Luk 13 - JAM DE NHIALIC 2011

Puk Rɔt në Karɛcku Yiic ku nɔn bä Thou

¹ Ku ade kɔc ë nu ëtɛ̈ɛ̈n ëköölë guöp kɔc ë lëk Yecu në këde kɔc ke Galili, kɔc wään cïï Pilato riɛmden liääp kekë kakɛn cïk lam ku näkkï ke.

² Go Yecu bɛ̈ɛ̈r, yöök keek an, “Në wek an rac kɔc ke Galilikë, awär kɔc ke Galili kedhie, luɔi cï kek ka cït ee kakë yök?

³ Wek yɔ̈ɔ̈k an, acie yen, ku të kɛ̈n wek wepiɔ̈ɔ̈th puk, ke we bï thou wedhie cït man ë kek.

⁴ Ayï kɔckë kathiëër ku bɛ̈t, kɔc wään cï aloocdïït bäär nu Thilowam wïïk ë kenïïm, ago ke nɔ̈k ë wek an rackï awär kɔc rɛ̈ɛ̈r ë Jeruthalem kedhie?

⁵ Wek yɔ̈ɔ̈k an, acie yen, ku të kɛ̈n wek wepiɔ̈ɔ̈th puk, ke we bï thou wedhie cït man ë kek.

Kääŋ de Ŋam cie Luɔk

⁶ Na wën, ke luel kääŋë aya an: “Ŋadï ade ŋaap cï com domde, na wën, ke bɔ̈ bï mïthke bɛ̈n kɔɔr, ku acïn kë cï yök.

⁷ Ku jɔ raan ee luui domic yɔ̈ɔ̈k an, ‘Tïŋ, run kadiäk yɛn ee mïth bɛ̈n kɔɔr tëde ŋaapë, ku acïn kë cä yök, yiɛpë wei, eeŋö kum en piny youyou?’

⁸ Go bɛ̈ɛ̈r, lueel an, ‘Bɛ̈ny, bɛyë pɔ̈l atɔ̈u ë run töŋë aya, abä wec thar, aguɔ yiëk thar wär:

⁹ aa le luɔk, ka piɛth: na kën luɔk, ka bä jɔ yiɛp wei.”’

Yecu atɔ Tiiŋ Aduany Dem ë Thabath

¹⁰ Ku aa wëët kɔc ɣön tök ë ɣööt ke Nhialic yiic ëkööl ë Thabath.

¹¹ Ku ade tiiŋ nu ëtɛ̈ɛ̈n, dï, tiiŋ cath ke jɔŋ ë ye tɔ kɔ̈c guöp ë run kathiëër ku bɛ̈t, ku acïï jɔk tot kɔ̈u, ku acï ee kɔ̈u ë lëu ë jöt.

¹² Na wën, aacï Yecu ye tïŋ, ke jɔ cɔɔl, yöök an, “Tiiŋë, yïn cï lony ë jɔŋdu!”

¹³ Go ecin thany ë yeguöp: na wën, ee tëthiinë, ke jɔ yekɔ̈u rïc, ago Nhialic leec.

¹⁴ Go bɛ̈ny de ɣön ë Nhialic gɔ̈th, luɔi cï Yecu raan tɔ dem ëkööl ë Thabath, ku jɔ bɛ̈ɛ̈r, yöök, an, “Akööl kadhetem anukï kööl duëërë kɔc ke luui thïn: yak bɛ̈n ë aköölkë yiic bï we bɛ̈n tɔ dem, ku duökï ë bɛ̈n ëkööl ë Thabath!”

¹⁵ Go Bɛ̈nydït puk nɔm, yöök an, “Yïn raan de yäc aguk, raan ëbɛ̈n ë weyiic cïï thɔnde ë lony ayï mulde tën ee yen rem thïn ëkööl ë Thabath, ku jɔ thɛl wïïr le dek?

¹⁶ Ku na tiiŋë, nyan ë Abraɣam, nyan cïï Catan mac, dï, ë run kathiëër ku bɛ̈t, cïï duëërë lony ë jonh mɛc en ëkööl ë Thabath?”

¹⁷ Na wën, aacï kakë lueel, ke kɔc de ater në yen ke ke jɔ yäär: go kɔc piɔ̈ɔ̈th miɛt kedhie në ka cï looi ka deyiic dhuëëŋ kedhie.

Kääŋ de Nyin töŋ de Matharda

¹⁸ Go lueel an, “Cït ciɛɛŋ de Nhialic ŋö? Ku bä thɔ̈ŋ ŋö?

¹⁹ Acït nyin töŋ de matharda, cïï raan nööm, ku cuɛt ë domde yic, ago cil, abï aa tim dït, ku jɔ diɛt nhial aa rëër ë kërke nïïm.”

Kääŋ de Luɔu

²⁰ Go bɛ lueel an, “Bä ciɛɛŋ de Nhialic thɔ̈ŋ ŋö?

²¹ Acït luɔu cïï tik nööm, ku jɔ tääu ë aköp wacic, cït aduuk kadiäk, aɣet të bï en tuak ëbɛ̈n.”

Kal Koor Thok

²² Go wuöt caath yiic ayï bɛ̈i yiic, ke jɔ cath ke wëët kɔc, ke lɔ Jeruthalem.

²³ Go raan tök thiëëc an, “Bɛ̈nydït, kɔc bï kony wëi, kek lik?” Go ke yɔ̈ɔ̈k an,

²⁴ “Yak cök ë thɛm wek en arëët luɔi bä wek tëëk ë kalthok thoŋ kooric: wek yɔ̈ɔ̈k an, kɔc juëc abïk lɔ thïn kɔɔr, ku acïkï bï lëu.

²⁵ Rial, të cï bɛ̈ny de ɣöt rɔt guɔ jɔt ku jɔ ɣöt thiöök thok, ku we bï jɔ kɔ̈ɔ̈c biic, ku taŋkï ɣöt thok, ku luɛlkï an, ‘Bɛ̈nydït, liëpë we ɣöt!’ Ku abï bɛ̈ɛ̈r, yöök week an, ‘Wek kuöc të bä wek thïn!’

²⁶ Ku abäk jɔ lueel an, ‘Wok a ye cam ku yok dek ë yïnɔm, ku yïn aaye wëët ë kuɛɛrkuɔ yiic!’

²⁷ Ku abï lueel an, ‘Wek yɔ̈ɔ̈k an, wek kuöc të bä wek thïn, jälkï ë yalɔ̈ɔ̈m, wek kɔc ë kërac looi wedhie!’

²⁸ Të cä wek Abraɣam tïŋ, ku tiëŋkï Yithaak, ku Jakop, ku tït kedhie, ë ciɛɛŋ de Nhialic yic, ku wegup ku cï we ciɛɛc biic, ke dhiëëu abï nu kekë ŋëny de lec!

²⁹ Ku kɔc abïk bɛ̈n të lɔ aköl amiäk ku bïkkï të lɔ aköl athɛ̈i, ku rut, ku wöuwic, bïk ku nyuckï ë ciɛɛŋ de Nhialic yic.

³⁰ Ku tiëŋkï, ade kɔc nu ciëën ënɔɔnë kɔc bï lɔ tueŋ, ku de kɔc nu tueŋ ënɔɔnë kɔc bï lɔ ciëën.”

Nhiëër Nhiɛɛr ë Yecu Jeruthalem

³¹ Na ɣɔn, ëkööl manë guöp, ke kɔc kɔ̈k ë Parithai ke ke bɔ̈, bïk ku yöökkï an, “Nyai, jël ee tënë: Ɣerod ade piɔ̈u luɔi bï en yï nɔ̈k.”

³² Go keek yɔ̈ɔ̈k an, “Lakï, yɔ̈ɔ̈kkï awantui an, ‘Tïŋ, yɛn ciec jɔɔk rac ku ja kɔc tɔ dem ëköölë ku miäk, ku na ëkööl ee kek diäk ke yɛn ë guɔ thök.’

³³ Ku yɛn bï dhil cath ëköölë ku miäk ku miäk ruu: acïn tiët duëër thou roor ku cïï thou ë Jeruthalem.

³⁴ Jeruthalem oou, Jeruthalem oou, paan ë tït nɔ̈k, ku biöök kɔc në kur kɔc cï tuöc yïn, ee nïn kadï cän piɔ̈u dɛ kum kuöm ɛn mïthku, cït man ee ajïth mïthke kum ë yewuök, ku acäk rɛɛc!

³⁵ Tiëŋkï, ɣöndun acï nyäŋ week ke yäär. Ku wek yɔ̈ɔ̈k ëyic an, we cïï a bï bɛ tïŋ, aɣet kööl bä wek e lueel an, ‘Thieithieei raan bɔ̈ në rin ke Bɛ̈nydït.”’