Maika 1 - JAM DE NHIALIC 2011

¹ Në akööl ɣɔn ye Jotham kekë Aɣadh, ku Ɣedhekia meliik ke Juda, Bɛ̈nydït acï jam kekë Maika, raan wun ë Moreceth. Go nyuöth ee kakë në biäk de Jeruthalem kekë Thamaria.

Maika adhiëëu Thamaria kekë Jeruthalem

² Go Maika lueel an, “Piɛŋkï wek juöör cieŋ pinynɔm ëbɛ̈n! Bɛ̈nydït Nhialic yen abï kërɛɛc cäk looi nyuɔɔth ëgɔk. Piɛŋkï! Abï jam ke nu luaŋdɛn ɣeric paannhial.

³ Tiëŋkï, Bɛ̈nydït abɔ̈ bei tëde, abɔ̈ piny bïï bɛ̈n cath të thöny në kur nïïm.

⁴ Ka kur abïk lɛ̈ɛ̈ŋ në yecök, cït man ë kɔl cï tääu mɛɛc. Ku abïk dhuöör ë ke lɔ piny në wakic cït pïïu bɔ̈ piny nhial ë kuur nɔm.

⁵ Ku kënë ëbɛ̈n, ee biäk de kërɛɛc de Jakop. Ku eeŋa bï gäk awäny ë baai de Yithriɛl? Cie Thamaria? Ku eeŋa bï gäk awäny ë Juda, awäny cï yen yiëth kɔ̈k lam? Cie Jeruthalem yiɛnhde?

⁶ Ago Bɛ̈nydït lueel an, “Thamaria abä riɔ̈ɔ̈k taitai, abï döŋ piny ke ye akuut ke tiɔp. Ku Yɛn bï kur ke ɣöötke thɔɔc nïïm në wakic, ku riäär këërkëër ke ɣöötke piny liŋliŋ. Ku ta ye duum bï kɔc aa com thïn.

⁷ Yɛn bï yiëthke dhuööŋ abï ciɛ̈n tök, ka abïk riäär liŋliŋ. Ku nyuɔp këriëëcdɛn cïk gäm yiëth piny ëbɛ̈n në mac. Në biäk ë yök ë Thamaria miɔ̈cde në läm de yiëth, miɔ̈cdɛn ë läm de yiëth abä ke bɛ tɔ jɔt ë kɔc ee yiëth lam cït keek ayadäŋ.

⁸ Go Maika lueel an, “Yɛn bï dhiau në baŋ de ee kërɛɛcë, ku tuaar arëët. Ku yɛn bï jiɛth ë yɛn piɔ̈u nyuɔɔth në tuëny tuɛny ɛn a guöp, ku cath në yakɔ̈u. Ku yɛn bï war bɛ̈ɛ̈i bei, ku cath në yacök. Yɛn bï dhiau cït man ë kɔ̈ɔ̈rgɔl, ku kiɛɛu cït man ë wuut.

⁹ “Në baŋ ye tëtök de Thamaria tëtök cie dem, ee tëtök ee thuɔɔu bɛ̈ɛ̈i, ku abï Juda cuööp. Abï ɣet ë Jeruthalem yic cil, wun ë kɔckï.

Kɔc ke Ater Alek Jeruthalem

¹⁰ Go Maika lueel an, “Duökï riäŋdun tɔ piŋ ë Gath. Miɛmkï, duökï dhiau taitai. Daalkï röt piny abuui yic, wek kɔc wun ë Beth Opera!

¹¹ Wek kɔc wun ë Capir, wek bïï peec ke we cath ë wekɔ̈ɔ̈th në cäth ayäär. Ku kɔc rɛ̈ɛ̈r Dhaanan, acïkï duëër bɛ̈n bei wunden. Ku të la wek kɔc ke Bethedhel piŋ akïïu, ke ŋiɛckï nɔn cïn en luääk nu ëtɛ̈ɛ̈n.

¹² Ku kɔc cieŋ Maaroth abïk köör ë kɔc luäk keek, në baŋ cï Bɛ̈nydït Jeruthalem riɔ̈ɔ̈k në kelɔ̈m tëthiɔ̈k.

¹³ Ku wek kɔc ke Lacic, mäckï jöŋgöör kɔ̈ɔ̈th abëël ke tɔŋ. Ee yïn ë gɔl kërɛɛc de nyan de Dhiɔn, ku tɔ kɔc ke Yithriɛl wäc.

¹⁴ Ka week, puɔ̈tkï Moreceth Gath kueer. Ku päny dïït de Akidhip abï meliik ke Yithriɛl math.

¹⁵ Wek kɔc ke Mareca, wek bä bɛ yiɛ̈n kɔc bï we bɛ̈n peec. Ka bänydït ke Yithriɛl abïk lɔ thiaan në kök yic në Adulam.

¹⁶ Muɔ̈tkï wenïïm, dhiëëukï mïth nhiaarkï. Lɛnykï wenïïm abäk ciët anyigoon, në biäk bïï ë mïthkun lɛɛr piny lei.