Mak 5 - JAM DE NHIALIC 2011

Yecu Atɔ Raan de Guöp Jɔŋrac Waar

¹ Agokï ɣet ë Baar ë Galili lɔŋtui, piny de kɔc ke Gadaren.

² Na wën, aacï bɛ̈n bei ë abëlic, ke räm ënɔnthiinë ke raan de guöp jɔŋ rac raan bɔ̈ bei ë rɛ̈ŋ yiic,

³ raan ee rëër të nu rɛ̈ŋ: ku acïn raan duëër e mac, acakaa yen ë mac ë kuat:

⁴ aaye cool ë rekë ye në joth ku kuɛɛt, go kuɛɛt aa tuɛ̈ɛ̈ny ku dhuuŋ joth, ku acïn raan cath ke riɛl bï en e tɔ loi nɔm.

⁵ Ku ë aköölnyïïn kedhie, wakɔ̈u ku aköl, ee tɔ̈u ë kuurdït kɔ̈ɔ̈th ku të nu rɛ̈ŋ, ke ye cööt, ku ye rɔt ŋuɛ̈ɛ̈t ë kɔi.

⁶ Na wën, ke tïŋ Yecu tëmec, go bɛ̈n ke riŋ, bïï ku lɛm,

⁷ ku cööt ë röl dït an, “Eeŋödï wo yïn? Yecu, yïn Wën ë Nhialic dït arëët! Yïn yɔ̈ɔ̈k në rin ke Nhialic, an, Du ya lui këtuc!”

⁸ (Aa lueel ee kënë në biäk cï Yecu ye yɔ̈ɔ̈k an, “Bä bei e raan guöp, yïn jɔŋ rac.”)

⁹ Go thiëëc an, “Cɔl yï ŋa?” Go bɛ̈ɛ̈r an, “Yɛn cɔl ‘Remdït’ luɔi juëc wok!”

¹⁰ Go lɔ̈ŋ arëët an, acïï ke bï ciɛɛc biic ë pinyë.

¹¹ Ku ade luny dïït ë kudhuur ë kuurdït thar ëtɛ̈ɛ̈n, ke ke nyuäth.

¹² Go jɔɔk rac ëbɛ̈n gokï lɔ̈ŋ, an, “Tɔ wo lɔ të nu kudhuur buk lɔ ë kegup.”

¹³ Go ke päl lɔ. Na wën, ke jɔɔk rac ë ke bɔ̈ bei ë raan guöp, lek ë kudhuur gup: go luny ëbɛ̈n lɔ guluŋ piny wïïr, cït aguum kaarou: agokï mou wïïr.

¹⁴ Go kɔc wën ë kudhuur nyuääth gokï kat, lek lueel pänydït ayï baai. Gokï jɔ lɔ biic lek kë cï looi tïŋ, nɔn e yen ŋö.

¹⁵ Gokï bɛ̈n të nu Yecu, ku tïŋkï raan wën de guöp jɔɔk, ke rɛ̈ɛ̈r, ku ceŋ lupɔ, ke cï nɔm piath, yen raan wën cath ke rem dïït ë jɔɔk rac, gokï riɔ̈ɔ̈c.

¹⁶ Na wën, ke kɔc wën cï e tïŋ, ke ke guïïrkï luɔi wën cï luöi raan wën de guöp jɔɔk, ku guïïrkï në këde kudhuur aya.

¹⁷ Gokï jɔ lɔŋ, an, bï jäl pinyden.

¹⁸ Na wën, ale ë abëlic, ke raan wën de guöp jɔɔk rac ke lɛ̈ŋ, an, bï tɔ̈u ke yen ëtök.

¹⁹ Go cuö gam, ku yöök an, “Lɔ paandu tëde kɔckun, ku lɛ̈kë keek kadït cïï Bɛ̈nydït luöi yïn, ku kok cï en piɔ̈u kok ke yïn.

²⁰ Go jäl, ku jɔ kɔc guiëër ë Dekapoli luɔi dïït cïï Yecu luöi yen, go kɔc gäi kedhie.

²¹ Na wën, acï Yecu wɛ̈ɛ̈r bɛ teem ë abël, ku cï ɣet lɔɔk, ke kut dïït ë kɔc guëër të nu yen, ku anu ë wɛ̈ɛ̈r yɔu.

²² Na wën, ke bɛ̈ny tök bɔ̈ bɛ̈ny töŋ de luaŋ de Nhialic, cɔl Jairo, na wën, aacï e tïŋ, ke cuɛt rɔt piny ë yecök,

²³ go lɔ̈ŋ arëët an, “Nyandiën thiinë acï tiaam akɔɔr thuɔɔu, yïn läŋ, an, bä, thanyë yïcin ë yeguöp, ke bï guöp waar, ago pïïr.

²⁴ Go lɔ kekë yen, ku kuany cök ë kut dïït ë kɔc, gokï giŋ.

²⁵ Na wën, ke tiiŋ tök bɔ̈, tiiŋ de tëdɛn ee cool ë wat ë riɛm ë run kathiëër ku rou,

²⁶ ku acï kajuëc guum kak ë looi akïm juëc, go wëuke thöl kedhie, ku acïn të ŋuän cï yök, arëk abï lɔ ke dït en tëtök.

²⁷ Na wën, acï këde Yecu piŋ, ke bɔ̈ ë kut ë kɔciic ë yekɔ̈u ciëën, bï ku jiɛk lupɔde.

²⁸ Aye lueel, an, “Na cakaa yɛn ë jak lupɔɔke tei, ke yɛn bï guöp pial.”

²⁹ Go awaŋdɛn ë bï riɛm bei thïn go lɔ ŋëu ënɔnthiinë, go yök ë yeguöp nɔn cï yen dem ë jɔŋde.

³⁰ Na wën, ke dap ŋic en Yecu nɔn cï riɛl bɛ̈n bei ë yeguöp, go rɔt puk ë kut ë kɔciic, ku thiëëc an, “Eeŋa ë jak lupɔɔkï?”

³¹ Go kɔckɛn ë piööcë gokï thiëëc, an, “Kɛ̈në kut ë kɔc tïŋ acï yïn giŋ, ku bä jɔ thiëëc, an, eeŋa ë jak ɛn?”

³² Go kɔc caath nyïïn, ke bï raan tïŋ raan ë loi kënë.

³³ Go tiiŋë bɛ̈n, ke riɔ̈c ku lɛthë, aŋic kë cï luöi yen, bï ku cuɛt rɔt piny ë yenɔm, jɔ guiëër yith ëbɛ̈n.

³⁴ Go yɔ̈ɔ̈k, an, “Nyanë, gämdu acï yï tɔ waar, lɔ tei ë ciën këdäŋ, yïn bï guöp pial ë jɔŋdu.

³⁵ Të ŋoot en ke jam, ke kɔc ë ke bɔ̈ ɣön ë bɛ̈ny de luaŋ de Nhialic, kɔc bï e bɛ̈n lueel, an, “Nyandu ë thou: eeŋö ŋoot yïn ke yï jut Bɛ̈ny ë wëët?”

³⁶ Na wën, acï Yecu jam piŋ, jam wën cï lueel, ke dap bɛ̈ny de luaŋ de Nhialic yɔ̈ɔ̈k, an, “Du riɔ̈c, gam tei.”

³⁷ Ku acïn raan cï pɔ̈l a kuany e cök, ee Petero etök, ku Jakop, ku Jɔn mänhë ë Jakop.

³⁸ Gokï bɛ̈n ɣön ë bɛ̈ny ë luaŋ de Nhialic, go kɔc tïŋ acïk nuɔɔn, adhiaukï ku kïïukï.

³⁹ Na wën, acï lɔ ë kalic, ke yöök keek, an, “Eeŋö cä wek nuɔɔn wäkya, ke we dhiau? Meth akën thou, anin tei.”

⁴⁰ Gokï dɔl guöp. Na wën ke ke tɔ lɔ biic kedhie, ku jɔ lɔ kekë wun meth ku man ku kɔc wën cath në yen, lek ɣöt të nu meth thïn.

⁴¹ Go meth dɔm cin, ku yöök an, “Talitha kumi.” Të pukë yen ë thoŋda, alueel an, “Yïn nyanthiinë, jɔt rɔt.”

⁴² Go duet rɔt jɔt ënɔnthiinë, ku ciɛth: runke athiëërkï ku rou. Gokï gäi ë gäi dït.

⁴³ Go ke cök ë lom en kethook, ke cïï bï dɛ raan bï kënë ŋic: ku lueel an, “Miackï ë këcam.”