Lebai 7 - JAM DE NHIALIC 2011

Miɔ̈c de Cuöl de Awäc

¹ Kakë ee lööŋ në biäk de miɔ̈c de awäc, yen kë ɣeric aläl.

² Miɔ̈c de awäc abï teem röl të wën ye miɔ̈c ye nyop ëbɛ̈n teem röl thïn, ku riɛmde abï wiɛ̈ɛ̈th ë aguuk ke yïk kedhie.

³ Ku kɔɔlke kedhie abï keek gam: ku miök de yɔ̈l kekë kɔɔl ee ka yiëëc kum.

⁴ Ku rook kedhie në kɔɔl nu ë kekɔ̈ɔ̈th të lɔ yɔu, ku kën ee cuäny kum, kekë biäk duëërë bɛ̈ɛ̈i bei kekë rook.

⁵ Abïï bɛ̈ny de kake Nhialic keek nyop në yïk nɔm. Ke ke ye miɔ̈c ye luöi Bɛ̈nydït në mac. Ee miɔ̈c de awäc.

⁶ Ku mïthwät nu paan de bɛ̈ny de kake Nhialic kedhie, aduëërkï cam në yen. Ku abï dhil aa cam tëɣeric. Ee kë ɣeric aläl.

⁷ Yen löŋë ayadäŋ, aduëër röŋ kekë keek kedhie: Tëde miɔ̈c de kërac ku miɔ̈c de awäc. Ayek kake bɛ̈ny de kake Nhialic wën lui keek atɛɛm.

⁸ Ku bɛ̈ny de kake Nhialic awën gɛm miɔ̈c ye nyop ëbɛ̈n në biäk de raan, aduëër biäk nööm tɔ ye këde.

⁹ Ku miɔ̈c ë rap ëbɛ̈n, miɔ̈c ye thaal në thakic, ayï tönyic, ayï athalic, ee kake bɛ̈ny de kake Nhialic awën gɛm yen.

¹⁰ Ku miɔ̈c ë rap ëbɛ̈n, na ee kë cï nuaai ë miök, ayï kë ril kɔ̈u akïtkï, ee kake wɛ̈ɛ̈t kë Aron kedhie.

Miɔ̈c de Mät.

¹¹ Kakë ee lööŋ ke miɔ̈c de mät, miɔ̈c duëër ë raan gäm Bɛ̈nydït.

¹² Na gɛm raan miɔ̈c de thieithieei, abïï keek gam ëtök kekë weŋ bïï nɔ̈k, ku lɔ miɔ̈c de kuïïn cï pam cïn yic luɔu, kuïn cï nuaai në miök, ku nɔn ee bethkawith cï yoor kɔ̈u në miök, ku nɔn ee kak cï looi në aɣar cï liääp kekë miök.

¹³ Abïï keek gam ëtök kekë miɔ̈cdɛn de mät, në biäk de miɔ̈c de thieithieei, raan abï miɔ̈c gam në kaak ku kuïn cï pam de yic luɔu.

¹⁴ Abï biäk tök aa bɛ̈ɛ̈i ke ee miɔ̈c, ke ye kë juëër Bɛ̈nydït, ee këde bɛ̈ny de kake Nhialic, ye riɛm de miɔ̈c de mät wiɛ̈ɛ̈th piny.

¹⁵ Ku rïïŋ de miɔ̈cdɛn de mät në biäk de miɔ̈c de thieithieei, abï dhil cuet në kööl ë gɛmë yen, acïn biäk bïï böth miäk.

¹⁶ Ku na ye miɔ̈cdɛn ë bïï këde gutguut, ku nɔn ee miɔ̈c de miɛtëpiɔ̈u, ke miɔ̈c abï cuet në kööl ë gɛmë yen. Ku na de kë cï döŋ piny aduëërë cam ë kööl de rou.

¹⁷ Ku rïïŋ lɔ döŋ piny aɣët cï kööl de diäk, ka abï dhil nyop ëbɛ̈n.

¹⁸ Na le rïïŋ de miɔ̈c de mät cuet ë kööl ye akööl diäk, ka acïï bïï gam. Acïï bï kueen tëde raan ë gɛm en. Abïï tɔ ye kë cï riääk. Raan lɔ dɛ këdɛn ciɛm thïn, abïï yiëk yeth gääk.

¹⁹ Ku na lɔ rïïŋ këriëëc cïï piɛth në biäk de ciɛɛŋ jak, ka acïï bïï dhil cuet, abï dhil nyop ëbɛ̈n. Ku në biäk de rïŋ kɔ̈k, aduëër ë raan lɔgɔk ëbɛ̈n në biäk de ciɛɛŋ cuet thïn.

²⁰ Ku na lɔ raan cïï lɔgɔk në biäk de ciɛɛŋ, na le cuet ë miɔ̈c de män de Bɛ̈nydït, yen ë raanë, abï dhil tɛɛm wei në kɔckï yiic.

²¹ Na de raan lɔ kë cïï piɛth de lɛ̈i, ayï kë cïï piɛth tei, ayï kë nhiany jak, ku ëtɛ̈ɛ̈n jɔ cuet në rïïŋ de miɔ̈c de män de Bɛ̈nydït, yen ee raanë, abï dhil tɛɛm wei në kɔckï yiic.

²² Go Bɛ̈nydït Mothe yɔ̈ɔ̈k,

²³ an, yɔ̈ɔ̈kë kɔc ke Yithriɛl: an, Duökï kɔɔl ke ɣɔ̈k ayï amɛ̈l ayï bɔɔth ee cuet.

²⁴ Ayï kɔl de lɛ̈n cï yök ke cï thou, ku nɔn ee lɛ̈n cïï läi roor cam, aduëër ë këdäŋ looi ku acïï duëërë cam.

²⁵ Ku na de raan lɔ cam në kɔl de weŋ bï gäm Bɛ̈nydït ke ye miɔ̈c ye nyop ëbɛ̈n, abï dhil tɛɛm wei në kɔckï yiic.

²⁶ Ku tëduön rɛ̈ɛ̈r wek thïn ëbɛ̈n, wek cïï bï dhil cam në riɛm de dit ayï riɛm de läi.

²⁷ Ku na de raan lɔ riɛm cam, yen ë raanë, abï dhil tɛɛm wei në kɔckï yiic.

²⁸ Go Bɛ̈nydït Mothe yɔ̈ɔ̈k.

²⁹ An, yɔ̈ɔ̈kë kɔc ke Yithriɛl, raan ëbɛ̈n, raan yïn yïn miɔ̈c de män de Bɛ̈nydït, abï biäk tök dhil bɛ̈ɛ̈i bei, ke ye miɔ̈cdɛn cï gëm Bɛ̈nydït.

³⁰ Ku yen guöpde abï miɔ̈cdɛn cï gam looi në mac yiɛ̈n Bɛ̈nydït. Ku abï kɔɔl bɛ̈ɛ̈i bei mɛtke ëtök në ka nu thïn, ku nyooth në Bɛ̈nydït nɔm ke ye miɔ̈c de anyuɔɔk.

³¹ Ku bɛ̈ny de kake Nhialic, abï kɔl nyop në yïk nɔm, ku thin ee kake Aron kekë wɛ̈ɛ̈tke.

³² Ku abï ɣäm cuëny de miɔ̈c de mät gäm bɛ̈ny de kake Nhialic ke ye miɔ̈c.

³³ Ku wën de Aron awën gɛm riɛm kekë kɔl de miɔ̈c de mät, abï dɛ ɣäm cuëc ke ye këde.

³⁴ Në miɔ̈c de män ë Yithriɛlic. Yɛn cï thin wään cï nyuɔɔth kekë ɣäm wään cï gam, nööm ku gam keek Aron, bɛ̈ny de kake Nhialic kekë wɛ̈ɛ̈tke, ke ye miɔ̈cdɛn de aköölnyïïn tëde Yithriɛl.

³⁵ Kënë ee biäk de miɔ̈c Bɛ̈nydït, miɔ̈c ye looi në mac, miɔ̈c wään cï gäm Aron kekë wɛ̈ɛ̈tke, në kööl ɣɔn gëm ë keek Bɛ̈nydït. Bïk Bɛ̈nydït aa luööi ke ke ye bäny ke kake Nhialic.

³⁶ Në kööl ɣɔn ë yoor ë keek nïïm, Bɛ̈nydït acï Yithriɛl bɛ̈n yɔ̈ɔ̈k an, Bïk ee kënë gäm keek, ke ye këdɛn de aköölnyïïn agut cï rɛm bï lɔ̈ɔ̈k bɛ̈n.

³⁷ Ku kakë kek aye lööŋ ke Bɛ̈nydït në biäk de miɔ̈c ye nyop ëbɛ̈n, ayï miɔ̈c ë rap, ayï miɔ̈c de kërac, ayï miɔ̈c de awäc, ayï miɔ̈c de ruk kekë miɔ̈c de mät.

³⁸ Lööŋ aa bïï Bɛ̈nydït ke gäm Mothe në kuur de Thinai nɔm, bïk miɔ̈cden yiɛ̈n Bɛ̈nydït në jɔ̈ɔ̈r de Thinai yic.