Luk 20 - JAM DE NHIALIC 2011

Thiëc në Biäk de Riɛl ë Yecu

¹ Na ɣɔn, ëkööl tök ee nïnkë yiic, të wëët en kɔc ë Luaŋdïtic, ku guiir wëlpiɛth, ke bänydït ke ka ke Nhialic ku kɔc ee löŋ gɔ̈ɔ̈r, ke ke jɔ bɛ̈n në röördït ëtök,

² bïk ku luelkï an, “Lɛ̈kë wook, ee riɛlou ee yïn ee kakë looi? Ku eeŋa ee raan ë gëm yïn ee riɛlë?”

³ Go pɔ̈k nɔm keek an, “Ku yɛn aya, we bä thiëc cöök tök, ku abäk bɛ̈ɛ̈r:

⁴ an Baptinh ë Jɔn, ë bɔ̈ nhial, ku ë bɔ̈ tëde kɔc?”

⁵ Gokï kenïïm cät kapäc an, “Të lueel wok en an, ‘Aa bɔ̈ nhial,’ ka bï lueel an, ‘Eeŋödäŋ kɛ̈n wek egam?’

⁶ Ku na luelku yen an, ‘Aa bɔ̈ tëde kɔc,’ wo bïï kɔc biɔ̈ɔ̈k ë kɔi kedhie: luɔi cï kek Jɔn gam ëgɔk an, ee tiët.”

⁷ Gokï bɛ̈ɛ̈r an, “Akucku të ë bï en thïn.”

⁸ Go Yecu ke yɔ̈ɔ̈k an, “Ayï yɛn aya, we cä lëk riɛl luɔɔi ɛn ee kakë.”

Kääŋ de Kɔc Tit Dom de Enap

⁹ Na wën, ke jɔ kɔc lɛ̈k kääŋë an: “Raan anu raan cï dom com, dom de tim cɔl enap, ago kuɛ̈i kɔc bï en aa tiit, ku jɔ keny paan mec ë pɛ̈i juëc.

¹⁰ Na wën, aacï pɛɛi ë luɔk ë tiim bɛ̈n, ke jɔ lïm tök tuöc kɔc ee dom tiit an, bïk miɔɔc në ka cï luɔk ë dom ë tiim yiic: go kɔc ee dom tiit gokï dui, ku jɔkï cieec, ke cïn kë muk.

¹¹ Go lïm däŋ bɛ tooc: gokï dui aya, ku lɛ̈ɛ̈tkï arëët, ku jɔkï cieec, ke cïn kë muk.

¹² Go däŋ bɛ tooc, gokï dui abïk yiëk tëtök, ku jɔkï cuat ë dom këc.

¹³ Na wën, ke jɔ bɛ̈ny de dom lueel an, ‘Eeŋö bä looi? Wëndiën nhiaar abä tooc: abï dɛ të bï kek e riëëu të tïŋ kek en!’

¹⁴ Ku të cï kɔc ee dom tiit e tïŋ, ke ke jɔ kethook mat an, ‘Wën bï käŋ lɔ̈ɔ̈k lak kï. Bäk näkku, ke ke buk lɔ̈ɔ̈k lak bï aa këda!’

¹⁵ Gokï cuat biic ë dom këc, ku jɔkï nɔ̈k. Bï bɛ̈ny de dom ke jɔ luöi ŋö?”

¹⁶ “Abï bɛ̈n bïï kɔc ee dom tiitë bɛ̈n nɔ̈k, ku jɔ dom yiɛ̈n kɔc kɔ̈k.” Na wën, aa cïk e piŋ, ke jɔkï lueel an, “Tɔ pëën Nhialic en ee kënë!”

¹⁷ Go keek woi, ku lueel an, “Kënë ee kaŋö kë cï këcïgɔ̈ɔ̈rë lueel an, ‘Kuur cïï ë yïk rɛɛc, Yen manë guöp acï tɔ ye kuur ë aguk nɔm.’

¹⁸ Raan bï kuurë lööny ë yenɔm, ka bï mot abï ciët abuui!”

Thiëc në Biäk de Kun ë Athölbö

¹⁹ Ku bänydït ke ka ke Nhialic ku kɔc ee löŋ gɔ̈ɔ̈r akɔɔrkï luɔi bï kek e dɔm ë thaar manë guöp, ee riɔ̈ɔ̈c riɔ̈ɔ̈c kek ë kɔc tei: aŋickï nɔn ë lueel en kääŋë në këden.

²⁰ Gokï tiit, ku jɔkï nëëm tooc, kɔc bï röt kɔ̈c tɔkï röt ë kɔc piɛth, bïk jamdɛn bï wööc bɛ̈n jɔt, agokï yiɛ̈n bɛ̈ny, le löŋde guiir.

²¹ Gokï thiëëc an, “Bɛ̈ny ee wëët, yïn ŋicku nɔn ee yïn käŋ lueel apiɛth ku wɛ̈ɛ̈të kɔc apiɛth, ku cïï kɔc ee kuany yiic, ku ye kɔc wɛ̈ɛ̈t ë kueer ë Nhialic në yic.

²² Cï pal wook an, buk Kaithar kuöt athölbö, ku cie ye?”

²³ Go ruëënyden ŋic, ku yöök keek an, “Eeŋö thɛm wek ɛn?

²⁴ Nyuöthkï yɛn rial tök. Ee raanou cï gɔ̈ɔ̈r ë yekɔ̈u, ayï rinke?” Gokï bɛ̈ɛ̈r an, “Ee Kaithar.”

²⁵ Go keek yɔ̈ɔ̈k an, “Yak Kaithar yiɛ̈n ka ke Kaithar, ku yak Nhialic yiɛ̈n ka ke Nhialic.”

²⁶ Ku akënkï lëu në jön bï kek jamë jɔt ë kɔc nïïm: acïk gäi në bëër cï en e bɛ̈ɛ̈r, ku jɔkï mim.

Thiëc në Biäk de Jönërɔt ë Thuɔɔuwic

²⁷ Na wën, ke kɔc kɔ̈k ke Thadokai ke ke jɔ bɛ̈n tëde yen, kek kɔc wën ee jai an, acïn jön bï kɔc röt jɔt nu, bïk ku thiëckï an,

²⁸ “Bɛ̈ny ee wëët, acï Mothe gäär wook an, ‘Të cï mänhë ë raan thou, ku de nɔm tik, ku thou ke cïn meth mänhë abï rëër kekë tiiŋde, dhiëëth mänhë nɔm.’

²⁹ Ku aa de raan ë de nɔm wɛ̈ɛ̈t kadhorou: ku jɔ wëndït tik thiaak, ago thou ke cïn meth.

³⁰ Na wën, ke wën lɔ ë yecök jɔ rëër kekë tiiŋde, ku jɔ thou ke cïn meth.

³¹ Go wën ee kek diäk jɔ rëër kekë yen, ayï wɛ̈ɛ̈t ciëën kedhie ayadäŋ: ku acïn mïth cïk nyääŋ piny, ku jɔkï thou.

³² Na wën, ke tik löök thou ë ke cök ciëën aya.

³³ Na ënɔɔnë, ëkööl ë jönërɔt ë kɔc, ke tiiŋë bï aa tiiŋ ë ŋa ë keyiic? Acï rëër ke keek kadhorou.

³⁴ Go Yecu bɛ̈ɛ̈r, yöök keek an, “Mïth ke pinyë nɔm ayek thiëëk, ku ye ke thiaak,

³⁵ ku kɔc bï tɔ ye kɔc röŋ në ɣet bï kek ɣet pinytui, ku yökkï jönërɔt ë kɔc cï thou yiic, acïkï bï aa thiëëk, ku cïï ke bï aa thiaak,

³⁶ ku cïkï duëër bɛ thou aya: acïk thöŋ ë tuucnhial, ku ayek wɛ̈ɛ̈t ke Nhialic, wɛ̈ɛ̈t ke jönërɔt.

³⁷ Ku jön ee kɔc cï thou jɔt, en acï Mothe nyuöth week në gäärdɛn ɣɔn gɛ̈ɛ̈r në këde but, ɣɔn cï en Bɛ̈nydït tɔ ye ‘Nhialic de Abraɣam, ku Nhialic de Yithaak, ku Nhialic de Jakop.’

³⁸ Acie Nhialic de kɔc cï thou, ee Nhialic de kɔc pïïr: kɔc kedhie apïïrkï në yen.”

³⁹ Go kɔc kɔ̈k ë kɔc ee löŋ gɔ̈ɔ̈r gokï bɛ̈ɛ̈r an, “Bɛ̈ny ee wëët, yïn ë löŋ tiiŋ nɔm!”

⁴⁰ Na wën, ke ke jɔ riɔ̈ɔ̈c në thiëc bï kek e bɛ thiëc käŋ.

Thiëc në Biäk de Kërtho

⁴¹ Go ke thiëëc an, “Eeŋö lueelë kɔc en an, Kërtho ee wën ë Debid?

⁴² Ku acï Debid guöp lueel në awerek de Diɛtic, an, ‘Bɛ̈nydït acï Bɛ̈nydiëndït yɔ̈ɔ̈k an: Nyuc ë ciin cuënydï,

⁴³ Aɣet të bän kɔc de ater në yïn tɔ ye kën ee yïn yïcök dhɔ̈ɔ̈r.’

⁴⁴ Aye Debid tɔ ye ‘Bɛ̈nydït’, ku jɔ aa wënde adï?”

Yecu Ajäny Kɔcpiööcë bïk Röt Tiit në Kɔc ee Löŋ Gɔ̈ɔ̈r

⁴⁵ Na wën, ke yöök kɔckɛn ë piööcë abï kɔc piŋ kedhie an,

⁴⁶ “Yak röt tiit ë kɔc ee löŋ gɔ̈ɔ̈r, kɔc kɔɔr cath ke ke ceŋ lupɔɔ bär, ku nhiaarkï thiëc ee kɔc röt thiëc ë thuk yiic, ku nhiaarkï ɣään piɛth ë ɣööt ke Nhialic yiic ayï ɣööt ke këcam yiic,

⁴⁷ ku yek ɣööt ke diëër cïn nïïm röör cam yiic, ku yek lɔ̈ŋ ë lɔ̈ŋ bäär thiɛɛn kek kërɛɛcden: këdɛn tuc bïk yök kek ee kɔckë abï dït!”