Luk 22 - JAM DE NHIALIC 2011

Kiɛɛr në Baŋ bï Yecu Nɔ̈k

¹ Ku Dhuëëŋ de Kuïn Cïnic Luɔu acï thiɔ̈k, Dhuëëŋ cɔl Winythok.

² Go bänydït ke ka ke Nhialic ku kɔc ee löŋ gɔ̈ɔ̈r gokï kë bï kek ë nɔ̈k kɔɔr, acïk riɔ̈ɔ̈c ë kɔc.

Judath acï Gam në Luɔi bï Yen Yecu Nyiɛɛn

³ Na wën, ke Catan lɔ ë Judath piɔ̈u, rinkɛn kɔ̈k acɔlke Yithkariɔt, ku ye raan töŋ ë kɔc kathiëër ku rou yiic.

⁴ Go lɔ le jam guiir kekë bäny ke ka ke Nhialic ku bäny ke rem de tɔŋ ke Luaŋdït, në nyiin bï en en yiɛ̈n keek.

⁵ Gokï piɔ̈ɔ̈th miɛt, ku matkï kethook, an bïk gäm wëu.

⁶ Go këden gam, ku jɔ kööl piɛth kɔɔr kööl duëër en en yiɛ̈n keek të liiuwë kuut ë kɔc.

Yecu Akïït Luɔi bï Yen Këcam de Winythok Cam

⁷ Na wën, ke akööl de Dhuëëŋ de Kuïn Cïnic Luɔu bɔ̈, kööl bï nyɔɔŋ de Winythok dhil nɔ̈k.

⁸ Go Yecu Petero tooc kekë Jɔn an, “Lak guiëkkï wook ka ke Winythok, buk lɔ cuet.”

⁹ Gokï thiëëc an, “Ee tënou kɔɔr ë yïpiɔ̈u të bï wok guik thïn?”

¹⁰ Go ke yɔ̈ɔ̈k an, “Tiëŋkï, të cä wek lɔ pänydït, ke we bï rɔ̈m në mony ɣɛ̈ɛ̈c töny ë pïïu, jakï kuany cök ɣön bï en lɔ thïn.

¹¹ Ku we bï raan de ɣöt yɔ̈ɔ̈k an, ‘Yïn thiëëc Bɛ̈ny ee wëët an, Nu ɣön ë kamaan tënou, ɣön bï wo Winythok lɔ cuet thïn wokë kɔckiën ë piööcë?’

¹² Ku abï we nyuöth ɣöndïït nu nhial ɣön de yic käŋ: jakï guik thïn.”

¹³ Gokï lɔ, ku yökkï ke cït man cï en e lɛ̈k keek, gokï ka ke Winythok guik.

Këcam Thëën de Bɛ̈nydït

¹⁴ Na wën, aacï thaar ee cam bɛ̈n, ke jɔ nyuc, ku nyuc tuuc kathiëër ku rou në yen ëtök.

¹⁵ Go ke yɔ̈ɔ̈k an, “Aa ya cök ë kaar ɛn en ë yapiɔ̈u në luɔi bï wok Winythok cuet wokë week ëtök, të ŋuɔɔt ɛn ke ya kën käŋ guɔ guum.

¹⁶ Wek yɔ̈ɔ̈k an, Yɛn cïï bï bɛ cuet ë ye ëliŋliŋ, të ŋoot en ke kën guɔ thök ë ciɛɛŋ de Nhialic.”

¹⁷ Na wën, ke nöm bïny, ku leec Nhialic, ku lueel an, “Nämkï kënë, bäk tɛ̈k röt.

¹⁸ Wek yɔ̈ɔ̈k an, Yɛn cïï bï bɛ dek në mïth ke enap, të ŋootë ciɛɛŋ de Nhialic ke kën bɛ̈n.”

¹⁹ Na wën, ke nöm kuïn cï pam, ku leec Nhialic, ku wɛ̈ɛ̈kic, ku yïn keek, lueel an, “Guöpdï kï, guöpdiën cï gam në baŋdun week, yak kënë looi në täŋ bä wek wenïïm aa tak në yɛn.

²⁰ Ku të cï këcam thök, ke jɔ looi aya në bïny, ku lueel an, “Bïnyë ee löŋ cï piac mac në riɛmdï, riɛm bï kuëër në baŋdun week.

²¹ Ku tiëŋkï, ciin ë raan nyiin ɛn anu ë pam ë cäm nɔm kekë ciindï ëtök.

²² Wën ë Raan alɔ, ëyic, cït man cï e kɔn lueel an, bï dhil lɔ: ku amawoou në ëraanë raan bï e nyiɛɛn!

²³ Ku jɔkï röt luɔp an, “Eeŋa në woyiic raan bï kënë looi?

Teer në biäk de Dït

²⁴ Go ater rɔt cak ë keyiic an, “Ee raanou bï tɔ dït ë woyiic.

²⁵ Go keek yɔ̈ɔ̈k an, “Meliik ke Juöör ayek kɔc cieŋ, ku bäny ee kɔc cieŋ aye ke tɔ ye adhuëŋ.

²⁶ Ku week, we cïï bï ciët keek, ku raan ë weyiic në ye ciët mɛnh koor: ku raan ë ya bɛ̈ny, ka bï ya ciët raan ë kɔc luööi.

²⁷ Ku eeŋa dït, raan ee rëër tën ee cam, ku ye raan ë kɔc luööi? Cie raan ë rëër tën ee cam? Ku yɛn ee tɔ̈u ë weyiic cil cït raan ee kɔc luööi.

²⁸ Ku week, dï, wek ee kɔc ee cool ë tɔ̈u në yɛn ëtök ë thëmdiën cï a themic,

²⁹ ku wek yiɛ̈n ciɛɛŋ, cït manë cï e yiɛ̈n ɛn ë wäär,

³⁰ bäk aa cam ku dɛ̈kkï ë pamdï nɔm ë ciɛɛŋdï yic, ku we bï aa rëër ë thöny nïïm ku guiɛɛrkï löŋ de dhiëën ke Yithriɛl kathiëër ku rou.

Yecu Anyooth Luɔi bï Petero Ye Jai

³¹ “Na wën, ke lueel Bɛ̈nydït an, “Thimon, tïŋ, Catan acï we kɔɔr arëët luɔi bï en we nööm, bï we kïïc cït man ë agamɔ:

³² ku yɛn cï lɔ̈ŋ në biäkdu, ke gämdu cïï bï dak: ku yïn, të cï yïn yïpiɔ̈u guɔ puk, ke yï rit mïthëkɔckun piɔ̈ɔ̈th.”

³³ Go lueel an, “Bɛ̈nydït, të mɛcë wo wo yïn ëtök ë alooc yic, arëk të ciɛk wok thou ëtök, ke yɛn duëër gam!”

³⁴ Go lueel an, “Yïn yɔ̈ɔ̈k, Petero an, ajïth acïï bï kɔn kiiu ee köölë, të ŋoot yïn ke yï kën a jai raandiäk, an, akuöc.”

Anyɔŋɔ ku Athep ku Abätäu

³⁵ Na wën, ke ke thiëëc an, “Wään tuɔɔc ɛn week ke cïn anyɔŋɔ ë wëu, ku cïn athep ë këcam, ku cïn war, de kë cï we bɛ̈n dak?” Gokï an, “Acïn këdäŋ.”

³⁶ Go ke yɔ̈ɔ̈k an, “Ku ënɔɔnë, raan de anyɔŋɔ ë wëu, ke nööm, ku nöm athep ë këcam aya: ku raan cïn nɔm abätäu, ke ɣɔɔc lupɔde, ɣöc en rɔt abätäu.

³⁷ Wek yɔ̈ɔ̈k an, cöökë, cöök cï gɔ̈ɔ̈r në këdï, aŋoot ke bï dhil thök ë yaguöp, cöök cï lueel an, ‘Acï mat kekë kɔc ee löŋ dhɔ̈ŋic ëtök,’ kakï yɛn adekï thökden aya, thök bï kek thök.”

³⁸ Gokï lueel an, “Bɛ̈nydït, tïŋ, Abätɛ̈ɛ̈u kï, kaarou.” Go lueel an, “Ë loi.”

Yecu Aläŋ në Kuur de Olip Nɔm

³⁹ Na wën, ke lɔ biic, le kuur ë Olip, cït man ee yen cool ë lɔ, ku kuɛny kɔckɛn ë piööcë cök aya.

⁴⁰ Ku të cï en ɣet ëtɛ̈ɛ̈n, ke ke jɔ yɔ̈ɔ̈k an, “Läŋkï, ke we cïï bï lɔ ë thëmic.”

⁴¹ Ago rɔt mɛ̈ɛ̈c ke keek të duëër raan cuööp të dɛɛny en kɔɔi, go emiɔl tuk, ku lɛ̈ŋ,

⁴² An, “Wäär na nu ë yïpiɔ̈u, ke yï nöm bïnyë tëde yɛn, ku acie këde piɔ̈ndï tei, tɔ loi ee këde piɔ̈ndu.”

⁴³ Go tunynhial tuöl tëde yen, ke bɔ̈ nhial, bï ye bɛ̈n riit piɔ̈u.

⁴⁴ Na wën, aacï piɔ̈u jiɛth arëët, ke jɔ lɔ̈ŋ arëët awär man awën: arëk abï tunyde aa thuat cït man ë rim dït kɔ̈ɔ̈th ke ke lööny piny.

⁴⁵ Na wën, aacï rɔt jɔt tëdɛn ë lɛ̈ŋ en, ke jɔ bɛ̈n tëde kɔcpiööcë, ku yök keek anin në jiɛth wën cï kek piɔ̈ɔ̈th jiɛth.

⁴⁶ Go ke yɔ̈ɔ̈k an, “Eeŋö niënkï? Jatkï röt, läŋkï, ke we cïï bï them.”

Döm de Yecu

⁴⁷ Ku të ŋoot en ke jam, dï, ke kut ë kɔc ë ke bɔ̈, awɛt raan cɔl Judath keek, ee raan töŋ de kɔc kathiëër ku rou, ku jɔ ɣet të nu Yecu le ciim.

⁴⁸ Go Yecu thiëëc an, “Judath, nyiɛɛnë Wën ë Raan në ciëm?”

⁴⁹ Na wën, aacï kɔc nu ë yelɔ̈ɔ̈m kë bï lɔ̈ɔ̈k tïc tïŋ, ke jɔkï thiëëc an, “Bɛ̈nydït, buk kip ë abätäu?”

⁵⁰ Go raan tök ë keek go lïm de bɛ̈nydïït ë kake Nhialic kiɛp yïc wei, yïny cuëc.

⁵¹ Go Yecu bɛ̈ɛ̈r an, “Jakï pɔ̈l ë pëk aya!” Na wën, ke jiɛk yïc, tɔ dem.

⁵² Go Yecu bänydït ke ka ke Nhialic thiëëc ku thiëëc bäny ke Luaŋdït, ku röördït, kɔc wën bïï tɔŋ tëde yen an, “Cäk bɛ̈n biic cït man ë ka yïn tɔŋ cuɛ̈ɛ̈r, ke we muk abätɛ̈ɛ̈u ku thieec?

⁵³ Wään aa yɛn cool ë rëër wokë week Luaŋdïtic, wek ë kën a dɔm: apiɛth, kööldun kï ee kënë, ku ye riɛl ë cuɔlëpiny.”

Petero Ajiɛi Yecu

⁵⁴ Na wën, ke dɔmkï, ku thelkï, leerkï ɣön ë bɛ̈nydïït ë kake Nhialic. Go Petero lɔ̈ɔ̈k kuany cök ke mec.

⁵⁵ Na wën, ke kɔc ë ke koth mac ë gɔ̈ɔ̈lic cil, ku jɔkï nyuc ëtök, go Petero lɔ nyuc ë keyiic.

⁵⁶ Na wën, ke tïŋ nyan lïm tök ke cï yenɔm kum go jɔ toom guöp arëët, go lueel an, “Raanë aa ye cath ke yen aya!”

⁵⁷ Go jai an, “Tik, ee raan kuöc!”

⁵⁸ Na wën, ee tëthiinë, ke tïŋ raan däŋ, go lueel an, “Yïn ee raan töŋden aya!” Go Petero jai an, “Mɔny, yɛn cie raanden!”

⁵⁹ Na wën, të cït thaar tök, ke ŋɛk ë raan däŋ an, “Ee yic, raanë aaye cath ke yen, ë luɔi ee yen raan ë Galili!”

⁶⁰ Go Petero lueel an, “Mɔny, yɛn kuc kë lueel!” Na wën, aŋoot ke jam, ke ajïth jɔ guɔ kiiu ënɔnthiinë.

⁶¹ Go Bɛ̈nydït rɔt puk, woi Petero. Go Petero yenɔm tak ë wël ke Bɛ̈nydït, në lëk cï en e lɛ̈k en an, “Të ŋootë ajïth ke kën kiiu ee köölë, ke yïn bï a jai raandiäk.”

⁶² Go lɔ biic, le dhiau ë dhiën kec.

Yecu Adɔl Guöp ku Dui

⁶³ Na wën, ke kɔc muk Yecu ke getkï guöp, ku duikï.

⁶⁴ Agokï kum nyin, ku jɔkï yup nyin, ku thiëckï an, “Luel! Eeŋa raan ë yup yïn?”

⁶⁵ Ku lɛ̈ɛ̈tkï arac në wël juëc kɔ̈k wël rac.

Yecu acï bɛ̈ɛ̈i ë Luk Nɔm

⁶⁶ Na wën, aacï piny guɔ ruu, ke amatnɔm ë röördït jɔ guëër, kekë bänydït ke ka ke Nhialic ayï kɔc ee löŋ gɔ̈ɔ̈r, gokï thel leerkï ë löŋdenic, ku luelkï an,

⁶⁷ “Tën ee yïn Kërtho, ke lɛ̈kë wook.” Go lueel an, “Ciɛk an, lɛ̈k week, ka cäkï bï gam,

⁶⁸ ku të thiɛ̈ɛ̈c ɛn week, ka cäkï bï bɛ̈ɛ̈r, ku cäkï ya päl.

⁶⁹ Gɔl ënɔɔnë, ke Wën ë Raan abï rëër ë biäk cuëny de riɛldïït ë Nhialic.”

⁷⁰ Gokï thiëëc kedhie an, “Ka yïn jɔ ya Wën ë Nhialic?” Go ke yɔ̈ɔ̈k an, “Ye ka, kë cäk lueelë.”

⁷¹ Gokï lueel an, “Eeŋö däŋ kɔɔr wok cäätɔ däŋ? Wogup acuk piŋ ë yethok!”