Kuɛ̈n 9 - JAM DE NHIALIC 2011

Winythok ee kek Rou

¹ Go Bɛ̈nydït jam kekë Mothe në jɔ̈ɔ̈r de Thinai yic, në kööl tueŋ de pɛɛi ye pɛɛi rou, pɛɛi ɣɔn jël ë Yithriɛl Rip. Go lɛ̈k Mothe an,

² Ye Yithriɛl tɔ loi dhuëëŋ de Winythok në akööl ye ke ye looi thïn.

³ Ye tɔ gɔlkï në luɔi në lɔ piny de akɔ̈l në kööl ye pɛɛiyë thok thiëër ku ŋuan. Ku ë yek looi në kueer wën cï mäc en ëbɛ̈n.

⁴ Go Mothe kɔc ke Yithriɛl yɔ̈ɔ̈k nɔn döt kek dhuëëŋ de winythok.

⁵ Na ɣɔn, në jɔ̈ɔ̈r de Thinai yic, ke kɔc ke Yithriɛl ë ke loi dhuëëŋ de winythok në kueer ɣɔn cïï Bɛ̈nydït nyuöth Mothe. Gɔlkï ɣɔn thëën, në kööl ye pɛɛi ye pɛɛi rou thok thiëër ku ŋuan.

⁶ Ku ade kɔc ë cïï gup piɛth, në luɔi ë cïï kek guöp de raan cï thou jak, në baŋ cïï kek Winythok bï looi ee köölë, agokï lɔ tëde Mothe kekë Aron, lek keek luɔp an,

⁷ “Wok cï gup rac në biäk cïï wok raan cï thou jak. Ku eeŋö duëërë wook pɛ̈n miɔ̈c miɔɔc wok Bɛ̈nydït në kɔc ke Yithriɛl ëtök, në kööldɛn cï lɔc?”

⁸ Go Mothe puɔ̈k nɔm keek an, “Yɔ̈kkï ke we kääc, ë ya kɔn Bɛ̈nydït lɔ luɔp në ke bï looi në biäkdun.

⁹ Na wën, ke lëk ë Bɛ̈nydït Mothe an,

¹⁰ “lɛ̈kë kɔc ke Yithriɛl an të de yen raan cï guöp rac në weyiic, ku nɔn ee yen mïthkun në luɔi cï yen guöp de raan cï thou jak, ku nɔn yen raan cï keny, ke ŋoot ke loi dhuëëŋ de winythok në akööl cï mäc en.

¹¹ Ë gɔlkï thëën në kööl ye pɛɛi ye pɛɛi rou thok thiëër ku ŋuan. Ë ke cam kuïn cï pam në wɛ̈ɛ̈l kec.

¹² Ku ë cïn këcam tɔ nin abï ruöu, ku ë cïn yuɔɔm dhoŋ kɔ̈u. Ë ke kuany lööŋ ke winythok cök apiɛth kedhie abï ciën tök.

¹³ Ku na de raan jai ke cïï winythok loi ke cïn këdɛn cï ye raac guöp, ku nu ke ken keny, ke cïï be ye kuɛɛn në kɔckï yiic, në luɔi kën en ya gäm miɔ̈c në kööl cï mäc en. Ku abï ariöp de kërɛɛc dhil guum.

¹⁴ Ku na de kamanduön rɛɛr ke week, ku cï tak nɔn looi en dhuëëŋ de winythok, ke takï looi ëgɔk në kueer ye ke ye looi. Lööŋ ke winythok luiyë ke raan kɔɔr bï winythok looi ëbɛ̈n, nɔn yen raan de Yithriɛl ku nɔn yen raan lei.

Luän ë Mac

¹⁵ Paany de mät acïï luät bɛ̈n paat piny, në kööl man ë yïkë yen thïn. Na ɣɔn thëën, ke luät ë riau cït man ë mac abï piny ruu.

¹⁶ Ku ë rɔt bɛ̈n cuuth aya në aköölkë yiic kedhie ke ye luät paat piny aköl, na wakɔ̈u ke riau cït man ë mac.

¹⁷ Të cï luät jäl në paany nɔm, ke kɔc ke Yithriɛl ë ke däk pɛɛnyken ku kuëthkï kuanykï luät cök. Na ëlë, ke ke lɔ piɔ̈ɔ̈t të cïï luät lɔ kɔ̈ɔ̈c thïn.

¹⁸ Ku kɔc ke Yithriɛl ye kuëëth të cïï Bɛ̈nydït ye lɛ̈k keek, ku piɔ̈ɔ̈tkï të cïï Bɛ̈nydït lɛ̈k keek. Të cïï luät cieŋ ke rɛ̈ɛ̈r ë paany nɔm, ke ke rɛɛr ë të töŋë.

¹⁹ Na cak luät cieŋ arëët ke rɛɛr në paany nɔm të töŋë, ye Bɛ̈nydït gam thok ku rëërkï ëtɛ̈ɛ̈n cïkï jäl.

²⁰ Në akööl kɔ̈k, luät aaye rëër në paany nɔm në nïn lik, ku kɔc ye rëër ëtɛ̈ɛ̈n cït man ë ke cïï Bɛ̈nydït lɛ̈k keek, ku kuëthkï cït man ë ke cïï Bɛ̈nydït lɛ̈k keek.

²¹ Në akööl kɔ̈k, luät aaye rëër në wɛ̈ɛ̈r tök ku jël, go kɔc aa niin ku kuëthkï të cïï luät jäl. Të cïï luät rɔt jɔt, ke kɔc ë ke jäl në luät.

²² Të cïï luät nïn aa rou ke rɛ̈ɛ̈r ë paany nɔm ee të töŋë, ku nɔn yen pɛɛi, ku nɔn yen ruöön, ku nɔn wɛ̈ɛ̈r ruöön, ke kɔc ayek rëër ë të töŋë ke ke cïï jël të kën ë luät jäl. Na cï luät jäl ke ke jël ayadäŋ.

²³ Aake ye piɔ̈ɔ̈t ku kuëthkï cït man ë kë cïï Bɛ̈nydït lɛ̈k keek në röl ë Mothe.