Kuɛ̈n 6 - JAM DE NHIALIC 2011

Löŋ de Yuul

¹ Acï Bɛ̈nydït lɛ̈k Mothe an,

² ‘lɛ̈kë kɔc ke Yithriɛl an të cïï raan kuëëŋ në kuëëŋ ë yuul, moc ku nɔn ee yen tik, ku cï gam nɔn bï yen rɔt gäm Bɛ̈nydït,

³ ke päl mɔ̈u, ayï mɔ̈n tuc ee kɔc wit, ku cïï dëk ë pïïu cï tɔ ee mɔ̈u ayï mɔ̈n tuc, ku acïï bï dek në pïïu ke mïth ke enap tiɔp, ayï mïth ke enap cï riɛl.

⁴ Ku në aköölkɛn ke yuuliic kedhie, ë cïï mïth ke enap cam, ayï kɔ̈th ke enap, ayï pände.

⁵ Ku në aköölkɛn ke yuuliic kedhie, ë cïï mut nɔm taitai agut të bï aköölkë kɔn thök, akööl cï yen rɔt gäm Bɛ̈nydït, abï yic dhil ɣɛɛr. Ë pɛ̈l e nɔm nhïm abï nɔm lɔ loplop.

⁶ Ku në akööl cï yen rɔt gäm Bɛ̈nydït, ë cïï lɔ në raan cï thou lɔ̈ɔ̈m.

⁷ Na cakaa wun yen ë thou, ku nɔn yen man, ku nɔn yen mänhë, ku nɔn yen nyankënë, ë cïï lɔ në kelɔ̈m në luɔi cieŋ en nhïm ke yuul cï yen rɔt gäm Nhialic.

⁸ Abï rëër ke ye kë ɣeric de Bɛ̈nydït në aköölkɛn ke yuuliic ëbɛ̈n.

⁹ Ku na cï raan guɔ thou në yelɔ̈ɔ̈m ëthiäu, ku cï ɣɛɛr ë yic dhiöök, ke mut enɔm në kööl ye akööl dhorou ku wɛɛk.

¹⁰ Ku në kööl ye akööl bɛ̈t, ke nöm guök kaarou, ku nɔn yen ajiël ke guuk kaarou, yïn keek bɛ̈ny de kake Nhialic në paany de mät thok.

¹¹ Ku bɛ̈ny de kake Nhialic abï tök gam ke ye miɔ̈c de kërac, ku gɛm däŋë ke ye miɔ̈c ye nyop ëbɛ̈n. Ku jɔ bɛ̈n teem guöp, në luɔi cï yen thiääk kekë guöp de raan cï thou. Ku be rɔt gäm Bɛ̈nydït në ee kööl manë, ku pɛ̈l nhïm ë yenɔm.

¹² Ku be rɔt gäm Bɛ̈nydït, ku ë bïï nyɔɔŋ amääl ee run tök ke ye miɔ̈c de awäc. Ku akööl wään tueŋ cï yen rɔt gam acï ke bï bɛ kueen, në luɔi cï yen nhïm cï gam dhiöök.

¹³ Ku löŋ de yuul kï, të cï ayul akööl ke yuul thöl thook, ke bïïyë në paany de mät thok.

¹⁴ Ku gëm Bɛ̈nydït nyɔɔŋ amääl ë run tök ke cïn guöp të dak, ke ye miɔ̈c ye nyop ëbɛ̈n. Ku gëm Bɛ̈nydït nyɔɔŋ bou ee run tök cïn guöp tëdak, ke ye miɔ̈c de kërac. Ku gɛm nyɔɔŋ amääl ke ye miɔ̈c de mät.

¹⁵ Ku gɛm diöny athiäŋ kekë kuïn cï pam kën mäth, ku kek cï thaal në aɣar lɔ mot cï liääp ke miök, ku bethkawith cïï nyuäŋ cï tɔc në miök, ku miɔ̈c ë rap ku mɔ̈u.

¹⁶ Ku bɛ̈ny de kake Nhialic abï ee kake gäm Bɛ̈nydït kedhie, ayï miɔ̈c de kërac, ku miɔ̈c ye nyop ëbɛ̈n.

¹⁷ Ku abï nyɔɔŋ amääl gam ke ye miɔ̈c de rëër lɔ dïu, ku gɛm diöny de kuïn cï pam nyuäŋ, ku gëm miɔ̈c ë rap, ayï miɔ̈c ye dek.

¹⁸ Ku ayul abï muut nɔm në paany de mät thok ëtɛ̈ɛ̈n, ku tɛ̈ɛ̈u nhïm mɛɛc në many de miɔ̈c de mät.

¹⁹ Ku bɛ̈ny de kake Nhialic abï cön ë nyɔɔŋ amääl nööm të cïï ye thaal, ku nööm kuïn cï pam në diönyic, ku nööm bethkawith, ku tɛ̈ɛ̈u keek në ayul ciin të cï en yenɔm kɔn muut.

²⁰ Ku ëtɛ̈ɛ̈n, abï bɛ̈ny de kake Nhialic keek jɔ nyuɔɔth ë Bɛ̈nydït nɔm ke ye miɔ̈c de anyuɔɔk, në biäk ye kek miɔ̈c ɣeric de bɛ̈ny de kake Nhialic, mɛ̈tkï në thin, ku ɣöi wën cï gam. Ku ëtɛ̈ɛ̈n, ayul aduëër jɔ dek në mɔ̈u.

²¹ Yen löŋ ayul cï kuëëŋ ka. Miɔ̈cdɛn miɔɔc en Bɛ̈nydït abï ya gam cït miɔ̈c de yuul. Ku na cï piɔ̈u dɛ luɔi ŋuɛk en en, ke ŋuɛk cït kë cï tak cït man ë löŋ de yuul.

Athiɛɛi de Bɛ̈ny de kake Nhialic

²² Go Bɛ̈nydït lɛ̈k Mothe an,

²³ lɛ̈kë Aron kekë wɛ̈ɛ̈tke, an të thiɛɛi wek kɔc ke Yithriɛl, ke yak lɛ̈k keek an,

²⁴ Bɛ̈nydït abï yï thieei ku döt yïn,

²⁵ Bɛ̈nydït abï piɔ̈u aa kok ke yïn ku miɔɔc yïn,

²⁶ Bɛ̈nydït abï yï dhuëëŋ guöp, ku tɔ yïn mät.

²⁷ Ku lueel ë Bɛ̈nydït an, “Të cï kek ya cɔɔl rin të thieei kek kɔc ke Yithriɛl, abä keek aa thieei.”