Lebai 15 - JAM DE NHIALIC 2011

Kuëër Rac ë Raan Guöp

¹ Go Bɛ̈nydït Mothe yɔ̈ɔ̈k kekë Aron,

² an, “Jäämë kɔc ke Yithriɛl ku yɔ̈ɔ̈kë keek, an, ‘Na de mony de tën ee kuëër ë yeguöp, yen ee kë kuëërë arac.

³ Na ŋoot ke kuëër, ku cïï kääc, ke luɔi kuëër yen guöp abï yen tɔ rac guöp:

⁴ Agen ëbɛ̈n, agen bï mony kuëër guöp aa tɔ̈c thïn, abï yic rac, ayï këriëëc ëbɛ̈n, këriëëc bï yen nyuc thïn, abï yic rac.

⁵ Ku raan lɔ agende jak, raanë abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

⁶ Ku raan ëbɛ̈n, raan lɔ nyuc të cï mony kuëër guöp kɔn nyuc thïn, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

⁷ Ku raan ëbɛ̈n, raan jak mony kuëër guöp, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

⁸ Na lɔ mony kuëër guöp raan piath guöp ŋuööt, yen ë raanë abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

⁹ Ku këriëëc ëbɛ̈n, këriëëc bï mony kuëër guöp nyuc thïn, ayï të kɛ̈ɛ̈c yen thïn, abï dhil rac.

¹⁰ Ku raan ëbɛ̈n, raan lɔ këdɛn ë rɛ̈ɛ̈r en thïn jak, abï guöp dhil rac aɣët cï thëën, ku raan lɔ ë kakë bɛ̈ɛ̈i bei, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

¹¹ Ku raan ëbɛ̈n, raan lɔ mony kuëër guöp jak, ke kën yeciin waak në pïïu, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

¹² Tööny de tiɔp cï mony kuëër guöp jak, abï dhil dhoŋ, ku të cï yen kë cï looi në tim ëbɛ̈n jak, abï dhil waakic ë pïïu.

¹³ Na cï raan guöp waar në kuëër nu në yeguöp, abï nin kadhorou dhil kuɛɛn wei, të cï yen guöp waar, abï lupɔɔke dhil waak, ku wɛɛk rɔt në pïïu piɛth, ku abï guöp jɔ piath.

¹⁴ Ku në kööl de bɛ̈t, abï guök kaarou bɛ̈ɛ̈i, ku nɔn yen ajiël ke guuk kaarou, abïï keek bɛ̈ɛ̈i në Bɛ̈nydït nɔm ë paany de mät thok, ku gëm keek bɛ̈ny de kake Nhialic.

¹⁵ Abïï bɛ̈ny de kake Nhialic keek nɔ̈k, tök abï aa këde miɔ̈c de kërac ku ye däŋë këde miɔ̈c ye nyop ëbɛ̈n. Ku abï bɛ̈ny de kake Nhialic jɔ teem guöp, në biäk de kë kuëër ë yeguöp.

¹⁶ Të de moc nɔm mïth ee wat, abï ye guöp dhil waak ëbɛ̈n në pïïu, ku abï guöp dhil rac aɣët cï thëën.

¹⁷ Na de lupɔ ku nɔn ee biöŋ de yic mïth, abï dhil waak në pïïu. Abï dhil rac aɣët cï thëën.

¹⁸ Na cï moc tɔ̈c kekë tik, ku de mïth cï wɛt piny, keek kedhie abïk dhil waak në pïïu, ku abïk gup rac aɣët cï thëën.

¹⁹ Na thëk tik, ke thɛ̈kde abï nïn kadhorou thöl. Na lɔ raan yen jak, raan abï guöp rac aɣët cï thëën.

²⁰ Ku këdɛn bï yen nyuc thïn ëbɛ̈n në akööl thɛ̈k en ke thïn, abï yic rac.

²¹ Raan ëbɛ̈n, raan lɔ agende jak, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

²² Ku raan ëbɛ̈n, raan lɔ kë ye tiiŋ thɛ̈k nyuc thïn jak, abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

²³ Na cakaa yen ë ye agen, ku nɔn ë këriëëc cï en nyuc thïn ëbɛ̈n, të cï raan en jak, raanë abï guöp rac aɣët cï thëën.

²⁴ Na cï moc tɔ̈c kekë yen, ku jɛk moc në riɛmdɛn thëk en, ke moc abï guöp rac aɣët cï thëën, ku agendɛn le yen tɔ̈c thïn, abï yic rac.

²⁵ Na lɔ tik guöp kuëër në riɛm në nïn juëc, ke cie aköölkɛn ke thɛ̈k, ku nɔn kuëër guöp, arëk abï aköölkɛn ke thɛ̈k waan, abï guöp rac në aköölkɛn kuëër en ke guöpë. Cït man ee yen tɔ̈u në aköölkɛn ke thɛ̈k.

²⁶ Ku agendɛn le yen tɔ̈c thïn të ŋoot en ke kuëër guöpë, abï yic rac, cït man ye agende tɔ̈u në aköölkɛn ke thɛ̈k, ku këriëëcdɛn le yen nyuc thïn ëbɛ̈n, abï yic rac, cït man ee yen tɔ̈u në aköölkɛn ke thɛ̈k.

²⁷ Ku raan lɔ keek jak, abï guöp rac, raan abï lupɔɔke dhil waak, ku wɛɛk rɔt në pïïu, ku abï guöp rac aɣët cï thëën.

²⁸ Na cï guöp waar në kuëër de yen guöp, ka abï nïn kadhorou kuɛɛn wei, ku ëtɛ̈ɛ̈n, abï guöp ja piath në kuëër de yen guöp.

²⁹ Në kööl de bɛ̈t, abï guök kaarou bɛ̈ɛ̈i, ku nɔn yen ajiël ke guuk kaarou, abï keek yiɛ̈n bɛ̈ny de kake Nhialic në paany de mät thok.

³⁰ Ku bɛ̈ny de kake Nhialic, abï tök nɔ̈k në baŋ de miɔ̈c de kërac ku ye däŋë këde miɔ̈c ye nyop ëbɛ̈n. Në ee kuëërë bɛ̈ny de kake Nhialic abï tik jɔ teem guöp në Bɛ̈nydït nɔm, në biäk bï yen guöp waar në kë kuëër ë yeguöp.

³¹ Yïn bï kɔc ke Yithriɛl dhil tɔ mɛ̈ɛ̈c ë röt, në kak ë keek tɔ rac gup, në biäk cïï kek bï thou në karɛcken yiic. Ku në biäk cïï kek paanydiën nu në keyiic bï riɔ̈ɔ̈k.

³² Kakë ayek lööŋ në biäk de mony kuëër guöp, ku në biäk de mony ye mïthke wɛ̈t bei.

³³ Ku në biäk de tiiŋ thɛ̈k, ku në biäk de moc, ku tiiŋ kuëër guöp, ku në biäk de mony cï tɔ̈c kekë tiiŋ thɛ̈k.