Kuɛ̈n 34 - JAM DE NHIALIC 2011

Akɛɛth ke ee pinyë

¹ Go Bɛ̈nydït Mothe gäm,

² ë wël bɔ̈ yë bïï ke lɛ̈k, kɔc ke Yithriɛl an, “Wek lɔ Kanaan, piny gäm week, akɛɛth ke pinydun abïk tɔ̈u alë.

³ Akendun tɔ̈u në biäk të lɔ wöuwicë abïï ɣet ciëën të lɔ jɔ̈ɔ̈r de Dhin, në aken de Edom nɔm. Ku abï rɔt gɔl në biäk lɔ aköl amiäk ciëën të lɔ wöuwic në Wɛ̈ɛ̈r de Amilɔ thar.

⁴ Ëtɛ̈ɛ̈n abï ŋoot ke lɔ wöuwic të lɔ Akrabim jɔ tëëk ke cuuth le jɔ̈ɔ̈r de Dhin ɣeet wöuwic ya cït Kadec Barniya. Ku cök të lɔ rut ke thɛ̈ny aköl athɛ̈i të lɔ Ɣadhar Addar, ku ŋoot ke lɔ të cɔl Adhemon.

⁵ Të bï yen rɔt lɔ yal në wak nu ë aken de Rip nɔm, ku jɔ lɔ guut në Wɛ̈ɛ̈rdïït ɣer kɔ̈u.

⁶ Ku akenduön nu të lɔ aköl athɛ̈i abï aa Wɛ̈ɛ̈rdïït ɣer.

⁷ Akenduön tɔ̈u në biäk të lɔ rut, abï tëëk në Wɛ̈ɛ̈rdïït ɣer yɔu lee në kuur de Ɣor.

⁸ Ku ëtɛ̈ɛ̈n abï jɔ ɣet ë kueer de Ɣamath. Ku jɔ cuuth ke lɔ Dhedad,

⁹ Ku le Dhipiron, ku jɔ lɔ guut në Ɣadhar Enan.

¹⁰ Aken tɔ̈u në biäk të lɔ bɛ̈n akɔ̈l thok, abï tëëk në Ɣadhar Enan yɔu lee Cepam.

¹¹ Ëtɛ̈ɛ̈n abï rɔt cɔ̈k në biäk të lɔ wöuwic gut të lɔ Ɣarbel, në biäk të lɔ aköl amiäk de Ayin. Ku ŋoot ke cök të lɔ aköl amiäk në kuriic në Baar ë Galili yɔu

¹² ku ëtɛ̈ɛ̈n cök wöuwic ke kuany wɛ̈ɛ̈r de Jordan kɔ̈u ke lɔ Wɛ̈ɛ̈r de Amilɔ. “Kakë kek aye akɛɛth kaŋuan ke pinydun.

¹³ Go Mothe lɛ̈k kɔc ke Yithriɛl an, “Yen piny bäk nööm kï në deeny de gɛk, yen piny cïï Bɛ̈nydït gäm dhiëën kadhoŋuan ku dhiën biäk.

¹⁴ Dhiën de Ruben ku Gad, ku biäk de dhiën de Manatha të lɔ aköl amiäk, acïk piinyken nööm, ku tekkï keek athöŋ ë ɣöötken thook.

¹⁵ Ku dhiëën kaarou ku dhiën biäk acïk pinyden nööm të lɔ aköl amiäk de wɛ̈ɛ̈r de Jordan, tuööm nɔm kekë Jeriko.

Bɛ̈ny nu riɛl de piny në ke cin

¹⁶ Go Bɛ̈nydït lɛ̈k Mothe

¹⁷ an, “Eleyadhar bɛ̈ny de ka ke Nhialic ku Jocua wën ë Nun abïk piny tɛ̈k kɔc.

¹⁸ Bä bɛ̈ny tök aa nööm në dhiën thook kedhie bïk keek kuɔny në tëŋ de piny.

^19-28 Kakë ayek rin ke kɔc cï Bɛ̈nydït lɔc bïk aa bäny: Dhiën Bɛ̈ny Juda Kalep wën ë Jepuna Thimion Celumiel wën ë Amiɣud Benjamin Elidad wën ë Kithlon Dan Buki wën ë Jogli Manatha Ɣaniel wën ë Epod Eparaim Kemiɛl wën ë Cipatan Dhebulun Elidhapan wën ë Parnak Yithakar Paltiɛl wën ë Adhan Acer Aɣiɣud wën ë Celomi Naptali Pedaɣel wën ë Amiɣud

Dhiën Bɛ̈ny

²⁹ Kakë ayek kɔc cïï Bɛ̈nydït ke gäm luɔi bïk käŋ tɛ̈k kɔc ke Yithriɛl piny de Kanaan.