Maika 4 - JAM DE NHIALIC 2011

Bɛ̈nydït Aceŋ Pinynɔm në Mät

¹ Në akööl ciëën wadäŋ, në kuur tɔ̈u ë Luaŋdït në yenɔm yen abï kɔ̈ɔ̈c ke ye kuur de naamde arëët në kur yiic kedhie abï kur kor wöör nïïm kedhie. Ka juöör juëc ëbɛ̈n, abïk aa guëër ë yelɔ̈ɔ̈m,

² Juöör juëc abïk aa bɛ̈n ku luelkï an, “Bäkï, lok nhial në kuur ë Bɛ̈nydït nɔm, lokku Luaŋdït de Nhialic de Yithriɛlic. Löŋ de Bɛ̈nydït aye wɛ̈ɛ̈t në Jeruthalem Lokku ke bï wo lɔ nyuöth kuɛɛrke, ke buk keek kuany yiic, në Dhiɔn yen aye kɔcke wɛ̈ɛ̈t thïn.

³ Bɛ̈nydït abï wël ke juöör juëc guiir, juöör ril nu të thiɔ̈k ayï të mec aya. Acïn jur bï jur bɛ yiɛ̈n tɔŋ. Ku cïn raan bï tɔŋ bɛ aa guik. Ka abïk abätɛ̈ɛ̈uken thɔ̈ɔ̈th tɔkï keek ee pur, ku tɔkï tɔɔŋken ee leem ke tëm ë rap.

⁴ Raan ëbɛ̈n, abï ya rëër ë dïu në dom de ŋaapde thar. Acïn raandɛn bï ye bɛ aa riääc. Yen kë cïï Bɛ̈nydït de rɛm than piny ka.

⁵ Ku ënɔɔnë, juöör ke piny ëbɛ̈n akuanykï yiëthken cök, na wook, wok bï Bɛ̈nydït Nhialicda kuany cök aɣet athɛɛr ya.

Yithriɛl abï Rɔt Puk në Pɛ̈cic

⁶ Go Bɛ̈nydït lueel an, “Akööl abïk bɛ̈n wadäŋ, akööl bän kɔc cä luöi këtuc määt yiic, ku mat kɔc cï peec nïïm, kɔc cä jieth piɔ̈ɔ̈th.

⁷ Kɔc cï gum abä ke tɔ dɔ̈ŋ apïïr, ku kɔc cï cuɔp wei ta keek ë jur ril. Abä ke cieŋ në Kuur ë Dhiɔn nɔm, gɔl ënɔɔnë aɣet athɛɛr.

⁸ Ku yïn guöp, yïn nyan de Dhiɔn, yïn cït tïn ë thök kääc ë alooc bäär nɔm, ke tiit kɔc ke Yithriɛl piny. Ku ciɛɛŋ ë nyan de Jeruthalem abï bɛ puɔ̈k nɔm yïn.

⁹ Ku ënɔɔnë, eeŋö tɔ we dhiau arëët aya abäk ciët ka cïn nïïm melik? Cï raan ee we riit piɔ̈ɔ̈th thou? Eeŋö tɔ we dëŋ aya, abäk ciët tiiŋ rɔ̈p?

¹⁰ Dhiaukï arëët wek kɔc ke nyan de Dhiɔn, cït man ë tiiŋ cïï arɛɛm ë dhiëth nuaan, në biäk bïï ë we jat wei ë pänydït yic ënɔɔnë, ku lak rëër roor baaŋ të cïn ɣööt. Wek bïï lɛɛr Babilon, yen të bï we lɔ luök thïn ka. Bɛ̈nydït abï we lɔ wɛ̈ɛ̈r bei ëtɛ̈ɛ̈n në kɔckuön ke ater cin.

¹¹ Ku ënɔɔnë, juöör juëc acïk mat në këdu. Ayek lueel an, “Pälkï Jeruthalem ë le riɔ̈ɔ̈k ëtɛ̈ɛ̈n, ke buk wɔi piny ke cï riääk.

¹² Ku juöör akuckï kë cath ke Bɛ̈nydït, akënkï kiɛɛrde yökic. Yen raan ee keek määt yiic, ku kɔ̈ɔ̈m keek cït kë käm rap në yiɛɛuwic.

¹³ Aye Bɛ̈nydït lueel an, “Jatkï röt wek kɔc ke nyan de Dhiɔn, ku luöikï kɔc ke ater këtuc. Wek bä tɔ cït thɔn cï jök cï leŋ tuŋ. Ka wek bï juöör juëc aa dhuööŋ. Ka wek bï Yɛn aa gäm këriëëcduön bäk lɔ rum ëbɛ̈n, ke ye miɔ̈cdï, Yɛn Bɛ̈nydïït de pinynɔm ëbɛ̈n.