Kuɛ̈n 35 - JAM DE NHIALIC 2011

Wuöt cï gäm kɔc ke Lebai

¹ Në riaaŋ de Mowapic lɔŋ de wɛ̈ɛ̈r de Jordan tiëëm nɔm ke Jeriko, acïï Bɛ̈nydït lɛ̈k Mothe an,

² “lɛ̈kë kɔc ke Yithriɛl, në piinykɛn cï tɛ̈k keek, abïk kɔc ke Lebai dhil gäm pɛ̈ɛ̈nydït bïï kek rëër thïn, ku lɔ piiny kɔ̈k thiääk në pɛ̈ɛ̈nydïtken kɔ̈ɔ̈th ke bï aa tëde nyuäth.

³ Ee pɛ̈ɛ̈nydïtkë abïk aa të bïï Lebai rëër thïn, ku tɔ̈ɔ̈r lääu bïï ɣɔ̈kken aa nyuäth thïn ku läikɛn kɔ̈k.

⁴ Ku ɣään ke nyuäth lääu abï ke dhil aa tɔ mec në kal ë pänydït në kaam lëu bot kaŋuan ku thiërdhïc 450 de mitïïr në tuŋ thook ëbɛ̈n.

⁵ Ago dɛk riaaŋ thiin nu ë pɛ̈ɛ̈nydït këc biic ye thëmde aa bot kadhoŋuan 900 de mitïïr në tuŋ thook ëbɛ̈n biäk lɔ aköl amiäk, ku biäk lɔ wöuwic, ku biäk lɔ aköl athɛ̈i, ku biäk të lɔ rut.

⁶ Wek bï kɔc ke Lebai dhil gäm pɛ̈ɛ̈nydït ke thiaan kadhetem, bï raan rɔt aa kual thïn të cïï yen raan nɔ̈k ëthiäu ke wɛ̈ɛ̈th. Ku pɛ̈ɛ̈nydït kɔ̈k kathiërŋuan ku rou bäk mat në ee pɛ̈ɛ̈nydïtken nyïïn,

⁷ ku lɔ ɣään kɛn ke nyuäth, na jɔ matic ëbɛ̈n, ke abïk aa kë cït pɛ̈ɛ̈nydït kathiërŋuan ku bɛ̈t.

⁸ Ku në biäk de pɛ̈ɛ̈nydït bä gäm kɔc ke Yithriɛlic, dhiëën dït abïk piny dït aa nööm, ku dhiën kor abïk piny koor aa nööm.

Pɛ̈ɛ̈nydït ke thiaan

⁹ Go Nhialic lɛ̈k Mothe an,

¹⁰ “lɛ̈kë kɔc ke Yithriɛl të le wek wɛ̈ɛ̈r de Jordan teem ke lɔ piny de Kanaan,

¹¹ wek bï pɛ̈ɛ̈nydït ke thiaan lɔc bï raan rɔt aa kual thïn të cï yen raan nɔ̈k ëthiäu ke wɛ̈ɛ̈th

¹² Ku pɛ̈ɛ̈nydït abïk raan aa kony në kɔc kɔɔr bïk raandɛn cï thou guöör. Ke cïï bïï nɔ̈k ke kën kɔn lɔ në gööny në akutnɔm nɔm.

¹³ Ku lɔckï pɛ̈ɛ̈nydït ke thiaan kadhetem.

¹⁴ Pɛ̈ɛ̈nydït kadiäk në wɛ̈ɛ̈r de Jordan lɔŋ de aköl amiäk, ku pɛ̈ɛ̈nydït kadiäk piny de Kanaan, bïk aa pɛ̈ɛ̈nydït ke thiaan.

¹⁵ Pɛ̈ɛ̈nydïtkë kadhetem abï kɔc ke Yithriɛl aa lɔ thiaan thïn, ku alɛi ku kɔc rɛ̈ɛ̈r në ke yiic, ku raan cï raan nɔ̈k ëthiäu ke wɛ̈ɛ̈t.

^16-18 Ku na näk raan në kë moth thok, ee wëëth ku nɔn ee tim, ke yen aduëër guöp dɛk awäny cï yen raan luc, ke yen abï nɔ̈k.

¹⁹ Raan cïï ke raande nɔ̈k, acï gäm nɔm lääu bïï raan ë näk raande nɔ̈k, të cï yen ë yök ke nɛ̈k.

²⁰ Ku na cï raan raan yup ku nɛ̈k në luɔi ë jiëp yen e piny, ku nɔn ë biök në këdäŋ,

²¹ ku nɔn ŋoi ye cin ku gut, ka bï guöp dɛk awäny cï yen raan luc, ke yen abï nɔ̈k.

²² “Ku na cï raan raan cïn kë tɔ̈u në kaamden nɔ̈k ëthiäu, në jiëp jiëp en en piny ku nɔn biök në këdäŋ.

²³ Ku nɔn ë cuɛt dööt ke kën raan tïŋ ku nɛ̈k, ku aa cïï loi ke ŋic, ku aa cie raan de kek nïïm ater.

²⁴ Ke akutnɔm abï lööŋkë dhil kuany cök të tïŋ kek gööny ë kaam de raan ë näk raan ku kɔc kɔɔr bïk raanden guöör,

²⁵ ku akutnɔm abï raan cï raan nɔ̈k kony në kɔc kɔɔr bïk raanden guöör, na lë ke akutnɔm abï raan jɔ tuɔɔc ë wuöt ke thiaan yiic, ku abï jɔ rëër ëtɛ̈ɛ̈n agut cï thon de bɛ̈nydïït ë kake Nhialic cï tɔc në miök ɣeric,

²⁶ ku na le jäl në wuöt ke thiaaniic, të wään cï yen kɔn lɔ thiaan thïn,

²⁷ ku le yök ke raan cï yen raanden nɔ̈k, ku nɛ̈k, kënë ee guur acie luc.

²⁸ Raan cï raan nɔ̈k abï dhil rëër në wuöt ke thiaaniic, agut cï thon de bɛ̈nydïït ë kake Nhialic, ku ëtɛ̈ɛ̈n aduëër rɔt jɔ pɔ̈k wunden.

²⁹ Lööŋkë abïk aa kakun ku kake kuatdun ë rɛmken yiic ëbɛ̈n, ku wuötkuniic ëbɛ̈n.

³⁰ Raan, cï raan nɔ̈k ëbɛ̈n, ke näk të de yen cäätɔɔ kaarou ku nɔn ee ka juëc, cäätɔ tök acïï ke raan ee kuöm nääk.

³¹ Raan cï luc abï dhil nɔ̈k. Acïï duëër ban në luɔi bï yen apuk tääu piny.

³² Na cï raan kat ke lɔ wun ë thiaan, ke duökï tɔ tɛ̈ɛ̈u käŋ piny wɛɛr e yeth në luɔi bï yen rɔt pɔ̈k baaide, të kën ë bɛ̈nydïït ë kake Nhialic thou.

³³ Na lak ee kënë looi, ke wek bï piny ciɛŋkï dhiöök. Raan ee kɔc luc ee piny dhiöök, të cïn thon ë raan ë raan luc, ke piny acïn luɔi bï ye luöi miɔ̈c de wɛ̈k ke de raan cï kɔn luc thïn.

³⁴ Duökï piny rɛ̈ɛ̈r wek thïn dhiök në biäk Yan Bɛ̈nydït, ku Yɛn ee rëër në kɔc ke Yithriɛliic.