Luk 21 - JAM DE NHIALIC 2011

Miɔ̈c de Tiiŋ cïn Nɔm Moc

¹ Na wën, ke liec nhial, ku jɔ kɔc juëc ë wëuken tïŋ ke ke cuɛt kaken të wën ee ye Nhialic miɔɔc.

² Ago tiiŋ tök tïŋ aya tiiŋ kuany nyin cïn nɔm moc, ke cuɛt wëu thiiakäŋ kaarou thïn, ka cït miliim.

³ Go lueel an, “Wek lɛ̈k ëyic an, “Tiiŋ kuany nyinë tiiŋ cïn nɔm moc acï käŋ cuat thïn awär kɔc kedhie.

⁴ Kɔckë kedhie acïk käŋ cuat tën ee Nhialic miɔɔc në juëc ë wëuken, ku tiiŋë në kuany wën kuɛɛny en nyin acï këdɛn bï en pïïr cuat thïn ëbɛ̈n.”

Yecu Ajam në biäk de Riääk de Luaŋdït

⁵ Na wën, aa jam kɔc kɔ̈k ë këde Luaŋdït, kiëër cï e kiir ë kur cï läk ku ka cï kɔc gäm Nhialic, ke jɔ lueel an:

⁶ “Në ee ka wɔikï yë, akööl abïk bɛ̈n, kööl bï ke dhuöör piny, ka cïn kuur töŋ bï bɛ tɔ̈u ë kuur däŋ nɔm.”

Nuɛɛn ku Yaaŋdït

⁷ Gokï thiëëc an, “Bɛ̈ny ee wëët, bï kake jɔ tïc nɛn? Ku bï kɔc akööl ŋic në ŋö kööl kɔɔr ee kakë tuöl?

⁸ Go lueel an, “Yak röt tiit, ke we cïï bï math: kɔc juëc abïk bɛ̈n në rinkï, bïk ku lueelkï an, ‘Ya kï!’ Ku an, ‘Piny ë guɔ thiɔ̈k!’ Duökï ke kuany cök.

⁹ Ku të ya wek tɔɔŋ piŋ ayï awënwën ë kɔc, duökï piɔ̈th ee päu: kakë abïk dhil kɔn tïc, ku thök bï käŋ thök aŋoot.

¹⁰ Go keek yɔ̈ɔ̈k an, “Jurë abï tɔŋ yiɛ̈n jurë, ku yïn ciɛɛŋë tɔŋ ciɛɛŋë.

¹¹ Ku piny abï rɔt niɛŋ tɛ̈ɛ̈n ku tɛ̈ɛ̈n, ku bɔ̈ cɔŋdït ku jɔɔk ee kɔc thöl, ku ka ye kɔc tïŋ agokï riɔ̈ɔ̈c abïk nu ayï kagöök bɔ̈ nhial.

¹² Ku të ŋootë kakë wei, ke we bïï kɔc dɔm, ku yɔŋkï week, ku leerkï week ë ɣööt ke Nhialic yiic, ku tɛ̈ɛ̈ukï week ë aloc yiic, ku we bï aa bɛ̈ɛ̈i ë meliik nïïm ku bäny nïïm në biäk de rinkï.

¹³ Ku abï rɔt pɔ̈k week ago aa cäätɔdun.

¹⁴ Yen aa wek löŋ dhek ë wepiɔ̈ɔ̈th, ke we cïï bï diɛɛr ë wepiɔ̈ɔ̈th në bëër bä wek aa bëër,

¹⁵ we bä gäm thook pɛlënɔm, ke kɔc de ater në week ke ke cïï bëër bëër kek këdun bï lëu, ayï teer teer kek në week aya.

¹⁶ Ku we bï kɔc ë dhiëth week nyiɛɛn, ku nyiin mïthëkɔckun week, ayï kɔc raan ë week, ayï määthkun, ku kɔ̈k në weyiic abï ke tɔ näk abïk thou.

¹⁷ Ku we bïï kɔc maan kedhie në biäk de rinkï.

¹⁸ Ku acïn nhiëm töŋ de weknïïm bï määr.

¹⁹ We bï wëikun yök në guöm aa wek käŋ ŋiëc guum.

Yecu Ajam në biäk de Riääk ë Jeruthalem

²⁰ “Ku na tiëŋkï Jeruthalem acï tuɔɔk ë rɛm ke tɔŋ, ke jakï ŋic nɔn cï riääkde thiɔ̈k.

²¹ Ëköölë, ë kɔc nu Judaya ë ke kɔt lekï ë kurdït nïïm, ku kɔc nu baai ë ke jël lek biic, ku kɔc nu rɛɛr ya ë ke cïï be lɔ thïn.

²² Aköölkë ee akööl ke guur, kööl bï kacïgɔ̈ɔ̈r thöl ë luɔi kedhie.

²³ Ku amawoou në diëër liac ku diëër thuat ë aköölkë! Jiɛthëpiɔ̈u abï dït ë piny nɔm, ku agönh ë Nhialic abï lööny ee kɔckë yiëth.

²⁴ Ku abï ke nɔ̈k ë abätäu, ku pec ke leerëke ë Juöör yiic ëbɛ̈n: ku Jeruthalem abï käcic ë Juöör, a thöökë run ke Juöör.

Bɛ̈n de Wën ë Raan

²⁵ Ku kagöök abïk tïc ë akɔ̈l nyin, ku pɛɛi nyin, ku kuɛl nyïïn, ku në piny nɔm jiɛthëpiɔ̈u abï nu ë juöör yiic, ku mumënɔm, wɛ̈ɛ̈r abï awuööu de apiöök amaŋ thïn.

²⁶ Kɔc abïk wëi miɛt në riɔ̈ɔ̈c, ku diɛɛr ee kek diɛɛr në kë bɔ̈ ë piny nɔm, karil nu tënhial abï ke niɛŋ.

²⁷ Na ëlë, ke kɔc abïk Wën ë Raan tïŋ a bɔ̈ ë luätic ke cath ke riɛldït ku dhuëëŋ dït.

²⁸ Ku të cï kakë röt gɔl ë bɛ̈n, jakï nhial lieec, ku jatkï wenïïm, wɛ̈ɛ̈rduön bï we wɛ̈ɛ̈r bei ee guɔ thiɔ̈k.”

Kääŋ de Wëët ë Tim de Ŋaap

²⁹ Go keek lɛ̈k kääŋ an: “Wɔikï ŋaap, ayï tiim kedhie.

³⁰ Të cï kek guɔ nyok, ke jakï tïŋ aguɔkï ŋic guöp nɔn cï deŋ amäi thiɔ̈k.

³¹ Yen a bä wek thiɔ̈k cï ciɛɛŋ de Nhialic thiɔ̈k ŋic aya, të tiëŋ wek kakë abɔ̈.

³² Wek yɔ̈ɔ̈k ëyic an, “Rem de ënɔɔnë acïï bï thök, të ŋootë kakë ke ke kën thök ë bɛ̈n kedhie.

³³ Tënhial ku piny abïk liu, ku wëlkï acïkï bï liu ananden.

Yak Röt Tiit

³⁴ “Yak röt tiit, ke we cïï piɔ̈ɔ̈th bï aa thiäŋ në kajuëc yak cam, ku wïn ee mɔu we wit, ku diɛɛr në ka ke pïïr ënɔɔnë, ke we cïï ëköölë bï mook ëthiäu.

³⁵ Ku acït man dhie dɔmë lɛ̈i ë wiën yen abï ëköölë kɔc mook kedhie ëthiäu kɔc rɛ̈ɛ̈r ë tiɔp nɔm ëbɛ̈n.

³⁶ Yen aa wek röt tiit, ku yak cool ë lɔ̈ŋ ë aköölnyïïn kedhie, ke bï we tɔ ye kɔc ee röŋ në luɔi bä wek poth ë ka bï bɛ̈në kedhie, aguɔkï kɔ̈ɔ̈c ë Wën ë Raan nɔm.”

³⁷ Ku ye kɔc wɛ̈ɛ̈t Luaŋdïtic aköl, na thëën, ke ye lɔ biic le niin në kuur ë Olip nɔm.

³⁸ Go kɔc aa riëël miäk ëtɛ̈ɛ̈n kedhie bïk tëde yen ë Luaŋdïtic, bïk këde bɛ̈n piŋ.