Lebai 5 - JAM DE NHIALIC 2011

Kak ee Miɔ̈c de Awɛ̈ɛ̈c Kɔɔr

¹ Na cï raan kërac looi, në biäk kën en jam në kɔc nïïm, në biäk de kë cï tïŋ ku nɔn ŋic luɔi cï yen rɔt looi, abïï yiëk yeth gääk.

² Ayï të cïï raan këriëëc cïï piɛth jak ëbɛ̈n, na ee yom ke lɛ̈n roor cï thou, ku nɔn ee weŋ. Ku nɔn ee kë cï yök ke cï thou piny, cakaa nɔn cïï yen en ŋic, acï aa raan de guöp gääk, ka ade guöp awäc.

³ Na cï raan kërɛɛc de raan jak, këriëëc cïï piɛth duëër en tɔ rac ëbɛ̈n, cakaa yen ë kuc, ku të cï yen ë ŋic, ka abï guöp dɛ gääk.

⁴ Ayï të cïï raan gutguut lueel an, bïï këdäŋ looi, ke kën takic, na ee këpiɛth ku nɔn ee kërac, ku nɔn ee gutguut duëër ë raan kuëëŋ, ke kën takic, cakaa nɔn cïï yen en ŋic, abï guöp de awäc.

⁵ Të cï ë raan awäny tök looi në ee kakë yiic, abï kërɛɛc cï looi dhil gam.

⁶ Abï miɔ̈c de awänyde yiɛ̈n Bɛ̈nydït, në biäk de kërɛɛc cï looi, abï ŋuöt, ku nɔn ee nyɔk bɛ̈ɛ̈i në thökke yiic, amääl ku nɔn ee bou, ke ee miɔ̈c de kërac, ku abï bɛ̈ny de kake Nhialic jɔ teem guöp në biäk de awänyde.

⁷ Ku na cïï raan nyɔɔŋ amääl ku nɔn ee bou bï lëu, ke yen abï guök kaarou, ku nɔn yen ajiël ke guuk kaarou yiɛ̈n Bɛ̈nydït ke ye miɔ̈c de awäc, në biäk de kërɛɛcdɛn cï looi, tök ee miɔ̈c de kërac, ku ye däŋë miɔ̈c ye nyop ëbɛ̈n.

⁸ Ku abïï keek yiɛ̈n bɛ̈ny de kake Nhialic. Ku jɔ tök nööm tueŋ gëm ke ye miɔ̈c de kërac, ku jɔ dhoŋ yeth ku cïï teem wei taitai,

⁹ ku abï riɛm biäk de miɔ̈c de kërac wiɛ̈ɛ̈th në yïk kɔ̈u, ku riɛm biäkë abïï thuaat ë thaaŋ ë yïkic, ee miɔ̈c de kërac.

¹⁰ Ku ëtɛ̈ɛ̈n abï din däŋë jɔ gam ke ee miɔ̈c ye nyop ëbɛ̈n cït man de ciɛɛŋ, ku abï bɛ̈ny de kake Nhialic jɔ teem guöp në biäk de kërɛɛc cï looi, ku abï ja päl awɛ̈ɛ̈c.

¹¹ Ku na cïï raan guök kaarou ku nɔn yen ajiël ke guuk kaarou bï lëu, raan aduëër kilɔ töŋ de aɣaar bɛ̈ɛ̈i, ke ye miɔ̈c de kërac. Acïn miök de olip bïï tääu thïn, ayï wal ŋïr acïï bïï tääu thïn. Në baŋ ee yen miɔ̈c de awɛ̈ɛ̈c acie miɔ̈c ë rap.

¹² Ku ëtɛ̈ɛ̈n abï jɔ yiɛ̈n bɛ̈ny de kake Nhialic, ku abï yeciin jɔ thiɔ̈ɔ̈ŋ në aɣaar ke ye miɔ̈c de këcam ye gäm Bɛ̈nydït, ku abï nyop në yïk nɔm ke ee miɔ̈c de kërac bïï cam. Ee miɔ̈c nyiɛɛiyë kërac.

¹³ Në ee kueerë abï bɛ̈ny de kake Nhialic jɔ teem guöp në biäk de kërɛɛc cï looi në ee kakë yiic, ku abï ja päl awɛ̈ɛ̈c. Biäk de aɣar cï döŋ ee këde bɛ̈ny de kakë Nhialic, cït man de täu de miɔ̈c ë rap.

Miɔ̈c de Cuöl de Awäc

¹⁴ Go Bɛ̈nydït Mothe yɔ̈ɔ̈k an,

¹⁵ Të cïï raan kërac looi ke kuc, në luɔi kën yen kë ɣeric de Bɛ̈nydït riëëu guöp, abï nyɔk yiɛ̈n Bɛ̈nydït ke ee miɔ̈c de awäc, nyɔɔŋ cïn guöp tëdak, nyɔɔŋ duëërë ɣööcde piath, cït man ë kuën de atek nu tëɣeric yic, ee miɔ̈c de awäc.

¹⁶ Abï dhil cool në biäk de kë kën cuat piny, ku abï kuën biäk de ka ɣeriic bɛ cuat piny, ku gëm bɛ̈ny de kake Nhialic. Ku abï bɛ̈ny de kake Nhialic jɔ teem guöp, në nyɔɔŋ de miɔ̈c de awäc, ku abï ja päl awɛ̈ɛ̈c.

¹⁷ Na cï raan kërac looi ke cïï ŋic, në luɔi cï yen löŋ töŋ de Bɛ̈nydït dhoŋ kɔ̈u, ka acï wäc, abï miɔ̈c de awäc dhil gam.

¹⁸ Ku abï bɛ̈ny de kake Nhialic yiɛ̈n nyɔɔŋ amääl ku nɔn ee nyɔɔŋ bou, ke cïn guöp tëdak, abï aa miɔ̈c de awäc, nyɔɔŋ duëërë ɣɔ̈ɔ̈c apiɛth. Ku abï bɛ̈ny de kake Nhialic jɔ teem guöp në biäk de awäny cï looi, ku abï ja päl awɛ̈ɛ̈c.

¹⁹ Ee miɔ̈c de awäc në biäk cï yen awäc looi në Bɛ̈nydït nɔm.