Maika 7 - JAM DE NHIALIC 2011

Karac ke Kɔc ke Yithriɛl

¹ Amawoou, yɛn cïï gök yök! Yɛn cï ciët raan nɛ̈k cɔk, ku cïn mïth ke tiim amäi nhiɛɛr ye cam cï yök në tim nɔm.

² Kɔc piɛth piɔ̈ɔ̈th acï ke thöl nyïïn paanda kedhie, acïn raan piɛth töŋ cï döŋ. Kɔc kedhie ayek buuth bïk kɔc nɔ̈k, ku ŋɛk ee mɛnhkënë yɔ̈ɔ̈p cï lɛ̈i.

³ Acïk luɔi de kërac ŋic aläl kedhie, ku bäny ayek ariöp cɔɔl. Ku bäny ee lööŋ guiir ayek kumthok nööm. Ku kɔc ril acïk kethook mat kedhie, ku ayek kë kɔɔrkï tɔ loi.

⁴ Kɔc arackï kedhie, ku raan ŋuän ë keyiic acït kou, ku adhuɛ̈ŋden acït thil. Akööl acïk bɛ̈n, akööl ɣɔn cï tïtkun week yɔ̈ɔ̈k, akööl bï Nhialic we luöi këtuc. Ka ënɔɔnë, wek cï nïïm nuɔɔn.

⁵ Du kë lueel ë raan rɛ̈ɛ̈r wek ee bɛ gam, ku du mɔ̈th ee bɛ ŋɔ̈ɔ̈th. Ayï tiiŋduön man nin në yïyɔu, ye yïliep tiit në yen.

⁶ Mïth röör ayek tɔ̈u ke ke dhɔt wärken, ku duet abïk röt jɔ̈t märken, ku diäär kor abïk aa gɔ̈m në märken ke röörken. Kɔc ke baai de raan, kek abï ya kɔc ke aterde.

⁷ Ku yɛn bï Bɛ̈nydït woi nyin, ku tiɛɛt Nhialicdï në luɔi bï yen a kony, ku Nhialicdï abï ya piŋ thok.

Bɛ̈nydït abïï Kuɔɔny

⁸ Du yïnɔm lec në yɛn raan de ater, na cakaa nɔn cän wïïkë, yɛn bï rɔt bɛ jɔt. Na ya cakaa rëër në mɔ̈ɔ̈th yic ënɔɔnë, Bɛ̈nydït ee yɛn gäm ɣɛɛr.

⁹ Yɛn ë Bɛ̈nydït wööc piɔ̈u, ka yɛn bï yök ke ya gum agönhde ë määth. Na miäk, abï ya kony, ku nyooth yinydï. Abï ya bɛ̈ɛ̈i të ɣer, ka yɛn bï yinyde tïŋ.

¹⁰ Ku ëtɛ̈ɛ̈n, abï raan ater tïŋ, ku gëm en ayäär. Kɔc wään ee ya dɔl guöp an, “Nu Bɛ̈nydït Nhialicdu ënou? Abä ke bɛ tïŋ awiëëk. Abï keek dum yiic, ku ciɛth ë kekɔ̈ɔ̈th cït raan cath ë tiɔ̈kic.

¹¹ Akööl abïkï, akööl bïï kaldu bɛ yïk ëbɛ̈n, ku be ë pinydu ŋuak thok.

¹² Ku ëtɛ̈ɛ̈n, kɔcku abïk bɛ̈n ciëën në Athiriya, ku në wɛ̈ɛ̈r ë Yuparat, ku bɔ̈ kɔ̈k ciëën në Rip. Ku puk kɔ̈k röt në wɛ̈ɛ̈r yɔu, agut cï wɛ̈ɛ̈r däŋ mecë yɔu. Ku bɔ̈ kɔ̈k ciëën në kur yiic, ayï tëde kur kɔ̈k mec aläl.

¹³ Ku piny abï ya jɔ̈ɔ̈r, në biäk cïï kɔc cieŋ en kërac looi.

Kokdepiɔ̈u ë Bɛ̈nydït ke Yithriɛl

¹⁴ Tit kɔcku apiɛth Bɛ̈nydït, kɔckuön cï lɔc. Arëërkï roor ënɔɔnë kapäc. Ee Yïn abï ke lɛɛr piny piɛth de Bacan ku Giliyad, cït man ɣɔn ye kek kɔn tɔ̈u ɣɔn thɛɛr.

¹⁵ Abä keek nyuöth kake gäi, cït man ɣɔn kan Ɛn ke looi ɣɔn jël kek ë Rip.

¹⁶ Abï juöör ke pinynɔm tïŋ ku yäärkï gup në keek, abï ke pɛ̈n riɛlden ëbɛ̈n. Abïk kethook aa kum në kecin, ku thiökkï keyïth.

¹⁷ Abïk aa ɣöc piny cït karɛc, ku molkï piny cït käm. Juöör abïk bɛ̈n bei në ɣäänkɛn ke thiaan yiic ke ke lɛthë. Ku pukkï kenïïm Bɛ̈nydït Nhialicda ke ke cï riɔ̈ɔ̈c në Yen.

¹⁸ Go Maika lueel, an, “Acïn Nhialic däŋ kït ke Yïn Bɛ̈nydït, Yïn ee kɔckuön lik cï döŋ apïr päl awɛ̈ɛ̈cken. Yïn cïï agönhdu ee cuuth aɣet athɛɛr. Ku Yïn kɔɔr bä wo nhiaar në nhiëërduön agɔk.

¹⁹ Yïn bï piɔ̈u bɛ kok we wook, ku dum awɛ̈ɛ̈ckuɔ yiic në yïcök, ku dɛɛnyë ke ë wɛ̈ɛ̈ric në lilic ya.

²⁰ Yïn bï piɔ̈nduön adöt nyuöth Jakop, ku nyuöthë Abraɣam nhiëërduön agɔk, cït man wään cï Yïn gutguut lɛ̈k kuarkuɔ ɣɔn thɛɛr.