Lebai 22 - JAM DE NHIALIC 2011

Ɣɛɛrë yic de Miɔ̈c

¹ Go Bɛ̈nydït Mothe yɔ̈ɔ̈k,

² an, “lɛ̈kë Aron kekë wɛ̈ɛ̈tke an, ‘Bïk miɔ̈c ee kɔc ke Yithriɛl gäm Ɛn aa looi në riëëu. Aguɔkï rinkiën ɣeriic cuö yɔ̈ɔ̈r, Ee Yɛn Bɛ̈nydït.

³ Në rɛm bï lɔ̈ɔ̈k bɛ̈n yiic, na lɔ mɛnh töŋ de guöp acuɔl ë käudu yic lɔ bɛ̈n ë miɔ̈c ɣeric cïï kɔc ke Yithriɛl yiɛ̈n Ɛn lɔ̈ɔ̈m, yen ee raanë, acïï bï bɛ lui në yïk nɔm, kënë abï aa looi në akööl bɔ̈ yiic kedhie. Ee Yɛn Bɛ̈nydït.

⁴ “Na de mɛnh tök ë mïth ke Aron yiic, na de guöp wɛth ku nɔn cï guöp toŋ, acïï bï cam në këcam ɣeric de Bɛ̈nydït aɣët të bï yen guöp waar. Ku abï guöp dɛ acuɔl ayadäŋ na cï këde raan cï thou jak, ayï raan ye mïthke wat,

⁵ Ayï na cï kë ye mol piny jak, kë duëër en tɔ de guöp acuɔl, ayï raan duëër en tɔ de guöp, ku këriëëc de guöp acuɔl ëbɛ̈n.

⁶ Raan lɔ këde guöp acuɔl jak, abï guöp dɛ acuɔl aɣet thëën. Acïï miɔ̈c ɣeric de Bɛ̈nydït bï cam, aɣet të bï en kɔn waak në pïïu.

⁷ Të cï akɔ̈l jɔ lɔ piny, yen abï en guöp ɣɛɛr, ku ëtɛ̈ɛ̈n, aduëër jɔ cam në miɔ̈c ɣeric në biäk ee kek kacaamke.

⁸ Ku yen acïï bï dhil cam në rïïŋ de lɛ̈n cï thou, ku nɔn ee lɛ̈n ë nɛ̈kë läi roor, ago guöp dɛ acuɔl në biäkde, Ee Yɛn Bɛ̈nydït.

⁹ “Bäny ke kake Nhialic abïk wëëtdï dhil döt, ke cïï bïï aa kërac në kegup, ke ke cïï bï thou, të lan keek jääm në agɔ̈th. Ee Yɛn Bɛ̈nydït, Raan ë tɔ keek ɣer.

¹⁰ “Acïn raan lei bï cam në miɔ̈c ɣeric yic, raan cie mɛnh dhiën de bäny de kake Nhialic. Na cakaa kaman de bɛ̈ny de kake Nhialic ayï raan lui kekë yen acïï bï cam në ye.

¹¹ Ku na cï bɛ̈ny de kake Nhialic lïm ɣɔɔc në wëu, ku nɔn ee lïm ë dhiëth paande, yen ee lïmë aduëër këcamde cam.

¹² Ku na cï nyan de bɛ̈ny de kake Nhialic thiaak në raan cie bɛ̈ny de kake Nhialic acïï bï cam në miɔ̈c ɣeric ë juaar.

¹³ Ku na cï nyan de bɛ̈ny de kake Nhialic aa tiiŋ abaar, ku nɔn cï puɔ̈l, ku acïn nɔm mïth, ku le rɛ̈ɛ̈r paanden cït man wään ee yen duet, aduëër dhil cam në këcam ë wunic. Raan alei acïï bï dhil cam në ye.

¹⁴ “Na cï raan cie raan dhiën de bɛ̈ny de kake Nhialic cam miɔ̈c ɣeric, ke cïï ŋic, abï kë cï cam dhil cuöl bɛ̈ny de kake Nhialic ëbɛ̈n ku ŋuɛk në biäk ee käŋ dhïc.

¹⁵ Bɛ̈ny de kake Nhialic acïï miɔ̈c ɣeric ee kɔc ë Yithriɛl gäm Ɛn bï riɔ̈ɔ̈k.

¹⁶ Në luɔi ee yen raan cïn nɔm yic, bï cam tɔ cäm kënë aduëër aa awäc ku abï këtuc bɛ̈ɛ̈i në raan cït ee kënë guöp, Ee Yɛn Bɛ̈nydït, raanë tɔ miɔ̈c ɣeric.”

¹⁷ Na wën ke Bɛ̈nydït ë yöök Mothe,

¹⁸ Jäämë Aron kekë wɛ̈ɛ̈tke ku kɔc ke Yithriɛl kedhie, yɔ̈ɔ̈k ë keek: an, na de raan baai de Yithriɛl ë we yiic, ku nɔn ee raan lei rɛ̈ɛ̈r ë Yithriɛl: Të gëm en miɔ̈c ye nyop ëbɛ̈n Bɛ̈nydït, na gɛm në biäk de gutguut cï lueel ku nɔn ee miɔ̈c de miɛtëpiɔ̈u.

¹⁹ Yïn bï thɔ̈n cïn guöp tëtök dhil gam në ɣɔ̈kiic ayï nyɔɔŋ de bou ayï nyɔɔŋ amääl ago gam në nyindu yic.

²⁰ Du kë de guöp tëdak bïï, në biäk cïï ë yen bï gam në nyindu yic.

²¹ Të bïï ë raan miɔ̈c de mät në ɣɔ̈k yiic, ayï thök yiic, yïn Bɛ̈nydït, na gɛm në biäk de gutguut cï lueel ku nɔn ee miɔ̈c de miɛtëpiɔ̈u, abï dhil dikëdik, ke cïn guöp tëdak, ke bï gam.

²² Du Bɛ̈nydït miɔc në weŋ cɔɔr, ayï ŋɔl, ayï weŋ cï dhuɔɔŋ, ayï weŋ de guöp tëtök, ayï weŋ cï guöp piɔ̈ɔ̈ny, ayï weŋ cï kɔ̈u tuɔɔr. Du ɣɔ̈k cït ee kakë leer ë yïk kɔ̈u ke ee miɔ̈c ye nyuöp Bɛ̈nydït në mac.

²³ Yïn duëër weŋ ayï thɔ̈k cï kɔ̈u dhuɔɔŋ gam ke ee miɔ̈c de miɛtëpiɔ̈u. Ku acïï ke duëër ë gam të looi ë gutguut.

²⁴ Du Bɛ̈nydït gëm miɔɔr cï doŋ nhian, ayï miɔɔr cï tɛ̈ɛ̈m nhian bei, ayï miɔɔr cï nhian piɔ̈ɔ̈ny, ayï miɔɔr cï roc. Kënë acïï bïï aa looi pinydun.

²⁵ Ku läi cït ee kakë acäkkï keek bï aa gam në kɔc lei cïn, ku gamkï keek ke ke ye këcam de Nhialicdun. Acïï keek bï gam në nyindun yic, në biäk cïï kek riääk ku adekï gup tëdak.

²⁶ Go Bɛ̈nydït Mothe yɔ̈ɔ̈k an,

²⁷ “Të cïï ë dau dhiëëth ayï amɛthɔ̈k amääl ayï amɛthɔ̈k bou, abï tɔ rɛ̈ɛ̈r kekë man në nïn kadhorou yiic, na nïn ye ë nïn bɛ̈t leer tueŋ, aduëër ë gam, të tɔ ë yen ee miɔ̈c ye luɔi Bɛ̈nydït në mac.

²⁸ Du weŋ ayï thɔ̈k tem röl kekë mɛnhde në kööl tök.

²⁹ Të gëm yïn Bɛ̈nydït miɔ̈c de thieithieei ye gam në kueer piɛth duëër ë yen gam në nyindu yic,

³⁰ abï dhil cam ë kööl manë guöp, në cïn biäk both agut cï miäk. Ee Yɛn Bɛ̈nydït.

³¹ Dɔ̈tkï lööŋkï ku kuanykï keek cök. Ee Yɛn Bɛ̈nydït.

³² Duökï rinkiën ɣeric ee läät, Yɛn bïï kɔc ke Yithriɛl dhil ŋic nɔn ɣɛɛr Yɛn yic. Ee Yɛn Bɛ̈nydït raan ë tɔ week ɣeric.

³³ Ku ya raan ë bïï week bei ë Rip, bä ya Nhialicdun. Ee Yɛn Bɛ̈nydït.”