Luk 10 - JAM DE NHIALIC 2011

Yecu Atoc Kɔc Kathiërdhorou ku Rou

¹ Na wën, aacï kakë thök, ke Bɛ̈nydït jɔ kɔc kɔ̈k kathiërdhorou cɔɔl aya, ku tooc keek renë kapäc ku renë kapäc, bïk lɔ pänydït ëbɛ̈n ku baai ëbɛ̈n, të bï en dap bɛ̈n thïn.

² Go keek yɔ̈ɔ̈k an, “Ka cï luɔk ajuëckï, ku kɔc luui alikï. Yen aa wek Bɛ̈nydït ë ka cï luɔk lɔ̈ŋ an, bï kɔc ë luui tuɔɔc domdɛn cï luɔk.

³ Lakï tei: tiëŋkï, wek tuɔɔc cït man ee amithöök lɔ në aŋuööth yiic.

⁴ Duökï anyɔŋɔ ë wëu muk, ayï athep, ayï war, ku duökï raan däŋ ee thiëëc kueer.

⁵ Ku ɣön bä wek lɔ thïn ke jakï kɔn lueel an, ‘Ë mät tɔ̈u ke ɣönë.’

⁶ Ku na nu raan nhiaar mät thïn, ke mändun abï rëër ke yen, ku na liu, ka bï rɔt pɔ̈k week.

⁷ Ku jakï cool ee ɣönë guöp, ke we ye cam ku dɛ̈kkï në ka bï yiɛ̈n week: raan ee luui ee röŋ ke ariöpde. Duökï ɣööt wïïl.

⁸ Ku pänydïït la wek thïn, ku tɔ kɔc week ee kamaan, ke we ye ka cï tääu ë wenïïm cam:

⁹ Ku takï kɔc tök dem kɔc nu thïn, ku yɔ̈ɔ̈kkï keek an, ‘Ciɛɛŋ de Nhialic acï ɣeet të thiɔ̈k ke week.’

¹⁰ Ku pänydïït la wek thïn, ku cïï kɔc we tɔ ye kamaan, ke we jɔ lɔ biic ë kuɛɛr ke paanë yiic, ku luɛɛlkï an:

¹¹ ‘Ayï tɔr ë pänyduöndït tɔr wën cï nuɛt ë wogup, yen a weecku wei, jäny jiëëny wok week ka! Ku jakï kënë ŋic an, Ciɛɛŋ de Nhialic acï ɣëët tëthiɔ̈k ke week!’

¹² Ku week yɔ̈ɔ̈k an, Këtuc bïï Thɔdom yök acïï bï kït kekë këtuc bïï pänydïïtë yök ee köölë!

Wuöt Cïn Piɔ̈ɔ̈th Gäm

¹³ Amawoou në yïn, Koradhin! Amawoou në yïn, Bethaida! Tëë kadït ril cï looi ë Tayer ku Thidon cït man cï ke looi ë weyiic, adï cïk kepiɔ̈ɔ̈th puk ɣɔn thɛɛr, ke ke ceŋ cual ku yek rëër ë aropic!

¹⁴ Ku këtuc bïï Tayer ku Thidon yök acïï bï kït kekë këtuc bäk yök.

¹⁵ Ku yïn Kapernaum, yïn cï jat nhial aɣet paannhial, yïn bï bɛ̈ɛ̈i piny aɣet paan ë thuɔɔu!”

¹⁶ Go Yecu kɔckɛn ë piööcë yɔ̈ɔ̈k an, “Raan piŋ këdun, ka piŋ këdï, ku raan reec week, ka reec ɛn, ku raan reec ɛn, ka reec raan ë toc ɛn.”

Bɛ̈n Ciëën de Kɔc Kathiërdhorou ku Rou

¹⁷ Na wën, ke kɔc kathiërdhorou ku rou ke ke jɔ kenïïm dhuny, ke ke mit piɔ̈ɔ̈th, ku jɔkï lueel an, “Bɛ̈nydït, aɣɔ̈l jɔɔk rac ayek këda gam në rinku!”

¹⁸ Go ke yɔ̈ɔ̈k an, “Yɛn ë Catan tïŋ ke lööny piny paannhial cït man ë wilëdeŋ.

¹⁹ Tïeŋkï, wek gäm riɛl bä wek karɛc käc ë wecök, ayï manciëëi, ku gäm wek riɛl bä wek riɛl dïït ë raan de ater tiaam ëbɛ̈n: ku acïn kë bï week nɔ̈k anandun.

²⁰ Ku duökï piɔ̈ɔ̈th mit në ee cöökë an, ye jɔɔk rac këdun gam, aŋuän luɔi bä wek piɔ̈ɔ̈th miɛt në gäär cï rinkun gɔ̈ɔ̈r paannhial.”

Yecu Amit Piɔ̈u

²¹ Ku në thaar manë guöp ke Yecu jɔ piɔ̈u miɛt në Wëidït, ku lueel an, “Yïn lɛɛc, Wäär Bɛ̈nydït de Paannhial, në luɔi cïn kakë mɔ̈ny kɔc pel ku kɔc de nïïm, ku jɔ keek nyuöth mïththii ateteet: ee yen, Wäär, en acï guɔ miɛt ë yïpiɔ̈u.

²² “Käŋ kedhie acï Wäär ke yiɛ̈n ɛn: ku acïn raan ŋic wënde, nɔn ee yen ŋa, ee wun etök, ku acïn raan ŋic wun, nɔn ee yen ŋa, ee wënde etök, ku raan nu ë Wënde piɔ̈u luɔi bï en ë nyuöth en.”

²³ Go rɔt pɔ̈k kɔcpiööcë, ku yöök keek kapäc an, “Thieithieei ë nyin tïŋ ka tiëŋkï!

²⁴ Wek yɔ̈ɔ̈k an, tït juëc ayï meliik acïk piɔ̈ɔ̈th dɛ luɔi tïŋ kek ka wɔikï ku akënkï ke tïŋ, ku luɔi piŋ kek ka piɛŋkï, ku akënkï piŋ.”

Kääŋ de Raan de Thamaria Piɛth

²⁵ Na wën, ke raan tök, jɔt rɔt, ee bɛ̈ny de löŋ, ku jɔ them thiëëc an, “Bɛ̈ny ee wëët, eeŋö bä looi kë bän pïïr athɛɛr lɔ̈ɔ̈k lak?”

²⁶ Go lueel an, “Eeŋö cï gɔ̈ɔ̈r ë löŋic? Ye kueen adï?”

²⁷ Go bɛ̈ɛ̈r an, “ ‘Yïn bï Bɛ̈nydït Nhialicdu nhiaar ë piɔ̈ndu ëbɛ̈n, ku wëiku ëbɛ̈n, ku riɛldu ëbɛ̈n, ku nɔmdu ëbɛ̈n,’ ku ‘nhiaar raan rɛ̈ɛ̈r ke yïn cït man nhiɛɛr yïn rɔt.’ ”

²⁸ Go lueel an, “Acï tiiŋ nɔm: na loiye wulë, ke yïn bï pïïr.”

²⁹ Go kɔɔr luɔi bï en rɔt kɔl, en ee raanë, ku jɔ Yecu thiëëc an, “Ku raan rɛ̈ɛ̈r ke yɛn yen eeŋa?”

³⁰ Go Yecu bɛ̈ɛ̈r an, “Ade raan ë jël Jeruthalem le Jeriko, ku jɔ rɔ̈m ke cuɛ̈ɛ̈r, na wën, ke ke döör lupɔde bei ë yeguöp, gokï dui, ku jɔkï jäl, ku nyiëëŋkï piny ke deyic wëi.

³¹ Na wën, ke bɛ̈ny töŋ ë ka ke Nhialic ke bïïyë piny ee kueerë, go tïŋ, ku jɔ rɔt yal ë kueer biäktui, ku tëëk.

³² Ayï raan ë Lebi aya, të cï en ɣëët të nu raan, ke woi, ku jɔ rɔt yal ë kueer biäktui, ku tëëk.

³³ Na wën, ke raan töŋ ë Thamaria keny ëtɛ̈ɛ̈n, ku jɔ bɛ̈n të nu raanë, na wën, aacï e tïŋ, ke jɔ piɔ̈u kok ke yen,

³⁴ ago lɔ të nu yen, ku jɔ ɣään tök deer, wën cï en ke tɔc ë miök kekë mɔ̈u, ku tɛ̈ɛ̈u ë mulde kɔ̈u, ku bïï ɣön ë kamaan, go jɔ muk apiɛth.

³⁵ Na ɣɔn amiäk, të jël en, ke jɔ rial bɛ̈ɛ̈i bei, yïn raan de ɣöt, ku yöök an, ‘Muk apiɛth, ku na de wëu kɔ̈k cï yïn ke ye ɣɔ̈ɔ̈c, ke yïn bä cuööt miäk, të cän bɛ̈n.”’

³⁶ Na yïn an, “Në keyiic kadiäk eeŋa cï rɔt tɔ ye raan rɛ̈ɛ̈r ke raan wën räm ke cuɛ̈ɛ̈r ee käŋ rum?”

³⁷ Go lueel an, “Ee raan wën cï piɔ̈u kok ke yen.” Go Yecu yɔ̈ɔ̈k an, “Lɔ, ku ye looi wuya.”

Yecu anem Martha kekë Meri

³⁸ Na wën, aa ciɛthkï kueer, ke jɔ lɔ paan tök, go nyuööc ë tiiŋ töŋ cɔl Martha.

³⁹ Ku de nɔm nyankënë cɔl Meri, nyan cï nyuc ë Bɛ̈nydït cök, ke piŋ wëëtde.

⁴⁰ Na wën, ke Martha nuan arëët ke luɔi dït, ku jɔ bɛ̈n të nu yen, bï ku lueel an, “Bɛ̈nydït, luɔi cï nyankäi a päl luɔi yatök, cïn këdu thïn? Yɔ̈ɔ̈kë bï a kony!”

⁴¹ Go Bɛ̈nydït bɛ̈ɛ̈r, yöök an, “Martha, Martha! Yïn cï piɔ̈u diɛɛr ku cï nuan ë kajuëc,

⁴² ee tök tei en dak. Ku Meri acï baŋ piɛth lɔc, baŋ cïï bï nyaai tëde yen.”