Mak 13 - JAM DE NHIALIC 2011

Yecu Ajam në Biäk de Riääk de Luaŋdït

¹ Na wën, a le biic Luaŋdït, ke lëkë raan töŋ de kɔckɛn ë piööcë yen an, “Bɛ̈ny ee wëët, tïŋ kur läk oou ku tïŋ ɣööt läk oou!”

² Go Yecu bɛ̈ɛ̈r, yöök an, “Cï ɣööt dïtkë tïŋ? Acïn kuur töŋ bï döŋ ë kuur däŋ nɔm, ke cïï bï dhuöör piny.”

Nuan ku Yaaŋdït

³ Na wën, aa rëër ë kuur ë Olip nɔm biäk të lɔ Luaŋdït, ke thiëëc ë Petero ku Jakop ku Jɔn ku Andereya tëden kapäc,

⁴ An, “Lɛ̈kë wook, ee nɛn en bï kakë jɔ tïc? Ku bï kɔc ŋic në ŋö ee kööl kɔɔr ee kakë thök kedhie?”

⁵ Go Yecu jam gɔl an, “Yak röt tiit ke cïn raan bï we math.

⁶ Kɔc juëc abïk bɛ̈n në rinkï, bïk ku luelkï an, ‘Ya kï!’ Ku abïk kɔc juëc math.

⁷ Ku të ya wek tɔɔŋ piŋ ku piɛŋkï jam ë tɔŋ lueel ë kɔc thook, ke we duökï ye diɛɛr: kek abïk dhil tïc, ku ŋoot thök de käŋ wei.

⁸ Jurë abï tɔŋ yiɛ̈n jurë, ku yïn ciɛɛŋë tɔŋ ciɛɛŋë: ku piny abï rɔt niɛŋ tɛ̈ɛ̈n ku tɛ̈ɛ̈n, cɔŋdït abï aa nu, ayï kak ë kɔc tɔ diɛɛr: kakë ayek ciët kɛ̈c de tiiŋ kɔɔr dhiëth.

⁹ “Ku week, yak röt tiit: we bï aa lɛɛr ë lööŋ nïïm, ku leerë week ë ɣööt ke Nhialic yiic, ku we bï aa dui, ku we bï bɛ̈ɛ̈i ë bäny ceŋ piny nïïm ayï meliik nïïm në biäkdï, abäk aa cäätɔɔkï ë kenïïm.

¹⁰ Ku wëlpiɛth abïï ke dhil kɔn guiëër juöör ëbɛ̈n.

¹¹ Ku të ye kek week thel, leerkï week ë löŋ nɔm, ke we duökï diɛɛr ë kë bäk lueel: ku jam ëbɛ̈n jam bï gäm week ë thaarë yen abäk lueel: acie wek bï jam, ee Wëidït ɣer kek bï jam.

¹² Ku raan abï mɛnhkënë yiɛ̈n kɔc lek nɔ̈k, ku yïn wun meth mɛnhde kɔc lek nɔ̈k, ku mïth abïk röt jɔ̈t kɔc ë dhiëth keek, ku tɔkï ke näk.

¹³ Ku we bï aa maan ë raan ëbɛ̈n në baŋ de rinkï: ku raan ë yepiɔ̈u ruut a thöökë käŋ, yen abï kony wëi.

Kënhiɛɛny ee Käŋ Riɔ̈ɔ̈k

¹⁴ Të cä wek kënhiɛɛny ee käŋ riɔ̈ɔ̈k tïŋ, kënhiɛɛny cï lueel ë tiët Danyel, të cä wek e tïŋ ke kääc të cïï en duëër kɔ̈ɔ̈c, (Raan kuen në ye cök ë piŋ eenë!) Ke kɔc nu Juda ë ke kɔt ke ke lɔ ë kuurdït yiic:

¹⁵ ku raan nu ë ɣöt nɔm nhial ë cïï lɔ piny, le ɣöt, le käŋ bɛ̈ɛ̈i bei ɣönde:

¹⁶ ayï raan nu domic ë cïï enɔm dɔk le lupɔde diëc.

¹⁷ Ku amawoou ë diëër liac ayï diëër thuat ë aköölkë!

¹⁸ Ku yak lɔ̈ŋ ë baŋ ë kat kat wek ke cïï bï nu rut!

¹⁹ Aköölkë abïk aa kööl ke këtuc ë kɔc dhal, këtuc cïn kë kït ë yen, gɔl të ɣɔn ciɛkë Nhialic käŋ aɣët cï ënɔɔnë, ku acïn kë cït en bï lɔ̈ɔ̈k nu aɣet athɛɛr.

²⁰ Ku tëë Bɛ̈nydït kën aköölkë tɛm kɔ̈ɔ̈th, adï cïn kɔc bï luök: ku në baŋ de kɔc cï lɔc, kɔc wään cï meek, en acï en aköölkë tɛm kɔ̈ɔ̈th.

²¹ “Ë aköölkë, të de en raan yöök week an, ‘Tiëŋkï, Kërtho kï eenë!’ Ku an, ‘Ye ka ëtɛ̈ɛ̈n!’ Ke duökï gam.

²² Kërtho aluɛth abïk röt jɔt ayï tït aluɛth, ku abïk kagöök dït nyuöth kɔc, ayï ka ke gäi dït, arëk abïk kɔc cï lɔc duɛ̈ɛ̈r cɔ̈k nïïm wei aya, të de yen të bï kek e lëu.

²³ Ku week, yak röt tiit! Tiëŋkï, we cä kɔn lɛ̈k käŋ kedhie.

Bɛ̈n de Wën ë Raan

²⁴ Ku në aköölkë yiic, të cï këtuc ë kɔc dhal wan, ke akɔ̈l abï cuɔl, ku pɛɛi acïï bï bɛ ɣɛɛr,

²⁵ ku kuɛl nu nhial abïk lööny piny, ku karil nu tënhial abïk röt niɛŋ.

²⁶ Na ëlë, ka bïk Wën ë Raan tïŋ abɔ̈ ë luäät yiic acath kekë riɛldït ku dhuëëŋdït.

²⁷ Na ëlë, ka abï tuucnhial tooc, lek kɔckɛn cï lɔc kut nïïm të ye yom pɔ̈t në aguut ke piny yiic ŋuan, gɔl ë piny thar aɣët të guutë tënhial thar thïn.

Kääŋ de Tim ë Ŋaap

²⁸ Jakï röt tɔ wëëtë ë kääŋ de tim cɔl ŋaap: të cï këërde guɔ kɔ̈c, ago yïth nyok, ka ŋiɛckï nɔn cï deŋ amäi guɔ thiɔ̈k.

²⁹ Yen acït ŋïny bä wek e ŋic aya, të tiëŋ wek kakë ke ke tiëc, ka ŋiɛckï nɔn cï en guɔ ɣëët ayï ɣööt thook.

³⁰ Wek yɔ̈ɔ̈k ëyic an, rem de ënɔɔnë acïï bï nyai, të ŋootë kakë ke ke kën tïc kedhie.

³¹ Tënhial abï nyaai ayï piny: ku wëlkï acïkï bï nyaai.

Acïn Raan Ŋic Akööl Ayï Thaar

³² Ku në këde ee köölë ayï thaarë acïn raan ŋic en, acakaa tuuc nu paannhial acïkï ŋic, ayï Wënde aya, ee Wääda yetök, yen aŋic en.

³³ Yak röt tiit, yak yïn ku yak lɔ̈ŋ: luɔi kuöc wek akööl nɔn bï yen aa nɛn.

³⁴ Acït nɔn dhie kenyë raan, ku nyiëëŋ ɣönde piny, ku gëm lïïmke riɛl, ku gëm raan ëbɛ̈n luɔide, ku yöök raan tit kalthok, an, ye yïn.

³⁵ Yen aa wek yïn: luɔi kuöc wek të bï bɛ̈ny de ɣöt bɛ̈n, nɔn ee yen thëën, ku nɔn ee yen wɛ̈ɛ̈ric cil, ku nɔn ee yen të kiiu ajïth, ku nɔn ee yen të cï piny ruu,

³⁶ ke cïï we bï yök anin, të dɛp en bɛ̈n ëthiäu.

³⁷ Ku kë lɛ̈k week, yen alɛ̈k raan ëbɛ̈n, an Yak yïn!”