Mak 3 - JAM DE NHIALIC 2011

Raan de Ciin cï Riɔu

¹ Na wën, aacï bɛ lɔ ɣön ë Nhialic, ku ade raan ëtɛ̈ɛ̈n raan cï ciin tök riɔu.

² Agokï woi guöp, nɔn bï en e tɔ dem ëkööl ë Thabath, ke bïk lɔ gaany.

³ Go lɛ̈k raan cï ciin riɔu an, “Jɔt rɔt, kääcë cil.”

⁴ Go keek thiëëc an, “Ee kënou cï päl kɔc ë kööl ë Thabath, ee luɔi de këpiɛth, ku ye luɔi de kërac? Ee kunydewëi, ku ye näŋ de kɔc?” Gokï lɔ diu.

⁵ Na wën, aacï keek lieec ke cï ŋeeny, ë piɔ̈u diu në riɛl ril kek piɔ̈ɔ̈th, ke jɔ raan yɔ̈ɔ̈k an, “Riny yïciin.” Go riny: go ciin bɛ piath cït man ë ciin däŋ.

⁶ Go Parithai lɔ biic, lek kethook mat në kɔc ke Ɣerod ëtök, në näŋ bï kek Yecu nɔ̈k.

Kut dïït nu në Wɛ̈ɛ̈r Yɔu

⁷ Go Yecu rɔt riic ëtɛ̈ɛ̈n kekë kɔckɛn ë piööcë le ë Baar ë Galili yɔu: ku kuany cök ë kut dïït ë kɔc bɔ̈ Galili: ku bɔ̈ kut dïït ë kɔc ë Juda,

⁸ ku në Jeruthalem, ku në Yidumia, ku në Jordan nɔm lɔŋtui, ku në piny thiääk ke Tayer ku Thidon, abïkï tëde yen, luɔi cï kek kadït cï looi piŋ.

⁹ Go lɛ̈k kɔckɛn ë piööcë an, bï abël thiinë ye tiit, në baŋ de kut ë kɔc, ke ke cï ye bï nyiɛɛc:

¹⁰ luɔi cï en kɔc juëc tɔ dem, arëk acïk röt cuöt të nu yen, bïk bɛ̈n jak guöp, kek kɔc de gup jɔɔk kedhie.

¹¹ Ku jɔɔk rac col, të de en të cï kek e tïŋ, ke ke cuɛt röt piny ë yenɔm, ku cötkï an, “Yïn ee Wën ë Nhialic!”

¹² Go ke cök ë lom en kethook, ke cïkï bï tɔ ŋic.

Yecu Akuany Tuuc Kathiëër ku Rou

¹³ Na wën, ke lɔ ë kuurdït nɔm, le ku cɔɔl kɔc nu ë yepiɔ̈u: gokï lɔ tëde yen.

¹⁴ Go thiëër ku rou lɔc, kɔc bï ya tɔ̈u në yen, ku bï keek aa tooc bïk wël aa lɔ guiir,

¹⁵ ku bïk aa cath në riɛl bï kek juäi tɔ waar, ku bïk jɔɔk rac aa cieec:

¹⁶ Ku jɔ Thimon cäk bɛɛŋ an, (Petero),

¹⁷ ku Jakop wën ë Dhebedayo, ku Jɔn mänhë ë Jakop, go keek cäk bɛɛŋ, an, (Bowanek, yen aye “Wɛ̈ɛ̈t ke määrëdeŋ”),

¹⁸ ku Andereya, ku Pilip, ku Bartholomayo, ku Mathayo, ku Thoma, ku Jakop wën ë Alapayo, ku Thadayo, ku Thimon raan ë Kanaan,

¹⁹ ku Judath Yithkariɔt, raan bï e nyiɛɛn aya.

Yecu ku Beeldhebub

²⁰ Na wën, ke kut ë kɔc be guëër, arëk acïn të man duëërë kɔc cam ë kuïn.

²¹ Na wën, aacï määthke ye piŋ, ke ke lɔ biic lek dɔm: ayek lueel an, “Jiɛɛm wei!”

²² Ku acïï kɔc ë löŋ gɔ̈ɔ̈r e lueel, kɔc bɔ̈ ë Jeruthalem an, “Ade guöp Beeldhebub! Ku an ee jɔɔk rac cieec në riɛl ë bɛ̈nydïït ë jɔɔk rac.”

²³ Go keek cɔɔl të nu yen, ku yöök keek ë kääŋ an, “Catan duëër Catan cieec adï?

²⁴ Ku na cï ciɛɛŋ e yic tek në ater, yen ee ciɛɛŋë acïï duëër kɔ̈ɔ̈c.

²⁵ Ayï dhiën, të tek en eyic ater, ka cïï duëër kɔ̈ɔ̈c en ee dhiënë.

²⁶ Ku Catan aya, të jɔt en rɔt ku ciëk rɔt ater, ago eyic tek, ka cïï duëër kɔ̈ɔ̈c, thök bï en thök aduëër thiɔ̈k.

²⁷ “Acïn raan duëër lɔ ɣön ë raan ril, ku yiɛk wëuke, të ŋoot en ke kën raan ril kɔn duut, na cï en kɔn duut, ke jɔ ɣönde yak.

²⁸ Wek yɔ̈ɔ̈k ëyic an, “Karɛc cïk wööc abï ke päl mïth ke kɔc, ayï lɛ̈t ëbɛ̈n lɛ̈t bïk kek Nhialic aa lat, abï ke päl keek kedhie:

²⁹ ku raan bï Wëidït ɣer aa lat acïï bï pɔ̈l ëtaitai, kërɛɛc dït anu ë yeyeth aɣët wadäŋ thɛɛr:

³⁰ luɔi cï kek e lueel an, “Ade guöp jɔŋ rac.”

Mïthëkɔcken ku Man Yecu

³¹ Na wën, ke mïthëkɔcken ë ke bɔ̈ në man, bïk ku kɛ̈ɛ̈ckï biic, agokï tuöc raan, le ye cɔɔl.

³² Ku rɛ̈ɛ̈r kut dïït ë kɔc ë yelɔ̈ɔ̈m, agokï lɛ̈k en an, “Tïŋ, moor ku mïthëkɔckun ka, biic, akɔɔrkï yïn.”

³³ Go bɛ̈ɛ̈r an, “Eeŋa ee maar? Ku ee yïŋa ee mïthëkɔckuɔ?”

³⁴ Go kɔc rɛ̈ɛ̈r ë yelɔ̈ɔ̈m lieec, ku lueel an, “Maar, kï, ku mïthëkɔckuɔ kï!

³⁵ Raan ëbɛ̈n raan bï këde Nhialic piɔ̈u aa looi, raanë yen aye Mɛnhkäi, ku ye nyankäi, ku ye maar.”