Lebai 26 - JAM DE NHIALIC 2011

Athiɛɛi de Riëëu

¹ Acïï Bɛ̈nydït lueel an, “Duökï röt lui yiëth, ku duökï wal loi ayï kuur yaath duökï keek lui röt. Ku duökï kuur cï guaŋ tɛ̈ɛ̈u pinydun ku yak keek lam. Ee yɛn Bɛ̈nydït Nhialicdun.

² Yak kööl de löŋ döt ku yak tëdiën ɣeric riëëuwic. Ee yɛn Bɛ̈nydït.

³ Na lak wëëtdï kuany cök ku yak lööŋkï riëëu apiɛth

⁴ Wek bä tuöc deŋ ruël, ku piny abï luɔk në rɛɛpke, ku dhiëëth tiim mïthken.

⁵ Wek bï aa käm aɣët të bï rap tem ku tɛmkï rap aɣët të bï com bɛ bɛ̈n, ku wek bï këcam kaarkï ëbɛ̈n cam, ku wek bï rɛ̈ɛ̈r ë diu pinydun.

⁶ “Wek bä gäm mät pinydun. Ka wek bï aa niin, ku acïn raan bï week tɔ riɔ̈c. Yɛn bï läi rac nyaai pinydun, ku acïn abätäu bï wundun reetic.

⁷ Wek bï kɔc dɛ wek ater cop, ku abïk aa wïïk ë wenïïm në abätäu

⁸ Kɔc kadhïc ë weyiic abïk buɔ̈t aa cop, ku buɔ̈t ë weyiic abï aguum kathiëër aa cop. Ku kɔc dɛ wek ater, abïk aa wïïk ë wenïïm në abätäu.

⁹ Wek bä aa woi në piɔ̈n mit, ku wek bä tɔ dhiëth ku ŋuak kuëndun, ku yɛn bï Mändï döt wokë ë week.

¹⁰ Wek bï aa ŋoot ke we cam rɛɛp ke ruöön wään, ku abäk keek aa bɛ̈ɛ̈i bei, bä wek të bïï rɛɛp ë piac luɔk tääu thïn.

¹¹ Yɛn bï rëër në weyiic tëdiën ɣeric, ku wek cä ke bï nyääŋ piny.

¹² Yɛn bï aa cath në weyiic, ku yɛn bï aa Nhialicdun, ku wek bï aa kɔckï.

¹³ Ee Yɛn Bɛ̈nydït Nhialicdun, raan ë bïï we bei ë Rip, aguɔkï cïï be aa lïïm ke kɔc ke Rip. Yɛn cï joth rɛk wek dhoŋ kɔ̈ɔ̈th, ku ta week cath ke we tɔ̈u nïïm nhial në nɔm lääu.”

Kuöm de Ciën Riëëu.

¹⁴ Ku na cäkï jamdï lɔ piŋ, ku cäkï lööŋkiën cä lueelë kedhie bï looi.

¹⁵ Ku na lak wëëtdï rɛɛc ku mankï lööŋkï, ku cäkï lööŋkiën cä lueelë kedhie bï looi, ku dhuɔŋkï mändï kɔ̈u.

¹⁶ Wek bä jɔ luöi kakë: Wek bï yiɛ̈n riääk ëthiäu, wek bä yiɛ̈n jɔɔk thöl kɔc, ku atuöc bï week tɔ cɔɔr, ku nyiith wëikun wei, wek bï rap aa cuöm baŋ, në biäk bï kɔc dɛ wek ater ke cam.

¹⁷ Yɛn bï rɔt wël week, ago kɔc dɛ wek ater week tiaam, kɔc man, week abïk week cieŋ. Ku wek bï ya kat, cakaa të cïn en raan cop week.

¹⁸ “Ku në ee kakë cök kedhie na lak ŋoot ke we cïï jamdï piŋ. Wek bä kuum në baŋ de karɛckun raan dhorou ku nɔm.

¹⁹ Yɛn bï lɛcduön dït dhoŋ kɔ̈u, ku ta nhial tɔ cït wëëth ë wenïïm ku ta piny tɔ cït ayööm ë wecök.

²⁰ Riɛldun abï thök baaŋ në biäk cïï pinydun bï luɔk në rap, ayï tiim aya acïkï bï luɔk në mïth.

²¹ “Ku na lak ŋoot ke we loi ater në yɛn, ku cäkï jamdï piŋ. Yɛn bï nuɛɛnkun ŋuak nyïïn raan dhorou ku nɔm. Cït man ë kë röŋ kekë karɛckun.

²² Yɛn bï läi rac tuöc week, ku abïk mïthkun ruöm bei në wecin ku riäärkï ɣɔ̈kkun, ku tɔkï week lik aläl ka kuɛɛrkun abïk keek pɔ̈l.

²³ “Ku në ee kakë yiic kedhie, ku ŋuɔɔtkï ke we cïï jamdï gam ku lakï tueŋ ke we loi ater në yɛn.

²⁴ Ëtɛ̈ɛ̈n, Yɛn bï ater luöi week, ka wek bä luöi këtuc thok raan dhorou awär kë tueŋ ë biäk ë karɛckun.

²⁵ Yɛn bï week tɔ näk abätäu, bä yɛn ke luɔi cä wek mändï dhoŋ kɔ̈u guöör. Të la wek lɔ ciëën ë pɛ̈ɛ̈nydïtkun yiic, yɛn bï jɔɔk tuc thook tuöc week, ka we bï röt gäm kɔc dɛ wek ater.

²⁶ Yɛn bï të ye këcamdun bɛ̈n tɛɛm wei, ka diäär kathiëër abïk kuïnduön cï pam aa thaal në töny tök yic. Ku abïk kuïn cï pam aa thɛ̈m bei në ke ye ë them, ku të cä wek cam, wek bï ŋoot ke we nɛ̈k cɔk.

²⁷ “Ku në ee kënë cök ë bɛ̈n ku lak ŋoot ke we cïï jamdï piŋ, ku lakï tueŋ ke we cïï Yɛn rïïu,

²⁸ ëtɛ̈ɛ̈n në agönhdï, Yɛn bï ater luöi week, ku bɛ we luöi këtuc thok aläl raandhorou awär këtueŋ ë biäk de karɛckun.

²⁹ Cɔŋdun abï dït aläl ka wek bï rïŋ ke wɛ̈ɛ̈tkun kekë duetkun cuet.

³⁰ Yɛn bï ɣäänkuön ke läm nu ë kur nïïm riɔ̈ɔ̈k, ku dhuɔŋ yïïŋdun piny yïïŋ ye wal ŋïr nyop, ku wiɛt gupkuön cï thou në yanhduön cï wïïk kɔ̈u, ku wek bä maan aläl.

³¹ Yɛn bï pɛ̈ɛ̈nydïtkun riäär piny, ku riääk ɣäänkuön ke läm, ku rɛɛc miɔ̈cduön ye gam.

³² Yɛn bï pinydun riɔ̈ɔ̈k liŋliŋ, ka kɔc dɛ wek ater rɛ̈ɛ̈r ëtɛ̈ɛ̈n abïk gäi aläl në riääk cït ee kënë.

³³ Yɛn bï tɔŋ yiɛ̈n week ku thiäi we piny ë juööriic. Pinydun abï yic ciën kɔc ku pɛ̈ɛ̈nydïtkun tɔ̈u ke ke cï riääk.

³⁴ Ku ëtɛ̈ɛ̈n piny abï lɔ̈ŋde jɔ looi në ee runkɛn bï yen ke rɛ̈ɛ̈r ke cïn yic kɔc. Ku wek bï nu në wuöt ke kɔc dɛ wek ater, ëtɛ̈ɛ̈n piny abï jɔ lɔ̈ŋ, ku looi kööl de lɔ̈ŋde.

³⁵ Në aköölkɛn bï en ke tɔ̈u ke cïn yic kɔc, piny abï lɔ̈ŋde jɔ yök. Lɔ̈ŋ awään cïï ee yök në run wään rɛ̈ɛ̈r wek thïn.

³⁶ “Ku në biäkdun wek kɔc cï döŋ ke we pïïr, yɛn bï riɔ̈ɔ̈cdït tääu në wepiɔ̈ɔ̈th piny de kɔc dɛ wek ater. Cakaa röl de yïnh ë tim gɔp ë yom abï keek tɔ kɔt. Abïk kat cït man ë ka kɔt në tɔŋ, ku abïk aa wïïk, cakaa cïn raan cop keek.

³⁷ Ka abïk kecök aa dɔ̈ɔ̈r kapäc, cït man ë kɔc kɔt në tɔŋ, cakaa të cïn en raan cop keek. Ka we cïï kɔ̈ɔ̈c bï lëu në kɔc ke aterdun nïïm.

³⁸ Wek bï thou ë juööriic, piny de kɔc de wek ater abï week liek

³⁹ Kɔc cï döŋ ke ke pïïr ë weyiic abïk riɛ̈ɛ̈r wei, piny de kɔc dɛ wek ater në biäk de karɛcken. Ku abïk riɛ̈ɛ̈r wei ayadäŋ në biäk de karɛc ke wärken.

⁴⁰ “Ku na lek karɛcken gam ku gɛmkï karɛc ke wärken, ku gɛmkï awɛ̈ɛ̈c cïk luöi Ɛn ku aterdɛn cïk looi në Yɛn.

⁴¹ Yen kën ë tɔ ya loi ater wo keek, aguɔ keek tuɔɔc piny de kɔc de kek ater. Ku të le piɔ̈ɔ̈thkɛn kën ë cueel röt kuɔɔr piny ku cuɛtkï ariöp de karɛcken piny.

⁴² Ëtɛ̈ɛ̈n, yɛn bï mändï tak wokë Jakop, ku mändï wokë Yithaak, ku mändï wokë Abraɣam, ku yɛn bï piny tak.

⁴³ Në biäk bï kek piny pɔ̈l, ku yɛn jɔ lɔ̈ŋde looi, të bï en rɛ̈ɛ̈r yetök të cïn keek. Abïk ariöp de karɛcken cuat piny në biäk cï kek lööŋkï rɛɛc ku mankï wëëtdï.

⁴⁴ Ku na cakaa nɔn tɔ̈u en aya të rɛ̈ɛ̈r kek piny de kɔc de kek ater, acä keek bï rɛɛc ku acä keek bï maan man abä keek riɔ̈ɔ̈r nyïïn taitai, ku riääk mändï wokë keek. Ee Yɛn Bɛ̈nydït Nhialicden.

⁴⁵ Ku në baŋden yɛn bï mät tak wokë kuarken, kɔc wään bɛ̈ɛ̈i bei ë Rip, në juöör nyïïn bä ya Nhialicden. Ee yɛn Bɛ̈nydït.”

⁴⁶ Kakë ayek wëët, ku lööŋ, ku jam ë lueel Bɛ̈nydït, në kuur ë Thinai nɔm, lɛ̈k keek Mothe bï ke guiëër kɔc ke Yithriɛl.