Lebai 1 - JAM DE NHIALIC 2011

Miɔ̈c ye Nyop Ëbɛ̈n

¹ Na wën, ke Bɛ̈nydït ë cɔl Mothe, ku jiɛɛm ke yen ke nu ë Paany de Mätic, ku gëm ee lööŋkë

² lööŋ bïï kɔc ke Yithriɛl döt të gɛm kek miɔ̈c. Tëde yen raan gëm Bɛ̈nydït miɔ̈c në weyiic, ë bïï miɔ̈cde ke ye thɔ̈k në thökke yiic, ku nɔn ee weŋ në ɣɔ̈kke yiic.

³ Na ye miɔ̈c ye nyop ëbɛ̈n weŋ, ke gɛm miɔɔr cïn guöp tëdak, ku abïï dhil gam në paany de mät thok tueŋ, ago Bɛ̈nydït yen jɔ gam.

⁴ Raan abï yeciin jɔ thany në miɔ̈c ye nyop ëbɛ̈n nɔm, ku abï jɔ gam në nyinde yic, ke bï aa kë teem ë yen guöp.

⁵ Ku abï miɔɔr koor nɔ̈k në Bɛ̈nydït nɔm. Na ëlë, ke wɛ̈ɛ̈t ke Aron, bäny ke kake Nhialic, abïk riɛm nööm ku wïïthkï në aguuk ke yïk kedhie, të lɔ paany de mät thok.

⁶ Ku raan abï miɔ̈c ye nyop ëbɛ̈n jɔ yaaŋ ku thim ë thïïm.

⁷ Ku wɛ̈ɛ̈t ke Aron, bäny ke kake Nhialic, kek abï many de yïk dɛ̈ɛ̈p ku guiirkï tiim mɛɛc.

⁸ Ku ëtɛ̈ɛ̈n, wɛ̈ɛ̈t ke Aron, bäny ke kake Nhialic, abïk thïïm ke rïïŋ ku nɔm kekë kɔl jɔ guiir në tiim nïïm, tiim dɛ̈p në yïk nɔm.

⁹ Ku abï yäc dhil waak kekë cök në pïïu, ku jɔ bɛ̈ny de kake Nhialic keek nyop kedhie në yïk nɔm, ke ee miɔ̈c ye nyop ëbɛ̈n, miɔ̈c ee looi në mac, miɔ̈c tum mit në Bɛ̈nydït piɔ̈u.

¹⁰ Na ye këdɛn gɛm ke ee miɔ̈c ye nyop ëbɛ̈n, na ye amääl ku nɔn ee bou, abï nyɔɔŋ cïn guöp tëdak dhil gam.

¹¹ Abïï nɔ̈k në yïk nɔm ë biäk lɔ të lɔ rut ë Bɛ̈nydït nɔm.

¹² Abï thim ë thïïm ku jɔ bɛ̈ny de kake Nhialic keek guiir ku mɛt keek në nɔm kekë kɔl, në tiim dɛ̈p nu në yïk nɔm.

¹³ Ku cïïn ku cök abïï keek waak në pïïu. Ku abïï bɛ̈ny de kake Nhialic keek gam ëbɛ̈n, ku nyop në yïk nɔm, ee miɔ̈c ye nyop ëbɛ̈n, miɔ̈c ee looi ë mac, miɔ̈c tum mit në Bɛ̈nydït piɔ̈u.

¹⁴ Na ye miɔ̈cdɛn gëm Bɛ̈nydït, ke ye miɔ̈c ye nyop ëbɛ̈n, na ee dit, abï aa guuk ku nɔn ee ajiël ke guuk.

¹⁵ Ku jɔ bäny ke kake Nhialic lɛɛr në yïk nɔm. Ku rïïr nɔm wei ku nyop në yïk nɔm, ku jɔ riɛmde wiɛ̈ɛ̈th piny në yïk lɔ̈ɔ̈m.

¹⁶ Ku bäny ke kake Nhialic abïk cïïn kekë nɔɔk bɛ̈ɛ̈i bei, ku cuɛtkï keek në yïk kɔ̈u, të lɔ aköl amiäk, të nu ë ŋeth thïn.

¹⁷ Abï dit pakic cil dɔm në yewuök ku cïï tekic taitai. Ku abïï bɛ̈ny de kake Nhialic jɔ nyop në many de tiim nu ë yïk nɔm, ee miɔ̈c ye nyop ëbɛ̈n, miɔ̈c ee looi ë mac, miɔ̈c tum mit në Bɛ̈nydït piɔ̈u.