Kuɛ̈n 5 - JAM DE NHIALIC 2011

Kɔc cïï Gup Piɛth

¹ Go Bɛ̈nydït lɛ̈k Mothe an,

² “Yɔ̈ɔ̈kë kɔc ke Yithriɛl ë ke bïï kɔc cïï gup piɛth bei wut, kɔc de gup wɛth kedhie, ayï kɔc ee gup wat, ayï kɔc cï röt raac në jäŋ de guöp cï thou.

³ Bɛ̈ɛ̈ikï ke bei kedhie röör ayï diäär, ku lɛɛrkï keek në wut këc, wunduön cäk piäät, ke ke cïï wun rɛ̈ɛ̈r ɛn thïn bï riɔ̈ɔ̈k, wun rɛ̈ɛ̈r Ɛn thïn në weyiic.

⁴ Go Yithriɛl Bɛ̈nydït gam thok, ku leerkï kɔc biic cït man cïï Bɛ̈nydït ë lɛ̈k Mothe.

Ariöp de Kërac

⁵ Go Bɛ̈nydït lɛ̈k Mothe an,

⁶ “lɛ̈kë kɔc ke Yithriɛl an, të cïï raan awäc luöi raan däŋ ka ye ciën adöt kekë Nhialic, ke gääk atɔ̈u në yeyeth,

⁷ ka abï kërɛɛcde dhiɛl gam, ku tɛ̈ɛ̈u kuën awäc piny ëbɛ̈n, ku ŋuɛk thok në kë ye käŋ dhïc ku gëm keek raan cï wäc awäc.

⁸ Ku na cï raan ë wɛ̈cë awäc thou, ku cïn raandɛn nu raan nöm acuutde, ke acuut ë gëmë Bɛ̈nydït bï ya këde bɛ̈ny de kake Nhialic, mɛ̈tkï në nyɔɔŋ amääl de atɛɛm teemë raan cï wäc guöp.

⁹ Ku miɔ̈c ku kaɣeriic ye kɔc ke Yithriɛl gäm Bɛ̈nydït ëbɛ̈n, ee këde bɛ̈ny de kake Nhialic.

¹⁰ Bɛ̈ny de kake Nhialic yen ee gäm miɔ̈c ɣeric, yen abï miɔ̈c aa nööm.

Gööny ë Tiiŋ cïï Monyde Dhööl

¹¹ Go Bɛ̈nydït lɛ̈k Mothe an,

¹² “lɛ̈kë kɔc ke Yithriɛl an të cïï tiiŋ e raan awäc looi,

¹³ cï köör ka cï rɔt dhiöök, na kën monyde ye cak tïŋ, ku cïn raan cï ye dɔm kekë moc,

¹⁴ ku cï moc piɔ̈u diu kekë kë cïï tik looi, na cï looi ë yic, ku nɔn kën looi,

¹⁵ ke moc abï tik lɛɛr tëde bɛ̈ny de kake Nhialic, ku leer miɔ̈c ë rap kɔɔr rɔt ë biäkde, kilɔ de aɣar ë barli, ku acïï bï yiɛ̈k nɔm miök, ku wal ŋïr aya, na luɔi yen miɔ̈c ë rap de tiɛɛl, ku miɔ̈c ë rap de täk, kɔɔrë luɔi bïï yic tïc.

¹⁶ Ku ëtɛ̈ɛ̈n, bɛ̈ny de kake Nhialic abï tik bɛ̈ɛ̈i tueŋ ku tɔ kääc në yïk lɔ̈ɔ̈m

¹⁷ Ku bɛ̈ny de kake Nhialic abï pïïu ɣeriic jɔ wäl në thakic, ku nööm abuui piny në paany de mätic, ku tɛ̈ɛ̈u ë pïïuwiic.

¹⁸ Ku ëtɛ̈ɛ̈n, abï nhïm ë tik jɔ dɔ̈k, ku tɛ̈ɛ̈u miɔ̈c ë rap në tik cin. Ku jɔ bɛ̈ny de kake Nhialic pïïu kec muk në yeciin, pïïu ke aciɛɛn.

¹⁹ Ku ëtɛ̈ɛ̈n, bɛ̈ny de kake Nhialic abï tik tɔ lueel gutguut an, Na kɛ̈në tɔ̈c wekë mony däŋ ke yï de nɔm moc, ku kɛ̈në rɔt riɔ̈ɔ̈k, ke pïïu kec ke aciɛɛn acïn kë bïk luöi yïn.

²⁰ Të man na cï wäc, ku cï tɔ̈c wekë mony däŋ ke yï de nɔm moc, ku cï rɔt riɔ̈ɔ̈k.

²¹ Ke Bɛ̈nydït abï yï riɔ̈ɔ̈k ku cieen yïn në kɔckuniic, ku acïn kë bï bɛ̈n bei në yïɣöi, ku yïn bï thum,

²² pïïukë abïk yï tɔ thum ka cïn kë bï bɛ̈n bei në yïɣöi. Ku ëtɛ̈ɛ̈n, abï tik puk nɔm an, Amiin, Amiin, yɛn ë gam, tɔ looi ë Bɛ̈nydït cït ee manë.

²³ Ku ëtɛ̈ɛ̈n bɛ̈ny de kake Nhialic abï ë kuëëŋë jɔ gɔ̈ɔ̈r në awerek kɔ̈u ku wɛɛk në pïïu kec ke aciɛɛnic, në thakic.

²⁴ Ku të kën en tik guɔ tɔ dek pïïu kec duëër e gäm arɛɛm dït,

²⁵ ke nöm miɔ̈c ë rap në tik cin, ku yɔɔk nhial gëm Bɛ̈nydït, ku tɛ̈ɛ̈u në yïk nɔm.

²⁶ Ku ëtɛ̈ɛ̈n, abï biäk de miɔ̈c ë rap nööm në yeciin athiäŋ, ku nyop në yïk nɔm ke ye miɔ̈c de këcam. Ku jɔ tik tɔ dek pïïu.

²⁷ Na tik ë cï tɔ̈c ke mony däŋ, abï pïïu en gäm arɛɛm dït, ku tɔ thum, ku acïn kë bï bɛ bɛ̈n bei në yeɣöi ku abï jɔ ee raan cï riääk në kɔckeniic.

²⁸ Ku na kën köör, ka acïn kë bï ye yök ku aduëër mïth dhiëëth.

²⁹ “Yen löŋ de adhɔ̈ɔ̈l ka, të cï tik köör ku riëëk rɔt ke de nɔm moc.

³⁰ Ku nɔn yen moc yen ë tik dhööl baaŋ. Bɛ̈ny de kake Nhialic abï tik bɛ̈n tɔ kääc në Bɛ̈nydït nɔm, ku looi ee löŋë.

³¹ Moc abï guöp ciɛ̈n gääk, ku tik na cï wäc ka abï këtucde guum.