Luk 14 - JAM DE NHIALIC 2011

Yecu atɔ Raan de Guöp Juäi Dem

¹ Na ɣɔn, ke lɔ ɣön ë bɛ̈ny tök ë bäny ke Parithai yiic, le cam ë kuïn ëkööl ë Thabath, ku jɔkï toom guöp.

² Ku ade raan tɔ̈u ë yenɔm, dï, raan cï bɔ̈ɔ̈t guöp.

³ Go Yecu bɛ̈ɛ̈r, thiëëc bäny ke löŋ ku Parithai, an, “Cï päl kɔc an, bïk kɔc tɔ dem ëkööl ë Thabath?”

⁴ Gokï lɔ lik. Na wën, ke nööm tɔ dem, ku tɔ jël.

⁵ Ku jɔ pɔ̈k nɔm keek, an, “Eeŋa në weyiic, raan de muul ayï thɔn, na lööny yiith, ke cïï bï dap miëët bei ëkööl ë Thabath?”

⁶ Agokï wëlkë cuö lëu ë bëër.

Koorë rɔt Piny kekë Dhuëëŋ

⁷ Na wën, ke jɔ kɔc wën cï cɔɔl lɛ̈k kääŋ, wën cï en keek tïŋ, acïk tëpiɛth ë rëër lɔc, yöök keek an:

⁸ “Të cï raan yï cɔɔl ë thiëëkic, ke yï du nyuc tëpiɛth, na alë, le raan dït ë yïn cɔɔl,

⁹ ku jɔ raan ë cɔl week bɛ̈n, bï ku yöök yïn an, ‘Nyai, pätë raanë.’ Ke yïn bï jɔ yäär, ku jɔ lɔ nyuc këc ya.

¹⁰ Ku na cɔl raan yïn, ke yï jɔ nyuc këc, na ëlë, lɔ raan wën ë cɔl yïn bɛ̈n, ke jɔ yï yɔ̈ɔ̈k an, ‘Mäth, bä tëpiɛth.’ Ke yïn bï lɛc yök ë kɔc nïïm kɔc rɛ̈ɛ̈r në yïn ëtök tëde cäm.

¹¹ Raan ëbɛ̈n raan ee rɔt tɔ dït abï tɔ koor, ku raan ee rɔt kuɔɔr piny, yen abï tɔ dït.”

¹² Go raan wën cɔl en yɔ̈ɔ̈k an, “Të looi yïn këcamdït ayï miäk ayï thëën, ke yï du määthku cɔl, ayï kɔc raan wek, ayï kɔc rɛ̈ɛ̈r wek ëtök kɔc cï bäny, ke ke cïï yï bï bɛ cɔɔl, cuutkï yïn.

¹³ Ku të looi yïn këcamdït, ke yï cɔl kɔc kuanynyïïn, ku ŋöl, ku kɔc ee kɔm, ku cöör:

¹⁴ ke yïn bï jɔ thieei, në luɔi cïn kek kë bï kek yï cuööt: yïn bï cuööt tei ëkööl ë jönërɔt ë kɔc piɛthpiɔ̈ɔ̈th.”

Kääŋ de Këcamdït

¹⁵ Na wën, ke raan tök ë kɔc wën rɛ̈ɛ̈r në yen ëtök tëde cäm, të cï en ee kakë piŋ, ke jɔ lueel an, “Thieithieei raan bï kuïn cam ë ciɛɛŋ de Nhialicic!”

¹⁶ Go yɔ̈ɔ̈k an, “Ŋadï acï këcamdït looi, ku jɔ kɔc juëc cɔɔl.

¹⁷ Na wën, aacï kööl ë cäm guɔ bɛ̈n, ke toc lïmde le kɔc wën cï cɔɔl lɔ yɔ̈ɔ̈k, an, ‘Bäkï, käŋ acïk guɔ thök kedhie!’

¹⁸ Gokï kethook mat në köc bï kek röt kɔ̈c. Acï raan tök lueel an, ‘Yɛn ë dom piac ɣɔɔc, ka bä dhil lɔ tïŋ. Yïn läŋ, an päl ɛn.’

¹⁹ Ku jɔ raan däŋ lueel an, ‘Yɛn ë miöör ɣɔɔc kathiëër, bïk aa luui, renë pei ku renë pei, ku yɛn lɔ la keek them: yïn läŋ an, päl ɛn.’

²⁰ Ku be däŋ lueel an, “Yɛn cï tiiŋdï thiaak, en acä yɛn duëër lɔ.’

²¹ Go lïm lɔ bɛ̈n ku jɔ bɛ̈nyde lɛ̈k kakë. Go bɛ̈ny de ɣöt gɔ̈th, ku yöök lïmde an, ‘Dap lɔ biic lɔ kuɛɛr ke pänydït kuɛɛr dït yiic ku kuɛɛr kor yiic, lɔ bɛ̈ɛ̈iyë kɔc kuanynyïïn ee tënë, ku ŋöl, ku kɔc ë kɔm, ku cöör.’

²² Na wën, ke jɔ lïm lueel an, ‘Bɛ̈ny, wëlkuön wën acä ka looi, ku ɣöt aŋoot ke dakic.’

²³ Go bɛ̈ny lïm yɔ̈ɔ̈k an, ‘Jël lɔ ë kuɛɛr yiic ku kɛ̈l kɔ̈ɔ̈th, ku dhil ke thel abïk dhil bɛ̈n, ke ɣöndï abï thiäŋ.

²⁴ Wek yɔ̈ɔ̈k an, acïn raan töŋ de kɔc cä kɔn cɔɔl bï këcamdï thiëëp.”’

Kuën de Raan ë Piööcë

²⁵ Ku cath kuut dït ke kɔc në yen: go rɔt puk, yöök keek an,

²⁶ “Na bɔ̈ raan tëde yɛn, ku cïï wun man, ku cïï man man, ku cïï tiiŋde man, ku mïthke, ku mïthëkɔcken, ku nyïïrëkɔcken, yeka, acakaa wëiken guöp ayadäŋ, ka cïï duëër aa raandiën ë piööcë.

²⁷ Ku raan cï timdɛn cïï rïïu nɔm ee ɣääc, ku jɔ yɛn aa kuany cök, ka cïï duëër aa raandiën ëpiööcë.

²⁸ Eeŋa në weyiic, raan de piɔ̈u luɔi bï en aloocdïït bäär yïk, ke cïï bï kɔn nyuc piny, ku jɔ wëu bï kɔɔr kueen, nɔn de wëu cath në yen bï en ke ye thöl?

²⁹ Na kën e looi, ke miäk, të cï en alooc kiɛɛr piny, ku kën lëu në thöl, ka bïï kɔc deet, kɔc cï e tïŋ, luelkï an,

³⁰ ‘Raanë acï aloocdïït bäär gɔl ë yïk, ku akën bɛ̈n lëu ë thöl!’

³¹ Ku ye melikou, të de yen piɔ̈u luɔi bï en tɔŋ yiɛ̈n melik däŋ, ke cïï bï kɔn nyuc piny, ago yenɔm cät, nɔn duëër en lɔ kekë aguum kathiëër de kɔc lɔ tɔŋ yiɛ̈n bɛ̈ny cath ke aguum kathiërrou de kɔc?

³² Ku na cï ë dhal, të ŋootë bɛ̈ny däŋ ke mec, ke jɔ kɔc tuɔɔc lek mät thiëëc tëde yen.

³³ Yen acït week aya, raan ëbɛ̈n ë weyiic raan cïï kake päl kedhie, ka cïï duëër a raandiën ë piööcë.”

Amilɔ cïn Naamde

³⁴ “Amilɔ yen apiɛth: ku të cï amilɔ jɔ liɛɛr, ke bï bɛ wac adï?

³⁵ Acïï piɛth ke dom, ku cïï piɛth ke töŋ ë dhiën, aye kɔc cuat wei tei. Raan de yïth ee yen ke piŋ, ke pïŋ!”