Lebai 2 - JAM DE NHIALIC 2011

Miɔ̈c de Rap.

¹ Të yïn ë raan miɔ̈c ë rap Bɛ̈nydït, miɔ̈cde abï ya aɣar piɛth, abïï wälic miök, ku miɔɔc yic në wal ŋïr.

² Ku yïn wɛ̈ɛ̈t ke Aron, bäny ke kake Nhialic. Ku bɛ̈ny de kake Nhialic abï aɣaar kekë miök nem në yeciin, mɛtke në wal ŋïr kedhie ku nyop ë yïk nɔm, ke ye miɔ̈c de këcam, miɔ̈c ye looi në mac, miɔ̈c mit ë Bɛ̈nydït piɔ̈u.

³ Biäk de miɔ̈c ë rap bï döŋ ee këde Aron kekë wɛ̈ɛ̈tke, ee yen aye biäk ɣeric aläl cï luöi Bɛ̈nydït në mac.

⁴ Na bɛ̈ɛ̈iyë ke ye miɔ̈c ë rap cï thaal në tönyic, abïï dhil looi në aɣar piɛth. Kë cï looi, ke cïn yic luɔu ku cï liääp kekë miök. Ku nɔn ee bethkawith cïn yic luɔu, ku cï yoor ë miök.

⁵ Na cï miɔ̈cduön ë rap guiir në thakic, abï ya kë cï looi në aɣar piɛth kekë miök ke cïn yic luɔu

⁶ abï liääp ku wɛ̈lë miök thïn, ee miɔ̈c ë rap.

⁷ Na cï miɔ̈cduön ë rap thaal në thakic, abï dhil looi në aɣar piɛth kekë miök.

⁸ Bɛ̈ɛ̈iyë miɔ̈c ë rap cï looi në ee kake tëde Bɛ̈nydït, gämë bɛ̈ny de kake Nhialic, ku abï jɔ lɛɛr ë yïk nɔm.

⁹ Ku abï biäk bïï aa tak bɛ̈ɛ̈i bei, në miɔ̈c ë rapic, ku nyop në yïk nɔm, ke ee miɔ̈c ye looi në mac, miɔ̈c tum mit ë Bɛ̈nydït piɔ̈u.

¹⁰ Ku biäk cï döŋ në miɔ̈c ë rapic ee këde Aron kekë wɛ̈ɛ̈tke, ee biäk ɣeric aläl në miɔ̈c ee luöi Bɛ̈nydït në mac.

¹¹ Miɔ̈c ë rap bï aa yiɛ̈n Bɛ̈nydït ëbɛ̈n, abï aa looi ke cïn yic luɔu, ku du luɔu ayï kiëc ee looi ke ye miɔ̈c ee luöi Bɛ̈nydït në mac.

¹² Aduëër ë keek yiɛ̈n Bɛ̈nydït ke ye miɔ̈c ë rɛɛp cï kɔn luɔk. Ku acïï keek bï ya gam në yïk nɔm ke ye miɔ̈c tum mit ye nyop.

¹³ Yak aɣardun liääp ëbɛ̈n në amilɔ. Duökï amilɔ de män ë Nhialicdun ee nyääŋ piny në miɔ̈cduön ë rapic, ye amilɔ tääu në miɔ̈cdu yic ëbɛ̈n.

¹⁴ Na yiɛ̈në Bɛ̈nydït miɔ̈c ë rap cï kɔn luɔk, gämë miɔ̈c ë rɛɛp cï kɔn luɔk cï geet ë mac, ku nɔn ee aɣar cï tiɔ̈p.

¹⁵ Tääuwë miök de olip thïn kekë wɛ̈ɛ̈l ŋïr, ee miɔ̈c ë rap.

¹⁶ Ku bɛ̈ny de kake Nhialic abï miɔ̈c de këcam biäk de aɣar cï tiɔ̈p kekë miök mɛtke në wal ŋïr ëbɛ̈n, abï keek nyop, ke ye miɔ̈c ye luöi Bɛ̈nydït në mac.