Kuɛ̈n 36 - JAM DE NHIALIC 2011

Läŋ de Tiiŋ cï thiaak

¹ Kɔcdït nu ɣööt nïïm në dhiën ë Giliyad, wën ë Makir ku ye wën ë wënë Manatha, wën de Jothep, acïk lɔ të de Mothe ku lɔ bäny kɔ̈k.

² Ku luelkï an, “Bɛ̈nydït acï jam, yöök yïn bä piny tɛ̈k kɔc ke Yithriɛl në cuɛt de gɛk. Ku acï yï yɔ̈ɔ̈k aya bä ka ke mänhëda Dhelopad lɔ̈ɔ̈k tɔ lɛk ë duɛtke.

³ Ku jɔ yï nɔm tak, na cïk röt tɔ thiɛɛk ë dhiëën kɔ̈k ke pinyden abï lɔ kekë dhiëënkë ku biäk de pinyda ëbɛ̈n abï döŋ ke koor.

⁴ Ku na lɔ ruöönë dhuëëŋ de kɔc ke Yithriɛl ye këriëëc rɔt dak tëde bɛ̈n, ke pinydɛn cïk lak abï mät jur cï ke piac thiaak, ku yen e määr ë pinyde kuarkuɔn ke jurda ka.

⁵ Go Mothe kɔc ke Yithriɛl lɛ̈k lööŋ cïï Bɛ̈nydït ke lueelë an, “Ke cïï dhiën de Manatha lueelë ee yic,

⁶ ku ëtɛ̈ɛ̈n, go Bɛ̈nydït lueel an, duet ke Dhelopad acï ke päl nɔm lääu bïk röt tɔ thiak në kɔckɛn cïk nhiaar në baai ë dhiëndenic.

⁷ Piiny ke kɔc ke Yithriɛl abïk aa tɔ̈u ke ke duööt në juöör ken.

⁸ Tiiŋ de Yithriɛl cï piny de dhiënde lak, abï rɔt dhil tɔ thiɛɛk ë raan de baai ë dhiënden. Ku në ee kueerë kɔc ke Yithriɛl abïk piiny ke kuarken aa lak,

⁹ ku yen acï piny bï aa jäl të de dhiënë le të de dhiënë. Dhiëën ke kɔc ke Yithriɛl abïk pinyden aa döt ananden.

^10-11 Ka acï yï Mala, Tirdha, Ɣogla, Milka, ku Nowa ee kek duet ke Dhelopad looi, cït man cï Bɛ̈nydït e lɛ̈k Mothe, gokï röt thiaak në wɛ̈ɛ̈t ke wälɛ̈ɛ̈nken.

¹² Aake thiak në baai ë dhiën de Manatha yic në wën de Jothep, ke piny ë bï ŋoot ke ye piny de kuɛɛrëden në dhiëndenic.

¹³ Kakë ayek lööŋ cïï Bɛ̈nydït gäm kɔc ke Yithriɛl bï kek ke röt mac në kueer de Mothe, në riaaŋ de Mowapic, në wɛ̈ɛ̈r de Jordan lɔŋ tiëëm nɔm ke Jeriko.