Mak 16 - JAM DE NHIALIC 2011

Jönërɔt

¹ Na wën, aacï Thabath guɔ thök, ke Meri Magdalene, ku Meri man Jakop, ku Thalome, ke ke ɣɔc wɛ̈ɛ̈l cï tumëtum, bï kek e bɛ̈n tɔc guöp.

² Ku na ɣɔn amiäk aa lɔ piny durdur, ëkööl tueŋ wën ee akööl dhorou, ke ke bɔ̈ të nu raŋ, ke akɔ̈l bɔ̈ thok.

³ Ayek röt thiëëc kapäc an, “Eeŋa bï wo kony bï kuur laar wei ë raŋ thok?”

⁴ Na wën, aa jɔtkï kenyïïn, ke ke tïŋ kuur acï guɔ laar wei: ku ye gökdïït ë kuur.

⁵ Na wën, aa cïk lɔ ë raŋic, ke ke jɔ dhuk tïŋ arɛ̈ɛ̈r ë biäk cuëëc, ke ceŋ lupɔ ɣer, agokï gäi arëët.

⁶ Go keek yɔ̈ɔ̈k an, “Duökï gäi: wek kɔɔr Yecu raan ë Nadhareth, raan wään cï piäät ë tim cï rïïu nɔm kɔ̈u: acï rɔt jɔt: aliu ee tënë, wɔikï të wään tɛ̈ɛ̈u kek en.

⁷ Jakï jäl, lak lɛ̈kkï kɔckɛn ë piööcë ayï Petero an, ‘Awat week ke lɔ Galili: abäk tïŋ ëtɛ̈ɛ̈n, acït man cï en ë kɔn lɛ̈k week.”’

⁸ Na wën, ë ke dap lɔ kɔtkï ë raŋ nɔm: ke ke lɛthë gup ku cïk piɔ̈ɔ̈th päu: ku acïn raan de kë cïk lɛ̈k en, acïk riɔ̈ɔ̈c.

Yecu acï Tuöl tëde Meri Magdalene

⁹ Na wën, aacï Yecu rɔt jɔt miäk ëtɛ̈ɛ̈n ëkööl tueŋ wën ee akööl dhorou, ke kɔn tuöl tëde Meri Magdalene, tiiŋ wään cï en jɔɔk rac kadhorou cieec ë yeguöp.

¹⁰ Go jäl, le lɛ̈k kɔc wään cath ë yen ëtök, të wään dhuöör kek ë dhiëëu.

¹¹ Ku keek, të cï kek pïïr pïïr en piŋ, ku piŋkï tïŋ wën cï en e tïŋ, ke jɔkï rɛɛc gam.

Yecu acï Tuöl tëde Tuuc Kaarou (Luk 24:13-35)

¹² Na wën, aacï kakë thök, ke nyuth rɔt kɔc kaarou ë keyiic ke cï eguöp puk, të wään ciɛth kek, ke ke lɔ rɛɛr.

¹³ Gokï jäl lek lɛ̈k kɔc wën cï döŋ: gokï këden rɛɛc gam ayadäŋ.

Yecu acï Tuöl tëde Tuuc Kathiëër ku Tök

¹⁴ Na wën, ke nyuth rɔt kɔc gup kɔc kathiëër ku tök, të rëër kek tën ee cam, ago keek jɔ̈ɔ̈ny ë rɛɛc reec kek gäm ku riɛl ril kek piɔ̈ɔ̈th, luɔi reec kek këde kɔc gam kɔc wën tïŋ en acï rɔt jɔt.

¹⁵ Go ke yɔ̈ɔ̈k an, “Lakï ë piny nɔm ëbɛ̈n, bäk wëlpiɛth aa lɔ guiëër kɔc cï cak ëbɛ̈n.

¹⁶ Raan gäm ku baptith abï kony wëi, ku raan reec gäm abï yiëk yeth gääk.

¹⁷ Ku kagöökkë abïk kɔc aa kuany cök kɔc cï gam: an, në rinkï abïk jɔɔk rac aa cieec, abïk aa guɛl ë thook mɛɛn thook cï piac yök,

¹⁸ abïk karɛc aa dɔm ë kecin, ku na yek ke deyic awuɔɔk dek, ka cïï keek bï nɔ̈k, abïk kecin aa thany ë kɔc tök gup, agokï waar.”

Yecu Aleerë Paannhial

¹⁹ Na wën, aacï Bɛ̈nydït Yecu thök ë jam ke keek, ke jɔt leerë paannhial, ku jɔ nyuc ë baŋ cuëny de Nhialic.

²⁰ Agokï lɔ, lek wël aa guiir ë baai yic ëbɛ̈n, ku ye Bɛ̈nydït luui kekë keek ëtök, ago jam tɔ ye yic në kagöök ee lɔ̈ɔ̈k tïc ë yecök. Amiin.