Luk 23 - JAM DE NHIALIC 2011

Yecu acï Bɛ̈ɛ̈i në Pilato Nɔm

¹ Na wën, ke kɔc wën cï guëër ë ke jɔt röt, ku bïïkï ë Pilato nɔm.

² Ku jɔkï gaany an, “Wo ë raanë yök, ee jurda thöi nɔm, ee kɔc pɛ̈n luɔi yïn kek Kaithar athölbö, ku ye lueel nɔn ee yen Kërtho melik.”

³ Go Pilato thiëëc an, “Ye melik de Judai?” Go bɛ̈ɛ̈r an, “Yeka, kë cï lueelë.”

⁴ Go Pilato lɛ̈k bänydït ke ka ke Nhialic ku kuut ke kɔc an, “Acïn awäny cä yök tëde ëraanë.”

⁵ Gokï ŋak nɔm awär man awën, luelkï an, “Ee kɔc riir nïïm, ë wëët ee yen kɔc wɛ̈ɛ̈t ë paan ë Judai ëbɛ̈n, gɔl ë Galili, aɣet cï eenë.”

Yecu acï Yiɛ̈n Ɣerod

⁶ Na wën, aacï Pilato ye piŋ, ke jɔ luɔp nɔn ee yen raan ë Galili.

⁷ Ku të cï en e ŋic nɔn nu yen ë ciɛɛŋ de Ɣerodic, ke jɔ tuöc Ɣerod, luɔi tɔ̈u en ë Jeruthalem ee aköölkë yen Ɣerod.

⁸ Na wën, aacï Ɣerod Yecu tïŋ, ke jɔ piɔ̈u miɛt aläl, aaye kɔɔr ë yepiɔ̈u ëcaŋɣɔn luɔi bï en e tïŋ, luɔi cï en kajuëc piŋ në këde, ku aŋäth luɔi bï en këgök bï looi tïŋ.

⁹ Go thiëëc ë wël juëc, go ciën kë cï bɛ̈ɛ̈r.

¹⁰ Ku kääc bänydït ke ka ke Nhialic ku kɔc ee löŋ gɔ̈ɔ̈r, ke gɔɔnykï arëët.

¹¹ Na wën, ke dhälkï guöp, yen Ɣerod kekë remdɛn ë tɔŋ, ku jɔkï geet guöp, agokï yiɛ̈n kɔ̈u lupɔ cï lɔ riauriau, ku jɔkï bɛ pɔ̈k nɔm Pilato.

¹² Go Ɣerod kekë Pilato gokï jɔ mat kapäc ëkööl manë guöp: wään aake de ater në röt.

Yecu acï Kuöm Thuɔɔu

¹³ Na wën, ke Pilato cɔl bänydït ke ka ke Nhialic, ku cɔɔl bäny ceŋ piny ayï kɔc kedhie an, bïk guëër,

¹⁴ ku lëk keek an, “Raanë acäk bɛ̈ɛ̈i tëde yɛn an, ee raan ë kɔc thöi nïïm: ku tiëŋkï, acä luɔp ë wenïïm, ku acïn kërɛɛc cä yök tëde raanë në ka gaany wek en.

¹⁵ Acakaa Ɣerod aya, acïn kë cï yök, acï bɛ pɔ̈k nɔm wook, ku tiëŋkï, acïn kë cï looi kë duëër en röŋ ke thuɔɔu.

¹⁶ Abä jɔ dui tei, ku ja pɔ̈l.

¹⁷ (Aa ye raan tök luöny keek ëkööl ë Dhuëëŋ de Winythok.)

¹⁸ Gokï cööt ë röl tök an, “Nyaaiyë raanë, ku luönyë wook Barabath.”

¹⁹ (Barabath ee raan cï tääu ë alooc yic në baŋ de tɔŋ cï yiɛ̈n miric ë pänydïtë, ku në baŋ de näŋ de raan.)

²⁰ Go Pilato bɛ jam ke keek, akɔɔr luɔi bï en Yecu lony.

²¹ Gokï cööt luelkï an, “Piäätë, piäätë!”

²² Go keek bɛ yɔ̈ɔ̈k raandiäk an, “Ee käŋö, ee kërɛɛc ŋö cï raanë looi? Acïn awäny cä yök tëde yen kë duëër ye nɔ̈k: yen a bän e dui ku jɔ lony.”

²³ Gokï ŋak nɔm ë röl dït, ke läŋkï an, bï piäät ë tim cï rïïu nɔm kɔ̈u. Go Pilato tiaam ë rölden.

²⁴ Go löŋ teem an, bï looi acït man ë këdɛn kɔɔrkï.

²⁵ Go raan luöny keek, raan wään cï tääu ë alooc yic në baŋ de tɔŋ cï yiɛ̈n miric ku näŋ de raan, raan wën kɔɔrkï, ku jɔ Yecu yiɛ̈n keek, bïk luöi këde piɔ̈nden.

Yecu acï Piäät ë Tim cï Rïïu Nɔm Kɔ̈u

²⁶ Na wën, athelkï ye wei, ke ke dɔm raan cɔl Thimon raan ë Kurene, ke bɔ̈ rɛɛr, gokï tim cï rïïu nɔm tääu ë yekët, bï ɣääc ë Yecu cök.

²⁷ Ku kuany cök ë kut dïït ë kɔc, ku diäär, diëër biëk kepiɔ̈ɔ̈th ku dhiëëukï.

²⁸ Go Yecu yenɔm wɛ̈l keek, ku lueel an, “Wek nyïïr ke Jeruthalem, duökï ya dhiëëu, dhiëëukï röt, ku mïthkun.

²⁹ Tiëŋkï, akööl abïk bɛ̈n, akööl bï kɔc yen aa lueel an, ‘Thieithieei ë diëër cï rol, ku madhiëth kën guɔ dhiëth, ku thin kënë kɔn thuat!’

³⁰ Ë aköölkë abï kɔc kurdït yɔ̈ɔ̈k an, ‘Wiëëkkï ë wonïïm!’ Ku yöökkï kur kor an, “Kuömkï wo piny!’

³¹ Ku na loikï kake ë tim tiɔpic, eeŋö bïk looi në tim cï riɛlic?”

³² Ku ade kɔc kɔ̈k kaarou, kɔc cï kërac looi, go ke thel në yen ëtök le ke nɔ̈k.

³³ Na wën, aa cïk ɣet të cɔl “Apet,” ke jɔkï piäät ëtɛ̈ɛ̈n ë tim cï rïïu nɔm kɔ̈u, ku piëëtkï kɔc cï kërac looi, tök ë baŋ cuënyde, ku tök ë baŋ cam.

³⁴ Na wën, ke lueel Yecu an, “Wäär, päl keek, në kuny kuc kek ke loikï.” Gokï lupɔɔke tɛ̈k röt në deeny deeny kek gɛk.

³⁵ Ku kääc kɔc juëc ë ke daai. Go bäny ceŋ piny gokï geet guöp aya, luelkï an: “Acï kɔc kɔ̈k kony, tɔ kony rɔt, tën ee yen Kërtho de Nhialic, raandɛn cï lɔc!”

³⁶ Ku get guöp ë rem de tɔŋ ayadäŋ, acïk bɛ̈n tëde yen, ku gɛ̈mkï mɔ̈n cï wac,

³⁷ ku luelkï an, “Tën ee yïn Melik de Judai, ke yï kony rɔt!”

³⁸ Ku ade jam cï gɔ̈ɔ̈r ë yenɔm nhial, në gäär de Girikii ku Roma ku Ɣeberuu an, “Kënë ee Melik de Judai.”

³⁹ Na wën, ke raan töŋ de kɔc cï piäät në yen ëtök, kɔc cï kërac looi, ke jɔ lat ë lɛ̈t rac, ku lueel an, “Na ye Kërtho, ke yï kony rɔt ku kony wook aya!”

⁴⁰ Go raan däŋ cï piäät kekë yen bɛ̈ɛ̈r, jiëëny an, “Cï ye cak riɔ̈ɔ̈c ë Nhialic, nɔn jiɛɛm yïn wuya, ke yïn cï këtuc manë yök aya?

⁴¹ Ku këtuc cuk yök wook acï tiiŋ nɔm ëgɔk, wo cï kë röŋ ke luɔida jɔ yök: ku raanë acïn kërɛɛc cï looi.”

⁴² Ku lëk Yecu an, “Bɛ̈nydït, tak yïnɔm ë yɛn, të cï yïn lɔ ë ciɛɛŋdu yic!”

⁴³ Go Yecu yɔ̈ɔ̈k an, “Yïn yɔ̈ɔ̈k ëyic an, ee köölë ke yïn bï nu wekë yɛn ë Paraditho.”

Thon de Yecu

^44-45 Na wën, të cït thaar kadhetem, ke mɔ̈ɔ̈th bɔ̈ ë piny nɔm ëbɛ̈n aɣet thaar ë dhoŋuan, akɔ̈l ë määr: ku jɔ lupɔ dïït de Luaŋdït yic rɛɛt ë ciɛɛlic.

⁴⁶ Na wën, ke Yecu cöt ë röl dït, lueel an “Wäär, wëikï a tääu keek ë yïcin!” Ku të cï en wëlkë lueel, ke jɔ thöök.

⁴⁷ Na wën, ke bɛ̈ny de tɔŋ kabɔt, të cï en kë cï tïc tïŋ, ke lec Nhialic, lueel an, “Raanë ee raan piɛthpiɔ̈u ë yic!”

⁴⁸ Ku kuut ke kɔc kedhie, kɔc wën cï guëër bïk bɛ̈n daai ee kënë, të cï kek kë cï looi tïŋ, ke ke dhuny kenïïm, ku biäkkï kepiɔ̈ɔ̈th.

⁴⁹ Go kɔc ŋic en kedhie ku diëër wään ë ye kuany cök në Galili, gokï kɔ̈ɔ̈c tëmec, ku dɛɛikï në kakë.

Täu Tɔ̈ɔ̈uwë Yecu

⁵⁰ Na wën, dï, ke raan cɔl Jothep, raan nu ë löŋ de röördït yiic, ku ye raan piɛth ku piɛth ë löŋ,

⁵¹ (raan kën löŋden gam ayï luɔidɛn cïk looi), ee raan ë Arimathia, pänydïït töŋ de Judai, ku yenguöp aŋäth ciɛɛŋ de Nhialic:

⁵² ë lɔ tëde Pilato en ee raanë, le ku lip guöp de Yecu.

⁵³ Go bɛ̈ɛ̈i piny, ku deer ë lupɔ linɔn, ku jɔ tääu ë raŋic, raŋ cï wec ë kuur lɔ giliu yic, raŋ cïn raan cï kɔn tɔ̈ɔ̈u thïn.

⁵⁴ Ku aaye kööl ë guiɛɛk, ku cï kööl ë Thabath thiɔ̈k.

⁵⁵ Na wën, ke diëër wään cï bɛ̈n bei ë Galili në yen ëtök, ke kuanykï cök, ke ke jɔ raŋ tïŋ, ku tïŋkï täu cï guöpde tɔ̈ɔ̈u.

⁵⁶ Gokï kenïïm dhuny, lek wɛ̈ɛ̈l cï ŋïrëŋïr guik ku miök. Gokï lɔ̈ŋ ëkööl ë Thabath cït man cï e lueel ë löŋic.