Lebai 8 - JAM DE NHIALIC 2011

Thäny de Aron Nɔm Kekë Wɛ̈ɛ̈tke

¹ Go Bɛ̈nydït Mothe yɔ̈ɔ̈k,

² an, “Bɛ̈ɛ̈iyë Aron kekë wɛ̈ɛ̈tke në paany de Mät thok, ku bɛ̈ɛ̈iyë lupɔɔkɛn ke bääny, ayï miök de tɔc, ku bɛ̈ɛ̈iyë miɔɔr atiëëk, në biäk de miɔ̈c de kërac, ku bɛ̈ɛ̈iyë nyök kaarou, ku diööny ke kuïïn cï pam cïn yic luɔu.

³ Ku ëtɛ̈ɛ̈n, abï akutnɔm ëbɛ̈n ja caal në paany de mät thok.”

⁴ Ago Mothe ye looi cït man cï Bɛ̈nydït ye yɔ̈ɔ̈k, na wën ke akutnɔm ë jɔ mat në paany de mät thok,

⁵ go Mothe akutnɔm yɔ̈ɔ̈k an, “Kë kaar bä looi ënɔɔnë ee kë cïï Bɛ̈nydït lɛ̈k ɛn.

⁶ Ago Mothe Aron kekë wɛ̈ɛ̈tke bɛ̈ɛ̈i në kɔc nïïm, ku tɔ keek waak në pïïu.

⁷ Ku tɛ̈ɛ̈u alanh thith në Aron kɔ̈u, ku duut thiönh de lupɔ në yekɔ̈u, go Mothe alanh biic tääu në yekɔ̈u, ku yïk kɔ̈u lupɔ de ajïpɔ. Na wën ke duut thiönh cï guel në yekɔ̈u, ago lupɔ de ajïpɔ jɔ duööt në Aron kɔ̈u.

⁸ Na wën ke Mothe ë tɛ̈ɛ̈u lupɔ ee yɔu kum në Aron kɔ̈u, ku tɛ̈ɛ̈u Yurim kekë Thumim në lupɔ ee yɔu kum yic.

⁹ Ku tɛ̈ɛ̈u akup de nɔm në Aron nɔm ayadäŋ. Ku tɛ̈ɛ̈u aduŋ de adhääp aya kekë göl ɣeric në yenɔm tueŋ, nyoth luöi cï yen rɔt gam. Cït man cïï Bɛ̈nydït yen yɔ̈ɔ̈k an looi.

¹⁰ Na wën ke Mothe ë nööm miök de tɔc, ku tɛ̈ɛ̈u në Paany de rëër ë Bɛ̈nydït guöp kekë këriëëc nu thïn ëbɛ̈n, ku në ee kueerë, acï jɔ gäm Bɛ̈nydït ëbɛ̈n.

¹¹ Ku nööm miök biäk, ku wïïth në yïk kɔ̈u kekë kake ëbɛ̈n raandhorou, ku lɔ aduuk kekë guölke, në biäk bï yen keek gäm Bɛ̈nydït.

¹² Ku jɔ Aron thany nɔm në luuŋ luuŋ en biäk de miök de tɔc në yenɔm.

¹³ Na wën, go Mothe wɛ̈ɛ̈t ke Aron bɛ̈ɛ̈i tueŋ, ku tɛ̈ɛ̈u aluluut në kekɔ̈ɔ̈th ku duut thiöth ë keyiic, ku tɛ̈ɛ̈u akuup në kenïïm, cït man cïï Bɛ̈nydït ye lueel.

¹⁴ Na wën, ke Mothe ë bïï miɔɔr atiëëk, ke ye miɔ̈c de kërac, go Aron kekë wɛ̈ɛ̈tke kecin tääu ë yenɔm.

¹⁵ Ago Mothe miɔɔr nɔ̈k ku nööm riɛm biäk në yeriöp, ku tɛ̈ɛ̈u në yïk tuŋ, në biäk bïï yen en tɔ piɛth, ku jɔ riɛm biäk wäl ë yïk thar, ku jɔ tɔ ɣeric, ke bï atɛɛm looi ë biäkde.

¹⁶ Ago Mothe kɔɔl nu ë yäc kɔ̈u thïn nööm kedhie, ku kë wën ee cuäny kum, ku rook kedhie në kɔɔlken ku nyop keek në yïk nɔm.

¹⁷ Ku nööm biöŋ de miɔɔr ku rïïŋde ku cïïnke ku lee keek nyop në wut këc biic, cït man cïï Bɛ̈nydït yen yɔ̈ɔ̈k.

¹⁸ Na wën ke Mothe ë bïï nyɔɔŋ amääl de miɔ̈c ye nyop ëbɛ̈n, go Aron kekë wɛ̈ɛ̈tke kecin thany në yenɔm.

¹⁹ Ago Mothe nyɔɔŋ amääl nɔ̈k ku wïïth riɛm në aguuk ke yïk kedhie.

^20-21 Ku tem nyɔɔŋ amääl në thïïm ku nyop nɔm kekë thïïm ku kɔl. Go kayiëëc kekë cök waak në pïïu, go Mothe nyɔk nyop ëbɛ̈n ë yïk nɔm, ke ee miɔ̈c ye nyop ëbɛ̈n, miɔ̈c tum mit, miɔ̈c ye luöi Bɛ̈nydït në mac cït man cï Bɛ̈nydït Mothe yɔ̈ɔ̈k.

²² Na wën ke gɛm nyɔɔŋ amääl, nyɔɔŋ bïï thany nɔm, go Aron kekë wɛ̈ɛ̈tke kecin thany në yenɔm.

²³ Ago Mothe nyɔk nɔ̈k ku tɛ̈ɛ̈u riɛm biäk në riöp butbut de ciin cuëc nɔm, ku tɛ̈ɛ̈u riɛm biäk në riöp dïït de cöök cuëc nɔm.

²⁴ Go Mothe wɛ̈ɛ̈t ke Aron bɛ̈ɛ̈i tueŋ ayadäŋ, ku tɛ̈ɛ̈u riɛm në yïth cuëëcken thäär, ku tɛ̈ɛ̈u riɛm biäk në riöp butbut de cïn cuëëcken nïïm. Ku jɔ riɛm piaak në yïk kɔ̈u ëbɛ̈n.

²⁵ Ku nööm kɔɔl, ku kɔlde yɔ̈l, ku kɔɔl kedhie nu në kayiëëc kɔ̈ɔ̈th, kekë biäk piɛth de cuäny. Ku rook kedhie kekë kɔɔlken ku ɣäm cuëc.

²⁶ Ku nööm kuïn cï pam tök, kuïn cï looi në miök, ku kuïn cï pam cï riɛl, nööm keek në diööny ye kuïn cï pam cïn yic luɔu cï gäm Bɛ̈nydït muk thïn, ku tɛ̈ɛ̈u ee kake në miök kɔ̈u kekë ɣäm cuëc.

²⁷ Ku tɛ̈ɛ̈u ee kakë kedhie në Aron kekë wɛ̈ɛ̈tke cin, ku nyooth keek në Bɛ̈nydït nɔm, ke ke ye miɔ̈c de anyuɔɔk.

²⁸ Na wën, ke nööm ë Mothe keek në kecin, ku nyop keek në yïk nɔm, në miɔ̈c ye nyop ëbɛ̈n nɔm nhial, ke ye miɔ̈c de thɛ̈ny de nɔm, ee miɔ̈c tum mit, miɔ̈c ye luöi Bɛ̈nydït në mac.

²⁹ Ago Mothe thin nööm ayadäŋ, ku gɛm ë Bɛ̈nydït nɔm, ke ye miɔ̈c de anyuɔɔk. Aa ye biäk de Mothe në nyɔkic, nyɔɔŋ amäl cï looi ke ye kë kuɛny ë bäny de kake Nhialic, cït man cïï Bɛ̈nydït yen yɔ̈ɔ̈k.

³⁰ Na wën ke Mothe ë nöm miök de tɔc biäk, ku riɛm biäk në yïk nɔm, ku wïïth ke në Aron kɔ̈u kekë lupɔɔ ke, ku wïïth në wɛ̈ɛ̈tke kɔ̈ɔ̈th kekë lupɔɔken. Ago Aron jɔ tɔ ɣer kekë lupɔɔke, ku tɔ wɛ̈ɛ̈tke ɣeriic kekë lupɔɔken.

³¹ Na wën, ke Mothe ë yɔ̈ɔ̈k Aron kekë wɛ̈ɛ̈tke an, “Thal rïŋ në nïn de Paany de mät thok, ku cam ëtɛ̈ɛ̈n në kuïn cï pam nu ë diööny de miɔ̈c de thäny ë nɔm yic. Cït man cän yïn yɔ̈ɔ̈k, an, abï Aron kekë wɛ̈ɛ̈tke cam.

³² Ku nyop rïŋ kekë kuïn cï pam bï döŋ ëbɛ̈n.

³³ Ku du nïn de Paany de mät thok nyiëëŋ piny ë nïn kadhorou yiic, agut kööl le nïn ke thɛ̈ny de nɔmdun thök. Në luöi bï thɛ̈ny de nɔmdun tɔ̈u në nïn kadhorou.

³⁴ Kë cï looi ee köölë ee kë cï Bɛ̈nydït lueel, në biäk bï ë yen teem guöp, ago jɔ aa raande.

³⁵ Yïn bï dhil rëër në Paany de mätic, aköl ku wakɔ̈u, në nïn kadhorou yiic. Na cïï ka cïï Bɛ̈nydït keek lueel rïïu, ke yïn bï dhil thou, ee Bɛ̈nydït yen ë gëm Yɛn ee lööŋkë.”

³⁶ Ago Aron kekë wɛ̈ɛ̈tke këriëëc ëbɛ̈n looi, kë cïï Bɛ̈nydït lueel në Mothe thok.