Mak 4 - JAM DE NHIALIC 2011

Kääŋde Raan Cum

¹ Na wën, ke be wëët gɔl ë Baar ë Galili yɔu. Ku kut dïït ë kɔc acïk guëër të nu yen, ago lɔ ë abëlic, ku rëër ë abëlic wïïr, ku nu kut dïït ë kɔc ëbɛ̈n ë wɛ̈ɛ̈r yɔu biic.

² Go ke wɛ̈ɛ̈t ë kajuëc në kɛ̈ŋ, ku yöök keek në wëëtde yic an,

³ “Piɛŋkï: raan cum, dï, ë lɔ biic le com:

⁴ na wën, aa cum, ke nyïïn kɔ̈k ë ke lööny ë kueer këc, ku bɔ̈ diɛt nhial bïkkï ku camkï ke.

⁵ Ku lööny kɔ̈k piny de kuur, të cïn tiɔɔm dït, gokï dap goŋ ku në luɔi cïn en tiɔɔm dït.

⁶ Na wën, aacï akɔ̈l ɣëët nhial, ke ke biɔɔr, gokï yom, luɔi cïn kek mei.

⁷ Ku lööny kɔ̈k ë kuɔɔth yiic, go kuɔɔth cil, gokï ke nyiɛɛc, agokï cuö lok.

⁸ Ku lööny kɔ̈k ë tiɔɔm piɛthic, gokï luɔk, acïk cil agokï kenyïïn ŋuak, ku jɔkï luɔk abï nyin tök thiërdiäk aa bɛ̈ɛ̈i, ku bïï nyin däŋ thiërdhetem, ku bïï nyin däŋ bɔt.”

⁹ Go lueel an, “Raan de yïth ee yen ke piŋ, ke piŋ.”

Kë Lueel ë Kääŋ

¹⁰ Na wën, aacï döŋ etök, ke kɔc rɛ̈ɛ̈r ë yelɔ̈ɔ̈m ku kɔc kathiëër ku rou ke thiëckï në këde kääŋ awën.

¹¹ Go ke yɔ̈ɔ̈k an, “Acï gäm week luɔi bä wek këcïthiaan ŋic, këde ciɛɛŋ de Nhialic: ku tëde kɔc nu biic, käŋ kedhie aye ke looi në kɛ̈ŋ:

¹² ‘luɔi bï kek aa daai, ku cïkï käŋ ë gɔɔk apiɛth, ku luɔi bï kek aa piŋ, ku cïkï käŋ ë yök yiic, ke cïï bï dɛ të bï kek kepiɔ̈ɔ̈th puk, abï karɛcken päl keek.”’

Yecu Awer Kë Lueel ë Kääŋic

¹³ Go ke thiëëc an, “Kuöckï kääŋë? Ku bäk kɛ̈ŋ kedhie ŋic adï?

¹⁴ Raan cum ee jam en com.

¹⁵ Ku kɔc ee ka nu ë kueer këc, të ye jam com thïn, na wën, acïk piŋ, ke Catan bɔ̈ ënɔnthiinë, bï ku jɔt jam wën cï com ë kepiɔ̈ɔ̈th.

¹⁶ Ku kɔckë aya ee ka cï com ë piny de kuur, kɔcke, të cï kek jam piŋ, ke ke dap gam ke ke mit piɔ̈ɔ̈th,

¹⁷ ku acïnkï thäär mei, gokï yök ë ke tɔ̈u ë nïnkë, na miäk, të bï këtuc dhal keek ayï yöŋ në baŋ de jam, ke ke dɔk röt ciëën ënɔnthiinë.

¹⁸ Ku kɔc kɔ̈k ee ka cï com ë kuɔɔth yiic, kɔckë ee kɔc cï jam piŋ,

¹⁹ na wën, ke diɛɛr ee kek diɛɛr ë ka ke piny nɔm, ayï mɛth ee juëc de wëu keek math, ayï ŋɔ̈ɔ̈ŋ de ka kɔ̈k, ke ke lɔ thïn, ku nyiickï jam, agokï cuö lok.

²⁰ Ku kɔc kɔ̈k ee ka cï com ë tiɔɔm piɛthic, ayek kɔc ë jam piŋ, ku gamkï, ku lokkï, tök abï thiërdiäk bɛ̈ɛ̈i, ku bïï tök thiërdhetem, ku bïï tök bɔt.

Manyëalanh nu në Aduök Thar

²¹ Go ke yɔ̈ɔ̈k an, “Manyëalath bï ya bɛ̈ɛ̈i ku tɛ̈ɛ̈uwë ë diöny thar, ayï agen thar, ku cïï bï aa tääu ë këdäŋ nɔm nhial?

²² Acïn kë cï thiaan, ke cïï bï tïc rial, ku acïn kë cï looi ëcuëër, ke cïï bï tïc ë gai.

²³ Na de raan de yïth ee yen ke piŋ, ke piŋ.”

²⁴ Go ke yɔ̈ɔ̈k an, “Yak röt tiit në kë yak piŋ: thëm aa wek käŋ them, en abï aa thɛ̈m week: ku wek kɔc ee käŋ piŋ, we bï ŋuak ë käŋ.

²⁵ Raan de nɔm kake, abï miɔɔc: ku raan cïn nɔm kake, acakaa kë cath ke yen abï nööm tëde yen.”

Kääŋ de Kɔ̈th Lok

²⁶ Go lueel an, “Ciɛɛŋ de Nhialic acït weer cï raan kɔ̈th wɛɛr piny,

²⁷ ku ye niin ku ye rɔt jɔt wakɔ̈u ku aköl, go kɔ̈th cil, ku dïtkï, ke kuc dït dïït kek.

²⁸ Piny ee rap bɛ̈ɛ̈i yetök, ee thok kɔn goŋ, aa miäk ke guäth, na miäk, ke rap dït nyin lok ë yenɔm.

²⁹ Na wën, aacï rap guɔ luɔk, ke dap menyjel tɔ lɔ, luɔi cï kööl ë tëm bɛ̈n.

Kääŋ de Nyin Töŋ de Matharda

³⁰ Go lueel an, “Buk ciɛɛŋ de Nhialic thɔ̈ɔ̈ŋ ke ŋö? Ku buk thɔ̈ɔ̈ŋ ë kääŋ ŋö?

³¹ Acït nyin töŋ de matharda, nyin koor ë kɔ̈th kedhie ë piny nɔm, të comë ye,

³² ku të cï e com, ke cil, abï dït, abï wal wöör kedhie, go këër dït tany, arëk abï diɛt nhial aa rëër e atiëpde yic.”

³³ Go keek aa guiëër në kɛ̈ŋ juëc cït ee kake, cït man lëu kek keek ë piŋ:

³⁴ ku acïn wël cï guiëër keek wël cïn yiic kääŋ: na wën, ke wëër kɔckɛn ë piööcë kɛ̈ŋ thäär kedhie kapäc pei.

Yecu Atɔ Apiöök lɔ Lik

³⁵ Na wën, ëköölë guöp, të cï akɔ̈l thëi, ke yöök keek an, “Lok teemku lɔŋtui.”

³⁶ Gokï kut ë kɔc tɔ jël, ku jɔkï tɔ cath ke keek ë abëlic ë guöpdɛnë. Ku nu abëël thii kɔ̈k në yen ëtök aya.

³⁷ Na wën, ke gök de amaŋ dït bɔ̈, go apiöök thɛc ë abëlic, arëk abï abël duɛ̈ɛ̈r thiäŋ.

³⁸ Ku yen guöp atɔ̈u ë abël thar ciëën, anin ë kɔm nɔm: agokï pɔ̈ɔ̈c, ku thiëckï an, “Bɛ̈ny, thon thou wok cïn këdu thïn?”

³⁹ Go pääc, go yom jɔ̈ɔ̈ny, ku yöök wɛ̈ɛ̈r an, “Lɔ lik, pälë rɔt piny!” Go yom kɔ̈ɔ̈c, ku lɔ wɛ̈ɛ̈r dïu arëët.

⁴⁰ Go Yecu Kɔckɛn ëpiööcë thiëëc an, “Eeŋö riääc wek wäkya? Ŋuɔɔtkï ë we cïn gäm?”

⁴¹ Gokï riɔ̈ɔ̈c ë riɔ̈ɔ̈c dït, ku thiëckï röt kapäc an, “Ee raan cït ŋö ee raanë, raan piŋë yom këde ayï wɛ̈ɛ̈r!”