Luk 11 - JAM DE NHIALIC 2011

Yecu Awɛ̈ɛ̈t në këde Lɔ̈ŋ

¹ Na wën, a lɛ̈ŋ tëdäŋ, ku jɔ lɔ̈ŋ pɔ̈l, go raan töŋ ë kɔckɛn ë piööcë lueel an, “Bɛ̈nydït, wɛ̈ɛ̈të wook ë lɔ̈ŋ, acït man wëëtë Jɔn kɔckɛn ë piööcë aya.”

² Go ke yɔ̈ɔ̈k an, “Të ya wek lɔ̈ŋ, ke yak lueel an, ‘Wäärda nu paannhial, tɔ rinku riëëuwë. Tɔ ciɛɛŋdu bɔ̈. Ye këde piɔ̈ndu tɔ loi ë piny nɔm, cït man ee ye looi paannhial.

³ Ye wo miɔɔc ë aköölnyïïn ë kë buk aa cam.

⁴ Ku ye wo päl karɛckuɔ, ku wook aya wo ye kɔc pɔ̈l kedhie kɔc cath në känykuɔ. Ku du wook ee lɛɛr ë thëmic, ye wo luök ë kërac.”’

⁵ Go lɛ̈k keek an, “Eeŋa në weyiic, raan de mɛ̈thë, ku bï lɔ tëde yen ë wɛ̈ɛ̈ric cil, ku lueel an, ‘Mäth, dhɛ̈në ya kuïïn cï pam kadiäk.

⁶ Ade mɛ̈thëdiën cï bɛ̈n të nuö yɛn, ke këny, ku acïn kë gɔɔŋ ɛn en!’

⁷ Go raan nu ɣööt lueel an, ‘Du ya jut guöp! Ɣöt acï guɔ gäär, ku mïthkï acïk tɔ̈c ë yayɔu në agen nɔm, yɛn cïï rɔt duëër jɔt, la yï miɔɔc?’

⁸ Wek yɔ̈ɔ̈k an, Ciɛk, an, cïï rɔt bï cak jɔt, miɔɔc, në baŋ de määth, ka bï rɔt dhil jɔt ku jɔ miɔɔc në ka kɔɔr kedhie, në baŋ wën cool en ë lip.

⁹ Ku wek yɔ̈ɔ̈k an: Yak lip, ke we bï aa miɔɔc, yak köör, ku abäk aa yök, yak ɣöt tɔɔŋ thok, ku abï liëp week.

¹⁰ Raan ëbɛ̈n raan ee lip, aaye miɔɔc, ku raan ee köör ee yök, ku raan ë ɣöt tɔɔŋ thok aye liep ɣöt.

¹¹ Ku na de raan ë weyiic raan de nɔm mïth, ku të lip mɛnhde kuïn tëde yen, bï miɔɔc ë kɔɔi? Ku na lip rɛ̈c, bï miɔɔc ë kërac, le ë nyin ë rɛ̈cic?

¹² Ku na lip tuɔŋ, bï miɔɔc ë manciëëi?

¹³ Ku të ŋiɛc wek mïthkun miɔɔc në kapiɛth, wek kɔc rac, na Wuöörduön nu paannhial cïï kɔc lip en bï dhil miɔɔc në Wëidït ɣer!”

Yecu ku Beeldhebub

¹⁴ Na ɣɔn, aa cieec jɔŋ rac jɔŋ cïn thok. Ku na wën, aacï bɛ̈n bei, ke raan wën cïn thok, ke jam, go kut ë kɔc gäi.

¹⁵ Go kɔc kɔ̈k ë keek lueel an, “Ee jɔɔk rac cieec në Beeldhebub bɛ̈nydïït ë jɔɔk rac.”

¹⁶ Ku them ë kɔc kɔ̈k, ke ke kɔɔr gök tëde yen, gök bɔ̈ nhial.

¹⁷ Go kë cïk tak ë kepiɔ̈ɔ̈th ŋic, ku lueel an, “Na teer kɔc ke ciɛɛŋ tök ke ciɛɛŋ aa riääk, ku na teer kɔc ke dhiën tök ke dhiën aa riääk.

¹⁸ Ku na teer Catan ë rɔt, ke ciɛɛŋde bï kɔ̈ɔ̈c adï? Në jamduön luɛlkï an, aa jɔɔk rac cieec në Beeldhebub.

¹⁹ Ku na ya jɔɔk rac cieec në Beeldhebub, ku na mïthkun, yek jɔɔk rac cieec në ŋa? Keek abïk aa kɔc ë löŋdun jɔ̈ɔ̈ny.

²⁰ Ku na ya jɔɔk rac cieec në ciin ë Nhialic, ke ciɛɛŋ de Nhialic kï, cï bɛ̈n tëde weekë.

²¹ “Të muk raan ril ka ke tɔŋ ku tiit paande, ke wëuke ayek jɔ tɔ̈u apiɛth.

²² Ku të bï raan ril ë yen, ku tiɛɛm en, ke jɔ kakɛn ë tɔŋ nööm tëde yen, kakɛn ee yen ke rɔt ŋɔ̈ɔ̈th, ku jɔ wëukɛn cï peec tek.

²³ “Raan reec mät kekë yɛn ka de ater ke yɛn, ku raan reec guëër ë yalɔ̈ɔ̈m ke thiëi wei.

Bɛ̈n ciëën de jɔŋ rac

²⁴ “Të cï jɔŋ rac bɛ̈n bei ë raan guöp, ke jɔ të cïn pïïu aa caath, ke kɔɔr të bï en lɔ̈ŋ thïn, na wën, aa cïn të cï yök, ke lueel an, ‘Yɛn bï a nɔm dhuöny ɣöndiën wään jäl ɛn thïn.’

²⁵ Na wën, aacï bɛ̈n, ke yök ɣöt acï weec ka acï yic läk.

²⁶ Go lɔ, ku cɔl jɔɔk rac kɔ̈k kadhorou jɔɔk wär en ë rac, gokï bɛ̈n, ku lek ɣöt, ku jɔ ɣap thïn, ago täu de raanë täudɛn ciëën go rac awär täudɛn thɛɛr.”

Miɛtëpiɔ̈u yic

²⁷ Na wën, të ŋoot en ke lueel, kakë, ke tiiŋ tök ë kut ë kɔc yiic ke jɔ yeröl jɔt, lueel an, “Thieithieei ë yäny ë dhiëëth, ku thïn cï thuat!”

²⁸ Go lueel an, “Aŋuän luɔi bï yïn e lueel an, thieithieei ë kɔc ee jam ë Nhialic piŋ, ku yek döt!”

Kɔ̈ɔ̈r de Gök

²⁹ Na wën, aacï kut dïït ë kɔc guëër, ke gieŋic, ke jɔ jam gɔl an, “Rem ënɔɔnë ee rem rac, akɔɔrkï gök bïk tïŋ, ku acïn gök bï yiɛ̈n keek, ee gök de tiët Jona tei.

³⁰ Acït man ɣɔn ee Jona gök cïï kɔc ke Ninebe tïŋ agokï gäi, en abï Wën ë Raan aa gök bïï rem ënɔɔnë tïŋ agokï gäi.

³¹ Tiiŋ melik de piny de Ceba nu të lɔ wöuwic abï rɔt jɔt ë kööl ë guiëërëlöŋ kekë rem de ënɔɔnë ëtök, ago ke yiëk yiëth gääk, acï bɛ̈n ë piny thar, bï wël ke Tholomon bɛ̈n piŋ wël ke pɛlënɔm ku raan dït ë Tholomon kï eenë.

³² Kɔc ke Ninebe abïk röt jɔt ëkööl ë guiëërëlöŋ në rem de ënɔɔnë ëtök, agokï ke yiëk yiëth gääk, acïk kepiɔ̈ɔ̈th puk në guiëër cïï Jona ke guiëër wël, ku raan dït ë Jona kï eenë.

Ɣɛɛr de guöp

³³ “Acïn raan ë manyëalath kooth, ku jɔ tääu të cïï en tiëc, ku cïï tɛ̈ɛ̈u ë këdäŋ thar aya, aye tääu nhial ë këdäŋ nɔm, ke kɔc bɔ̈ ɣöt ke ke bï mac tïŋ apiɛth.

³⁴ Nyin ee many ee guöp riaau, na piath nyindu, ke yïn ɣer guöp ëbɛ̈n, ku na rac nyindu, ke yïn col guöp ë cut ayïk yïyic.

³⁵ Ye rɔt tiit ke këɣeer nu ë yïguöp ke cïï bï aa cuɔl.

³⁶ Të cï guöpdu ɣɛɛr ëbɛ̈n, ku cïn tëthiin col, ka bï jɔ ɣɛɛr ë wic ëbɛ̈n, cït man ee riau de manyëalath yï riaau.

Yecu Ajiëëm Parithai ku Röör ee löŋ gɔ̈ɔ̈r

³⁷ Na wën, të ŋoot en ke jam, ke cɔɔl raan töŋ de Parithai an, bï lɔ cam ke yen, go lɔ ɣöt, le ku nyuuc tën ee kɔc cam.

³⁸ Go raan ë Parithai tïŋ wën ciëm en ke kën kɔn piny, go gäi.

³⁹ Go Bɛ̈nydït yɔ̈ɔ̈k an, “Wek Parithai ënɔɔnë, wek ee bïny coth kɔ̈u abï piath, ku cuɔthkï aduök kɔ̈u, ku weyiic thïn acïk thiäŋ ë wäth ku kërac.

⁴⁰ Wek dhän! Aciëŋ ë cäk kë nu biic, kën kë nu thïn cak aya?

⁴¹ Aŋuän luɔi bä wek kɔc kuanynyïïn miɔɔc në ka cath në week, ku tiëŋkï, käŋ kedhie ayek ɣɛɛr tëde week.

⁴² “Amawoou në week, wek Parithai! We ye wal juaar, yï mint, ku rue, ku wäl ëbɛ̈n, gämkï Nhialic töŋ wën thiëër kek, ku yak guiëërëlöŋ wööc yic kekë nhiëër ë Nhialic. Kakë adï cäk ke dhil aa looi, ku cäkï kakë awën ee pɔ̈l ayadäŋ.

⁴³ “Amawoou në week, wek Parithai! Wek nhiaar rëër aa wek rëër ë thöny piɛth nïïm ë ɣööt ke Nhialic yiic, ku nhiaarkï thiëc ee kɔc week thiëëc ë thuk yiic.

⁴⁴ Amawoou në week! Wek kɔc ee löŋ gɔ̈ɔ̈r ku Parithai, kɔc de yäc aguk! Wek cït rɛ̈ŋ cïï tiëc, go kɔc aa cath ë kenïïm nhial ke kuckï.”

⁴⁵ Go raan tök ë bäny ke löŋ jɔ bɛ̈ɛ̈r, yöök an, “Bɛ̈ny ee wëët, luɛl lueel yïn ee kakë, ke yïn ë wook lat aya!”

⁴⁶ Go lueel an, “Amawoou në week aya, wek bäny ke löŋ! Wek ee kɔc yiëk kɔ̈ɔ̈th kathiek ë ke doony, ku wegup we cïï kathiek ë jak ë ciin tök.

⁴⁷ Amawoou në week! Wek ee rɛ̈ŋ ke tït yïk, tït ɣɔn cïï wärkun nɔ̈k.

⁴⁸ Ee yic, wek ee cäätɔɔ ënɔɔnë ë gäm cä wek luɔi de wärkun gam, ee kek ë näk keek, ku wek aye rɛ̈ŋken yïk.

⁴⁹ Yen a lueelë Nhialic En në pɛl ë yenɔm an, ‘Yɛn bï tït tuöc keek ayï tuuc, ku abïk kɔc kɔ̈k ë keek nɔ̈k abïk thou, ku yɔŋkï kɔ̈k.’

⁵⁰ Ke riɛm de tït kedhie riɛm cï lëu gɔl të ɣɔn ciɛkë piny aɣët cï ënɔɔnë, ke bï thiëëc tëde rem de ënɔɔnë,

⁵¹ gɔl ë riɛm de Abel aɣët riɛm de Dhekaria, raan cï nɔ̈k ë kaam de yïïŋ de läm kekë tëɣeric. Wek yɔ̈ɔ̈k ëyic an, abï thiëëc tëde rem de ënɔɔnë!

⁵² “Amawoou në week, wek bäny ke löŋ! Wek cï gäärgäär de ŋïnydekäŋ jɔt, wegup wek kën lɔ ɣöt, ku kɔc wën an, lek ɣöt, acäk ke pëën!”

⁵³ Na wën, të lueel en kakë, ke kɔc ee löŋ gɔ̈ɔ̈r ku Parithai ke ke gɔl ater në yen arëët, ku themkï luɔi bï kek e tɔ jam në kajuëc,

⁵⁴ acïk buuth, luɔi bï kek e cäk thok në kë lueel, ke bïk lɔ gaany.