Lebai 25 - JAM DE NHIALIC 2011

Ruöön de Dhorou

¹ Go Bɛ̈nydït Mothe yɔ̈ɔ̈k, në kuur ë Thinai nɔm an,

² Jäämë kɔc ke Yithriɛl ku lɛ̈kë keek an, të la wek lɔ piny la gäm week, yen piny guöpde abï dɛ ruöön de Thabathde këde Bɛ̈nydït.

³ Në run kadhetem yiic yak duumkun com, ku në run kadhetem yak tiimkun guaar nïïm ku yak mïthken tet.

⁴ Ku në ruöön de dhorou, piny abï dhil lɔ̈ŋ, ee Thabath de Bɛ̈nydït. Duökï duumkun com ku duökï tiimkun guar nïïm.

⁵ Duökï ka cï luɔk kapäc tem. Ku duökï mïth ke enap kënkï keek tiit tet, piny abï nɔm dɛ ruöön de lɔ̈ŋ.

⁶ Ku bï luɔk piny ëbɛ̈n ë ruöön de Thabath ë dhorou, abï ya këcamdun wegup, ayï röör lïïmkun ayï duet lïïmkun ayï kɔc lui në week ayï kamaan rɛ̈ɛ̈r në week ë nïn liiakäŋ.

⁷ Ayï ɣɔ̈kkun aya, ku läi roor nu paandun. Ka lɔ luɔk piny kedhie aduëër ë keek cam.

Ruöön de Cuölëkäŋ

⁸ Kuen run kadhorou raandhorou ee run kathiërŋuan ku dhoŋuan kedhie.

⁹ Na ëlë në kööl de thiëër ë pɛɛi de dhorou, Kööl de atɛɛm, toc raan bï kaaŋ lɔ kooth ë wuötiic paandun ëbɛ̈n

¹⁰ Në ee kueerë wek bï ruöön ye kek dhïc tɔ̈ɔ̈u pei, ku lɛ̈kkï nɔmlääu kɔc ceŋ piny kedhie. Ku në ee ruöönë yic ka cï keek ɣaac kedhie, abï keek pɔ̈k nïïm raandɛn tueŋ ku nɔn ee yen mïth ke mïthke, ku raan cï ɣaac ke ee lïm abï rɔt pɔ̈k paanden.

¹¹ Wek cïï duumkun bï com ku cäkï rɛɛp cï luɔk kapäc bï tem, ku cäkï mïth ke enap kënkï guar bï tet.

¹² Yen ruöön ëbɛ̈n abï yic ɣɛɛr tëde week kë bäk cam yetök ee ka cï luɔk ë duumiic kapäc.

¹³ Në ee ruöönë yic ka wään cï ɣaac ëbɛ̈n, abï keek dɔ̈k nïïm raandɛn tueŋ.

¹⁴ Ka të ɣɔ̈c yïn raande Yithriɛl piny ku nɔn ee piny yen ɣɔc tëde yen, duökï ee luui në ruëëny.

¹⁵ Kuën aduëër ë mac, cït man ë run ke luɔk de dom, të ŋoot ë ruöön bï ë ye pɔ̈k nɔm wun wei.

¹⁶ Ku na de run juëc, ke kuën abï lɔ nhial, ku na lik run ke kuën abï nu ciëën, në luɔi ee yen kë bï dom bɛ̈ɛ̈i të ciën luɔk yen ɣɛɛcë.

¹⁷ Duökï raanduön de Yithriɛl ee cam, yak riɔ̈ɔ̈c ë Nhialicdun, ee Yɛn Bɛ̈nydït Nhialicdun.

Nuɛɛn ke Ruöön de Dhorou.

¹⁸ Riëëukï lööŋ ke Bɛ̈nydït kedhie ku wëëtde. Aguɔkï rɛ̈ɛ̈r apiɛth paan bïï gäm week.

¹⁹ Piny abï luɔk në rɛɛpke, ku wek bï nïïm de këcam kaarkï ëbɛ̈n, ku wek bï rɛ̈ɛ̈r apiɛth.

²⁰ Tɛk däŋ bäk lop an, Eeŋö buk cam në ruöönë dhorou, na cuku cum ku cuku rɛɛpkuɔ tem?

²¹ Wek bä tuöc athiɛɛi dït në ruöön de dhetem, ka pinydun abï luɔk në rɛɛp ke run kadiäk.

²² Të la wek com në ruöön de bɛ̈t, wek bï cam në rɛɛp thɛɛr yiic ku we bï ŋoot ke we cäm thïn agut cï të le tëm de ruöön ë dhorou bɛ̈n thïn.

Cuöl de Käŋ

²³ Piny acïï bï dhil ɣaac liŋliŋ, në biäk ye piny këdï, ku week ee kɔc lei tei, ku yak kɔckiën ee tïït.

²⁴ Ku në piny rɛ̈ɛ̈r wek thïn ëbɛ̈n ke ee këdun, wek bï këdäŋ dhil aa tääu piny waar wek piny.

²⁵ Na cï raan tök nyin kuany në kɔc wundun yiic, ku ɣɛɛc kakɛn kɔ̈k, raan raan kekë yen aläl, aduëër bɛ̈n ku wɛɛr ka cï raanden ke ɣaac.

²⁶ Ku na cïn raan nɔm raandɛn duëër käŋ wɛ̈ɛ̈r en, ku cïn raan kueth, ku jɔ nɔm dɛ ka röŋ ke luɔi wɛɛr en en.

²⁷ Ka aduëër kuën ke run ɣɔn ɣɛɛc yen en thɔ̈ɔ̈ŋ, ku cul raan wään ɣɔc piny tëde yen wëukɛn kɔ̈k, ku ëtɛ̈ɛ̈n aduëër jɔ lɔ ciëën ë kake yiic.

²⁸ Ku na le ciën ka cï keek yök bï en ke raan cuööt, ke kë cï ɣaac abï ya këde raan ë ɣɔɔc en, agut cï ruöön de cuöl ë käŋ. Ku ëtɛ̈ɛ̈n aduëër jɔ lɔ ciëën në kake yiic.

²⁹ Na cï raan ɣöt ɣaac në pänydït yic, aduëër ŋoot ke ee kë bï waar aɣët të le en ruöön tök thöl në ɣɛɛcde, aduëër waar në ee kaamë yic.

³⁰ Na lɔ ruöön wan, ke kuën ë waar ke ɣön nu ë pänydïtic abï aa këde raan ë ɣɔ̈c kekë mïth ke mïthke liŋliŋ. Acïï bï bɛ puk nɔm në ruöön ë cuöl ë käŋ.

³¹ Ku ɣööt nu në bɛ̈i yiic bɛ̈i kënë ke luöi kɛ̈l, abïï keek tɔ ee duum biic, aduëër ë keek aa waar, ku abï keek dhil aa puk nïïm në ruöön ë cuöl ë käŋ.

³² Ku kɔc ke Lebai adekï nïïm yicdɛn bï kek ɣöötken aa waar në pɛ̈ɛ̈nydït ke Lebai yiic, pɛ̈ɛ̈nydïtkɛn cieŋkï keek.

³³ Ka kake kɔc ke Lebai abï keek aa waar yen ɣön cïk ɣaac në ruöön de cuölëkäŋ në biäk ye ɣööt wën nu ë pɛ̈ɛ̈nydït ke Lebai yiic kaken në kɔc ke Yithriɛl yiic.

³⁴ Ku ɣään ke nyuäth nu ë pɛ̈ɛ̈nydïtken yiic acïï keek bï dhil ɣaac ee kaken liŋliŋ.

Ka cï Dhɛ̈n Kɔc Kuany nyïïn

³⁵ Na cï raan tök nyin kuany në kɔc wundun yiic, ku acïn luɔi lëu en rɔt në weyiic, kuɔnykï cït man duëër wek raan lei kony ku nɔn ee kaman, aŋoot ke rɛ̈ɛ̈r në weyiic. Duökï kajuëc nöm tëde yen, yak riɔ̈ɔ̈c ë Nhialicdun, ago raan wundun ŋoot ke rɛ̈ɛ̈r ë weyiic.

³⁶ Duökï dhën wëu bï kenyïïn ŋuak, ku duökï ɣɔ̈c këcam në wëu juëc.

³⁷ Ee Yɛn Bɛ̈nydït Nhialicdun, raan ë bïï we bei në Rip, bïï we bɛ̈n gäm piny de Kanaan, ku bïï aa Nhialicdun.

³⁸ Na cï raan wundun tök nyin kuany në weyiic, ku ɣɔ̈c rɔt week, duökï tɔ lui cït man ë lïm.

Luny de Lïïm

³⁹ Abï dhiɛl luööi cït man ë raan lui në wëu, ku nɔn ee kaman ë weyiic, abï dhil lui ke week agut cï ruöön de cuölëkäŋ.

⁴⁰ Ëtɛ̈ɛ̈n yen kekë baaide abïï keek jɔ lony, ku abï jɔ lɔ ciëën të nu dhiënden ku jɔ lɔ piny de wärken.

⁴¹ Në biäk ye kɔc ke Yithriɛl lïïmkiën ë bɛ̈ɛ̈i bei Rip, acïï keek bï dhil ɣaac ke ke ye lïïm.

⁴² Duökï keek ceŋ arac. Yak riɔ̈ɔ̈c në Nhialicdun.

⁴³ Lïïmkuön röör ku lïïm duet, abäk keek bɛ̈ɛ̈i në juöör thiääk ë week yiic. We bï lïïm ɣɔɔc në keyiic.

⁴⁴ Ku wek duëër ɣɔ̈ɔ̈c në kɔc rɛ̈ɛ̈r ë weyiic ke ke ye kamaan, ayï juöör ë dhiëth wundun wek duëër lïïmkun ɣɔɔc në keyiic, ku abïk aa kakun.

⁴⁵ Aduëërkï keek tɔ lak ë mïthku, ku abïk aa kaken në pïïrden yic. Ku wek cïï kɔckun ke Yithriɛl bï ceŋ arac.

⁴⁶ Na cï raan lei ku nɔn ee kaman rɛ̈ɛ̈r ë weyiic kuɛth, ku lɔ raanduön tök nyin kuany ku lee rɔt ɣɔ̈c raan lei ku nɔn ee kaman rɛ̈ɛ̈r ë weyiic.

⁴⁷ Ade nɔm yic bï ë yen waar të cï yen rɔt ɣaac. Raan töŋ de kɔcken aduëër en waar.

⁴⁸ Wuulënë ku nɔn ee wënwuun ayï raan raan kekë yen, raan dhiënden, aduëër yen waar, ku na cï rɔ lɔ yɔ̈k wëu juëc aduëër rɔt waar.

⁴⁹ Yen kekë raan ë ɣɔ̈c yen, abïk kaam kueen, gɔl ë ruöön ë ɣɛɛc en rɔt aɣët cï ruöön de cuölëkäŋ. Ku kuën bï ë yen waar, abï ya kuën ye gäm raan lui, në pëk ë kuɛ̈n de run.

⁵⁰ Na ee run juëc kek cï döŋ, ke abï wëu dhil cool bï en ke rɔt waar në wëu ke ɣööcde.

⁵¹ Na ee run liaakäŋ ke cï döŋ tei në bɛ̈n ë ruöön ë cuölëkäŋ. Ke abï ë kakë kiëët nïïm ku cool wëu wɛɛr en rɔt në ka röŋ.

⁵² Ku na lee luööi në luɔi de raan lui ë run nyin ëbɛ̈n. Ke abäk dhil döt ë gɔk nɔn cïï raande yen, ye bï luööi arac.

⁵³ Cakaa yen ë kënë waar në kueer ë yic yen kekë mïthkë abï keek lony në ruöön ë cuölëkäŋ

⁵⁴ Na kënë lony në kueer tök në ee kuɛɛrkë yiic, yen kekë mïthke aduëërë keek lony në ruöön däŋ bïï ë kɔc bɛ lony.

⁵⁵ Raan de Yithriɛl acïï duëër aa lïm athɛɛr, në biäk ye kɔc ke Yithriɛl lïïm ke Bɛ̈nydït. Acï ke bɛ̈ɛ̈i bei ë Rip, ee Yɛn Bɛ̈nydït Nhialicden.