Mak 14 - JAM DE NHIALIC 2011

Kiɛɛr Rɛɛc Luiyë Yecu

¹ Na wën, aŋoot nïn kaarou wei ke bï aa Dhuëëŋ de Winythok, ku bï aa Dhuëëŋ de Kuïn Cïnic Luɔu, ke bänydït ke ka ke Nhialic ku kɔc ë löŋ gɔ̈ɔ̈r ë ke kɔɔr luɔi bï kek ë dɔm ë cuëër, lek nɔ̈k:

² ku jɔkï lueel an, “Acuku bï dɔm ëköölë dhuëëŋ, ke awuööu de kɔc cïï bï lɔ pat.”

Yecu Acï Tɔc ë Bethani

³ Na wën, të nu Yecu Bethani ɣön ë Thimon raan de guöp wɛth, ku rëër tën ee cam, ke tik bɔ̈ ke muk gul cï cuëëc ë kuur cɔl alabatha, gul de yic miök cï tumëtum de wɛ̈ɛ̈l lɔ wai cɔl narad, ɣööcde atuc arëët: go gul bany thok ku luuŋ miök ë yenɔm.

⁴ Ku ade kɔc ëtɛ̈ɛ̈n kɔc cï piɔ̈ɔ̈th diu arëët, agokï lueel an, “Eeŋö thuëëc en ë miökë aya?

⁵ Miökë adï cï ɣaac ë wëu wär riët kabɔt ku thiërdhïc, ku gëmë ke kɔc kuanynyïïn!” Gokï tik gɔ̈k arëët.

⁶ Go Yecu lueel an, “Pälkï ë tɔ̈u! Eeŋö juötkï yen? Acï luɔi piɛth looi ë yaguöp.

⁷ We de kɔc kuanynyïïn ë weyiic ëcaŋɣɔn, ku të de yen köölduön yak tak, ka duɛ̈ɛ̈rkï keek aa luöi këpiɛth: ku yɛn cie raan bï tɔ̈u wo week ëcaŋɣɔn.

⁸ Kë duëër lëu ë luɔi acï looi: acï kɔn bɛ̈n tueŋ bï guöpdï bɛ̈n tɔc në këde täu bï a tɔ̈ɔ̈u.

⁹ Ku wek yɔ̈ɔ̈k ëyic an, të bï wëlpiɛthkë aa guiir ë piny nɔm ëbɛ̈n, ayï kë cïï tiiŋë looi abï aa lueel aya, në täŋ bï kɔc këde aa tak.”

Judath Acï Gam ë Luɔi Bïï Yen Yecu Nyiɛɛn

¹⁰ Na wën, ke Judath Yithkariɔt, raan töŋ de kɔc kathiëër ku rou, ke jël le tëde bäny ke ka ke Nhialic, le Yecu nyiɛ̈n keek.

¹¹ Na wën, aa cïk e piŋ, ke ke jɔ piɔ̈ɔ̈th miɛt, ku luelkï an, bïk gäm wëu. Go të bï en ë nyiɛɛn kɔɔr ëkööl piɛth bïï piny bɛ̈ɛ̈i.

Yecu Acam Këcam de Winythok kekë Kɔckɛn ë piööcë

¹² Na ɣɔn, në kööl tueŋ ë akööl ke Dhuëëŋ de Kuïn Cïnic Luɔu, kööl ee kek nyɔŋamääl de Winythok nɔ̈k, ke thiëëc kɔckɛn ë piööcë an, “Ee tënou kɔɔr të bï wok guik thïn, të bï yïn Winythok cam?”

¹³ Go kɔc tooc kaarou ë kɔckɛn ë piööcë yiic, ku yöök keek an, “Lakï pänydït, ku we bï rɔ̈m ë mony ɣɛ̈ɛ̈c töny ë pïïu: jakï kuany cök,

¹⁴ ku ɣön bï en lɔ thïn, ke we bï raan de ɣöt yɔ̈ɔ̈k an, ‘Acï Bɛ̈ny ee wëët lueel alëyɔ̈ɔ̈ an, ɣön ë kamaan akou, të bän Winythok cam wokë kɔckiën ë piööcë?’

¹⁵ Ku abï we nyuöth ɣön dïït nu nhial ɣön nu käŋ thïn ku cï guik: jakï kakuɔ guik ëtɛ̈ɛ̈n.”

¹⁶ Go kɔcpiööcë jäl, lek pänydït, lek ku yökkï ke cït man wën cï ë lɛ̈k keek: agokï këde Winythok guik.

¹⁷ Na ɣɔn thëën, ke bɔ̈ kekë kɔc kathiëër ku rou.

¹⁸ Na wën, aa rëërkï ke ke cäm, ke lueel Yecu an, “Wek yɔ̈ɔ̈k ëyic an, raan tök ë weyiic abï a nyiɛɛn, raan ciëm wok ëtök ënɔɔnë.”

¹⁹ Agokï piɔ̈ɔ̈th dhiau arëët, ku jɔkï thiëëc, ŋɛk ë kɔn thiëc, ku be ŋɛk thiëc an, “Ee yɛn?”

²⁰ Go bɛ̈ɛ̈r, yöök keek an, “Ee raan tök ë thiëër ku rou yiic, raan gëm wok ëtök ë atɛ̈nyic.

²¹ Wën ë Raan alɔ ëyic, acït man cï e gɔ̈ɔ̈r në këde, ku amawoou në raan nyiin Wën ë Raan! Adï piɛth tëde ë raanë tëë kënë ye dhiëëth!”

Këcam Thëën de Bɛ̈nydït

²² Na wën, aa ciëmkï, ke nöm kuïn cï pam, go thieei, ku wɛ̈ɛ̈kic, ku jɔ gäm keek, lueel an, “Ŋäkï camkï: guöpdï kï, ee kënë.”

²³ Na wën, ke nöm bïny, ku të cï en thieithieei lueel, ke gëm keek: agokï dek ë ye kedhie.

²⁴ Go keek yɔ̈ɔ̈k an, “Riɛmdï kï, ee kënë, riɛm de löŋ cï piac mac, riɛm cï lëu në biäk de kɔc juëc.

²⁵ Wek yɔ̈ɔ̈k ëyic an, Yɛn cïï bï bɛ dek në mïth ke enap, të ŋoot ë kööl wadäŋ kööl bän bɛ dek ë ye ë ciɛɛŋ de Nhialic yic.”

²⁶ Na wën, aa cïk dit kiit, ke ke jɔ lɔ biic lek kuur ë Olip.

Yecu acaar luöi bï ë Petero Yen Jai

²⁷ Go Yecu ke yɔ̈ɔ̈k an, “We bï nïïm mum wedhie në baŋdï: luɔi cï e gɔ̈ɔ̈r an, “Yɛn bï tïn ë thök dui, go thök thiëi röör.

²⁸ Ku na miäk, të cän rɔt bɛ jɔt, ke we bä wat Galili.”

²⁹ Go Petero lueel an, “Na cak kɔc nïïm mum kedhie, ke yɛn cïï nɔm bï mum!”

³⁰ Go Yecu lueel an, “Yïn yɔ̈ɔ̈k ëyic an, ëköölë, ëlë wakɔ̈u, të ŋoot ajïth ke kën kiiu raanrou, ke yïn bï a jai ëtaiwei raandiäk.”

³¹ Go ŋak nɔm arëët dïïtë an, “Na ya cak dhil thou wokë yïn, ke yïn cä duëër jai!” Ku yen aye jamden aya kedhie.

Yecu Aläŋ ë Gethemane

³² Na wën, ke ke bɔ̈ të cɔl Gethemane: go kɔckɛn ë piööcë yɔ̈ɔ̈k an, “Yɔ̈kkï ë we rɛ̈ɛ̈r eenë, të läŋ ɛn.”

³³ Ku le kekë Petero ku Jakop ku Jɔn, ku jɔ guɔ gäi arëët, abï duɛ̈ɛ̈r thöök.

³⁴ Go lɛ̈k keek an, “Yɛn ë piɔ̈u jiɛth arëët, abä duɛ̈ɛ̈r thou: rɛ̈ɛ̈rkï eenë, ke we yiɛ̈n.”

³⁵ Go rɔt cuɔt tueŋ ëmääth, le ku cuɛt rɔt piny, ku jɔ lɔ̈ŋ an, na duɛ̈ɛ̈rë ye lëu, ke yï tɔ thaar wan ɛn.

³⁶ Go lueel an, “Abba, Wäär, yïn ee käŋ lëu kedhie, nyaaiyë bïnyë tëde yɛn: ku acie këde yɛn piɔ̈u, ee këde yïn piɔ̈u.”

³⁷ Go bɛ̈n, ku yök keek anin, go Petero thiëëc an, “Thimon, ninë? Cïï thaar tök duëër lëu ë yïn?”

³⁸ Go lëk keek an, “Yiɛ̈nkï, ku läŋkï, ke we cïï bï lɔ ë thëmic: wei ee lɔ thïn ëyic, ku guöp yen kɔ̈c.”

³⁹ Go bɛ jäl, le lɔ̈ŋ, aluel wël manë gup.

⁴⁰ Na wën, ke be enɔm puk, ku be ke yök anin, acïk thiai, ku akuckï bëër bï kek e bɛ̈ɛ̈r.

⁴¹ Go bɛ bɛ̈n raandiäk, bï ku yöök keek an, “Yɔ̈kkï ke we nin tëthiinakäŋ abäk lɔ̈ŋ? Ë guɔ loi! Thaar acï bɛ̈n! Tiëŋkï, Wën ë Raan anyiinë, ku yïnë kɔc ë kërac looi.

⁴² Jatkï röt, lokku: tiëŋkï, raan nyiin ɛn ë guɔ ɣëët.”

Yecu Acï Dɔm

⁴³ Na wën, ëtëthiinë, të ŋoot en ke jam, ke Judath bɔ̈, raan töŋ de kɔc kathiëër ku rou, ku bɔ̈ kut dïït ë kɔc në yen ëtök, ke ke muk abätɛ̈ɛ̈u ku thieec, ke ke bɔ̈ tëde bänydït ke ka ke Nhialic ku kɔc ee löŋ gɔ̈ɔ̈r ku röördït.

⁴⁴ Ku raan nyiin en acï keek kɔn wɛ̈ɛ̈t an, “Raan bä ciim, ka yen aye yen, jakï dɔm, jatkï, ku dɔ̈tkï apiɛth.”

⁴⁵ Na wën aa cï bɛ̈n, ke jɔ lɔ tëde yen ënɔnthiinë, le ku lueel an, “Rabi, Rabi!” Go ciim aläl.

⁴⁶ Gokï dɔm ë kecin, ku mukkï aril.

⁴⁷ Na wën, ke raan töŋ de kɔc wën kääc ëtɛ̈ɛ̈n, ke mïït abätäu bei, ku kip lïm de bɛ̈nydïït ë kake Nhialic, arëk abï ŋuiɛth yïc wei.

⁴⁸ Go Yecu bɛ̈ɛ̈r, yöök keek an, “Cäk bɛ̈n bei cït man ë ka yïn raan tɔŋ raan ee käŋ rum, ke we muk abätɛ̈ɛ̈u ku thieec, bäk a bɛ̈n dɔm?

⁴⁹ Yɛn ee cool ë rëër wo week Luaŋdït ke ya wɛ̈ɛ̈t, ku wek kën a dɔm: ku kacïgɔ̈ɔ̈r abïk dhil aa yith tei.”

⁵⁰ Gokï nyääŋ piny kedhie, ku kɔtkï.

⁵¹ Ku ade dhuŋ töŋ biɔth ecök, acï lupɔ linɔn cuat ë yekɔ̈u aya, ku cïn lupɔ däŋ ceŋ: na wën, ke dɔm dhuök,

⁵² go lupɔ linɔn nyääŋ piny, ku kɔt ë keek, ke cath ë yekɔ̈u.

Yecu Aleerë në Kuut nɔm

⁵³ Na wën, ke ke thel Yecu leerkï të nu bɛ̈nydïït ë kake Nhialic: ku guëër bänydït ke ka ke Nhialic kedhie të nu yen, ayï röördït ku kɔc ee löŋ gɔ̈ɔ̈r.

⁵⁴ Go Petero biɔɔth cök tëmec, aɣëët en ë kalic kal de bɛ̈nydïït ë kake Nhialic, go rëër kekë kɔc ee bäny tiit, ke ɣɔ̈c mac.

⁵⁵ Na wën, ke bänydït ke ka ke Nhialic ku kɔc nu ë löŋic ëbɛ̈n ke ke kɔɔr jam de cäätɔ jam de ater ke Yecu, bïk tɔ näk, gokï kɛ̈n yök.

⁵⁶ Cäätɔɔ juëc aake lueel kakɛn ë lueth, ku kakɛn luelkï akënkï rɔ̈m.

⁵⁷ Na wën, ke kɔc kɔ̈k ë ke jɔt röt tɔkï röt ë cäätɔɔ, ku jɔkï cäk thok, luelkï an,

⁵⁸ “Acuk piŋ ke lueel an, ‘Luaŋdït ɣön cï yïk ë kɔc cin abä jäp piny, ku bä däŋ bɛ yïk ë akööl kadiäk, ɣön cïï bïï yïk ë kɔc cin.”’

⁵⁹ Ayï kaken aya akënkï rɔ̈m.

⁶⁰ Na wën, ke bɛ̈nydïït ë kake Nhialic ke jɔt rɔt ë kɔc yiic cil, ku thiëëc an, “Cïn kë bɛ̈ɛ̈rë? Ee käŋö kë lueel kɔckë në këdu?”

⁶¹ Go lɔ lik, acïn kë cï bɛ̈ɛ̈r. Go bɛ̈nydïït ë kake Nhialic bɛ thiëëc an, “Ye Kërtho, Wën ë Nhialic cath ke Athiɛɛi?”

⁶² Go Yecu lueel an “Ee yɛn: ku we bï Wën ë Raan tïŋ ke rɛ̈ɛ̈r ë baŋ cuëny de riɛl dït, ku bï ë luäät yiic luäät nu nhial!”

⁶³ Na wën, ke bɛ̈nydïït ë kake Nhialic ke ret lupɔɔke yiic, ku jɔ lueel an, “Eeŋödäŋ köörku cäätɔɔ kɔ̈k!

⁶⁴ We cï lɛ̈t piŋ lɛ̈t lɛ̈ɛ̈t en Nhialic ë wek wäkdiaa?” Gokï yiëk yeth gääk an, röŋ ke thuɔɔu.

⁶⁵ Ku jɔ kɔc kɔ̈k ŋuööt guöp ku kumkï nyin, ku jɔkï biɔ̈ɔ̈k, ku yöökkï an, “lɛ̈kë wook ke bï tïc!” Ku mëëŋ kɔc ee bäny tiit ë kecin.

Petero Ajiɛi Yecu

⁶⁶ Na wën, të rëërë Petero biic ë kalic, ke nyan tök bɔ̈ nyan töŋ de duet ee bɛ̈nydïït ë kake Nhialic luööi,

⁶⁷ go Petero tïŋ ke ɣɔ̈c, go toom guöp, ku lueel an, “Ayï yïn aya, yïn ee cath wekë Yecu, raan ë Nadhareth.”

⁶⁸ Go jai an, “Yɛn kuc kë luel, ku kɛ̈n piŋ aya.” Ago lɔ biic le ë kalic: ku jɔ ajïth kiiu.

⁶⁹ Na wën, acï nyan lïmë ye bɛ tïŋ, ke jɔ lɛ̈k kɔc wën kääc ëtɛ̈ɛ̈n an, “Kënë ee raan töŋden.”

⁷⁰ Ago bɛ jai. Na wën, ëtëthiinë, ke kɔc wën kääc ëtɛ̈ɛ̈n ke bekï lɛ̈k Petero an, “Ee yic, yïn ee raan töŋden, luɔi ee yïn raan ë Galili, ku kït thok wekë keek aya.”

⁷¹ Ago läm rac cak, ku jɔ kuëëŋ an, “Yɛn kuc raan luɛlkï!”

⁷² Na wën, ëtëthiinë, ke ajïth ë kiiu ë kiiudɛn ee yic rou. Go Petero wël tak wël wën cïï Yecu lɛ̈k ɛn en an, “Të ŋoot ajïth ke kën kiiu raanrou, ke yïn bï a jai ëtaiwei raandiäk.” Na wën, aacï ye thɔ̈ɔ̈ŋ, ke dhiau.