Luk 3 - JAM DE NHIALIC 2011

Wëët de Jɔn Baptith

¹ Na ɣɔn, ë ruöön ë ciɛɛŋ de Tibero Kaithar, ruöön ee kek thiëër ku dhïc, ruöön nu Pontio Pilato ke ye bɛ̈ny ë Juda, ku ye Ɣerod bɛ̈ny de Galili, ku ye Pilip mänhë bɛ̈ny de Yituria, ku piny de Tarakoniti, ku ye Luthanio bɛ̈ny de Abilini,

² Ku ye yï Anath kekë Kayapath bänydït tueŋ ke ka ke Nhialic, go jam ë Nhialic bɛ̈n tëde Jɔn wën ë Dhekaria ë jɔ̈ɔ̈ric.

³ Ku jɔ cath ë piny nu ë Jordan yɔu ëbɛ̈n, ee kɔc guiëër baptinh ë puŋdepiɔ̈u në nyiɛɛi bï karɛc nyaai.

⁴ Acït man cï e gɔ̈ɔ̈r ë këcïgɔ̈ɔ̈r de tiët Yithaya yic an, “Röl ë raan cöt ë jɔ̈ɔ̈ric, ‘Luɔikï kueer ë Bɛ̈nydït, takï kuɛɛrke lɔ cit!

⁵ Wak ëbɛ̈n abï juök, ku kuurdït ëbɛ̈n ayï kuurthii abï ke rai piny, ɣään ŋɔl abï ke rïc,

⁶ Ku jɔ jäŋ ëbɛ̈n kuny de Nhialic tïŋ.”’

⁷ Na wën, aacï kuut dïït ë kɔc bɛ̈n, bï ke bɛ̈n baptith në yen, ke jɔ keek yɔ̈ɔ̈k an, “Wek mïth ke karɛc! Eeŋa ë yöök week an, bäk kat agönh bï bɛ̈n?

⁸ Jakï luɔk ë luɔi piɛth luɔi bï röŋ ke puŋdepiɔ̈u, ku duökï jam gɔl ë wepiɔ̈ɔ̈th an, wo de wäärda Abraɣam, wek yɔ̈ɔ̈k an, Nhialic aduëër mïth ke Abraɣam cak në kɔikë!

⁹ Ku ënɔɔnë, yiëp ë guɔ tääu të nu mei ke tiim: tim ëbɛ̈n tim reec luɔk ë mïth piɛth abï jɔ yiɛp piny, ku cuɛtë mɛɛc.”

¹⁰ Go kuut dïït ë kɔc thiëëc an, “Eeŋö buk jɔ looi?”

¹¹ Go bɛ̈ɛ̈r, yöök keek an, “Raan de aluluut kaarou, ke gɛm tök raan cïn aluluut, ayï raan de këcam, ke looi aya.”

¹² Go kɔc kɔ̈k ë athölbö tɔ kut bɛ̈n bïï ke bɛ̈n baptith, ku thiëckï an, “Bɛ̈ny ee wëët, eeŋö buk looi?”

¹³ Go keek yöök an, “Duökï käŋ ë kɔɔr tëde kɔc kë wär kë cï lɛ̈k week.”

¹⁴ Go alathkëër thiëëc an, “Na wook, eeŋö buk looi?” Go ke yɔ̈ɔ̈k an, “Ë cïn raan ruöm wek këde, ku ë cïn raan cäkï thok, ku yak piɔ̈ɔ̈th miɛt në ariöpdun.”

¹⁵ Na ɣɔn, ke kɔc kedhie ë ke jɔ ŋɔ̈th, ku jɔkï kepiɔ̈ɔ̈th cät në Jɔn, nɔn ee yen Kërtho, ku nɔn cïï en ee yen.

¹⁶ Go Jɔn bɛ̈ɛ̈r, yöök keek kedhie an, “Ya kï, wek aa baptith ë pïïu, ku ade raan bɔ̈ raan ril ë yɛn, raan cä yɛn röŋ në luɔi bän thiönh ë wɛɛrke dɔ̈k, yen abï week baptith në Wëidït ɣer ku në mac.

¹⁷ Amuk kën ee yen rap kɔ̈l ë yen, ku abï yiɛɛude nap abï lipëlip, ago agamɔde kuöt ë adhaande yic, ku nyop ayiɛl ë many cie lëu në näk.”

¹⁸ Ago kɔc lɛ̈k wël juëc kɔ̈k në guiëër ee yen keek guiëër.

¹⁹ Ku Jɔn aacï bɛ̈ny Ɣerod bɛ̈n jɔ̈ɔ̈ny në këde Ɣerodiath tiiŋ de Pilip mänhë, ku në biäk de karɛc ëbɛ̈n ka cïï ke looi,

²⁰ Go Ɣerod karɛc kedhie jɔ ŋuak nyïïn, në mäny cï en Jɔn mac në alooc yic.

Jool de Yecu

²¹ Na wën, aacï kɔc thök ë baptith kedhie, ke Yecu jɔ baptith aya, ku jɔ lɔ̈ŋ, go tënhial e yic liep

²² go Wëidït ɣer lööny ë yeguöp, ke cït guöp guuk, ku bɔ̈ röl paannhial, röl lueel en an, “Yïn ee Wëndiën nhiaar, yɛn mit piɔ̈u wokë yïn arëët.”

Kuarken ke Yecu

²³ Ɣɔn gɔlë Yecu wëët, ke runke acïk ciët thiërdiäk, ku ye wën ë Jothep (cït man ee kɔc e lueel), Jothep de Eli

²⁴ Eli de Mathat, Mathat de Lebi, Lebi de Melki, Melki de Janai në Jothep,

²⁵ Jothep de Matathiath, Matathiath de Amoth, Amoth de Naɣum, Naɣum de Ethli, Ethli de Nagai,

²⁶ Nagai de Maath, Maath de Matathiath, Matathiath de Themein, Themein de Jothek, Jothek de Joda,

²⁷ Joda de Joana, Joana de Retha, Retha de Dherubabel, Dherubabel de Caltiɛl, Caltiɛl de Neri

²⁸ Neri de Melki, Melki de Adi, Adi de Cotham, Cotham de Elmadam, Elmadam de Er,

²⁹ Er de Yecu, Yecu de Eliedher, Eliedher de Jorim, Jorim de Mathat, Mathat de Lebi,

³⁰ Lebi de Thimion, Thimion de Judath, Judath de Jothep, Jothep de Jonam, Jonam, de Eliakim,

³¹ Eliakim de Melea, Melea de Mena, Mena de Matath, Matath de Nathan, Nathan de Debid,

³² Debid de Jethe, Jethe de Obed, Obed de Bowadh, Bowadh de Thalmon, Thalmon de Nacon,

³³ Nacon de Aminadab, Aminadab de Aram, Aram de Ɣedheron, Ɣedheron de Peredh, Peredh de Juda,

³⁴ Juda de Jakop, Jakop de Yithaak, Yithaak de Abraɣam, Abraɣam de Tera, Tera de Naɣor,

³⁵ Naɣor de Thiruk, Thiruk de Riu, Riu de Pelek, Pelek de Eber, Eber de Cela,

³⁶ Cela de Cainan, Cainan de Arpakad, Arpakad de Cem, Cem de Nowa, Nowa de Lamek,

³⁷ Lamek de Mathuthela, Mathuthela de Eenok, Eenok de Jared, Jared de Maɣalaleel, Maɣalaleel de Kenan,

³⁸ Kenan de Enoth, Enoth de Theth, Theth de Adam, Adam de Nhialic.