Lebai 3 - JAM DE NHIALIC 2011

Miɔ̈c de Mät

¹ Na bïï raan miɔ̈c de mät, në ɣɔ̈kiic, na ë bïï weŋ ŋuöt, ku nɔn ee thɔn, abï aa weŋ cïn guöp të dak.

² Abï yeciin thany në miɔ̈cde nɔm, ku jɔ teem röl në paany de mät thok. Ku ëtɛ̈ɛ̈n, wɛ̈ɛ̈t ke Aron, bäny ke kake Nhialic abïk riɛm jɔ wiɛ̈ɛ̈th në aguuk ke yïk kedhie.

³ Në miɔ̈c de mätic, bɛ̈ny de kake Nhialic, abï miɔ̈c cï looi në mac yiɛ̈n Bɛ̈nydït, ku kɔɔl kedhie ayï ka cï röt nuat në kekɔ̈ɔ̈th.

⁴ Ku rook kedhie kekë kɔɔl nu në kekɔ̈ɔ̈th të lɔ yɔu, ku kën ee cuäny kum kɔ̈u, ku kë wën bïï bɛ̈ɛ̈i bei kekë rook.

⁵ Abïï wɛ̈ɛ̈t ke Aron keek jɔ nyop në yïk nɔm, në miɔ̈c ye nyop ëbɛ̈n nɔm, miɔ̈c nu në tiim dɛ̈p nïïm. Ke ye miɔ̈c ye looi në mac, miɔ̈c tum mit në Bɛ̈nydït piɔ̈u.

⁶ Na gëm raan Bɛ̈nydït miɔ̈c de mät në thökke yiic, abï ya ŋuöt ku nɔn yen nyɔk, ke cïn guöp tëdak

⁷ Na ee nyɔk en ë gɛm, abïï dhil gam Bɛ̈nydït.

⁸ Abï yeciin thany në miɔ̈cde nɔm, ku teem röl në paany de mät thok, ku ëtɛ̈ɛ̈n, wɛ̈ɛ̈t ke Aron bäny ke kake Nhialic, abïk riɛm jɔ wiɛ̈ɛ̈th në aguuk ke yïk kedhie,

⁹ në miɔ̈c de mätic, ku jɔ miɔ̈c cï looi në mac yiɛ̈n Bɛ̈nydït, kɔɔl kekë kɔl de yɔ̈l cï tɛ̈ɛ̈m bei të lɔ yuɔɔm de kɔ̈uwë, ku kɔɔl kedhie ayï ka ee röt nuat ë kekɔ̈ɔ̈th.

¹⁰ Rook kedhie kekë kɔɔl nu në kekɔ̈ɔ̈th të lɔ yɔu, ku kën ee cuäny kum kɔ̈u, kë wën bïï bɛ̈ɛ̈i bei kekë rook.

¹¹ Abïï bɛ̈ny de kake Nhialic keek nyop në yïk nɔm ke ke ye këcam, miɔ̈c cï luöi Bɛ̈nydït në mac.

¹² Na ye miɔ̈cde bou, abï dhil gam në Bɛ̈nydït nɔm.

¹³ Abï yeciin thany në miɔ̈cde nɔm, ku teem röl në paany de mät thok. Ku ëtɛ̈ɛ̈n, wɛ̈ɛ̈t ke Aron, bäny ke kake Nhialic, abïk riɛm jɔ wiɛ̈ɛ̈th në aguuk ke yïk kedhie.

¹⁴ Në ee kë cï gamë yic, abïï miɔ̈c luöi Bɛ̈nydït në mac. Ku kɔɔl ee biäk thïn kum kedhie ku kak ee röt nuat në keek.

¹⁵ Ku rook kedhie kekë kɔɔl nu në kekɔ̈ɔ̈th të lɔ yɔu, ku kë kum cuäny, kë wën bïï bɛ̈ɛ̈i bei kekë rook.

¹⁶ Abïï bɛ̈ny de kake Nhialic ke nyop në yïk nɔm ke ke ye këcam. Miɔ̈c cï looi në mac, miɔ̈c tum mit. Ku kɔɔl kedhie ee kake Bɛ̈nydït.

¹⁷ Kënë ee ciɛɛŋ bï tɔ̈u athɛɛr agut cï rɛm bï lɔ̈ɔ̈k bɛ̈n, në ɣäänkuön rɛ̈ɛ̈r wek ke thïn, duökï kɔl ee cam ayï riɛm.