Lebai 9 - JAM DE NHIALIC 2011

Aron Agɛm Miɔ̈c näk

¹ Na ɣɔn aa cï nïn kabɛ̈t wan, nïn wään thɛny ë keek nïïm, ke Mothe ë cɔl Aron kekë wɛ̈ɛ̈tke ku röördït ke Yithriɛl.

² Go keek yɔ̈ɔ̈k, an, “Nämkï miɔɔr atiëëk në biäk de miɔ̈c de kërac ku nyɔɔŋ amääl në biäk ë miɔ̈c ye nyop ëbɛ̈n, keek kedhie abïk gup ciën tëdak, ku gɛmë keek në Bɛ̈nydït nɔm.

³ Na wën ke yɔ̈ɔ̈k kɔc ke Yithriɛl an, ‘Nöm nyɔɔŋ bou në biäk de miɔ̈c de kërac, ku miɔɔr kekë nyɔɔŋ amääl abïk run aa tök, ku cïnkï gup tëdak, në biäk de miɔ̈c ye nyop ëbɛ̈n.

⁴ Ku weŋ kekë nyɔɔŋ amääl ke ke ye miɔ̈c de mät, miɔ̈c bïï ke gam në Bɛ̈nydït nɔm, ku mɛ̈tkï në miɔ̈c ë rap cï liääp ë miök. Në biäk bïï Bɛ̈nydït tuöl tëde week ee köölë.

⁵ Ago kɔc bɛ̈n kedhie në Paany de mät thok, ku bïïkï ka cï Mothe keek yɔ̈ɔ̈k an bïk keek bɛ̈ɛ̈i, ago akutnɔm ëbɛ̈n kɔ̈ɔ̈c në Bɛ̈nydït nɔm.

⁶ Ago Mothe lueel an, “Wek cï kë cïï Bɛ̈nydït lueel looi, ka wek bï dhuëëŋ de Bɛ̈nydït tïŋ.

⁷ Na wën ke Mothe ë yɔ̈ɔ̈k Aron an, “Lɔɔr në yïk nɔm ku gämë miɔ̈c de kërac kekë miɔ̈c ye nyop ëbɛ̈n. Ku luöiyë rɔt atɛɛm wekë kɔc kedhie, ku bɛ̈ɛ̈iyë miɔ̈c de kɔc ku teem kɔc gup, cït man cï Bɛ̈nydït e lueel.

⁸ Go Aron bɛ̈n ë yïk nɔm, ku teem miɔɔr röl, ke ee miɔ̈c de kërac në biäkde.

⁹ Go wɛ̈ɛ̈tke riɛm yiɛ̈n en, go yeriöp luöt në riɛmic, ku tɛ̈ɛ̈u në yïk tuŋ, ku wɛ̈l riɛm biäk në yïk thar.

¹⁰ Ago Aron kɔl nööm kekë rook kedhie, ku biäk piɛth de cuäny në miɔ̈c de kërac yic, ku nyop keek në yïk nɔm, cït man cïï Bɛ̈nydït Mothe yɔ̈ɔ̈k.

¹¹ Ku nyop rïŋ kekë biöök në wut këc biic.

¹² Na wën ke miɔ̈c ye nyop ëbɛ̈n, ago wɛ̈ɛ̈tke gäm riɛm, go riɛm wiɛ̈ɛ̈th në aguuk ke yïk kedhie.

¹³ Agokï gäm miɔ̈c ye nyop ëbɛ̈n në thïïm, ku nɔm ago keek nyop në yïk nɔm.

¹⁴ Go ka yiëëc waak kekë cök ku nyop keek në miɔ̈c ye nyop ëbɛ̈n nɔm në yïk nɔm nhial.

¹⁵ Na wën ke Aron ë bïï miɔ̈c wën ye këde kɔc, ku nööm nyɔɔŋ bou de miɔ̈c de kërɛɛc ë kɔc, ku teem röl, ku gɛm ke ye miɔ̈c de kërac, cït man cï yen ë luöi wën kɛ̈ɛ̈i.

¹⁶ Ago miɔ̈c ye nyop ëbɛ̈n bɛ̈ɛ̈i, ku gɛm në kueer ye ë yen looi, cït man cïï Bɛ̈nydït ye lueel.

¹⁷ Ago miɔ̈c ë rap bɛ̈ɛ̈i ayadäŋ, ku nööm biäk de aɣaar, në yeciin athiäŋ ku nyop në yïk nɔm mɛtke në miɔ̈c ye nyop ëbɛ̈n adurduur.

¹⁸ Ago thɔn kekë nyɔɔŋ amääl nɔ̈k ke ke ye miɔ̈c de mät ë biäk de kɔc, ago wɛ̈ɛ̈tke gäm riɛm, gokï riɛm wiɛ̈ɛ̈th në aguuk ke yïk kedhie.

¹⁹ Go Aron ɣään cuai ke thɔn kekë nyɔɔŋ amääl. Ku miök de yɔ̈l ku kɔɔl de kayiëëc kedhie, ku rook kedhie, ku biäk piɛth de cuäny.

²⁰ Ku jɔkï tääu ë thin kɔ̈ɔ̈th. Na wën ke Aron ë nyop kɔl në yïk nɔm.

²¹ Go Aron thin nyuɔɔth kekë ɣäm cuëc në Bɛ̈nydït nɔm ke ee miɔ̈c de anyuɔɔk, cït man cïï Mothe yɔ̈ɔ̈k.

²² Na wën ke Aron ë jɔt yecin nhial në kɔc nïïm, ku thieei keek. Ku të cï yen miɔ̈c de kërac kekë miɔ̈c ye nyop ëbɛ̈n, ku miɔ̈c de mät kɔn gam tueŋ, ke bɔ̈ piny në yïk nɔm.

²³ Na wën ke Mothe kekë Aron ë ke lɔ në paany de mätic. Na wën bï kek bei kekë thiei kɔc, ago dhuëëŋ de Bɛ̈nydït tuöl tëde kɔc kedhie.

²⁴ Ago mac bɛ̈n bei në Bɛ̈nydït lɔ̈ɔ̈m, ku thöl miɔ̈c ye nyop ëbɛ̈n kekë biäk cuai nu ë yïk nɔm. Na wën aa tïŋ ë kɔc kedhie, agokï kiɛɛu de miɛt de piɔ̈u moc, ku gutkï kenïïm piny lamkï Bɛ̈nydït.