Luk 4 - JAM DE NHIALIC 2011

Thëm de Yecu

¹ Na wën, ke Yecu dɔk enɔm ë Jordan, ke cï thiäŋ ke Wëidït ɣer, ku jɔ Wëidït thɛl ë jɔ̈ɔ̈ric,

² ku jɔ tɔ̈u ë nïn kathiërŋuan ë jɔ̈ɔ̈ric, ke ye them ë jɔŋdït rac. Ku acïn kë cï cam ee köölë, na wën, aacï nïnkë thök, ke jɔ cɔk nɔ̈k.

³ Go jɔŋdït rac yɔ̈ɔ̈k an, “Na ye wën ë Nhialic, yɔ̈ɔ̈kë kuurë bïï rɔt tɔ ye kuïn.”

⁴ Go Yecu puk nɔm an, “Acï gɔ̈ɔ̈r an, ‘Raan acïï bï pïïr në kuïn etök, ee wël ke Nhialic ëbɛ̈n, yen abï en ke pïïr.”’

⁵ Na wën, ke leerë jɔŋdït rac ë kuurdït bäär nɔm, ku jɔ dap nyuöth bɛ̈i ëbɛ̈n raantök, bɛ̈i ceŋ bäny ke piny nɔm ëbɛ̈n.

⁶ Go jɔŋdït rac yɔ̈ɔ̈k an, “Yïn bä miɔɔc në bɛ̈ɛ̈ny de bɛ̈ike kedhie, ayï dhuëëŋden: cï guɔ yiɛ̈n Ɛn, ku abä gäm raan cä tak.

⁷ Ku yïn, na lam ɛn, käŋ kedhie abïk aa kaku.”

⁸ Go Yecu puk nɔm an, “Waanë ë yakɔ̈u ciëën, Catan: acï gɔ̈ɔ̈r an, ‘Yïn bï Bɛ̈nydït Nhialicdu aa lam, ku yen etök yen abä ya luööi!”’

⁹ Na wën, ke bïï Jeruthalem, ku jɔ tääu ë Luaŋdït nɔm, ë këërkëër nɔm, go yɔ̈ɔ̈k an, “Na ye wën ë Nhialic, cuatë rɔt piny ëtënë:

¹⁰ acï gɔ̈ɔ̈r an, ‘Abï tuuckɛnhial yiɛ̈n thok në këdu, bïk yïn aa tiit:’

¹¹ ku an, ‘Abïk yï geeny ë kecin, ke yï cïï rɔt bï yuöp ë kuur kɔ̈u.”’

¹² Go Yecu puk nɔm, an, “Acï lueel an, ‘Yïn cïï Bɛ̈nydït Nhialicdu bï them.”’

¹³ Na wën, aacï jɔŋdït rac thëm thöl ëbɛ̈n, ke jɔ jäl ë yelɔ̈ɔ̈m, atit akööldɛn bï rɔt yök.

Yecu Agɔl Luɔide ë Galili

¹⁴ Go Yecu enɔm dhuöny Galili në riɛl ë Wëidït: go rinke thiëi ë pinyë nɔm ëbɛ̈n.

¹⁵ Go lɔ wëët ë ɣöötkɛn ë Nhialic yiic, ke leec ë kɔc kedhie.

Yecu acï Rɛɛc ë Nadhareth

¹⁶ Ku jɔ bɛ̈n Nadhareth, paan ë dïït en thïn: na wën, ke jɔ lɔ ɣön ë Nhialic ëkööl ë Thabath, cït man ë luɔi ee cool ë looi en en, ku jɔ rɔt jɔt bï këcïgɔ̈ɔ̈r bɛ̈n kueenic

¹⁷ go yiɛ̈n këcïgɔ̈ɔ̈r de tiët Yithaya. Na wën, aacï këcïgɔ̈ɔ̈r liepic, ke yök të cï gɔ̈ɔ̈r an,

¹⁸ “Wëidït ke Bɛ̈nydït acïk nyuc ë yaguöp, En aa tɔc en a guöp, bä kɔc kuanynyïïn aa guiëër wëlpiɛth. Acï a tooc bä kɔc cï piɔ̈ɔ̈th jiɛth bɛ̈n duut piɔ̈ɔ̈th, Ku bä kɔc cï mac bɛ̈n guiëër luny bï ke lony, Ku guiëër cöör yïn bï kek bɛ yïn,

¹⁹ Ku guiëër kɔc bɛ̈n de ruöön piɛth ë Bɛ̈nydït kööl bï En kɔc yɔŋ kony wëi.”

²⁰ Na wën, ke jɔ këcïgɔ̈ɔ̈r matic, ku yïn raan ë käŋ looi, ku jɔ nyuc, go kɔc ë nu ɣön ë Nhialic kedhie agokï ye toom guöp ë kenyïïn.

²¹ Go jam gɔl ke keek an, “Köölë këcïgɔ̈ɔ̈rë acï tɔ ye yic ë weyïth.”

²² Go kɔc piath de yenthok gam kedhie, ku jɔkï gäi në wël de yiic dhuëëŋ wël ë bɔ̈ bei ë yethok, gokï röt thiëëc an, “Cie wën ë Jothep?”

²³ Go lɛ̈k keek an, “We bï a dhil lɛ̈k ë kääŋë an, ‘Akïïm, tɔ rɔt dem.’ Këriëëc cuk piŋ an, cï ke looi ë Kapernaum, jɔ ke looi paandun ee tënë.

²⁴ Go lueel an, “Wek yɔ̈ɔ̈k ë yic an, Acïn tiët cï gam ë paanden guöp.

²⁵ Ku wek lɛ̈k yic an, Diëër abɛɛr juëc aake nu paan ë Yithriɛl ɣɔn nu Elija, ɣɔn cï tënhial thiöök ë run kadiäk ku pɛ̈i kadhetem, ku nu cɔŋ dït ë piny nɔm ëbɛ̈n.

²⁶ Ku akënë Elija tuöc tiiŋ tök ë keyiic, ee Dharepath etök, paan ë Thidon, yen aa toocë yen thïn, tuc tiiŋ abaar ëtɛ̈ɛ̈n.

²⁷ Ku nu kɔc juëc de gup wɛth paan ë Yithriɛl ɣɔn nu ë tiët Elica, ku acïn raan tök ë keek cï tɔ waar, ee Naaman etök, raan ë Thiriya.”

²⁸ Na wën, aa cïk kakë piŋ, kek kɔc nu ɣön ë Nhialic kedhie, ke ke jɔ gɔ̈th arëët.

²⁹ Ku jɔkï röt jɔt, ku cieeckï wei pänydït, ku thelkï ë kuurdït nɔm kuur cï pänydɛndït yïk ë yenɔm, an, bïk dɛɛny piny.

³⁰ Go jɔ tëëk ë keyiic cil, ku jɔ jäl.

Raan de Guöp Jɔŋ Rac

³¹ Go bɛ̈n Kapernaum, pänydïït ë Galili, ku jɔ keek aa wɛ̈ɛ̈t ë akööl ë Thabath.

³² Gokï gäi në wëëtde: nɔn ciɛthë wëlke në riɛl.

³³ Ku ade mony nu ɣön ë Nhialic, mony cïï jɔŋ rac dɔm, go cööt ë röl dït an,

³⁴ “Cai! Eeŋöda në yïn, yïn Yecu de Nadhareth? Ë yï bɔ̈ bä wo bɛ̈n nɔ̈k? Yïn ŋiɛc nɔn ee yïn Raan ɣeric de Nhialic!”

³⁵ Go Yecu jɔ̈ɔ̈ny an, “Mim, ku bä bei ë yeguöp.” Na wën, ke jɔŋ rac jɔ raan wit ë kɔc yiic cil, ku jɔ bɛ̈n bei ë yeguöp, ku kën yiëk tëtök.

³⁶ Gokï gäi kedhie, ku jɔkï jam kapäc an, “Ee wël ŋö ëkakë? Ee jɔɔk rac yɔ̈ɔ̈k në riɛl dït, agokï bɛ̈n bei!”

³⁷ Go rinke tïc ë baai yic ëbɛ̈n ë pinyë nɔm.

Yecu atɔ Kɔc Juëc Dem

³⁸ Na wën, ke jɔt rɔt, ku jël ɣön ë Nhialic, le ɣön ë Thimon. Ku dhiɔm ë Thimon aa tök arëët aye juäi dɛ̈ɛ̈p guöp, ku jɔkï Yecu lɔ̈ŋ në këde.

³⁹ Na wën, ke jɔ kɔ̈ɔ̈c ë yenɔm, ku jɔ juäi jɔ̈ɔ̈ny, go juäi päl piny, go rɔt jɔt ënɔnthiinë, ku jɔ ke guiëk.

⁴⁰ Na wën aa lɔ akɔ̈l piny, ke kɔc de kɔckɛn tök ë juän kithic ke ke jɔkï bɛ̈ɛ̈i të nu yen, go ecin thany ë raan guöp ëbɛ̈n, ku jɔ ke tɔ dem.

⁴¹ Ku bɔ̈ jɔɔk rac bei ë kɔc juëc gup, ke ke cöt an, “Yïn ee Kërtho wën ë Nhialic.” Go ke jɔ̈ɔ̈ny, ku cïï ke pɛ̈l jam: në ŋïny ŋic kek en nɔn ee yen Kërtho.

Yecu Awɛ̈ɛ̈t në Ɣööt ke Nhialic Yiic

⁴² Na wën, aacï piny ruu, ke jɔ jäl, le jɔ̈ɔ̈ric: go kɔc lɔ kɔɔr, aɣeet kek të nu yen an, bïk pëën, ke cïï bï jäl ë kelɔ̈m.

⁴³ Go keek yɔ̈ɔ̈k, Yɛn bï pɛ̈ɛ̈nydït kɔ̈k dhil guëër wëlpiɛth ke Ciɛɛŋ de Nhialic: en aa tuucë yɛn.

⁴⁴ Go wël aa guiir ë ɣööt ke Nhialic yiic piny de Galili.