Luk 12 - JAM DE NHIALIC 2011

Jäny në biäk de Ruëëny

¹ Ɣɔn aacï kuut ke kɔc jɔ guëër, kuut cïï raan ke duëër lëu ë kuɛ̈n, arëk abï kɔc kecök aa käc, ke jɔ jam gɔl kekë kɔckɛn ë piööcë an, “Yak röt tiit ë luɔi de Parithai, yen aye aguk nu ë raan yäc.

² Acïn kë cï kum, kë cïï bï liep nɔm, ku acïn kë cï moony, kë cïï bï ŋic.

³ Yen ka, këriëëc cäk lueel tëcol ëbɛ̈n abï ke piŋ tëɣer, ku kë cäk tuöm ë raan yïc ë ɣööt yiic thïn abï guiir ë röl dït ë ɣööt nïïm.

Raan bä Wek Riɔ̈ɔ̈c

⁴ “Ku wek yɔ̈ɔ̈k, wek määthkï an, duökï ee riɔ̈ɔ̈c ë kɔc näk kɔc gup abïk thou, ku acïn däŋ bïk bɛ lëu.

⁵ Ku we bä nyuöth raan bä wek aa riɔ̈ɔ̈c ë yen: Yak riɔ̈ɔ̈c në raan ë kɔc kɔn nɔ̈k abïk thou, na ëlë, ke de riɛl bï en ke cuat ë giɛna yic, yeka, wek yɔ̈ɔ̈k an, Yak riɔ̈ɔ̈c në yen!

⁶ “Amɔ̈r kadhïc cïï ke ee ɣaac ë miliim kaarou? Ku acïn tök ë keek töŋ ee Nhialic möör nɔm.

⁷ Acakaa nhïm gup nhïm ke wenïïm acï ke kueen kedhie. Duökï riɔ̈c, wek wär amɔ̈r juëc në piath!

Gäm ku Reec de Kërtho

⁸ “Wek yɔ̈ɔ̈k aya an, Raan ëbɛ̈n raan ee ya gam ë kɔc nïïm, yen abïï Wën ë Raan gam aya ë tuuc ke Nhialic nïïm.

⁹ Ku raan ee ya jai ë kɔc nïïm, yen abä jai ë tuuc ke Nhialic nïïm.

¹⁰ “Ku raan ëbɛ̈n raan ë Wën ë Raan lɛ̈k jam rac, ka duëërë päl en, ku raan ë Wëidït ɣer läät acïï duëërë pɔ̈l.

¹¹ “Ku të ye kek week bɛ̈ɛ̈i ë ɣööt ke Nhialic yiic ku bäny nïïm bäny ee löŋ guiir, ku bäny ee kɔc cieŋ, ke we duökï ë diɛɛr në wël bäk bɛ̈ɛ̈r, ku në kë bäk lueel.

¹² Wëidït ɣer abïk we wɛ̈ɛ̈t ë thaar manë guöp në kë bäk dhil lueel.”

Kääŋ de Raan Dhɔ̈n Kueth

¹³ Na wën, ke lëkë raan töŋ de kut ë kɔc en an, “Bɛ̈ny, lɛ̈kë wänmääth, buk ka cïï wääda nyäŋ piny tek.”

¹⁴ Go lueel an, “Ŋadï, eeŋa cï a tɔ ye bɛ̈nyduön ë luk ku ya bɛ̈ny ee week tɛ̈k käŋ?”

¹⁵ Go keek yɔ̈ɔ̈k an, “Yak röt tïŋ, ku tiɛtkï röt në kɔ̈ɔ̈r ë kajuëc, juëc de ka nu ë raan cin acïï en ke ee pïïr.”

¹⁶ Go keek lɛ̈k kääŋ an, “Raan cï bäny anu raan cï pinyde luɔk arëët.

¹⁷ Ago cät ë yepiɔ̈u an, ‘Eeŋö bä looi, nɔn cïn en të bän kakiën cï luɔk tääu thïn?’

¹⁸ Go lueel an, ‘Abä looi alë: Adhɛnkï abä ke ŋaany, aguɔ ka wär keek yïk: ku ja kakiën cï luɔk kedhie tääu thïn ayï wëukï.

¹⁹ Ku yɛn bï piɔ̈ndï yɔ̈ɔ̈k an, piɔ̈ndï, kakuön juëc acï ke tɔ̈ɔ̈u bïk run juëc lɛɛr, jɔ lɔ̈ŋ tei, ye cam, ku ye dek, abä piɔ̈u aa miɛt.’

²⁰ Na wën, ke yöök ë Nhialic an, ‘Yïn dhɔ̈n! Ëlëwakɔ̈u wëiku abï ke cɔɔl tëde yïn: ku kakuön cï guik bïk guɔ aa ka ke ŋa?”’

²¹ Go Yecu lueel an, “Raan ee rɔt kuɛ̈t wëu juëc, ku cie bäny ë ka ke Nhialic, yen acït ee raanë.”

Ŋäth Nhialic

²² Na wën, ke yöök kɔckɛn ë piööcë an, “Yen a yɔ̈ɔ̈k ɛn week an, “Duökï ee diɛɛr ë wëikun në kë bäk aa cam, ku duökï ee diɛɛr ë wegup, në kë bäk aa cieŋ.

²³ Wëi adïtkï awärkï këcam, ku guöp apiɛth awär lupɔ.

²⁴ Wɔikï gɛk col, acïkï ee pur, ku acïkï ee tem, ku acïnkï ɣöndɛn ë rap ayï adhaan, ku aye Nhialic ke cääm! Ŋuän ŋuään wek ë diɛt yïndï?

²⁵ Ku eeŋa në weyiic raan duëër bɛ̈ɛ̈rde ŋuak ë kaam tök në diɛɛr wën ee yen diɛɛr?

²⁶ Na cäkï ye bï lëu ayï të ciɛk en aa luɔi koor, ke eeŋö ya wek diɛɛr në luɔi kɔ̈k kedhie?

²⁷ Wɔikï agurbiök cil ciil kek: acïn luɔi yek looi, ku acïn alɛɛth yek wii, ku wek yɔ̈ɔ̈k an, acakaa Tholomon kekë dhuëëŋde ëbɛ̈n akën rɔt piöth cït tök në kakë yiic.

²⁸ Ku na ye Nhialic wɛl roor piöth alë, wɛl tɔ̈u roor ëköölë, ku na miäk ke cuɛtë mɛɛc, ke cïï we bï piöth ë piöth wär piöthden arëët, wek kɔc dɛk ë gäm!

²⁹ Ku duökï kë bäk aa cam ee kɔɔr, ayï ka bäk aa dek, ku duökï ee diɛɛr ë wepiɔ̈ɔ̈th.

³⁰ Kakë kedhie aye juöör ke piny nɔm ke kɔɔr: ku aŋic Wuöördun nɔn bä wek dhil dɛ kakë.

³¹ Yak ciɛɛŋ de Nhialic kɔn kɔɔr, ku kakë abï ke juɛ̈k week kedhie.

Kuɛth nu Paannhial

³² “Du riɔ̈c, yïn luny koor: anu ë Wuöördun piɔ̈u luɔi bï en we miɔɔc ë ciɛɛŋ.

³³ Ɣaackï ka cath në week, ku miackï kɔc kuanynyïïn, yak röt luɔi anyɔŋɔɔ cïï bï dhiap, yak wëu kueet paannhial wëu cïï bï thök, të cïn cuɛ̈ɛ̈r bï ɣëët tëthiɔ̈k, ku të cïn kɔ̈m bï ke riɔ̈ɔ̈k.

³⁴ Të nu wëukun, yen abï piɔ̈ndun nu thïn aya.

Lïïm ee Ruu Ke Ke Tït

³⁵ Yak tɔ̈u ke we duööt yiic, ku dɛ̈p mɛ̈ckuön ë alath.

³⁶ Ku wegup yak rëër cït kɔc tit bɛ̈nyden, në dhuny bï en enɔm dhuny ë thiëëkic, na alë, bï ku tɔɔŋ ɣöt thok, ka bïk dap liep en ënɔnthiinë.

³⁷ Thieithieei lïïmkë, lïïm bïï bɛ̈ny yök ke ke tit käŋ, kööl bï en bɛ̈n! Wek yɔ̈ɔ̈k ëyic an, abï ë yic duut, ku jɔ ke tɔ nyuc tën ee cäm, ago bɛ̈ny ke yiɛ̈n këcam.

³⁸ Ku na bï të cï piny dït, ku të kiiuwë ajïth, ku yök keek aya, thieithieei lïïmke!

³⁹ Ku jakï kënë ŋic an, tëë bɛ̈ny de ɣöt ŋic thaar bï cuɛ̈ɛ̈r bɛ̈n thïn, adï cï yïn, ku cïï ɣönde päl a thur kɔ̈u.

⁴⁰ Ku week, yak röt coc aya, Wën ë Raan abɔ̈ ë thaar kuöckï.”

Lïm Adöt ku Lim cie Adöt

⁴¹ Go Petero thiëëc an, “Bɛ̈nydït, kääŋë lɛ̈kë wook, ku lɛ̈kë kɔc kedhie ayadäŋ?”

⁴² Go Bɛ̈nydït lueel an, “Eeŋa ye raan tit dhiën, raan adöt ku de nɔm, raan bïï bɛ̈nyde tääu ë dhiënde nɔm, bï kɔc aa tɛ̈k këcam ëkööldɛn cï lueel?

⁴³ Thieithieei lïmë, lïm bïï bɛ̈nyde yök ëkööl bïï yen, ke looi aya.

⁴⁴ Wek yɔ̈ɔ̈k an, abï jɔ tääu ë kakë nïïm kedhie.

⁴⁵ Ku na jam lïmë ë yepiɔ̈u an, bɛ̈nydï acï gääu ë bɛ̈nde, ago wɛ̈ɛ̈t lïïm gɔl ë dui ayï duet lïïm, ku ye cam ku ye dek ku ye rɔt tɔ wit mɔ̈u,

⁴⁶ ke bɛ̈ny de lïmë abï bɛ̈n ëkööl kënë ye tiit, ku në thaar kuc, ku jɔ dui arëët, ago mat kekë kɔc reec gäm.

⁴⁷ Ku lïm wään ŋic këde piɔ̈n ë bɛ̈nyde, ku cïï rɔt ee coc, ku cïï këde piɔ̈n ee bɛ̈nyde ë looi, yen abï dui ë wɛt juëc.

⁴⁸ Ku raan cï këde piɔ̈n ë bɛ̈ny kuc, ku cï käŋ looi ka röŋ ë luɔi bï ye dui, yen abï dui ë wɛt lik. Raan ëbɛ̈n raan cï yiɛ̈n kajuëc, abï thiëc kajuëc, ku raan cï kɔc kuɛ̈i kajuëc, en abïk thiëc kajuëc wär kɔc kɔ̈k.

Yecu Yen Atek Kɔc Yiic

⁴⁹ Yɛn ë bɔ̈ bä mac bɛ̈n cuat ë piny nɔm, ku dɛ piɔ̈u ŋö, të cï ë guɔ kooth?

⁵⁰ Ku yɛn de baptith bï a dhil baptith ë ye, ku yɛn cï piɔ̈u jiɛth aläl të ŋoot en ke kën kɔn thök!

⁵¹ Luɛlkï nɔn bä yɛn bä mät bɛ̈n bɛ̈ɛ̈i ë piny nɔm? Wek yɔ̈ɔ̈k an, acie yen, ater en a bɛ̈ɛ̈i.

⁵² Gɔl ënɔɔnë, kɔc kadhïc abïk keyiic tek ɣön tök, diäk abïk dɛ ater në rou, ku rou në diäk.

⁵³ Wun meth abï dɛ ater ke wënde, ku bï wënde dɛ ater ke wun, ku man duet kekë nyande, ku nyande kekë man, ayï man mony ë duet kekë tiiŋ de wënde, ku tiiŋ de wënde kekë mamɔɔcde.

Ŋïny de Akööl

⁵⁴ Ku yöök kuut ë kɔc aya an, “Të tiëŋ wek luät ke tul të lɔ aköl athɛ̈i, ke wek ayak dap lueel an, deŋ abɔ̈, ago bɛ̈n.

⁵⁵ Ku të putë yom ke ye wöuwic, ke wek ayak lueel an, piny abï tuöc, ago tuöc.

⁵⁶ Wek kɔc de yäc aguk, wek ee tënhial ŋic ayï piny täu bï kek tɔ̈u, ku eeŋö kuöc wek ee köölë täu bï en tɔ̈u?

Mätë Wekë Raan de Aterdu

⁵⁷ Ku eeŋö cä wek löŋ ee guiir apiɛth wapäc ayadäŋ?

⁵⁸ Na lɔ we raan de ater ke yïn ë bɛ̈ny nɔm, ke yï them mät wekë yen kueer, ke cïï yï bï thɛl ë bɛ̈ny ë löŋ guiir nɔm, ago bɛ̈ny ë löŋ guiir yï yiɛ̈n bɛ̈ny de rem, ku bï bɛ̈ny de rem yï cuat ë aloocic.

⁵⁹ Yïn yɔ̈ɔ̈k an, yïn cïï bï bɛ̈n bei, të ŋoot yïn ke yï kën käŋ cool kedhie, ayï miliim.”