Luk 1 - JAM DE NHIALIC 2011

Anyooth

¹ Adhuɛ̈ŋdït Theopilo: Kɔc juëc acïk luɔɔi dɔm, luɔɔi de guiëër ë jam de ka cï gam arëët ë woyiic.

² Acït man cï kɔc ë lɛ̈k wook, kɔc wään tïŋ keek ë kenyïïn ɣɔn ciɛkë ke, ku yek kɔc ë ka ke jam ë Nhialic looi.

³ Ku yɛn aya, yɛn de piɔ̈u luɔɔi gäär ɛn yïn wël, në kuëny wën ee käŋ kecök kuany, yïn Theopilo adhuɛ̈ŋdït, nɔn ŋiɛc ɛn käŋ ëgɔk kedhie të ɣɔn ciɛk ë keek.

⁴ Abä ke gäär yïn, ke ke bä ŋic nɔn ee kek yith kek ka cï yï wɛ̈ɛ̈t ë ke.

Dhiënh de Jɔn Baptith Aciɛɛlë

⁵ Ɣɔn nu ë Ɣerod, ke ye melik de Judaya, bɛ̈ny de ka ke Nhialic aa nu, bɛ̈ny cɔl Dhekaria, ee raan ë dhiën ë Abija, tiiŋde ee nyan cɔl Elithabeth, nyan ë kuɛɛrëden Aron.

⁶ Ku piɛthkï piɔ̈ɔ̈th ë Nhialic nɔm keek kaarou, ayek lööŋ ke Bɛ̈nydït döt kedhie, ku dötkï luɔɔide ëbɛ̈n ke cïn gääk bï ke gɔ̈k.

⁷ Ku acïnkï meth, në luɔɔi cï Elithabeth rol, ku acïk dhiɔp kaarou.

⁸ Na wën, ë köölë aa looi luɔɔidɛn ë bɛ̈ny de ka ke Nhialic ë Nhialic nɔm, ke looi luɔɔi ë kööl de dhiënde.

⁹ Ke jɔ lɔ Luaŋdït le wal ŋïr nyop, cït man ë luɔɔi de bɛ̈ny de ka ke Nhialic, luɔɔi cï gäm en në deeny de gɛk.

¹⁰ Ku nu kut ë kɔc biic ëbɛ̈n ke ke läŋ ë thaar ë nyum de wal ŋïr.

¹¹ Na wën, ke tunynhial ë Bɛ̈nydït ë tul, ke kääc ë biäk cuëny de yïïŋ de nyum ë wal ŋïr.

¹² Na wën, aacï Dhekaria ye tïŋ, ke jɔ piɔ̈u päu, go riɔ̈ɔ̈c dɔm.

¹³ Go tunynhial yɔ̈ɔ̈k an, “Du riɔ̈c, Dhekaria, lɔ̈ŋdu acï piŋ. Ku tiiŋdu Elithabeth abï yï dhiëth mɛwä, ku abä cäk an, Jɔn.

¹⁴ Ku abï yï tɔ mit piɔ̈u abä cöŋ, ku kɔc juëc abïk piɔ̈ɔ̈th miɛt të dhiëëthë ye.

¹⁵ Abï dït ë Bɛ̈nydït nyin, ku acïï bï aa dek ë mɔ̈n tuc ayï mɔ̈u ëbɛ̈n, ku abïï Wëidït ɣer thiɔ̈ɔ̈ŋ piɔ̈u ë kööl dhiëëthëye.

¹⁶ Ku abï mïth juëc ke Yithriɛl wɛ̈l piɔ̈ɔ̈th Bɛ̈nydït Nhialicden.

¹⁷ Ku abï kɔn lɔ ë yenɔm tueŋ, ke cath ke Wëi ke Elija ku riɛlde, le wärken ë mïth wɛ̈l piɔ̈ɔ̈th mïthken, ku puk kɔc piɔ̈ɔ̈th kɔc reec gäm, bïk pɛlënɔm yök pɛlënɔm ë kɔc piɛthpiɔ̈ɔ̈th, ago kɔc tɔ guik röt kɔc cï röt coc në këde Bɛ̈nydït.”

¹⁸ Go Dhekaria tunynhial thiëëc an, “Bä kënë jɔ ŋic adï? Kɛ̈n dhiɔp, ku kën tiiŋdï dhiɔp aya?”

¹⁹ Go tunynhial bɛ̈ɛ̈r, yöök an, “Yɛn Gabriɛl kï, yɛn ee kɔ̈ɔ̈c ë Nhialic nɔm, ku yɛn cï tooc bä bɛ̈n jam wo yïn, ku bä wëlpiɛthkë bɛ̈n lɛ̈k yïn.

²⁰ Tïŋ, yïn bï ciën thok, yïn cïï jam bï lëu, aɣët kööl bï kakë lɔ̈ɔ̈k tïc, luɔɔi kën yïn wëlkï gam, wël bï aa yith ëkööldɛn cï lueel.”

²¹ Ku kɔc atitkï Dhekaria, ku gɛ̈ikï ë luɔɔi cï en gääu Luaŋdït.

²² Na wën, aacï bɛ̈n biic, ke cïï jam be lëu ke keek: agokï ŋic nɔn cï en nyuuth tïŋ Luaŋdït, aye keek nieu tei, ku gɛ̈ɛ̈k ke cïï jam.

²³ Na wën, aacï kööl ke luɔɔide thök ë Luaŋdïtic, ke jɔ jäl le paanden.

²⁴ Na wën, acï aköölkë thök, ke Elithabeth tiiŋde ke liac, ku jɔ lɔ thiaan ë pɛ̈i kadhïc, ku lueel an,

²⁵ “Luɔɔi de Bɛ̈nydït kï, ke cï looi ëkööl lieec en ɛn, bï ayärdï nyaai ë kɔc yiic!”

Dhiënh de Yecu Aciɛɛlë

²⁶ Na ɣɔn acï pɛ̈i aa dhetem, ke tunynhial Gabriɛl ke tooc Nhialic tooc pänydït de Galili cɔl Nadhareth.

²⁷ Acï tuöc dhueny kën kɔn yök ke moc, nyan cï thiaak ë mony cɔl Jothep, raan dhiën ë Debid, ku rin ke ë nyanë acɔl Meri.

²⁸ Go tunynhial bɛ̈n ɣöt të nu yen, bï ku lueel an, “Thieithieei, nyan cï athiɛɛidït yök, Bɛ̈nydït atɔ̈u ke yïn! Yïn cï thieei ë diäär yiic!”

²⁹ Na wën, acï e tïŋ, ke lɔ nɔm cɔ̈t në wëlkë, ku ciët enɔm ë thiëc an, ee thiëc cït ŋö?

³⁰ Go tunynhial yɔ̈ɔ̈k an, “Du riɔ̈c, Meri: yïn ë dhuëëŋdepiɔ̈u yök tëde Nhialic.

³¹ Ku tïŋ, yïn bï meth yök, ku yïn bï mɛwä dhiëëth, ku bä cäk an, Yecu.

³² Abï dït arëët ku abï cɔl wën ë Nhialic Awärjäŋ: ku abïï Bɛ̈nydït Nhialic yiɛ̈n thööny de kuɛɛrëdɛn Debid:

³³ Ku abï aa melik ceŋ dhiën ë Jakop aɣet athɛɛr, ku ciɛɛŋde abï ciën thökde!”

³⁴ Go Meri tunynhial thiëëc an, “Kënë bï tïc adï, ku cïn mony ŋiɛc?”

³⁵ Go tunynhial bɛ̈ɛ̈r, yöök an, “Wëidït ɣer abïk yï lɔ̈ny, ku riɛl ë Nhialic Awärjäŋ abï yï kuöm piny: ago këɣeer bä dhiëëth ago cɔl Wën ë Nhialic.

³⁶ Ku tïŋ, Elithabeth raandun, yen acï mɛwä yök aya, ke ye dhiɔp: ku pɛ̈ike abïk aa dhetem ë pɛɛiyë, tiiŋ wään ee lueel, an, ee rol.

³⁷ Nhialic acïn kë bï ye dhal.”

³⁸ Go Meri lueel an, “Yakï yɛn nyan lïm ë Bɛ̈nydït, në tiëc tëde yɛn cït man ë wëlku.” Go tunynhial jäl ë yelɔ̈ɔ̈m.

Meri Anem Elithabeth

³⁹ Na wën, ke Meri jɔt rɔt ë aköölkë, ku dɛp lɔ piny ë kuur, lee pänydïït töŋ de Juda.

⁴⁰ Ku jɔ lɔ ɣön ë Dhekaria, le Elithabeth thiëëc.

⁴¹ Na wën, aacï Elithabeth thiëc de Meri piŋ, ke meth jɔt rɔt ë yeyäc, go Elithabeth thiäŋ ke Wëidït ɣer:

⁴² Go cööt ë röldït an, “Yïn cï thieei ë diäär yiic, ku mɛnh nu ë yïyäcë ee kë cï thieei!

⁴³ Ku cä kënë yök tënou, kë bïï man Bɛ̈nydiëndït tëde yɛn?

⁴⁴ Ku tïŋ, ënɔnthiin ë piɛŋ ɛn thiëcdu, ke meth jɔt rɔt ë yayäc në piɔ̈nmit.

⁴⁵ Ku thieithieei nyan cï wël gam: abïk dhil aa yith kek wël cï lɛ̈k en ë Bɛ̈nydït!”

Din de Piɔ̈ny ë Meri

⁴⁶ Go Meri ket an, “Piɔ̈ndï alec Bɛ̈nydït nɔm,

⁴⁷ Ku yɛn ë piɔ̈u guɔ miɛt wokë Nhialic Konydï.

⁴⁸ Luɔɔi cï en nyanlïmde woi në kuany cï en nyin kuany: Tiëŋkï, gɔl ënɔɔnë aɣet wadäŋ rɛm ëbɛ̈n abïk a tɔ ye nyan cï thieei.

⁴⁹ Raan ril ee käŋ lëu acï a luöi kadït, ku rinke ayek rin ɣeric ëgɔk.

⁵⁰ Kok de yenpiɔ̈u ee tɔ̈u kekë kɔc riëëu en, Remë ku remë aɣët wadäŋ.

⁵¹ Acï këril looi ë köŋde, Acï kɔc thiɔ̈i kɔc ë röt tɔ dït në täŋ yek tak ë kepiɔ̈ɔ̈th.

⁵² Acï bänydït cieec ë thöckɛn ee kek rëër, ku jɔ kɔc kor jat nhial.

⁵³ Acï kɔc nɛ̈k cɔk tɔ kueth ë kamit, Ku jɔ kɔc cuai tɔ jël ke ke dak.

⁵⁴ Acï Yithriɛl awunde kony, Në täŋ cï en kok de yenpiɔ̈u tak,

⁵⁵ Acït man ë jiɛɛm en kekë kuarkuɔ, Yï Abraɣam kekë kɔ̈thke aɣet athɛɛr!”

⁵⁶ Go Meri rëër kekë yen ë pɛ̈i kadiäk, ku be enɔm pɔ̈k paanden.

Dhiënh de Jɔn Baptith

⁵⁷ Na wën, ke pɛ̈i ke Elithabeth pɛɛi liɛɛc en ke ke ke jɔ thök, go mɛwä dhiëëth.

⁵⁸ Ku piŋ kɔc ke paanden ku kɔcken nɔn cï Bɛ̈nydït piɔ̈u kok ke yen arëët, ku jɔkï piɔ̈ɔ̈th miɛt në yen ëtök.

⁵⁹ Na wën, ë nïn ee kek bɛ̈t, ke ke jɔ bɛ̈n bïk meth bɛ̈n cueel, gokï an, bïk cäk, an, Dhekaria, në rin ke wun.

⁶⁰ Go man jai an, “Acie yen abï cɔl Jɔn.”

⁶¹ Gokï yɔ̈ɔ̈k an, “Acïn raan tök dhiëndun cï kɔn cäk ë rinkë!”

⁶² Gokï wun nieu an, kɔɔr nɔn bï ye cɔl ŋa?

⁶³ Na wën, ke cɔl pam ë gäär ku jɔ gɔ̈ɔ̈r an, “Rinke acɔl Jɔn.” Gokï gäi kedhie!

⁶⁴ Go thoŋde rɔt liep ënɔnthiinë, ku däk liep rɔt, go jam, ku leec Nhialic.

⁶⁵ Go kɔc rɛ̈ɛ̈r në keek go riɔ̈ɔ̈c ke dɔm kedhie: go jam de kakë kedhie jɔ thiɛ̈i ë piny ë kuur Juda ëbɛ̈n.

⁶⁶ Na wën, ke kɔc cï ke piŋ, ke ke mukkï ë kepiɔ̈ɔ̈th, ku luelkï an, “Mɛnhë bï ciët ŋö wadäŋ?” Ku jɔ ciin ë Bɛ̈nydït aa tɔ̈u ke yen.

Cäär de Dhekaria

⁶⁷ Go Dhekaria wun go thiäŋ ke Wëidït ɣer, ku jɔ wël guiir an:

⁶⁸ “Thieithieei Bɛ̈nydït, Nhialic de Yithriɛl, acï kɔcke neem ku wëër keek bei,

⁶⁹ Ku acï tuŋ de kunydewëi jat nhial në këda, Tuŋ de dhiën ë Debid awunde,

⁷⁰ (Acït man cï en e lueel ë thok ke tït ke Nhialickɛn ɣeriic të ɣɔn ciɛkë piny),

⁷¹ Bï wo kony në kɔc de ater në wook, ku luɛ̈k wo bei ë kɔc cin kɔc man wook,

⁷² Bï kok ee yen piɔ̈u kok ke kuarkuɔ thöl, Ku be yenɔm tak në löŋ wään cï mac löŋ ɣeric,

⁷³ Gutguut cï lueel kekë kuɛɛrëdan Abraɣam, an,

⁷⁴ “Bï wo luäk bei ë kɔc cin kɔc de ater në wook. Agoku ka ke yen aa looi ke cïn riɔ̈ɔ̈c,

⁷⁵ Ke wo tɔ̈u në ɣɛɛrë yic ku piathëpiɔ̈u ë yenɔm ananda.

⁷⁶ “Ku yïn, wëndï, yïn bï cɔl tiët de Nhialic Awärjäŋ: Yïn bï kɔn lɔ ë Bɛ̈nydït nɔm tueŋ, bä kuɛɛrke lɔ looi.

⁷⁷ Bä kɔcke tɔ ŋic kunydɛn ë wëi. Në nyiɛɛi bï karɛcken nyaai,

⁷⁸ Në kok kookë Nhialic Piɔ̈u ke wook, Yen a neemë Runëpiny wook, Runëpiny bɔ̈ nhial,

⁷⁹ Bï aa many ë kɔc riaau kɔc rɛ̈ɛ̈r tëcol ku rëërkï atïptïïp ë thuɔɔuwic, Ago wo dak cök ë kueer ë mätic.”

⁸⁰ Ago meth dït, ku jɔ piɔ̈u riɛl, ku le ceŋ ë jɔ̈ɔ̈ric aɣët kööl bï en rɔ nyuöth Yithriɛl.