Mak 1 - JAM DE NHIALIC 2011

Wɛ̈ɛ̈t de Jɔn Baptith

¹ Göl ë wëlpiɛth kï, wëlpiɛth ke Yecu Kërtho, Wën ë Nhialic.

² Acït man cï e gɔ̈ɔ̈r ë awerek de tiët Yithaya yic, an, “Tïŋ, ‘Yɛn tooc tunydï ë yïnɔm tueŋ, Raan bï kueerdu lɔ looi.’

³ Röl de raan cöt ë jɔ̈ɔ̈ric an, ‘Luɔikï kuɛɛr ke Bɛ̈nydït abïk lɔ cit!”’

⁴ Go Jɔn bɛ̈n, raan ee kɔc baptith ë jɔ̈ɔ̈ric, ku ye kɔc guiëër në baptith ë puŋëpiɔ̈u në päl bïï karɛc pɔ̈l.

⁵ Na wën, ke kɔc ke piny ë Juda kedhie, ku kɔc ke Jeruthalem, ke ke lɔ biic të nu yen, go ke baptith në yen kedhie ë wɛ̈ɛ̈r de Jordan yic, ku gamkï karɛcken.

⁶ Ku ye Jɔn lupɔ cieŋ lupɔ cï cuëëc ë nhïm ke thɔ̈rɔ̈l, ku ye thiönh ë dɛ̈l cieŋ ë yethar, ku ye kɔyɔm cam ku ciɛm miök de kiëc nu röör.

⁷ Ku ye guiir an, “Ade raan bɔ̈ ë yacök ciëën, raan ril ë yɛn, ku yɛn cï röŋ në luɔi duɛ̈ɛ̈r ɛn guŋ dak thiönh ë wɛɛrke.

⁸ Yɛn ë we baptith ë pïïu: ku raanë abï we baptith në Wëidït ɣer.”

Baptith ku Thëm de Yecu

⁹ Na wën, ë aköölkë, ke Yecu bɔ̈ Nadhareth de Galili, ago baptith ë Jɔn ë Jordanic.

¹⁰ Na wën, ënɔntöŋ ë bïï en biic ë pïïu yiic, ke tënhial ë liep yeyic, ku tïŋ Wëidït ɣer abɔ̈ piny nhial lekï ë yeguöp acït guöp guuk.

¹¹ Ku bɔ̈ röl paannhial an, “Yïn ee Wëndiën nhiaar, Yɛn mit piɔ̈u wo yïn arëët.”

¹² Na wën, ë tëthiinë, ke dap lɛɛr ë jɔ̈ɔ̈ric ë Wëidït.

¹³ Ku jɔ lɔ tɔ̈u ë jɔ̈ɔ̈ric ë nïn kathiërŋuan, ke ye Catan them, ku ye tɔ̈u kekë läi roor ëtök, ku ye luööi ë tuucnhial.

Yecu Acɔl Kɔc ee Rec Deep Kaŋuan

¹⁴ Na ɣɔn, aacï Jɔn mac, ke Yecu bɔ̈ Galili, ke ye Wëlpiɛth ke Nhialic guiir,

¹⁵ aaye lueel an, “Piny ë thök, ku ciɛɛŋ de Nhialic acï guɔ thiɔ̈k! Pɔ̈kkï wepiɔ̈ɔ̈th, ku gamkï Wëlpiɛth!”

¹⁶ Na wën, aa ciɛth ë Baar ë Galili yɔu, ke tïŋ Thimon ku Andereya mänhë ë Thimon ke ke deeny bɔi wïïr: luɔi ee kek kɔc ee dep.

¹⁷ Go Yecu keek yɔ̈ɔ̈k an, “Bäkï ë yacök, ke we bä tɔ ye kɔc ë kɔc deep.”

¹⁸ Gokï bɔɔiken dap pɔ̈l ënɔnthiinë, ku kuanykï cök.

¹⁹ Na wën, acï lɔ tueŋ tëthiinakäŋ, ke tïŋ Jakop wën ë Dhebedayo kekë Jɔn mänhë, kɔc nu ë abëlic ayadäŋ, arukkï bɔɔiken.

²⁰ Go keek cɔɔl ënɔnthiinë: gokï wuönden Dhebedayo nyääŋ ë abëlic kekë kɔc ë luui ë wëu, ku biɔthkï cök.

Raan de Guöp Jɔŋdïtrac

²¹ Gokï lɔ Kapernaum, na wën, ëkööl ë Thabath, ke dap lɔ ɣön ë Nhialic le wëët.

²² Gokï gäi në wëëtde: luɔi ee yen keek wɛ̈ɛ̈t cït man ë raan cath ke riɛl, ku acïï cït man ë kɔc ë löŋ gɔ̈ɔ̈r.

²³ Na wën, ke raan anu ë ɣöndɛn ë Nhialic yic raan de guöp jɔŋ rac, go rel an,

²⁴ “Yecu! Eeŋöda në yïn, yïn Yecu de Nadhareth? Cï bɛ̈n bä wo bɛ̈n riɔ̈ɔ̈k? Yïn ŋiɛc nɔn ee yïn Raan ɣeric de Nhialic!”

²⁵ Go Yecu jɔ̈ɔ̈ny an, “Lɔ lik, ku bä bei ë yeguöp!”

²⁶ Na wën, aacï jɔŋ rac raan tɔ lɔ juɔ̈kläŋ, ke jɔ cööt ë röl dït, ku bïï bei ë yeguöp.

²⁷ Gokï gäi kedhie, arëk abïk röt thiëëc kapäc an, “Ee käŋö ee kënë? Ee wëët ŋö ee kënë wëët cï piac bɛ̈në? Acakaa jɔɔk rac aye ke yɔ̈ɔ̈k në riɛl, agokï këde piŋ!”

²⁸ Go rinke tïc ënɔnthiinë në wuöt thiɔ̈k ke piny de Galili yic ëbɛ̈n.

Yecu Atɔ Kɔc Juëc Waar

²⁹ Na wën, aa cïk bɛ̈n biic ɣön ë Nhialic, ke ke dap lɔ ɣön ë Thimon ku Andereya, aciɛthkï në Jakop ku Jɔn.

³⁰ Ku dhiɔm de Thimon adhɔt piny ke juäi, agokï këde dap lɛ̈k Yecu.

³¹ Go bɛ̈n, bïï ku dɔm cin, jɔt nhial, go juäi päl piny ënɔnthiinë, go kaken looi.

³² Na ɣɔn thëën, të cï akɔ̈l lɔ piny, ke ke bïï kɔc tëde yen kɔc tök kedhie ayï kɔc cïï jɔɔk rac dɔm.

³³ Ku kɔc ke pänydït ëbɛ̈n acïk guëër ɣöt thok.

³⁴ Go kɔc tök juëc tɔ dem kɔc de gup jɔɔk kith yiic, ku cieec jɔɔk rac ë kɔc gup kɔc juëc, ku pën jɔɔk rac jam, luɔi cï kek e ŋic.

Yecu Awɛ̈ɛ̈t ë Galili

³⁵ Na ɣɔn amiäk, aŋoot piny ke col, ke jɔt rɔt, le biic, ku jël le jɔ̈ɔ̈ric të cïn kɔc, le lɔ̈ŋ ëtɛ̈ɛ̈n.

³⁶ Go Thimon ku kɔc wën cath në yen gokï biɔɔth cök,

³⁷ na wën, aa cïk en yök, ke luelkï an, “Yïn kɔɔr raan ëbɛ̈n.”

³⁸ Go keek yɔ̈ɔ̈k an, “Lokku ë wuöt thiɔ̈k yiic, ke ya bï wël aa guiir ëtɛ̈ɛ̈n aya, yen aa bä yɛn.”

³⁹ Go wël lɔ guiir ë ɣööt ke Nhialic yiic piny ë Galili nɔm ëbɛ̈n, ku ye jɔɔk rac cieec.

Yecu Atɔ Raan Waar

⁴⁰ Na wën, ke raan bɔ̈ tëde yen, raan de guöp wɛth ke läŋ, ku tuk emiɔl ë yenɔm, lueel an, “Të de yïn piɔ̈u luɔi bï yïn a tɔ waar, ka duëërë looi.”

⁴¹ Go Yecu piɔ̈u kok ke yen, go ecin riny, ku jɛk guöp, lueel an, “Anu ë yapiɔ̈u, waar guöp.”

⁴² Go wɛth jäl ë yeguöp ënɔnthiinë, ku jɔ guöp waar.

⁴³ Go lom thok arëët, ku tɔ jël ënɔnthiin

⁴⁴ yöök an, “Tit rɔt, ë cïn kë lɛ̈kë raan däŋ: lɔ kueerdu, nyuöthë rɔt bɛ̈ny ë ka ke Nhialic, ku gämë ka cïï Mothe thɔn, në baŋ de waar cï yïn guöp waar, abï aa ŋïny bï kek e ŋic.”

⁴⁵ Ku yen, të cï en lɔ biic, ke jɔ jam lueel arëët, abï thiëi ë piny nɔm, arëk acïn të duëërë Yecu bɛ lɔ pänydït ë kɔc nyïïn, ku ye tɔ̈u röör ë jɔ̈ɔ̈ric: go kɔc bɛ̈n të nu yen ë baai yic ëbɛ̈n.