Lebai 18 - JAM DE NHIALIC 2011

Köör cïï piɛth në Bɛ̈nydït nɔm

¹ Go Bɛ̈nydït Mothe yɔ̈ɔ̈k,

² bïï lɛ̈k kɔc ke Yithriɛl ku yɔ̈ɔ̈k ë keek an, ‘Ee Yɛn Bɛ̈nydït Nhialicdun.

³ Duökï ciɛɛŋde kɔc ke Rip kuanyic, të wään rɛ̈ɛ̈r wek thïn, ku duökï ciɛɛŋ de kɔc ke Kanaan kuanyic, të wään lɛɛr Ɛn we thïn. Duökï ciɛɛŋden kuanyic taitai.

⁴ Wek bï lööŋkï dhil riëëu, ku kuanykï wëëtdï yic apiɛth. Ee Yɛn Bɛ̈nydït Nhialicdun.

⁵ Dɔ̈tkï wëëtdï ku dɔ̈tkï lööŋkï yiic, në biäk ye raan ë keek döt pïïr në keek. Ee Yɛn Bɛ̈nydït.

⁶ Go Bɛ̈nydït lööŋkë tääu piny, an, “Du tɔ̈c wekë raan raan kekë yïn.

⁷ Du wuur yɔ̈ɔ̈r guöp në luɔi bï yïn tɔ̈c wekë moor. Du moor yɔ̈ɔ̈r guöp, ago tɔ̈c wekë en.

⁸ Du tiiŋ de wuur ee kɔɔr bäk tɔ̈c wekë yen, kënë abï wuur yɔ̈ɔ̈r guöp.

⁹ Du nyankui ee kɔɔr bäk tɔ̈c wekë en, ayï nyanwuur, ayï nyan ë moor, nyan ë dhiëth baai, ku nɔn ee nyan ë dhiëth tëdäŋ, du tɔ̈c we keek.

¹⁰ Du nyan ë wëndu ee kɔɔr bäk tɔ̈c wekë en, ayï nyan ë nyandu, kënë abï yïn yɔ̈ɔ̈r guöp.

¹¹ Du nyan ë tiiŋ wuur ee kɔɔr, bä tɔ̈c wekë en, nyan ë dhiëth baai tëde wuur, ee nyankui.

^12-13 Du wac ee kɔɔr, bä tɔ̈c wekë yen, ee nyankënë ë wuur. Du moolɛ̈n ee kɔɔr, bä tɔ̈c wekë yen në biäk ee yen nyankënë ë moor.

¹⁴ Du wuulën yɔ̈ɔ̈r guöp, në luɔi bï yïn tiiŋde kɔɔr bäk tɔ̈c wekë yen, ee tiiŋ de wuulën.

¹⁵ Du tiiŋ ë wëndu ee kɔɔr, bä tɔ̈c wekë yen, ee tiiŋ ë wëndu du tɔ̈c wekë yen.

¹⁶ Du tiiŋ ë wänmuuth ee kɔɔr, bä tɔ̈c wekë yen, kënë abï wänmuuth yɔ̈ɔ̈r.

¹⁷ Du tɔ̈c wekë tik kekë nyande, ayï nyan ë wënde, ayï nyan de nyande, du tɔ̈c wekë keek, ayek kɔc raan, kënë ee gökdïït de kërac.

¹⁸ Du nyankënë ë tiiŋdu thiak, ku du nyankënë ee mony de nyankui thiak, bïï aa tiiŋ mɔɔc de tiiŋdu, ku du kɔɔr, bä tɔ̈c wekë en, ke tiiŋdu ë pïïr. Kënë ee gökdïït ë aciɛɛn.

¹⁹ Du tik ee kɔɔr bäk tɔ̈c wekë yen të thɛ̈k en.

²⁰ Du tiiŋ de raan däŋ nöm, ke yï cïï rɔt bï riɔ̈ɔ̈k në yen.

²¹ Du meth gɛm në mïthku yiic, bïï lɔ näk yanh cɔl Molek. Në biäk cïï yïn rin ke Nhialicdu bï läät. Ee Yɛn Bɛ̈nydït.

²² Du tɔ̈c wekë moc, cït man ye raan tɔ̈c kekë ë tik, kënë amɛɛn Nhialic.

²³ Du tɔ̈c wekë lɛ̈i, ku jɔ rɔt riɔ̈ɔ̈k në yen, ku tik ë cïï tɔ̈c kekë lɛ̈i, bïï ë lɛ̈i yen niɛɛn, kënë ee luɔi rac.

²⁴ Duökï röt riɔ̈k në ciɛɛŋ cït ee kakë, në biäk ee yen luɔi cït ee luɔiyë, yen aa riɔ̈ɔ̈kë juöör, juöör ɣɔn cuɔp wei ënɔɔnthiinë në wenïïm.

²⁵ Ayï piny aya, acï riääk, aguɔ kuum në biäk de kërɛɛcde, ago piny kɔc ceŋ en ŋak wei.

²⁶ Ku wek bï wëëtdï dhil muk ku mɔ̈kkï lööŋkï. Raan de Yithriɛl ku raan bï rɛ̈ɛ̈r në weyiic, ë cïn kërɛɛc töŋ bï looi në ë kakë yiic.

²⁷ Në luɔi cïï kɔc wään tueŋ kɔn ee pinyë ceŋ në wenïïm tueŋ, kakë looi kedhie, ago piny guɔ riääk.

²⁸ Ku na lak piny lɔ riɔ̈ɔ̈k. Abï week ŋak wei, cït man ɣɔn kɔn en juöör wään tɔ̈u ë wenïïm tueŋ ŋak wei.

²⁹ Raan ëbɛ̈n raan lɔ kërɛɛc tök looi në ee karɛckë yiic, yen ee raanë, abï dhil nyaai në kɔcken yiic.

³⁰ Dɔ̈tkï lööŋkï ku duökï ciɛɛŋ rɛɛcë kuany yic, ciɛɛŋ ɣɔn ë kuany yic ë kɔc ɣɔn tɔ̈u wenïïm tueŋ, aguɔkï bɛ̈n. Duökï röt be riɔ̈ɔ̈k në keek, ee Yɛn Bɛ̈nydït Nhialicdun.