Lebai 24 - JAM DE NHIALIC 2011

Dön bïï Manyalath Döt

¹ Go Bɛ̈nydït Mothe yɔ̈ɔ̈k,

² an, “Yɔ̈ɔ̈kë kɔc ke Yithriɛl, agokï miök piɛth de olip cï dhiim bɛ̈ɛ̈i, ago manyalath dɛ̈p aköölnyïïn ke cï liu.

³ Të ye cï piny aa thëën aköölnyïïn Aron abï mɛ̈ckealath dɛ̈ɛ̈p ku tɔ keek tɔ dɛ̈p aɣet të bïï piny ruu, abï looi ë gëlgël de athänduŋ de mät thok biic, ë paany de mätic. Yen ee löŋë abïï aa looi aköölnyïïn kedhie agut cï run bï lɔ̈ɔ̈k bɛ̈n.

⁴ Aron abï mɛ̈ckealath dhil tiit në të ye ë keek cäp thïn në adhäm awai nɔm, ku bï keek tïŋ luɔi dɛ̈p kek ë Bɛ̈nydït nɔm aköölnyïïn.

Kuïn cï Pam Gëmë Nhialic

⁵ Nöm kilɔɔ ke aɣaar kathiëër ku rou ku thal kuïïn cï pam kathiëër ku rou.

⁶ Tääuwë kuïïn cï pam në aber kaarouwiic, ye dhetem tääu në aber tökic në paam nɔm, paam cï kum nɔm ë adhäm awai nu ë Bɛ̈nydït nɔm.

⁷ Tuɛɛlë wal ŋïr piɛth kɔ̈k në aber yiic ke ee kë bï miɔ̈c de këcam gämë Bɛ̈nydït käär, ke bï tëde kuïn cï pam nööm.

⁸ Në akööl ke Thabath yiic kedhie, ku në run nyïïn ëbɛ̈n kuïn cï pam abï dhil tääu ë Bɛ̈nydït nɔm. Kënë abï kɔc ke Yithriɛl aa looi aɣet athɛɛr.

⁹ Ku kuïn cï pam ee këde Aron kekë kuatde. Ku abïk dhil cam tëɣeric në biäk ee yen baŋ de kuïn ɣeric aläl, kuïn cï gäm Bɛ̈nydït këde bäny ke kake Nhialic.

Nyooth de Kuöm Yic.

^10-11 Na wën ke mony ye wun raan de Rip, ku ye man nyan de Yithriɛl, ë lɔ biic kekë kɔc ke Yithriɛl, ago tɔŋ rɔt looi në kaam wun de kekë mony ë Yithriɛl. Go wën de nyan de Yithriɛl rin ke Bɛ̈nydït lät aciɛɛn. Agokï yiɛ̈n Mothe, (ku man acɔl rin Celomith, nyan de Dibri, nyan dhiën ë Dan)

¹² Agokï tääu në aloocic, në biäk bï kek këde Bɛ̈nydït piɔ̈u ŋic në biäkde.

¹³ Na wën ke Bɛ̈nydït ë yöök Mothe an,

¹⁴ “Lɛɛrkï raan ë lɛ̈t Bɛ̈nydït aciɛɛn ë wut këc, ku kɔc ë piŋ en ke lɛ̈ɛ̈t Bɛ̈nydït kedhie ë ke thɛny kecin në yenɔm. Ku ë jɔ biɔ̈ɔ̈k në akutnɔm ëbɛ̈n abïï thou

¹⁵ Ku yöökë kɔc ke Yithriɛl an raan ëbɛ̈n raan lɔ Nhialic lɔ lät aciɛɛn, acï kërac looi.

¹⁶ ku näk. Ku na lɔ raan de Yithriɛl ku nɔn aa alei rɛ̈ɛ̈r ë Yithriɛl na le Bɛ̈nydït lɔ lät aciɛɛn abïï biöök në akutnɔm abïï thou.

¹⁷ Na de raan cï raan nɔ̈k, ke abï dhil nɔ̈k.

¹⁸ Na de raan cï weŋ de raan däŋ nɔ̈k, ke abï dhil cool. Pïïr ee nɔm pïïr.

¹⁹ “Na de raan cï raan gäm guöp buɔ̈t, këdɛn cï looi abï dhil luɔi yen.

²⁰ Dhuŋ ee nɔm dhuŋ, nyin ee nɔm nyin, lëc ee nɔm lëc. Cït man cï yen raan gäm guöp buɔ̈t, abïï gäm guöp buɔ̈t aya.

²¹ Raan cïï weŋ nɔ̈k abïï cool, ku raan lɔ raan nɔ̈k abïï dhil nɔ̈k.

²² Kek ee lööŋ abäk keek luöi kɔc lei, ayï kɔc ë dhiëth ë weyiic. Ee Yɛn Bɛ̈nydït Nhialicdun.”

²³ Go Mothe kɔc ke Yithriɛl jääm, agokï raan wën cï Bɛ̈nydït lät rin aciɛɛn lɛɛr ë wut këc biic ku biöökë. Go kɔc ke Yithriɛl looi cït man cïï Bɛ̈nydït Mothe yöök.