Luk 19 - JAM DE NHIALIC 2011

Yecu kekë Dhakayo

¹ Na wën, ke lɔ ku reet Jeriko yic.

² Ku ade raan, dï, raan cɔl Dhakayo, ku ye bɛ̈ny ee kɔc ë athölbö tɔ kut, ku ye raan juëc ë wëuke.

³ Ku akɔɔr ë yepiɔ̈u luɔi bï en Yecu tïŋ nɔn ee yen raan yïndï, ku acïn luɔi duëër en e tïŋ ë baŋ de kut ë kɔc, në ciɛk cek en.

⁴ Go kat, ke lɔ tueŋ, le kɛɛc ë ŋaap nɔm, ke bïï tïŋ: luɔi kɔɔr en tëëk ëtɛ̈ɛ̈n.

⁵ Na wën, aacï Yecu ɣet ëtɛ̈ɛ̈n, ke jɔ nhial lieec, go tïŋ ku yöök an, “Dhakayo, dap bɛ̈n piny, yɛn bï dhil rëër ɣöndu ee köölë.”

⁶ Go dap kɛɛc piny, ku jɔ loor ke mit piɔ̈u.

⁷ Na wën, aa cïk e tïŋ ke ke ŋun ë keyäc kedhie, luelkï an, “Acï rɔt lɔ tɔ ye kaman ë raan ee kërac looi.”

⁸ Go Dhakayo rɔt jɔt, ku yöök Bɛ̈nydït an, “Tïŋ, Bɛ̈nydït, biäk töŋ de kakï abä yɛn ke kɔc kuanynyïïn miɔɔc, ku na de këde raan däŋ cä nööm në gööny ë lueth, ka bä bɛ cuööt ë ŋuan.”

⁹ Go Yecu lueel an, “Kunydewëi acï bɛ̈n ëköölë, luɔi ee yen wën ë Abraɣam aya.

¹⁰ Wën ë Raan aa bɔ̈ bï kë cï määr bɛ̈n kɔɔr, ku bï bɛ̈n kony wëi.”

Kääŋ de Wëu

¹¹ Na wën, aa piŋkï wëlkë, ke jɔ jam ŋuak lëk keek kääŋ, luɔi cï en thiɔ̈k ke Jeruthalem, agokï lueel, ë kepiɔ̈ɔ̈th an, bï ciɛɛŋ de Nhialic dap tuöl.

¹² Ago lueel an, “Ade bɛ̈ny cï keny paan mec, le lupɔ nööm ëtɛ̈ɛ̈n, bï aa melik de ciɛɛŋ, ku bï yenɔm bɛ lɔ dhuny.

¹³ Na wën, ke cɔl lïïmke kathiëër, ku gëm keek jinii kathiëër, go keek yɔ̈ɔ̈k an, ‘Ɣaackï keek aɣet të bän lɔ bɛ̈n.’

¹⁴ Ku amɛɛn kɔc ke paanden, gokï kɔc tuɔɔc ë yecök, kɔc bï e lɔ lueel an, ‘Wo cïï raanë kɔɔr luɔi bï en wo cieŋ.’

¹⁵ “Na wën, aacï e nɔm dhuny, ke cï aa melik de ciɛɛŋ, ku jɔ kɔc yɔ̈ɔ̈k an, bï lïïmke cɔ̈l en, kɔc wään cï yiɛ̈n wëu, ke bï kë cïk yök ë ɣööc ŋic, raan ëbɛ̈n.

¹⁶ Go lïm tök kɔn bɛ̈n tueŋ, bï ku lueel an, ‘Bɛ̈ny, jinidu acï jinii bɛ̈ɛ̈i kathiëër.’

¹⁷ Go yɔ̈ɔ̈k an, ‘Apiɛth, yïn ee lïm piɛth: nɔn cï yïn këthiinakäŋ ŋiëc döt, ke yïn bï aa bɛ̈ny ceŋ pɛ̈ɛ̈nydït kathiëër.’

¹⁸ Na wën, ke lïm ee kek rou jɔ bɛ̈n, bï ku lueel an, ‘Bɛ̈ny, jinidu acï jinii bɛ̈ɛ̈i kadhïc.’

¹⁹ Go mɛnhë yɔ̈ɔ̈k aya an, ‘Yïn aya yïn bï aa bɛ̈ny ceŋ pɛ̈ɛ̈nydït kadhïc.’

²⁰ Na wën, ke lïm däŋ bɔ̈, bï ku lueel an, ‘Bɛ̈ny, tïŋ, jinidu kï, acä duut ë lupɔ ku tääu,

²¹ yɛn ë riɔ̈ɔ̈c ë yïn, luɔi ee yïn raan rilic, yïn ee käŋ kuany ka kɛ̈në tääu piny, ku yïn ee käŋ tem ka kɛ̈në com.’

²² Go yɔ̈ɔ̈k an, ‘Në wëlkuön cï lueel, kek abän ke löŋdu guiir, yïn ee lïm rac. Yïn cï a ŋic nɔn aa yɛn raan rilic, nɔn aa yɛn käŋ kuany ka kɛ̈n tääu piny, ku nɔn aa yɛn käŋ tem ka kɛ̈n com:

²³ eeŋö kën yïn wëukï yiɛ̈n kɔc ë käŋ kan na ënɔɔn cän bɛ̈në, ka dï cä kakï yök acï ke nyïïn ŋuak?’

²⁴ Go kɔc kääc ëtɛ̈ɛ̈n yɔ̈ɔ̈k an, ‘Nämkï jinii tëde yen, ku gämkï raan wën de jinii kathiëër!’

²⁵ Gokï lueel an, ‘Bɛ̈ny, acath ke jinii kathiëër!’

²⁶ Wek yɔ̈ɔ̈k an, “Raan cath ke käŋ abï miɔɔc, ku raan cïn ka cath ke yen, acakaa kë cath ke yen abï nööm tëde yen.

²⁷ Ku jakï kɔckë bɛ̈ɛ̈i kɔc de ater në yɛn, kɔc wään reec ɛn an, cä bï aa melik bï keek cieŋ, bɛ̈ɛ̈ikï ke ku näkkï ke ë yanɔm!”’

Yecu alɔ Jeruthalem ke cï Tiam

²⁸ Na wën, aacï kakë lueel, ke lɔ ë kenïïm tueŋ, kuany kueer lɔ Jeruthalem.

²⁹ Na wën, aacï thiɔ̈k ke Bethpage kekë Bethani, në kuurdïït cɔl kuur ë Olip, ke jɔ kɔckɛn ë piööcë tooc kaarou,

³⁰ Ku lueel an, “Lakï paan nu ë wenïïm tueŋ, ku të cä we lɔ thïn, ke we bï mɛnh ë muul yök ke mac, mɛnh cïn raan cï kɔn cath ë yekɔ̈u: luɔnykï, ku bɛ̈ɛ̈ikï ee tënë.

³¹ Ku na de raan thiëc week an, eeŋö luönykï yen? Ka bäk pɔ̈k nɔm en alë an, ee luɔi kɔɔrë Bɛ̈nydït en.”

³² Go kɔc wën cï tooc lɔ, lek ku yökkï ke cït man wën cï en e lueel.

³³ Na wën an, lonykï ye, ke ke jɔ kɔc de mɛnh ë muul thiëëc an, “Eeŋö luönykï mɛnh ë muul?”

³⁴ Gokï lueel an, “Ee Bɛ̈nydït en akɔɔr en.”

³⁵ Gokï bɛ̈ɛ̈i tëde Yecu: ku jɔkï lupɔɔken cuat ë mɛnh ë muul kɔ̈u, ku tɛ̈ɛ̈ukï Yecu ë yekɔ̈u.

³⁶ Na wën, të ciɛth en, ke ke jɔ lupɔɔken aa thiɛth piny kueer.

³⁷ Ku të cï en guɔ thiɔ̈k ke pänydït, ku cï ɣet ë kuur ë Olip thar, ke kut dïït ë kɔc piööcë ëbɛ̈n ke ke jɔ piɔ̈ɔ̈th miɛt ku leckï Nhialic ë röl dït në baŋ de luɔi dït ëbɛ̈n luɔi cïk tïŋ,

³⁸ luelkï an, “Thieithieei Melik bɔ̈ në rin ke Bɛ̈nydït! Ë mät tɔ̈u paannhial, ku tɔ̈u dhuëëŋ tënhial ya!”

³⁹ Go kɔc kɔ̈k ke Parithai nu ë kut ë kɔc yiic, gokï lueel an, “Bɛ̈ny, jäny kɔckuön ë piööcë!”

⁴⁰ Go pɔ̈k nɔm keek an, “Wek yɔ̈ɔ̈k an, të miimë kɔckë, ke kɔi gup aduëërkï cööt ënɔnthiinë.”

Yecu Adhiëëu Jeruthalem

⁴¹ Na wën, aacï guɔ thiɔ̈k, ke woi pänydït, ke jɔ dhiau,

⁴² Lueel an, “Tëë yï cï ka ke mändu guɔ ŋic oou, yïn guöp, ëköölduönë yoou! Ku ënɔɔnë, acï ke guɔ thiaan ë yïnyin.

⁴³ Akööl abïk bɛ̈n tëde yïn, akööl bï kɔc dɛ wek ater yï geeu në rek, agokï yï tuɔɔk, ku jɔkï yï pɛ̈n lɔ biic ë wut këc ëbɛ̈n.

⁴⁴ Ku abïk yï rai piny abä nɔm kït we piny, yïn wekë mïthkuön nu ë yïyic, ku acïn kuur töŋ bïk nyääŋ piny ë kuur däŋ nɔm ë yïyic, luɔi kuc yïn kööl ë nɛ̈mduön cï yï neem!”

Yecu alɔ në Luaŋdïtic

⁴⁵ Go lɔ ë Luaŋdïtic, le ku cieec kɔc wën ee käŋ ɣaac thïn, ayï kɔc wën ee käŋ ɣɔɔc,

⁴⁶ ku yöök keek an, “Ë gɔ̈ɔ̈r an, ‘Luaŋdiën dït ee ɣön de lɔ̈ŋ.’ Ku week, acäk tɔ ye ɣön ë cuɛ̈ɛ̈r.”

⁴⁷ Go kɔc aa wɛ̈ɛ̈t ë Luaŋdïtic ë aköölnyïïn. Ku bänydït ke ka ke Nhialic ku kɔc ee löŋ gɔ̈ɔ̈r ku röördït ë kɔc yiic akɔɔrkï näŋ bï kek e nɔ̈k.

⁴⁸ Ku acïn kë cïk yök kë bïk looi: kɔc ëbɛ̈n ayek gɛ̈ɛ̈k ë yelɔ̈ɔ̈m, ke ke piŋ wëlke.