Lebai 13 - JAM DE NHIALIC 2011

Lööŋ në biäk ë Jɔɔk ee Kɔc Poor Gup

¹ Na wën ke Bɛ̈nydït ë yöök Mothe kekë Aron, an

² “Të de yen raan de guöp të cï but ku nɔn ye të cï piɔ̈ɔ̈ny, ku nɔn cï guöp toŋ. Ku ye toŋ bï rɔt tɔ ye wɛth. Raan abï dhil yiɛ̈n Aron bɛ̈ny de kake Nhialic, ku nɔn ee raan tök në wɛ̈ɛ̈t ke Aron yiic, bäny ke kake Nhialic.

³ Bɛ̈ny de kake Nhialic abï buɔ̈t nu në yeguöp jɔ gɔɔk. Ku na cï nhïm nu në buɔ̈tic ɣɛɛr ku cï buɔ̈tic thuth awär dɛ̈l, acï jɔ aa wɛth, ku raan abï bɛ̈ny de kake Nhialic tɔ ye raan de guöp acuɔl.

⁴ Ku na cï të cï toŋ yic ɣɛɛr në raan guöp, ku të cï toŋ tïc ke cïï yic thuth awär dɛ̈l de raan, ku na kën të cï toŋ rɔt puk ke ɣer, ke bɛ̈ny de kake Nhialic aduëër raan cï guöp toŋ tɔ mɛ̈ɛ̈c në kɔc lɔ̈m në nïn kadhorou.

⁵ Ku në nïn ye kek dhorou, bɛ̈ny de kake Nhialic abï raan dhil bɛ lɔ gɔɔk guöp, ku na le tëtök tïŋ ke kën waar, ku kën lɔ në guöpic ëbɛ̈n, abï bɛ̈ny de kake Nhialic ŋoot ke tɔ raan mëëc kekë kɔc në nïn kadhorou kɔ̈k.

⁶ Ku në nïn ye kek dhorou bɛ̈ny de kake Nhialic abï raan bɛ nyɔk ë tïŋ, ku na cï tëtök jäl ku kën thiëi ë guöpic ëbɛ̈n, ka abï bɛ̈ny de kake Nhialic caal an raan acï guöp waar, ee tëtök tei. Ku raan abï lupɔɔke waak, ku abï guöp jɔ bɛ piath.

⁷ Ku na cï toŋ bɛ thiäi, ke cïï bɛ̈ny de kake Nhialic tɔ ee raan cï guöp piath, raan abï rɔt dhil bɛ dak bɛ̈ny de kake Nhialic.

⁸ Abï bɛ̈ny de kake Nhialic yen bɛ gɔɔk guöp. Ku na cï toŋ thiɛ̈i ë guöpic ëbɛ̈n. Ka abï bɛ̈ny de kake Nhialic jɔ caal an, raan ade guöp acuɔl, ee wɛth.

⁹ Ku na de raan guöp wɛth, abï dhil yiɛ̈n bɛ̈ny de kake Nhialic.

¹⁰ Ku abï bɛ̈ny de kake Nhialic dhil gɔɔk guöp, ku na de guöp buɔ̈t ɣer në yeguöp, ku cï nhïm ɣɛɛr aya, ku dɛ̈l acï tïŋ ke thith në buɔ̈tic.

¹¹ Ee wɛth, raan acïï jɔk ɣap ë yeguöp të bääric, abï bɛ̈ny de kake Nhialic dhil caal an, raan ade guöp acuɔl, ku acïï raan bï mɛ̈ɛ̈c kekë kɔc, në luɔi ŋic ë kɔc kedhie yen, nɔn de yen acuɔl.

¹² Ku na cï wɛth thiëi ë raan guöp ëbɛ̈n, gɔl në yenɔm leer ë yecök, ku awoi ë bɛ̈ny de kake Nhialic, abï raan jɔ gɔɔk guöp ëbɛ̈n.

¹³ Na le bɛ̈ny de kake Nhialic tïŋ nɔn cï jɔk raan thöl guöp ëbɛ̈n, ku cï dɛ̈l de raan rɔt puk ke ɣer ëbɛ̈n, abïï dhil caal an, raan ë guöp piath.

¹⁴ Ku na de raan guöp buɔ̈t tuɛɛr thok, ke raan ade guöp dɛ acuɔl.

¹⁵ Na lɔ bɛ̈ny de kake Nhialic buɔ̈t tuɛɛr thok ke cïï piath, ee wɛth.

¹⁶ Na cï buɔ̈t tuɛɛr thok bɛ ɣɛɛr, ke raan abï dhil bɛ̈n tëde bɛ̈ny de kake Nhialic.

¹⁷ Raan abïï bɛ̈ny de kake Nhialic gɔɔk guöp. Ku na cï buɔ̈t ɣɛɛr, ka abï bɛ̈ny de kake Nhialic caal an, raan de guöp buɔ̈t acï guöp piath. Ku ë tɛ̈ɛ̈n abï guöp jɔ piath.

¹⁸ Na cï raan guöp poor ku cï të cï poor dem.

¹⁹ Ku na cï të wään cï poorë bɛ toŋ, ku nɔn cï but, ku nɔn cï të cï piɔ̈ɔ̈ny thiin thith tïŋ ë ye yic. Ku të thiith nu në guöpic abïï dhil nyuöth bɛ̈ny de kake Nhialic.

²⁰ Ku abï bɛ̈ny de kake Nhialic gɔɔkic apiɛth. Ku na cï të cï toŋ yic thuth awär dɛ̈l, ku cï nhïm nu në ye yic thïn ɣɛɛr, abï bɛ̈ny de kake Nhialic dhil caal an, raan ade guöp acuɔl. Të cï të cï toŋë jɔ aa wɛth, yen cï bɛ̈n bei të wään cï kɔn poor.

²¹ Ku na cïï bɛ̈ny de kake Nhialic yen gɔɔkic, ku kën nhïm nu në ye yic ɣɛɛr, ku të cï të cï toŋë yic thuth awär dɛ̈l, ku cï jäl, bɛ̈ny de kake Nhialic, abï raan dhil mɛ̈ɛ̈c ke kɔc në nïn kadhorou.

²² Ku na cï poor thiëi ë guöpic, ka abï bɛ̈ny de kake Nhialic jɔ caal an, raan ade guöp acuɔl, ee wɛnh bï thiäi.

²³ Ku na cï poor döŋ tëtök ke kën thiäi, ka ee piäär de poor thɛɛr tei, ëtɛ̈ɛ̈n abï bɛ̈ny de kake Nhialic jɔ caal an raan acï guöp waar.

²⁴ Na cï raan guöp nyop, ku na cï buɔ̈t yic ɣɛɛr ku nɔn cï thiɛth.

²⁵ Abï bɛ̈ny de kake Nhialic dhil gɔɔk, ku na cï tëtök yic thuth në dɛ̈l, ku cï nhïm nu në yeyic thïn ɣɛɛr, ee wɛth, jɔk acï tïc të cï nyop. Ku abï bɛ̈ny de kake Nhialic jɔ caal an, raan ade guöp acuɔl, ee wɛth.

²⁶ Ku na cï bɛ̈ny de kake Nhialic dɛ̈l gɔɔk, ku liu nhïm ɣer në buɔ̈tic, ku dɛ̈l acïï yic thuth në guöp, ku cï jäl, ëtɛ̈ɛ̈n bɛ̈ny de kake Nhialic, abï raan mɛ̈ɛ̈c kekë kɔc në nïn kadhorou.

²⁷ Në kööl de dhorou abï bɛ̈ny de kake Nhialic bɛ tïŋ guöp.

²⁸ Ku na cï poor döŋ tëtök ku kën thiëi ë dɛ̈lic, ku cï jäl, ee buɔ̈t de të cï nyop, abï bɛ̈ny de kake Nhialic jɔ caal an raan ë guöp waar, në biäk yen piäär de të cï nyop tei.

²⁹ Na de moc ku nɔn ee tik, na cï nɔm ku nɔn ee nɔ̈k dɛ buɔ̈t.

³⁰ Bɛ̈ny de kake Nhialic, abï buɔ̈t dhil tïŋ, ku na cï yic thuth në dɛ̈l, abï bɛ̈ny de kake Nhialic jɔ caal an, raan ade guöp acuɔl, aa akuɔ̈ɔ̈k, ee wɛnh de nɔm kekë nɔ̈k, ku abï bɛ̈ny de kake Nhialic jɔ caal an raan ade guöp acuɔl.

³¹ Ku na le bɛ̈ny de kake Nhialic woi ke cïï thuth në dɛ̈l, ku acïn nhïm col thïn, bɛ̈ny de kake Nhialic, abï raan mɛ̈ɛ̈c kekë kɔc në nïn kadhorou.

³² Ku në kööl de dhorou, bɛ̈ny de kake Nhialic, abï buɔ̈t tïŋ. Ku na kën thiäi, ku acïn nhïm atul cï cil thïn, ku buɔ̈t acïï yic thuth në guöp.

³³ Ke raan, abï yeguöp dhil muut, ku acïï buɔ̈t bï dhil muutic, bɛ̈ny de kake Nhialic, abï raan dhil mɛ̈ɛ̈c kekë kɔc në nïn kadhorou kɔ̈k.

³⁴ Ku në kööl de dhorou, bɛ̈ny de kake Nhialic, abï buɔ̈t bɛ nyɔk ë tïŋ, na kën buɔ̈t thiëi në guöpic ku cïï yic thuth në dɛ̈l, abï bɛ̈ny de kake Nhialic caal an raan ë guöp waar. Ka abï lupɔɔke dhil waak, ku jɔ guöp piath.

³⁵ Ku na cï buɔ̈t thiëi ë guöpic të cï raan guöp kɔn piath.

³⁶ Abïï bɛ̈ny de kake Nhialic bɛ gɔɔk guöp, na cï buɔ̈t thiëi ë guöpic ëbɛ̈n, bɛ̈ny de kake Nhialic, acïï nhïm atul bï bɛ kɔɔr, raan acï guöp dɛ acuɔl.

³⁷ Ku na ye bɛ̈ny de kake Nhialic tak nɔn cïï buɔ̈t bï bɛ thiäi, ku nhïm col acïk cil në buɔ̈tic thïn, ke buɔ̈t acï waar, abï bɛ̈ny de kake Nhialic jɔ caal an raan acï guöp waar.

³⁸ Na cï moc ayï tik guöp dɛ të cï toŋ ku ɣeer.

³⁹ Abïï bɛ̈ny de kake Nhialic keek dhil tïŋ, ku na ye toŋ nu në ke gup ka ɣer ë määth, ku cie wɛth, yen ë raanë apiɛth guöp.

⁴⁰ Na de nɔm nhïm ku cï nɔm baar, ka apiɛth guöp.

⁴¹ Na cï nhïm dak ë yenɔm tueŋ, ku cï nɔm baar tueŋ, ka apiɛth.

⁴² Ku na de bɔ̈ɔ̈t thith ɣeriic në yenɔm, të cï baarë ku nɔn ee yenɔm tueŋ, ka ee wɛth, yen bɔ̈ bei në ë ɣäänkë yiic.

⁴³ Bɛ̈ny de kake Nhialic, abï ë raanë dhil tïŋ guöp, ku na cï buɔ̈ɔ̈t de tëtöök nu ë yenɔm, të cï baarë, ayï yenɔm tueŋ, na cï buɔ̈ɔ̈t thith ɣeriic röt looi cït man ë wɛnh ee thiäi.

⁴⁴ Yen ee raanë ade guöp wɛth, yen ade guöp acuɔl, abïï bɛ̈ny de kake Nhialic caal an raan ade guöp wɛth, në baŋ tɔ̈u ë buɔ̈tde ë yenɔm.

⁴⁵ Na de raan guöp wɛth, wɛnh wën ee thiäi, abï kɔc kɔ̈k dhil aa lɛ̈k në kiiu ee yen kïïu, an, “Acuɔl, acuɔl!’ Ku abï lupɔɔ cï yiic rɛt aa cieŋ, ku acïï yenɔm bï aa theer, ku abï yethok dhil aa kum.

⁴⁶ Yen ee raanë, abï guöp dɛ acuɔl, në ë kaamdɛn de yen guöp wɛth, ku abï dhil rëër yetök në wut këc biic.

Lööŋ de biäk Lupɔ cï Riääk.

⁴⁷ Të cïï yïn lupɔɔ tïŋ ke de gup dhiëi, lupɔɔ kë linɔn ayï lupɔɔ ke nhïm.

⁴⁸ Na ee lupɔɔ ë kɔc keek ku nɔn ye lupɔɔ ë nuat keek, ayï lupɔ de dɛ̈l, ayï lupɔ ye looi në kake dɛ̈l

⁴⁹ Na de të cï riääk ë lupɔ guöp, lupɔ de dɛ̈l, ayï lupɔ ë nuat, ayï lupɔ cï kɔɔc. Na cï të tɔ̈c, ayï na cï të thith tïŋ, ka ee riääk ee dhiëi. Abïï dhil nyuöth bɛ̈ny de kake Nhialic.

⁵⁰ Bɛ̈ny de kake Nhialic abï lupɔ lɔ tïŋ, ku abï mɛ̈ɛ̈c në nïn kadhorou.

⁵¹ Ku në kööl de dhorou abï të cï riääk bɛ tïŋ. Na cï të cï riääk thiäi ë lupɔ guöp. (Lupɔ cï kɔɔc ayï lupɔ cï nuat) ayï dɛ̈l, acïn këdäŋ, cakaa dɛ̈l de nɔm kë ye looi në yen, ee dhiëi wën ee riääk bɛ̈ɛ̈i, ee dɛ̈l cïï piath.

⁵² Bɛ̈ny de kake Nhialic, abï lupɔ dhil nyop. Acïn kë looi cakaa yen ë ye lupɔ cï nuat, ayï lupɔ cï kɔɔc, ayï lupɔ de nhïm, ayï lupɔ de linɔn, ayï lupɔ ë loi në dɛ̈l, në biäk le ë dhiëi ke thiäi piny. Lupɔ abï dhil nyop.

⁵³ Ku na tïŋ bɛ̈ny de kake Nhialic yen, nɔn cï dhiëi bï thiäi në lupɔ guöp (lupɔ cï kɔɔc, ayï lupɔ ë nuat) ayï lupɔ de dɛ̈l.

⁵⁴ Abï kɔc dhil yɔ̈ɔ̈k bïk ë lupɔ de dɛ̈lë waak, ayï lupɔ de alath. Ku ëtɛ̈ɛ̈n, abï lupɔɔ mɛ̈ɛ̈c në nïn kadhorou.

⁵⁵ Ku të cï biäk de jɔk thök në wɛ̈k, abï bɛ̈ny de kake Nhialic nyɔk ë tïŋ, na ŋoot dhiëi ke ŋoot ke cït man wään tueŋ, ke lupɔ acïï piath. Cakaa jɔk yen ë kën thiäi. Abäk dhil nyop në mac. Acïn kë looi, cakaa jɔk yen ë nu ë lupɔ thok baŋ tök, ku liiu në baŋ däŋë, abï dhil ŋoot ke nyop ë mac.

⁵⁶ Ku na cï bɛ̈ny de kake Nhialic lupɔ de dɛ̈l tïŋ kekë lupɔ däŋë, ku tïŋ dhiëi ke liu të wään cïï ë keek waakë, ëtɛ̈ɛ̈n, bɛ̈ny de kake Nhialic, abï të cï jɔk dɔm në lupɔ ë dël thok kekë lupɔ rɛ̈ɛ̈t bei. (Lupɔ cï kɔɔc, ayï lupɔ cï nuat)

⁵⁷ Ku na be jɔk bɛ̈n në lupɔ de dɛ̈l guöp kekë lupɔ, (lupɔ cï kɔɔc ayï, lupɔ cï nuat) ka dhiëi akɔɔr thiäi, ka kë de guöp jɔk ëbɛ̈n, abï dhil nyop në mac.

⁵⁸ Të cï (lupɔ cï kɔɔc ayï lupɔ cï nuat) ayï lupɔ de dɛ̈l, të cï ë keek waak, ku cï jɔk jäl ë kegup, abï keek dhil bɛ waak, ku ëtɛ̈ɛ̈n, abïk piath.

⁵⁹ Kakë ayek lööŋ de dhiëi ë tɔ̈u në lupɔɔ gup, Lupɔɔ ë kɔc keek ayï lupɔɔ ë nuat keek, ayï lupɔɔ ke dɛ̈l, në biäk bä wek keek ŋic na piɛthkï ku na rackï.