Lebai 20 - JAM DE NHIALIC 2011

Gääk de Ciën Riëëu

¹ Na wën ke Bɛ̈nydït ë yɔ̈ɔ̈k Mothe,

² an, “Jäämë kɔc ke Yithriɛl: an, ‘Raande Yithriɛl kedhie ayï kɔc lei rɛ̈ɛ̈r në weyiic kedhie, raan lɔ mɛnhde gäm bï näk Molek raanë abï dhil nɔ̈k, yen abïï kɔc ke wut dhil biɔ̈ɔ̈k ë kur.

³ Yɛn bï Yanyin wɛ̈l ee raanë ku abä tɛ̈ɛ̈m bei në kɔckï yiic në biäk cïï yen mïthke gäm Molek, acï tëdiën ɣeric riɔ̈ɔ̈k ku lɛ̈ɛ̈t rinkiën ɣeriic.

⁴ Ku na lɔ kɔc ke wut këdɛn cï looi miëm yic, ku cïkï ee raanë näk,

⁵ Yɛn guöpdï, yɛn man ciën gämden ye kek Yɛn pɔ̈l, ku lɛmkï Molek. Abä ke tëëm bei në kɔckï yiic.

⁶ Na de raan lɔ cɔ̈ɔ̈r ë kɔc ee cɔ̈ɔ̈r nïïm ku kɔc de gup jɔɔk rac, ku riäkkï röt në läm lɛm kek yiëth, abä keek tëëm bei në kɔckï yiic.

⁷ Takï we yiic ɣer në biäk ee yɛn Bɛ̈nydït Nhialicdun.

⁸ Riëëukï lööŋkï ku dɔ̈tkï keek, ee yɛn Bɛ̈nydït, raan ee yïn tɔ ɣeric.

⁹ Na lɔ raan wun kekë man läm aciɛɛn raanë abï dhil nɔ̈k, në biäk cïï yen wun kekë man lam, ku riɛmde abï nu ë yeyeth yetök.

¹⁰ Na lɔ raan tiiŋ de raandäŋ nööm, na ee tiiŋ ë raan rɛ̈ɛ̈r kek yen ë mony ë nöm tik kekë tiiŋ ë nöm abïï keek dhil nɔ̈k kedhie.

¹¹ Na lɔ raan tiiŋ ë wun nööm, acï wun yɔ̈ɔ̈r guöp, yen ë monyë kekë tiiŋë abïï keek dhil nɔ̈k, riɛmden abï nu ë keyiëth kapäc.

¹² Na lɔ raan tiiŋ ë wënde nööm, keek kaarou abïï keek dhil nɔ̈k, këdɛn cïk looi ee kërac. Riɛmden abï nu ë keyiëth kapäc.

¹³ Na nöm raan moc cït man ye raan tik nööm. Keek kaarou acïk gök ë kërac looi abïï keek dhil nɔ̈k, riɛmden abï nu ë keyiëth kaarou.

¹⁴ Na thiak raan tik kekë man, keek kedhie kadiäk abï keek dhil nyop ë mac abïk thou. Ago ciɛ̈n kërɛɛc cït ee kënë bï tɔ̈u ë we yiic.

¹⁵ Na cï raan tɔ̈c kekë lɛ̈i aya, yen ë raanë abï dhil nɔ̈k ku näk lɛ̈i aya.

¹⁶ Na cï tik rɔt tɔ nööm ë lɛ̈i, ke tik abï dhil nɔ̈k kek ë lɛ̈i kedhie. Riɛmden abï nu ë keyiëth kapäc.

¹⁷ Na cï raan nyan kënë thiaak, na ee nyan, ë wun ayï nyan, ë man ku cïk röt nööm, ee gök de ayäär. Abïï keek dhil tɛɛm wei në kɔcken yiic. Acï nyankënë yiɛ̈n guöp ayäär, abï nɔm dɛk gääk.

¹⁸ Na tɔ̈c moc kekë tik në aköölkɛn ke thëk, acï awaŋde nyuɔɔth, ku tik acï awaŋ de riɛlde nyuɔɔth aya, ka keek kedhie abï ke dhil tɛ̈ɛ̈m bei në kɔcken yiic.

¹⁹ Du wac nöm ayï moolɛ̈n, në biäk bï ee kënë raan thiääk wek yɔ̈ɔ̈r, week wedhie we bïï yiëk yiëth gääk.

²⁰ Na cï raan tiiŋ wun nööm acï wuulënë yɔ̈ɔ̈r guöp, abï kërɛɛcden dhil guum, abïk thou ke ke ye thum.

²¹ Na thiak raan tiiŋ ë mɛnhkënë, ee luɔi col, acï mɛnhkënë yɔ̈ɔ̈r guöp, abïk thou ke ke ye thum.

²² Go Bɛ̈nydït lueel an, “Dɔ̈tkï wëëtdï kedhie kekë lööŋkï ku kuanykï keek cök. Ago piny lɛɛr Ɛn week thïn, bäk lɔ cieŋ, ago week cïï gök bei.

²³ Duökï cëŋ në ciɛɛŋ de jur cuɔp wei ënɔɔnë ë wenïïm, në biäk cïï kek ee kakë looi kedhie. Acä keek maan.

²⁴ Ku wek cä yɔ̈ɔ̈k an, ‘Wek bï pinyden nööm. Abä gäm week ke ee kë bäk lɔ̈ɔ̈k lak piny, yen ee wat ë ca ku miök ë kiëc. Ee yɛn Bɛ̈nydït Nhialicdun, raan ë lɔ̈c week bei ë juööriic.

²⁵ Në biäk de kënë we bï akeu dhil ŋic në kaam de lɛ̈n piɛth ku lɛ̈n rac, ayï din piɛth ku din rac. Duökï röt riɔ̈k në läi ayï diɛt ayï ka ee mol piny, ka cä ke tɔ̈ɔ̈u pei an,, bïk rac në biäkdun.

²⁶ Wek bï dhil ɣɛɛr tëde yɛn, në biäk ɣɛɛr Ɛn. Yɛn Bɛ̈nydït. Ku wek cä lɔ̈c bei ë juööriic bäk aa kɔckï.

²⁷ “Na de moc ku nɔn ee tiiŋ cï rɔt tɔ ee tiët ku nɔn de guöp jɔɔk ë we yiic, abï dhil nɔ̈k. Abäk keek dhil biɔ̈ɔ̈k ë kur. Riɛmden abï nu ë keyiëth kapäc.”