Luk 24 - JAM DE NHIALIC 2011

Jön de rɔt

¹ Na wën, ëkööl tueŋ wën ë akööl dhorou, të cï piny ruu, ke ke bɔ̈ të nu raŋ, bïïkï wɛ̈ɛ̈l wën cïk guik wɛ̈ɛ̈l cï ŋïrëŋïr, ku cath kɔc kɔ̈k në keek.

² Gokï kuur yök aacï laar wei ë raŋ thok.

³ Na wën, aa cïk lɔ thïn, gokï guöp de Bɛ̈nydït Yecu kɛ̈n yök.

⁴ Na wën, aa ŋootkï ke ke gäi në kënë, dï, ke ke tïŋ kɔc kaarou ke ke kääc ë kelɔ̈m, aceŋkï lupɔɔ lɔ bilbil.

⁵ Na wën, ke ke päu piɔ̈th, abïk kenyïïn guöt piny, agokï ke thiëëc an, “Eeŋö kaar wek raan pïïr tëde kɔc cï thou?

⁶ Aliu ee tënë, ë rɔt jɔt: takï wenïïm në wël wään cï lɛ̈k week, ɣɔn ŋoot en Galili an:

⁷ ‘Wën ë Raan abï dhil yiɛ̈n kɔc rac, ku bï piäät ë tim cï rïïu nɔm kɔ̈u, ku bï rɔt bɛ jɔt ëkööl ee kek diäk.”’

⁸ Gokï kenïïm tak ë wëlke,

⁹ ku dhunykï kenïïm ë raŋ nɔm, lek kakë kedhie lɛ̈k kɔc kathiëër ku tök, ayï kɔc kɔ̈k.

¹⁰ Ee yï Meri Magdalene, kekë Jowana, ku Meri man Jakop, ku diëër kɔ̈k cath në keek, kek aa lëk tuuc ee kakë.

¹¹ Go wëlken ciët ɣäär yiic tëde keek, agokï ke cuö gam.

¹² Na wën, ke Petero jɔt rɔt, kɔt ke lɔ ë raŋ nɔm: le ku guŋ luiit raŋic, go lupɔɔ linɔn tïŋ ke ke tɔ̈u kapäc, go jäl le paanden ke gäi në kë cï tïc.

Kɔc lɔ Emauth

¹³ Na wën, dï, ke kɔc kaarou ë keyiic aake cath ëkööl manë guöp ke ke lɔ paan cɔl Emauth, kaam de paanë ke Jeruthalem acït meel kadhorou.

¹⁴ Ku jɔkï guïïr kapäc në kë cï tïcë kedhie.

¹⁵ Na wën, aa jamkï kapäc, ku yek röt luɔp, ke Yecu guöp cut rɔt tëthiɔ̈k, ku le cath ke keek ëtök.

¹⁶ Ku acï ke kum nyïïn, agokï cuö ŋic.

¹⁷ Go ke thiëëc an, “Ee jam ŋö guiɛɛrkï wapäc, ke we cath?” Gokï gäk ke ke kääc, ke ke gut kenyïïn piny.

¹⁸ Go raan tök ë keek, cɔl Kleopath, go bɛ̈ɛ̈r an, “Yïn ye kaman rɛ̈ɛ̈r yïtök ë Jeruthalem, ku kuc kë cï tïc ëtɛ̈ɛ̈n ë aköölkë?”

¹⁹ Go ke thiëëc an, “Ee käŋö?” Gokï lueel an, “Ka ke Yecu de Nadhareth, ee tiët ril ë luɔide ku wëlke ë Nhialic nɔm ku në kɔc nïïm kedhie.

²⁰ Ku luɔi cï bänydït ke ka ke Nhialic e yiɛ̈n miric, ayï bänykuɔn ë wo cieŋ, bï löŋde teem an, näk, gokï piäät ë tim cï rïïu nɔm kɔ̈u.

²¹ Ku wook, aa yok ŋɔ̈ɔ̈th, nɔn ee yen raan bï Yithriɛl wɛ̈ɛ̈r bei. Ku matë cöökë ë cökkë yiic ayadäŋ an, nïn acïk aa diäk ee köölë të wään tïc ee kakë.

²² Ku diëër kɔ̈k në diëër ke remda acïk wo tɔ gäi ayadäŋ, diëër cï dap riɛɛl ë raŋ nɔm wënamiäk,

²³ na wën, akënkï guöpde yök, ke ke jɔ bɛ̈n, bïk ku luelkï an, cïk tuucnhial tïŋ ë nyuuthic, tuuc wën lueel en an, a pïïr.

²⁴ Go kɔc kɔ̈k në kɔc rɛ̈ɛ̈r në wook gokï lɔ ë raŋ nɔm, lek ku yökkï ke cït man cï diäär e lueel: ku yenguöp akënkï tïŋ.”

²⁵ Go ke yɔ̈ɔ̈k an, “Agäi kɔc dhän oou, kɔc ë käŋ rɛɛc dap gam ka cï tït lueel kedhie!

²⁶ Kën Kërtho kake dhil guum, ku jɔ lɔ tëde ë dhuëëŋ?

²⁷ Na wën, ke ke wëër jam nu ë kacïgɔ̈ɔ̈r yiic kedhie, jam de yenguöp, gɔl ë Mothe aɣɔ̈l tït kedhie.

²⁸ Na wën, aa cïk thiɔ̈k ë paan le kek thïn, go an, le tueŋ.

²⁹ Gokï pëën an, “Rɛ̈ɛ̈rë we wook, piny acï aa thëën, akɔ̈l ë thiɔ̈k ke lɔ piny.” Go lɔ ɣöt le rëër ke keek.

³⁰ Na wën, aacï nyuc ke keek tën ee cam, ke nöm kuïn cï pam, leec Nhialic, ku wɛ̈ɛ̈kic, ku gëm keek.

³¹ Go ke liep nyïïn, ku jɔkï ŋic, go lɔ riär piny ë kenyïïn.

³² Gokï röt thiëëc kapäc an, “Kënku piɔ̈ɔ̈th dëp ë woyiic thïn, wën jiɛɛm en ke wook kueer, ke wëër wo kacïgɔ̈ɔ̈r?”

³³ Gokï röt jɔt ë thaar manë guöp, ku bekï kenïïm dhuöny Jeruthalem, agokï kɔc kathiëër ku tök yök acïk guëër, kekë kɔc ë rëër në keek,

³⁴ ku luelkï an, “Bɛ̈nydït acï rɔt jɔt ë yic! Ku acï tuöl tëde Thimon!”

³⁵ Go kɔc wën kaarou gokï ka cï tïc kueer guiir, ku ŋïny cï kek e jɔ ŋic ë wɛ̈ɛ̈k cï en kuïn cï pam wääkic.

Yecu Anyuth Rɔt Tuucke

³⁶ Na wën, aa ŋootkï ke ke luel kakë, ke Yecu guöp ke jɔ tuöl ë keyiic cil, yöök keek an, “Ë mät tɔ̈u ë weyiic.”

³⁷ Gokï piɔ̈ɔ̈th päu ku riɔ̈ckï arëët, luelkï an, ee jɔk en ë tïŋkï.

³⁸ Go ke thiëëc an, “Eeŋö päu wek piɔ̈ɔ̈th? Ku eeŋö luɛɛl wek kajuëc ë wepiɔ̈ɔ̈th?

³⁹ Wɔikï yacin ku yacök, nɔn ee yen yɛn guöp? Tiɛckï yɛn ku tiëŋkï, jɔk acïn rïŋ ku yom, cït man cä wek e tïŋ nɔn ciɛth kek ë yɛn.”

⁴⁰ Ku të cï en kënë lueel, ke jɔ ecin nyuöth keek ayï yecök.

⁴¹ Na wën, aa ŋootkï ke ke kën guɔ gam në miɛt mit kek piɔ̈ɔ̈th, ke ke gäi ke ke jɔ thiëëc an, “Dɛkï këcam ee tënë?”

⁴² Gokï miɔɔc në baŋ töŋ de rɛ̈c cï geet, ku athïn ë kiëc.

⁴³ Go nööm, ku jɔ cam ë kenïïm.

⁴⁴ Go keek yɔ̈ɔ̈k an, “Wëlkï kï, wël wään cä lɛ̈k week, wään ŋuɔɔt ɛn ke ya tɔ̈u wo week an, “Käŋ kedhie abïk dhil aa yith, ka cï gɔ̈ɔ̈r në këdï ë löŋ de Mothe yic, ku tït yiic, ku Diɛt yiic.”

⁴⁵ Go käŋ wɛ̈ɛ̈r keek apiɛth, ke ke bï kacïgɔ̈ɔ̈r aa yök yiic,

⁴⁶ ku yöök keek an, acï gɔ̈ɔ̈r alë an: “Kërtho abï käŋ dhil guum, ku be rɔt jɔt ë kɔc cï thou yiic ëkööl ee kek diäk,

⁴⁷ ku an, puŋdepiɔ̈u ku päl ë kërac abï ke ya guiëër juöör ëbɛ̈n në rinke, gɔl ë Jeruthalem.

⁴⁸ Ku wek ee cäätɔɔ de kakë.

⁴⁹ Ku tiëŋkï, wek tuöc kë cïï wäär lueel an, bï gam: ku week, jakï rëër ë pänydït Jeruthalem, aɣet të bï we piɔ̈th në riɛldïït bɔ̈ nhial.”

Yecu acï lɛɛr Paannhial

⁵⁰ Na wën, ke ke leer biic ɣeet keek Bethani: ku jɔ e cin jat nhial, thieei keek.

⁵¹ Na wën, aa ŋoot ke ke thieei, ke jël ë keyiic, ku jɔ jɔt leerë paannhial.

⁵² Gokï lam ku bekï kenïïm dhuöny Jeruthalem ke ke cï piɔ̈ɔ̈th miɛt arëët:

⁵³ ku yek cool ë tɔ̈u Luaŋdïtic, ke ke ye Nhialic leec. Amiin.