Mak 10 - JAM DE NHIALIC 2011

Yecu Awɛ̈ɛ̈t ë Biäk de Pɔ̈k

¹ Na wën, ke jël ëtɛ̈ɛ̈n, bï piny de Juda ë Jordan nɔm lɔŋtui. Go kuut ke kɔc bɛ guëër të nu yen, go keek bɛ wɛ̈ɛ̈t, cït man ë täudɛn thɛɛr.

² Na wën, ke Parithai ë ke bɔ̈ tëde yen, bïk ku thiëckï, them kek en an, “Piɛth të pɔ̈kë raan kekë tiiŋde?”

³ Go bɛ̈ɛ̈r, yöök, keek an, “Cï Mothe we lɛ̈k ŋö?”

⁴ Gokï lueel an, “Mothe ë raan päl gäär gɛ̈ɛ̈r en awerek de pɔ̈k, ku bï pɔ̈k kekë yen.”

⁵ Go Yecu ke yɔ̈ɔ̈k an, “Në baŋ de riɛl ë wepiɔ̈ɔ̈th en aa gɔ̈ɔ̈r en löŋ.

⁶ Ku të ɣɔn ciɛkë piny, moc ku tik en aye cuɛ̈c ë cuëëcë Nhialic keek.

⁷ Yen abï moc wun pɔ̈l ku pɛ̈l man, ku mɛ̈t ke tiiŋde:

⁸ agokï aa guöp tök keek kaarou: yen a cïï kek be aa rou, acïk aa guöp tök.

⁹ Yen ka cïï Nhialic jɔ mat, ë cïn raan ë ke pääk.”

¹⁰ Na wën, arëërkï ɣööt, ke beyë kɔckɛn ë piööcë thiëëc në këde jamë.

¹¹ Go ke yɔ̈ɔ̈k an, “Raan pɔ̈k ke tiiŋde, ku jɔ tiiŋ däŋ thiaak, ka ye lɔ ke tiiŋ lei.

¹² Ayï tik, të pɛ̈l en monyde, ku beyë thiaak ë mony däŋ, ka ye lɔ ke mony lei.”

Yecu Athiei Mïththiaakäŋ

¹³ Na wën, ke ke jɔ mïththiaakäŋ bɛ̈ɛ̈i të nu yen, bï ke bɛ̈n jak: go kɔcpiööcë ke jɔ̈ɔ̈ny:

¹⁴ na wën, aacï Yecu ye tïŋ, ke diu piɔ̈u arëët, ku yöök keek, pälkï mïththiaakäŋ ë ke bɔ̈ të nuö yɛn, duökï ke pën: ciɛɛŋ de Nhialic ee këde kɔc cït keek.

¹⁵ Wek yɔ̈ɔ̈k ëyic an, Raan reec ciɛɛŋ de Nhialic nööm cït man ë mɛnhthiinakäŋ, ka cïï bï lɔ thïn ëtaiwei.”

¹⁶ Go ke boom, ku thieei keek, ku thɛny ecin ë kenïïm.

Raan Kueth

¹⁷ Na wën, alööny kueer, ke raan tök bɔ̈ ke riŋ, bï ku tuk emiɔl ë yenɔm, ku jɔ thiëëc an, “Bɛ̈ny piɛth ee kɔc wɛ̈ɛ̈t, eeŋö bä looi kë bän pïïr athɛɛr lɔ̈ɔ̈k lak?”

¹⁸ Go Yecu lueel an, “Eeŋö tɔ yïn ɛn ee raan piɛth? Acïn raan piɛth nu, ee Nhialic Yetök.

¹⁹ Yïn ŋic cök ke lööŋ an, ‘Du lɔ wekë tiiŋ lei, du raan däŋ näk abï thou, du ye kual, du kɔc ee cäk thook, du kɔc ee cam, ye wuur riëëu kekë moor.”’

²⁰ Go bɛ̈ɛ̈r an, “Bɛ̈ny ee wëët, kake kedhie acä ke ya döt ɣɔn aa yɛn meth aɣɔ̈l cï ënɔɔnë.”

²¹ Na wën, ke woi Yecu guöp, ku nhiɛɛr, go yɔ̈ɔ̈k an, “Ee tök en a dak yïn: lɔ, ɣaacë kaku kedhie, ku miɔc kɔc kuanynyïïn, ke yïn bï dɛ wëu piɛth paannhial: ku bä, jɔt timduön cï rïïu nɔm, ku kuany a cök.”

²² Go piɔ̈u rac në jamë, ku jɔ jäl, ke cï piɔ̈u diu, luɔi ee yen raan juëc ë kake.

²³ Na wën, ke Yecu ciɛɛth kɔc nyïïn, ku yöök kɔckɛn ë piööcë an, “Ee këril ëtör oou, luɔi bï kɔc de wëu juëc lɔ ë ciɛɛŋ de Nhialic yic!”

²⁴ Go kɔcpiööcë gäi në wëlke. Go Yecu bɛ bɛ̈ɛ̈r, yöök keek an, “Wäthii, ee këril ëtör oou, luɔi bï kɔc ee wëu juëc ŋɔ̈ɔ̈th lɔ ë ciɛɛŋ de Nhialic yic!

²⁵ Luɔi bï thɔ̈rɔ̈l tëëk ë liiprɔ nyin, yen apiɔl në luɔi bï raan de wëu juëc lɔ ë ciɛɛŋ de Nhialic yic.”

²⁶ Gokï gäi ë gäi rac, ku thiëckï röt kapäc an, “Ka ye ŋa duëërë kony wëi?”

²⁷ Go Yecu ke caath nyïïn, ku lueel an, “Kënë adhal kɔc, ku acïï Nhialic dhal: këriëëc ëbɛ̈n aye Nhialic lëu.”

²⁸ Na wën, ke jɔ Petero lɛ̈k en an, “Tïŋ, wo cï käŋ nyääŋ piny kedhie, ku kuanyku yïcök.”

²⁹ Go Yecu bɛ̈ɛ̈r an, “Wek yɔ̈ɔ̈k ëyic, an, Acïn raan cï ɣönde nyääŋ piny, ku nyiëëŋ mïthëkɔcken piny, ku nyïïrëkɔcken, ku wun, ku man, ku tiiŋde, ku mïthke, ku duum, në biäkdï, ku në biäk de wëlpiɛth,

³⁰ ku cïï käŋ bï bɛ yök, ka cï kenyïïn ŋuak raan bɔt ë nɔn pïïr en, ɣööt, ku mïthëkɔcken, ku nyïïrëkɔcken, ku märken, ayï mïthke, ayï duum, kekë yöŋ bï kɔc e yɔŋ, na miäk ë piny bï bɛ̈n, ke yök pïïr athɛɛr.

³¹ Ku kɔc juëc nu tueŋ abïk lɔ ciëën, ku lɔ kɔc nu ciëën tueŋ.”

Yecu Ajam ë kë yek kek Diäk në biäk de Thonde

³² Na wën, aciɛthkï kueer, ke ke lɔ Jeruthalem, ku cath Yecu ë kenïïm tueŋ, agokï gäi, ku ariɔ̈ckï të kuɛny kek e cök. Go kɔc kathiëër ku rou bɛ cɔɔl të nu yen, ku jɔ keek lɛ̈k ka bï yök.

³³ Go lueel an, “Tiëŋkï, wo lɔ Jeruthalem, ku Wën ë Raan abï yiɛ̈n bänydït ke ka ke Nhialic ku kɔc ee löŋ gɔ̈ɔ̈r, agokï löŋde teem an, näk, ku jɔkï yiɛ̈n Juöör:

³⁴ ku abïk geet guöp, ku ŋuutkï, ku duikï ë waat, ku jɔkï nɔ̈k abï thou, ku abï rɔt bɛ jɔt ëkööl ee kek diäk.”

Kë Kɔɔr ë Jakop ku Jɔn

³⁵ Na wën, ke Jakop bɔ̈ kekë Jɔn, kek wɛ̈ɛ̈t ke Dhebedayo, bïk të nu yen, ku luelkï an, “Bɛ̈ny ee wëët, na de kë buk lip tëde yïn, akɔɔrku nɔn bï yïn e looi.”

³⁶ Go ke thiëëc an, “Ee käŋö kë kaarkï nɔn bän e luöi week?”

³⁷ Gokï lueel an, “Pälë wo rëër në dhuëëŋdu yic, tök ë baŋ cuënydu, ku tök ë baŋ camdu.”

³⁸ Go Yecu ke yɔ̈ɔ̈k an, “Wek kuc kë liɛpkï. Duɛ̈ɛ̈rkï dek në bïny aa yɛn dek thïn, ku duëërë we baptith në baptinh bï ya baptith?”

³⁹ Gokï lueel an, “Aduëërku lëu.” Go Yecu ke yɔ̈ɔ̈k an, “We bï dek në bïny dɛ̈k ɛn thïn ë yic, ku baptith bï ya baptith, ke we bï baptith aya:

⁴⁰ ku rëër ë baŋ cuënydï ayï baŋ camdï acie këdiën gäm kɔc: ee këde kɔc cï ë guiëk keek.”

⁴¹ Na wën, acï kɔc kathiëër ye piŋ, ke ke jɔ piɔ̈ɔ̈th diu në Jakop ku Jɔn.

⁴² Go Yecu ke cɔ̈ɔ̈l të nu yen, ku yöök keek an, “We ŋic kɔc wën cï tɔ ye bäny ceŋ piny ë juöör nïïm, nɔn ee kek kɔc cieŋ ë ciɛɛŋ ril, ku röördït ë keyiic aye keek cieŋ.

⁴³ Ku acïï bï tɔ̈u aya ë weyiic: ku raan kɔɔr luɔi bï en dït ë weyiic, en abï aa raan ë week luööi:

⁴⁴ ku raan kɔɔr luɔi bï en lɔ tueŋ ë weyiic, en abï aa lïm ë kɔc kedhie.

⁴⁵ Acakaa Wën ë Raan aa cïï bɔ̈ luɔi bï ye luööi ë kɔc, ee luɔi bï en kɔc aa luööi, yen aa bï yen, ku luɔi bï en wëike gam bï kɔc juëc bɛ̈n waar.”

Yecu Atɔ cɔɔr cɔl Bartimayo tɔ Waar

⁴⁶ Gokï bɛ̈n Jeriko: na wën, të jël en Jeriko kekë kɔckɛn ë piööcë ku kut dïït ë kɔc, ke cɔɔr cɔl Bartimayo, wën ë Timayo, arɛ̈ɛ̈r ë kueer këc, ke lip.

⁴⁷ Na wën, aacï ye piŋ nɔn ee yen Yecu de Nadhareth, ke jɔ cööt an, “Yecu, wën ë Debid, tɔ yïpiɔ̈u kok wekë yɛn.”

⁴⁸ Go jɔ̈ɔ̈ny ë kɔc juëc, an, “Le lik, go cööt ë cɔ̈t wär cɔ̈t wën arëët, an, “Wën ë Debid, tɔ yïpiɔ̈u kok wekë yɛn.”

⁴⁹ Na wën, ke kääc en Yecu, ku lëk kɔc an, “Calkï.” Gokï cɔɔl, ku yöökkï an, “Rit yïpiɔ̈u, jɔt rɔt, acï yï cɔɔl.”

⁵⁰ Go lupɔde cuat wei, ku jɔt rɔt, bïï tëde Yecu.

⁵¹ Go Yecu bɛ̈ɛ̈r, thiëëc an, “Eeŋö kɔɔr kë bä luöi yïn?” Go cɔɔr lueel an, “Raboni, ee luɔi bän yïn, yen akaar.”

⁵² Go Yecu yɔ̈ɔ̈k an, “Lɔ, gämdu acï yï tɔ dem.” Go dap yïn ënɔnthiinë, ku jɔ kuany cök kueer.