Mak 15 - JAM DE NHIALIC 2011

Yecu acï Bɛ̈ɛ̈i në Pilato nɔm

¹ Na ɣɔn amiäk, aa ruu piny, ke bänydït ke ka ke Nhialic ke ke cam löŋ në röördït ku kɔc ee löŋ gɔ̈ɔ̈r ku kɔc nu ë löŋic ëbɛ̈n, ku jɔkï Yecu duut, leerkï yïnkï Pilato.

² Go Pilato thiëëc, an, “Ye melik de Judai?” Go bɛ̈ɛ̈r, lueel an, “Ee yɛn.”

³ Go gaany ë kajuëc ë bänydït ke ka ke Nhialic.

⁴ Go Pilato thiëëc an, “Cïn kë bɛ̈ɛ̈r? Tïŋ kajuëc gɛɛny kek yïn.”

⁵ Go Yecu ciën kë be bɛ̈ɛ̈r: arëk abï Pilato gäi.

Yecu acï Kuöm Thuɔɔu

⁶ Ku ɣɔn ëkööl ë Dhuëëŋ de Winythok, Pilato aaye raan töŋ cï mac luöny keek, raandɛn nu ë kepiɔ̈ɔ̈th.

⁷ Ku ade raan cɔl Barabath, raan cï rek kekë kɔc ëtök kɔc wään cï tɔŋ cäk miric, ku acïk kɔc nɔ̈k ë buuth ëkööl ë tɔŋ.

⁸ Na wën, ke kut ë kɔc cöt, ku jɔkï lɔ̈ŋ an, bï luöi keek cït man ee yen e looi ëcaŋɣɔn.

⁹ Go Pilato bɛ̈ɛ̈r, lueel an, “Dɛkï piɔ̈ɔ̈th luɔi bän week luöny Melik de Judai?”

¹⁰ Aŋic ë gɔk nɔn ee yen tiɛɛl yen ë bïïyë yen ë bänydït ke ka ke Nhialic.

¹¹ Go bänydït ke ka ke Nhialic gokï kut ë kɔc riir nïïm an, aŋuän luɔi bï en Barabath luöny keek.

¹² Go Pilato bɛ̈ɛ̈r ku be keek thiëc an, “Eeŋö jakï kɔɔr kë bä luöi raan yak tɔ ye Melik de Judai?”

¹³ Gokï bɛ cööt an, “Piäät ë tim cï rïïu nɔm kɔ̈u!”

¹⁴ Go Pilato ke thiëëc an, “Eeŋö, ee kërɛɛc ŋö cï looi?” Gokï cööt arëët an, “Piäätë ë tim cï rïïu nɔm kɔ̈u!”

¹⁵ Na wën, akɔɔr Pilato luɔi bï en kut ë kɔc tɔ lɔ piɔ̈ɔ̈th yum, ke jɔ Barabath luöny keek. Go Yecu kɔn tɔ dui ë waat, ku yïn kɔc bï lɔ piäät ë tim cï rïïu nɔm kɔ̈u.

Alathkëër Adɔlkï Yecu Guöp

¹⁶ Na wën, ke thel alathkëër biic leerkï alooc dïït lääuwic: ku jɔkï rem alathkëër kut nɔm ëbɛ̈n.

¹⁷ Na wën, aa cïk yiëk kɔ̈u lupɔ thith amujuŋ, ke ke jɔ göl ë kuɔɔth nai, tueelkï ë yenɔm,

¹⁸ Ku jɔkï thiëëc an, “Thieithieei, Melik de Judai!”

¹⁹ Ku yek yup nɔm ë wai aruöör, ku ŋuutkï guöp, ku jɔkï kemiɔl tuk, lamkï.

²⁰ Na wën, aa cïk thök ë gɛ̈t geet kek en, ke ke luny lupɔ thith amujuŋ bei ë yekɔ̈u, ku bekï yiëk kɔ̈u luɔpɔɔke. Gokï thɛl biic lek piäät ë tim cï rïïu nɔm kɔ̈u.

Yecu acï Piäät ë Tim Kɔ̈u

²¹ Ku ade raan cɔl Thimon raan tëk ee kueerë, ke bɔ̈ rɛɛr, raan ë Kurene, ku ye wun Alekandaro ku Rupo: agokï dɔm, ku dhilkï tɔ jɔt timdɛn cï rïïu nɔm, tim ë Yecu.

²² Gokï bɛ̈ɛ̈i të cɔl Golgotha, tɔ pukë yen ë thoŋda, acɔl “Tëde Apet.”

²³ Ku miɔckï ë mɔ̈n cï liääp kekë mer: go rɛɛc.

²⁴ Na wën, ke piëëtkï ë tim cï rïïu nɔm kɔ̈u, ku jɔkï lupɔɔke tɛ̈k röt, deenykï gɛk në këden, nɔn bï ŋɛk ŋö nööm.

²⁵ Ku acï aa thaar kadiäk, thaar ë piëët kek yen thïn.

²⁶ Ku gɔny wën cï e gaany acï gɔ̈ɔ̈r tɛ̈ɛ̈uwë ë yenɔm nhial an, “Melik de Judai.”

²⁷ Ku jɔkï kɔc piäät kaarou në yen ëtök, kɔc ë käŋ rum, tök ë baŋ cuënyde, ku tök ë baŋ cam.

²⁸ Go këcïgɔ̈ɔ̈r jɔ aa yic, ke ɣɔn cï lueel an, “Acï mat kekë kɔc ee löŋ rɛɛc.”

²⁹ Go kɔc wën ee tëëk agokï aa läät, ke ke lek kenïïm, luelkï an, “Aa! Yïn ee raan ë Luaŋdït dhuöör piny, ku bɛyë yïk ë nïn kadiäk!

³⁰ Kony rɔt, ku bä piny ë tim cï rïïu nɔm kɔ̈u.”

³¹ Ku jɔ geet guöp aya në bänydït ke ka ke Nhialic ku kɔc ee löŋ gɔ̈ɔ̈r, ayek lueel kapäc an, “Acï kɔc kɔ̈k luök, ku acïï rɔt duëër luök.

³² Në Kërtho, Melik de Yithriɛl, në bɔ̈ piny ë tim kɔ̈u ënɔɔnë, tim cï rïïu nɔ̈m, buk tïŋ, ku gamku!” Go lat ë kɔc wën cï piäät në yen ëtök.

Thon de Yecu

³³ Na wën, aa cï thaar aa dhetem, ke piny ë jɔ guɔ cuɔl ëcut ë piny nɔm ëbɛ̈n aɣët thaar kadhoŋuan.

³⁴ Na wën, ë thaar kadhoŋuan, ke Yecu cöt ë röl dït an, “Eloi, Eloi, lama tha bakthani?” Të pukë yen ë thoŋda, yen aye, “Nhialicdï, Nhialicdï, eeŋö ë yïn a nyääŋ piny?”

³⁵ Go kɔc kɔ̈k ë kɔc yiic kɔc wën kääc ëtɛ̈ɛ̈n, të cï kek e piŋ, gokï lueel an, “Tiëŋkï, acɔl Elija!”

³⁶ Go raan tök kat, le ku thiëëŋ kë wën ee pïïu jooc në mɔ̈n cï wac, ku tɛ̈ɛ̈u ë wai aruöör nɔm, gëm en le dek, ku lueel an, “Jakï pɔ̈l, tïŋkï nɔn bï Elija bɛ̈n bɛ̈ɛ̈i piny!”

³⁷ Na wën, aa cï Yecu cööt ë röl dït, ke jɔ thöök.

³⁸ Ku lupɔ dïït nu ë Luaŋdït yic acï yic rɛɛt ë rou gɔl nhial ɣeet piny.

³⁹ Na wën, ke bɛ̈ny de rem ë alathkëër, bɛ̈ny wën kääc ë yenɔm tueŋ, të cï en e tïŋ ke cöt aya, ago thöök, ke jɔ lueel an, “Ee yic, raanë aaye Wën ë Nhialic!”

⁴⁰ Ku ade diäär ëtɛ̈ɛ̈n aya diëër kääc tëmec ke ke daai: adekï yiic yï Meri Magdalene ku Meri man Jakop thii ku Jothe, ku Thalome.

⁴¹ Aake ye yen kuany cök wään nu yen ë Galili, ku yek luööi, ku nu diëër juëc kɔ̈k diëër wään cï bɛ̈n Jeruthalem në yen ëtök.

Täu Tɔ̈ɔ̈uwë Yecu

⁴² Na wën, aacï akɔ̈l thëi, luɔi ee yen akööl ë Guiɛɛk, yen aye kööl ee kɔn bɛ̈n ë kööl ë Thabath,

⁴³ ke Jothep raan ë Arimathia bɔ̈, raan nu ë löŋic, ku ye raan piɛth, raan ee Ciɛɛŋ de Nhialic ŋɔ̈ɔ̈th aya, bï ku le të nu Pilato ke cï enyin riil, le guöp de Yecu lip.

⁴⁴ Go Pilato gäi në kë cï en dap thou: go bɛ̈ny de rem ë alathkëër cɔɔl, ku lop nɔn cï en thou wën thɛɛr.

⁴⁵ Na wën, aacï e piŋ tëde bɛ̈ny de rem ë alathkëër, ke jɔ Jothep gäm guöp.

⁴⁶ Go lupɔ linɔn ɣɔɔc, ku bïï piny, ku deer guöp ë linɔn, ku jɔ tääu ë raŋic raŋ cï wec ë kuur lɔ giliu yic, go kuur tök laar ë raŋ thok.

⁴⁷ Go Meri Magdalene ku Meri man Jothe gokï të cï e tääu thïn tïŋ.