Lebai 10 - JAM DE NHIALIC 2011

Kërɛɛc de Nadap Kekë Abiɣu

¹ Wɛ̈ɛ̈tke Aron yï Nadap kekë Abiɣu acïk thɛ̈kkɛn ye kek wal ŋïr nyop nööm, ku tɛ̈ɛ̈ukï mac në kekɔ̈ɔ̈th, ku ŋuɛkï wal ŋïr thïn, ku akënkï many ɣeric wään cïï Mothe lueel an, bïk aa looi në Bɛ̈nydït nɔm looi.

² Ago mac bɛ̈n nhial ë Bɛ̈nydït lɔ̈ɔ̈m, ku nɛ̈k Nadap kekë Abiɣu. Agokï thou ë Bɛ̈nydït nɔm.

³ Na wën ke Mothe ë yöök Aron an, “Kënë ee kë wään bïï Bɛ̈nydït jam në biäkde, Ago Aron nɔm ciën këdɛn lueel në biäk de thon ë wɛ̈ɛ̈tke.

⁴ Ku Aron aa de nɔm wuulënë cɔl Yudhiɛl, Yudhiɛl aa de nɔm wɛ̈ɛ̈tke kaarou, yï Miciɛl kekë Eldhapan. Ago Mothe lëk keek an, “Bäkï ee në ku jatkï gup ke wɛ̈ɛ̈t ke wuur. Lɛɛrkï keek në wut këc biic, të mec në tëɣeric thok.

⁵ Go Miciɛl kekë Eldhapan Mothe gam thok, ku jɔtkï gup ke yï: Nadap kekë Abiɣu, ke ke ceŋ aluluut ke bäny ke kake Nhialic, ku leerkï ke në wut këc biic.

⁶ Na wën ke Mothe ë yɔ̈ɔ̈k Aron kekë wɛ̈ɛ̈tke kaarou, yï Eleyadhar kekë Yithamar, an, “Duökï dhiëndun nyooth në rɛ̈t rɛt wek lupɔɔkun yiic, ku në luɔi cä wek wenïïm bï keet, na lak looi aya, we bï thou, ku Bɛ̈nydït abï gɔ̈th bɛ̈ɛ̈i në akutnɔm guöp ëbɛ̈n. Ku baai de Yithriɛl ëbɛ̈n, ayï kɔc raan në week aduëërkï dhiau aläl në biäk cïï Bɛ̈nydït Nadap kekë Abiɣu nɔ̈k në mac.

⁷ Ku week duökï paany de mät nyiëëŋ piny, na lak looi we bï thou, në biäk tɔ̈uwë miök de tɔc ë Bɛ̈nydït në wegup. Ago Aron kekë Eleyadhar ku Yithamar Mothe gam thok.

Lööŋ ke Bäny ke kake Nhialic

⁸ Na wën ke Bɛ̈nydït ë yöök Aron

⁹ an, “Yïn wekë wɛ̈ɛ̈tku, wek cïï mɔ̈u ayï mɔ̈n tuc bï dhil dek, të la wek ë Paany de Mätic. Na lak looi, ke we bï dhil thou, ku löŋë abï cath gɔl ënɔɔnë agut wadäŋ.

¹⁰ Yïn bï kë ɣeric dhil ŋic, ku ŋic ke cïï yic ɣer, yïn bï këpiɛth muk pei, ku muk kërac pei.

¹¹ Yïn bï kɔc dhil wɛ̈ɛ̈t në lööŋ kedhie, lööŋ wään gëmë Bɛ̈nydït Mothe.”

¹² Go Mothe Aron yɔ̈ɔ̈k kekë wɛ̈ɛ̈tkɛn cï döŋ kaarou, Eleyadhar kekë Yithamar an, “Nöm miɔ̈c ë rap cï döŋ piny në kuïn, miɔ̈c ye gäm Bɛ̈nydït, loi kuïn cï pam cïn yic luɔu në yen, ku cam në yïk lɔ̈ɔ̈m, në biäk yen miɔ̈c ɣeric aläl.

¹³ Cam tëɣeric ee biäk bï aa këdu wekë wɛ̈ɛ̈tku, ku në kuïn ee gäm Bɛ̈nydït yic, yen kë cï Bɛ̈nydït lëk ɛn ka.

¹⁴ Ku yïn aya wekë wɛ̈ɛ̈tku ku duetku, wek duëër cam në thïn ku ɣäm de miɔ̈c de mät cï gäm Bɛ̈nydït. Abä keek dhil cam të lɔgɔk, ayek biäkdu në miɔ̈c de mätic, miɔ̈c cï kɔc ke Yithriɛl gam.

¹⁵ Kɔc abïk kɔɔl ke läiken dhil aa bɛ̈ɛ̈i, në biäk de miɔ̈c ë cï looi në mac. Ku abï nyuɔɔth ë Bɛ̈nydït nɔm kekë thin ku cök ke ye miɔ̈c de anyuɔɔk, ku abïk aa biäkdun wekë wɛ̈ɛ̈tku aɣet athɛɛr. Cït man cï Bɛ̈nydït ye lueel.”

¹⁶ Na wën ke Mothe ë lop nyɔɔŋ de miɔ̈c de kërac, ago nyop në mac ëbɛ̈n, go piɔ̈u diu kekë Eleyadhar ku Yithamar, wɛ̈ɛ̈t ke Aron ë cï döŋ.

¹⁷ Ago keek thiëëc an, “Eeŋö cä wek miɔ̈c de kërac cam në tëɣeric yic? Ee kë ɣeric aläl, aa gëmë week, në biäk bä wek karɛc ke akutnɔm nyaai, në luöi bä wek keek teem gup në Bɛ̈nydït nɔm.

¹⁸ Ku në biäk kënë riɛmde lɛɛr tëɣeric, yïn duëër nyɔk cam në paany de mätic, cït man cän en lueel.”

¹⁹ Go Aron bɛ̈ɛ̈r an, “Köölë acïk miɔ̈cdɛn de kërac kekë miɔ̈c ye nyop ëbɛ̈n gam në Bɛ̈nydït nɔm, ku kë cït ee kënë acï tïc tëde yɛn, duëër Bɛ̈nydït piɔ̈u miɛt kekë yɛn na ë ya cï cam në miɔ̈c de këracic ee köölë?”

²⁰ Na wën piŋ Mothe ë jamë, go piɔ̈u kuɛth.