Lebai 19 - JAM DE NHIALIC 2011

Lööŋ ke Ɣɛɛrë yic ku Yic

¹ Na wën ke Bɛ̈nydït ë yöök Mothe,

² an, “Jäämë akutnɔm de kɔc ke Yithriɛl, ku lɛ̈kë keek: an, ‘Yak piɔ̈ɔ̈th ɣɛɛr në luɔi ɣɛɛr Ɛn piɔ̈u, Yɛn Bɛ̈nydït Nhialicdun.’

³ Ku ŋɛk ë ye man riëëu kekë wun, ku yak kööl de Thabathdï döt, ee Yɛn Bɛ̈nydït Nhialicdun.

⁴ Duökï röt ee luöi ka ye lam, ka cï guaŋ në tiim ayï yiëth. Ee Yɛn Bɛ̈nydït Nhialicdun.

⁵ Ku të gëm yïn Bɛ̈nydït miɔ̈c de mät, ye gam në kueer bïï ë yen gam në nyindu yic.

⁶ Miɔ̈c aduëërë cam në kööl ë gɛmë yen, ayï kööl de rou aya, ku kë lɔ döŋ piny aɣët cï kööl de diäk, abï dhil nyop.

⁷ Ku në biäkdɛn lɔ cam në kööl de diäk, abï aa kënhiɛny, acïï bï gam.

⁸ Ku raan lɔ en cam, abï yiëk yeth gääk, në luɔi cïï yen kë ɣeric de Bɛ̈nydït luöi dhääl. Yen ee raanë abï nyaai në kɔcke yiic.

⁹ Ku të tɛm wek rɛɛp ke duumkun, duökï keek ee tem abäk ɣet në dom këc, ku duökï athɔɔr ee bɛ kɔ̈ɔ̈m.

¹⁰ Duökï duumkun ke enap ee bɛ beeriic në tëm, ku duökï enap cï lööny piny domic ee kuany. Pälkï keek kɔc kuanynyïïn ku kɔc lei. Ee Yɛn Bɛ̈nydït Nhialicdun.

¹¹ Du ee kual, du lueth ee töör, du raandäŋ ee math.

¹² Duökï ee kuëëŋ në rinkï baaŋ në lueth, ku jakï rinkï yɔ̈ɔ̈r. Ee yɛn Bɛ̈nydït Nhialicdun

¹³ Du raan thiääk ke yïn ee yɔŋ ku du rum aya, ku du wëu kë raan lui yïn në ariöp ee pëën agut cï wakɔ̈u.

¹⁴ Du miŋ ee cieen, ku du döt tɛ̈ɛ̈u në cɔɔr nɔm tueŋ. Ye riɔ̈ɔ̈c në Nhialicdu. Ee Yɛn Bɛ̈nydït.

¹⁵ Du yic ee dhɔ̈ŋic ë luɔi rac, du raan kuany nyin ee kuɛ̈ny bei, ku du ee riɔ̈ɔ̈c në raan kueth, ye gööny de kɔc rɛ̈ɛ̈r në yïn guiir në piathëpiɔ̈u.

¹⁶ Du raan ee cäk thok, ku du lueth ee caath në kɔc yiic. Ku du kë bï wei ke raan rɛ̈ɛ̈r wek mɔ̈ɔ̈r ye looi. Ee Yɛn Bɛ̈nydït.

¹⁷ Du mɛnhkui ee maan guöp në yïpiɔ̈u, ye jɔ̈ɔ̈ny në yic, ago nɔm ciën gääk wekë yen ëtök.

¹⁸ Du guur ee kɔɔr, ku du ater muk raandun, ye mɛnhkui nhiaar cït man nhiɛɛr yïn rɔt, ee Yɛn Bɛ̈nydït.

¹⁹ Döt lööŋkï, du läi wuöc gup ee tɔ kac röt, du dom tök ee cuömic kɔ̈th wuöc gup, du lupɔ cï nuɛ̈ɛ̈t kɔ̈ɔ̈th në lupɔ wuöc kek ee cieŋ.

²⁰ Na cï moc tɔ̈c kekë nyan lïm, ku ee nyan cï lɔc në mony däŋ, ku ee nyan kën ë waar kɔ̈u, ku akënë ë gäm nɔm lääude, acïï keek bï nɔ̈k, në luɔi kënë ë yen gäm nɔm lääu.

²¹ Ku raan abï miɔ̈cdɛn de awäc yiɛ̈n Bɛ̈nydït në paany de mät thok, abïï aa nyɔɔŋ amääl ke ye miɔ̈c de awäc.

²² Ku abï bɛ̈ny de kake Nhialic jɔ teem guöp, në nyɔɔŋ amääl de miɔ̈c de awäc, në biäk de kërɛɛc cï looi në Bɛ̈nydït nɔm, ku kërɛɛcde abï jɔ päl en.

²³ Të cä wek jɔ lɔ piny cï thɔ̈n week, ku lak mïth ke tiim lɔ com ëtɛ̈ɛ̈n. Wek cïï mïthken bï cam në kë cït run kadiäk, acï keek pëën, acïï keek bï dhil cam.

²⁴ Ku në ruöön ye kek ŋuan mïthken kedhie abïk yiic ɣɛɛr, abï aa miɔ̈c cï leec tëde Bɛ̈nydït,

²⁵ Ku në ruöön ye kek dhïc, wek duëër jɔ cam në mïthken, na lak ee kakë lɔ looi, tiimkun abïk aa dhiëth në mïth juëc. Ee Yɛn Bɛ̈nydït Nhialicdun.

²⁶ Du rïïŋ ee cam ke ŋoot ke de yic riɛm, du tïït ee looi, ku du yiëth ee lam.

²⁷ Du yïnɔm ee muut në biäk, ku du nhïm ke yïthok ee tem.

²⁸ Duökï wegup ee tɛm të dhiëëu wek raan cï thou, ku duökï kït ke käŋ ee käär ë wegup.

²⁹ Duökï duetkun yɔ̈ɔ̈r, bäk keek tɔ ë akɔɔrröör de luëkiic, të la wek en lɔ looi paandun abï thiäŋ kekë akɔɔrröör ku luɔi rac.

³⁰ Döt kööl de Thabath, ku riëëuwë tëdiën ɣeric, Ee Yɛn Bɛ̈nydït.

³¹ Du täŋ piɛth ye lɔ kɔɔr në kɔc ee cɔ̈ɔ̈r nïïm, ayï kɔc ee jam në kɔc cï thou nïïm, në luɔi bï kek yïn riɔ̈ɔ̈k. Ee Yɛn Bɛ̈nydït Nhialicdun.

³² Yak kɔc dït riëëu gup ku yak keek theek gup, yak Nhialicdun riëëu, ee Yɛn Bɛ̈nydït.

³³ Duökï alɛi rɛ̈ɛ̈r paandun ee kuöc luööi.

³⁴ Yak keek ŋiëc luöi cït man, ya wek kɔckuön ke Yithriɛl luööi, ku nhiaarkï keek cït man nhiaar wek röt. Ku takï wenïïm wään we cï kɔn aa alɛi paan de Rip. Ee yɛn Bɛ̈nydït Nhialicdun.

³⁵ “Du raandäŋ mɛth në luɔi bï yïn en them në ruëëny të them yïn bɛ̈ɛ̈r de käŋ, ayï të them yïn thiek de käŋ, ayï të wɛɛr yïn käŋ.

³⁶ Yak athëm piɛth looi, ee Yɛn Bɛ̈nydït Nhialicdun.

³⁷ Yak Lööŋkï riëëu kedhie ayï wëëtdï, ee yɛn Bɛ̈nydït.”