Mak 11 - JAM DE NHIALIC 2011

Lɔ de Tiëm Jeruthalem

¹ Na wën, aa cïk thiɔ̈k ë Jeruthalem, ku acïk ɣet Bethpage ku Bethani, të lɔ kuurdïït cɔl Olip, ke toc kɔc kaarou ë kɔckɛn ë piööcë yiic,

² Yöök keek an, “Lakï paan nu ë wenïïm tueŋ, ku të cä wek lɔ thïn, ke we bï mɛnh ë muul dap yök ënɔnthiinë, mul cïn raan cï kɔn lɔ ë yekɔ̈u ëcaŋɣɔn, jakï lony, ku bɛ̈ɛ̈ikï.

³ Ku na de raan thiëc week an, Eeŋö luöikï eekënë? Ke luɛlkï an, Akɔɔr Bɛ̈nydït, ka bï dap tɔ bïïyë.”

⁴ Gokï jäl, lek ku yökkï mɛnh ë muul amac ɣöt thok biic ë apɔ̈kkuɛɛr thok, agokï lony.

⁵ Ku thiëc keek ë kɔc kɔ̈k ë kɔc kääc ëtɛ̈ɛ̈n an, “Ee käŋö ke luɔny wek mɛnh ë muul?”

⁶ Gokï lɛ̈k keek cït man cï Yecu ye lɛ̈k keek: gokï ke pɔ̈l.

⁷ Gokï mɛnh ë muul bɛ̈ɛ̈i të nu Yecu, ku thiethkï lupɔɔken ë yekɔ̈u, ku jɔ lɔ ë muul kɔ̈u.

⁸ Go kɔc juëc lupɔɔken thiɛth piny kueer, ku tem kɔc kɔ̈k kër ke tiim, ku thiethkï ke kueer.

⁹ Ago kɔc wën cath tueŋ ku kɔc cath ë yecök ciëën, agokï ya cööt an, “Ɣothana! Thieithieei në raan bɔ̈ në rin ke Bɛ̈nydït!

¹⁰ Thieithieei në ciɛɛŋ bɔ̈, ciɛɛŋ de wääda Debid! Ɣothana tënhial ya!”

¹¹ Go Yecu lɔ Jeruthalem, le Luaŋdït, na wën, aacï käŋ caath nyïïn ëbɛ̈n, ku cï akɔ̈l guɔ thëi, ke jɔ jäl le Bethani kekë kɔc kathiëër ku rou.

Yecu Acien Tim ë Ŋaap

¹² Na ɣɔn amiäk, të cï kek bɛ̈n bei ë Bethani, ke nɛ̈k cɔk.

¹³ Na wën, ke jɔ tim de ŋaap tïŋ tëmec, ade nɔm yïth go bɛ̈n, nɔn de kë bï yiɛ̈n yök ë yenɔm: na wën, ke bɔ̈, go ciën kë cï yök, ee yïth kapäc, pɛɛi ee ŋaap ŋuɔl aa ŋoot wei.

¹⁴ Go bɛ̈ɛ̈r, yöök an, “Ë cïn raan bï mïthku bɛ ya cam aɣet athɛɛr!” Ku aa piŋ kɔckɛn ë piööcë.

Yecu alɔ Luaŋdït

¹⁵ Gokï bɛ̈n Jeruthalem: ku le Luaŋdït, le ku gɔl kɔc ë ciëc biic kɔc ee käŋ ɣaac, ku kɔc ee käŋ ɣɔɔc Luaŋdït, ago pɛɛm ke kɔc ee wëu waar yiic pɔ̈k yiic piny, ayï pɛɛm wën rëërë kɔc ë ajiël ke guuk ɣaac,

¹⁶ go jai an, acïn raan bï töny aa ɣääc në kal de Luaŋdït yic.

¹⁷ Go ke wɛ̈ɛ̈t, yöök keek an, “Kënë gɔ̈ɔ̈r an, ‘Ɣöndï abï aa cɔl ɣön ye juöör lɔ̈ŋ thïn ëbɛ̈n?’ Ku week, acäk tɔ ye ruŋ ë kɔc ee käŋ rum!”

¹⁸ Go bɛ̈nydït de ka ke Nhialic ku kɔc ee löŋ gɔ̈ɔ̈r gokï piŋ, ku kɔɔrkï näŋ bï kek e nɔ̈k: acïk riɔ̈ɔ̈c ë yen, luɔi cï kut ë kɔc gäi ëbɛ̈n në wëëtde.

¹⁹ Na wën, ke Yecu ë jël kekë kɔckɛn ë piööcë ë pänydïtic.

Wɛ̈ɛ̈t de Tim de Ŋaap

²⁰ Na ɣɔn amiäk, të tëëk kek, ke ke tïŋ tim de ŋaap wään acï riɔu ayï meeide.

²¹ Go Petero enɔm tak ku lueel an, “Rabi, tïŋ, ŋaap wään bä cieen, acï guɔ riɔu!”

²² Go Yecu bɛ̈ɛ̈r, yöök keek an, “Yak Nhialic gam.

²³ Wek yɔ̈ɔ̈k ëyic an, Raan yöök kuurdïïtë an, Tɔ rɔt nyiɛɛiyë, ku cuɛtë yï ë wɛ̈ɛ̈ric, ku cïï piɔ̈u wiël, ku gam ëgɔk nɔn bï ka lueel aa yith, ka bï këdɛn ë lueel yök.

²⁴ Yen alɛ̈k ɛn e week, an, Të de yen ka bäk aa lip, të ya wek lɔ̈ŋ, yak gam nɔn cä wek ke guɔ nööm, ku abäk ke yök.

²⁵ Ku të kääc wek, ke we läŋ, ku ade raan cï we wäc këdäŋ, ke pälkï, ke Wuöörduön nu paannhial abï we päl kë cäk wööc ayadäŋ.

²⁶ Ku na rɛɛckï ye pɔ̈l, ke Wuöörduön nu paannhial acïï ka cäk wööc bï päl week ayadäŋ.”

Thiëc në Biäk de Riɛl ë Yecu

²⁷ Gokï bɛ bɛ̈n Jeruthalem: na wën, aa cath Yecu ë Luaŋdïtic, ke bänydït ke ka ke Nhialic ke ke bɔ̈ tëde yen, kekë kɔc ee löŋ gɔ̈ɔ̈r, ku röördït,

²⁸ bïk ku thiëckï an, “Ee riɛlou looi yïn ee kakë? Ku ye ŋa ë gëm yïn ee riɛlë looi yïn ee kakë?”

²⁹ Go Yecu pɔ̈k nɔm keek an, “We bä thiëëc aya në cöök tök, ku bäk këdï bɛ̈ɛ̈r, ke we bä lɛ̈k riɛl luɔɔi ɛn ee kakë.

³⁰ An, Baptith ë Jɔn, ë bɔ̈ paannhial, ku ë bɔ̈ tëde kɔc tei? Jakï këdï bɛ̈ɛ̈r.”

³¹ Gokï wël tɛɛr kapäc an, “Na luelku an, ‘Aa bɔ̈ paannhial,’ ka bï lueel an, ‘Ka ye ŋö kɛ̈n wek en gam?’

³² Ku na luelku an, ‘Aa bɔ̈ tëde kɔc,’ acïk riɔ̈ɔ̈c ë kɔc, kɔc kedhie ayek Jɔn tɔ ye tiët agɔk.

³³ Gokï bɛ̈ɛ̈r, lëkkï Yecu an, “Akucku.” Go Yecu pɔ̈k nɔm keek an, “Ayï yɛn aya, acä bï lɛ̈k week yen riɛl luɔɔi ɛn ee kakë.”